JOHAN 11

Lazara dei nai

1Naibaly khumi leaungrei Lazara napi nai ly no bo; mymy ly Mari hawi ni i amjo Martha i awm nai avang Bethani khumi ne.#Lk 10.38–39

2Huni ly Areng ai rimui thi iy mymy i sam hawi Isu i kheu tamui pi nai Mari ne. No nai khumi Lazara ly mymy i ampro ne.#Jh 12.3 3Naibaly mymy i thuicho nini my Isu teng y, “Areng khen cham, nang i tamen nai ly no bo,” nanai leu taviu. 4Isu my huna nai thai i, “Tameuh i Chapo ly hini deuangkho y palo naira nga thai ai nai, hini no nai ly dei hai ai nai ny y leang, Tameuh ai palo ai nai no nai teu,” napi.

5Naibaly Isu my Martha ai hawi ni i amnau ai hawi, Lazara ai py tamen. 6Hunaibaly ni ly no nanai pany baly mymy i awm naira y kani nyhrei awm a sai. 7Naibaly huni bo y mymy ly abangnaichi teng y, “Judai pri y chei bi sina,” napi. 8Abangnaichi ly mymy teng y, “Rabbi, jangvai my Judachi ly nang ai lengseaung y aphi ai nai tau be; huna i py hu y ly chei bi ai rai a?” napi. 9Naibaly Isu my, “Kanirei y nari holai nyhrei by y a? Ami py kanithun y pavai baly, hini khaileaung pri i kangvang ang niu nai deaungkho y atlym vai y. 10Na i py ami py vum y pavai baly kangvang ly mymy teng y by y nai deaungkho y atlym reng,” nanai pathang. 11Mymy ly huna nai kamta leu thui. Hunai bo y mymy ly nichi teng y, “Achi i ahawi Lazara ly i bo, palaw ai nai kai chei ai,” napi. 12Hunaibaly abangnaichi ly mymy teng y, “Areng, i baly hawi teang na chy,” napi. 13Isu ly ni i dei nai satang thui pi nai ne: na i py nichi ly anawn khala y i nai thui pi nai mi, nanai palawm. 14Hunaibaly Isu my hawihai chai pyn naimy nichi teng y, “Lazara ly dei bo. 15Naibaly nangchi ym thai ai nai kai ly hu y by y nai deaungkho y kang kawn hai; ne mang ly mymy teng y chei u sina,” napi. 16Naibaly Thoma, Diduma napi nai my ly abangnai ahawichi teng y, “Mymy hawi dei ai nai chei teang sina,” napi.

Angthau bi nai hawi heng nai Isu

17Hunaibaly Isu tym Khala y ni ly angawm y kani palyhrei awm bo, nanai pany bo. 18Bethani avang ly Jerusalem avang ahawi y ne, hlau holai pangrei mo palo. 19Hunaibaly mymy i ampro dei nai deaungkho y nini ai awm hai nem ai nai, Judachi neangneang ly Mari nini Martha teng y tym bo. 20Naibaly Martha my ly Isu ang jeu ai bo, nanai pany baly ni ai lamchung; na i py Mari ly yhm y ateh jo. 21Naibaly Martha my ly Isu teng y, “Areng, nang hi y awm i khyly kai i ampro dei ai ny y. 22Vai py nang Tameuh teng y atiti hnei nai ngierei ly Tameuh my ang pei ai, nanai kai pany,” napi. 23Isu my ni teng y, “Ngampro ly angthau teang ai,” napi. 24Martha my ly ni teng y, “Kani kangkhym y angthau teang nai neng khala y ly angthau teang ai, nanai kai pany,” napi. 25Isu my ni teng y, “Kai ly angthau teang naira hawi hengra py ne; ami py kai ai ym nai ly dei i py heng ai; 26heng nai ngierei kai ai ym nai ly deungtasarei dei ai ny y; huni ly nang ym a?” napi. 27Ni my ly mymy teng y, “Ym chy Areng: Krista, Tameuh i chapo, khaileaung pri y jeu ai nai ly nang ne, nanai kai ym,” napi.

Isu mei katui tla nai

28Naibaly huni leu thui nai bo y mymy ly chei praw i, ni i amnau Mari ai ly kangviu y heang i, “Areng ly tym bo, ang palau na a,” napi. 29Naibaly mymy ly huni satang thai baly angthau praw iy mymy teng y chei. 30Isu ly avang y kun y rai, Martha my lamchung nai meingtym y awm jo rai. 31Naibaly yhm angtheung i mymy ai awm hai nem nai Judachi my ly Mari angthau praw iy theu nai niu baly, angawm y vo ai nai chei nai palawn i abang praw ryp. 32Naibaly Mari my Isu i awm nai meingtym y tym iy niu baly, mymy i kheu keung y ambeu i mymy teng y, “Areng, nang hi y awm i khyly kai i ampro dei ai ny y,” napi. 33Naibaly Isu my Mari i vo nai hawi ni teng y abang nai Judachi i vo nai ly niu khala y paleung theung y tangam iy paleung si i, 34“mymy ai ly ma y khai mo?” napi. Mychi my ly ni teng y, “Areng, jeu ly, khen cham,” napi. 35Isu ly vo bo. Naibaly Judachi my ly, 36“Khen cham, Lazara ai ly mana tanrei ang tamen mo?” napi. 37Na i py phyreichi ly, “Hini khumi mei kamju i mei angvang hai nai keung my ly hini khumi ai py dei hai y ai nai pajeu y a?” napi.

Lazara ai paheng ali teang nai

38Naibaly Isu ly paleung theung y tangam bi i angawm y tym. Huni angawm ly tapiu ne, kho nai lengseaung harei awm. 39Isu my, “Hini lengseaung ly kasyh u,” napi. Kadei i tuicho Martha my ly, “Areng, vai ly mui ai bo, dei nai kani palyhrei awm bo,” napi. 40Isu my ni teng y, “Nang ym baly Tameuh i nang parai nai sai niu ai, nanai kang tapi y a?” napi. 41Hunaibaly lengseaung ly kasyh u, Naibaly Isu ly deangtheang i, “Ngaai, kai i leu nang tangai pi nai deaungkho y kai kawn parai ba. 42Kai i leu nang tangai pi jojo, nanai kai pany; na i py nang my kai ai pato, nanai nichi pany thai ai nai ahawi y angdo nai khumi mipuichi deeaungkho y kathui nai teu,” napi. 43Naibaly huni ka-tawn katheu nai bo y ni ly athorei my, “Lazara, theu jau,” napi nai aeu. 44Naibaly kadei ly kiu kheuchi angawm kanih y bam naimy theu i, meimai py atamui nai kanih y bam nai ne. Isu my nichi teng y, “Su ly, patleaung u,” napi.

Isu ai padei ai tau nai

(Mt 26.1–5; Mk 14.1–2; Lk 22.1–2)

45Hunaibaly Mari teng y chei nai Judachi theung i neng neangchi ly Isu i sa nai niu nai deaungkho y mymy ai ym u bo. 46Na i py phyreichi ly Pharisaichi teng y chei u i, nichi teng y Isu i atiti sa nai ly thui pi.

47Hunaibaly pathyp pi nai keung kalenchi hawi Pharisaichi ly tara chih nai keungchi ai palau achu i, “Achi mana sa ai mo? 48Hini khumi ly atiti rengrang neangneang sa. Hinai kamta achi my khai jo baly khumi bawibawichi ly mymy ai ym ai, naibaly Romchi ang jeu ai i achi i meingtym hawi achi i cheng ang la pi pawn ai,” napi. 49Naibaly nichi theung y khumi leaungrei Kaiapha ly huni saneng ly pathyp pi nai keung kalen kehra y awm i nichi teng y, “Nangchi ly ati sai py pany y. 50Cheng jyn phra y ai nai khumi leaungrei khumichi i vui dei pi ai nai tla, nanai py nangchi dawn y,” napi. 51Huni leu ly mymy paseang ryry nai thui nai ny y leang; huni saneng ly ni ly pathyp pi nai keung kalen kehra y awm i, nichi i cheng jyn y Isu dei ai nai thui rym nai teu; hunichi i cheng jyn harei khyh py ny y leang. 52Tameuh i chanau khaileaung pri y ahei nai bawibawichi ai ly kamkawm harei y pahawi achu ai nai py ne. 53Hunaibaly huni kani dengdairei ni ai padei ai nai arum u bo.

54Hunai deaungkho y Isu ly Judachi theung y ka-niura y pavai ali y i, hu i dengdairei daichi ka-vym ahawi i meingtym avang harei, Ephraim na naira y chei veng iy, abangnaichi hawi hu y awm neaung.

55Naibaly Judachi i Katlen Vui nai pawi ly kasa bo; khumi neangneangchi ly apachai ai nai Katlen Vui nai pawi ny y rai kha y daichi dengdairei Jerusalem avang y chei kalau yb bo. 56Nichi ly Isu ai hau iy achura yhm kalen pui y angdo nai tarawi y arum u i, “Mana dawn mo? Pawira y jeu y ai a?” na u. 57Naibaly pathyp pi nai keung kalenchi hawi Pharisaichi ly mymy ai patiu thai ai nai, ami py ni i awm naira pany baly thui pi ai nai tla, nanai leu pei bo.

Currently Selected:

JOHAN 11: KCL02

Highlight

Copy