JOHAN 10

Beram typ nai keung y pata nai

1“Meitang khypkhyp kang thui pi, ami py beram hai y katheu pa-kho mang kun y naimy, takhra mang lyn iy kun nai ly mymy kypkyp ly kangviu khumi hawi damra teu. 2Na i py katheu pa-kho mang kun nai khumi ly beram typ nai keung ne. 3Katheu pa-kho typ nai keung ly ni ai paeaung pi i, beramchi ly ni i raawi thai, naibaly ni ly mymy i beramchi ai amyn palau iy angam mang y pahawi. 4Mymy i bawibawi ang patheu pajau baly mo mang y pahawi i, beramchi ly ni i raawi pany nai deaungkho y ni teng y abang u. 5Nichi ly khumi takhrachi i raawi pany y nai deaungkho y khumi takhra teng y ly abang y ai i, angpreng pawn veng ai,” napi. 6Isu my ly huni pata nai leu ly nichi teng y thui pi, na i py mymy i nichi teng y thui pi nai ly ati mo, nanai pany u thai y.

Beram typ nai keung kahawi ly Isu

7Hunaibaly Isu my nichi teng y thui bi i, “Meitang khypkhyp kang thui pi, kai ly beram katheu pa-kho ne. 8Kai i mo y jeu naichi bawibawi ly kangviuchi hawi damrachi sasa; na i py beramchi my ly nichi i leu tangai y. 9Kai ly katheu pa-kho ne: ami py kai i saho y kun baly lawi hai ai, naibaly ni ly kun py kun, theu py theu ai i teicha tlai ai naira nga ai. 10Paviu nai khumi ly paviu ai nai hawi, padei ai nai hawi, taphra ai nai ny y baly jeu y leang; kai naini nichi hengra nga thai ai nai, nga tleaung nga ra thai ai nai kang jeu bo. 11Kai ly beram typ nai keung kahawi ne; beram typ nai keung kahawi ly beramchi i vui mymy i hengra patlaw pi. 12Tham nai khumi, beram typ nai keung tatang ny y nai ly beramchi mymy i ny y nai deaungkho y, kasui jeu nai khala beramchi ai khai su iy angpreng veng; naibaly kasui ly beramchi ai kei iy ahei hai. 13Mymy ly tham nai khumi ne nai deaungkho y beramchi ai dawn hai y i angpreng veng. 14Kai ly beram typ nai keung kahawi ne. 15Ampo my kai ai pany nai kamta hawi, kai ly Ampo ai pany nai kamta py, kaimy i ly kaimy pany, kaimy i py kai ai pany teang; naibaly beramchi i vui ly kaimy i hengra kapatlaw pi.#Mt 11.27; Lk 10.22 16Naibaly hini hai theung i ny y naimy, kai i beram takhrachi py awm rai; nichi ai py kaimy pahawi ai nai tla, kai i raawi py nichi thai u ai; hunaibaly kamkawm harei hawi typ nai keung leaungrei py awm ai. 17Kaimy i hengra la bi thai ai nai kapatlaw pi nai deaungkho y Ngaai my kai ai tamen. 18Ami py kai teng i nai lo pi y leang, kaimy ngaingai patlaw pi nai teu, Kai ly patlaw py patlaw pi thai, la py la bi thai. Hini leu pei nai ly Ngaai teng i nai kanga bo,” napi.

19Huni leu deaungkho y Judachi ly amprei u iy amkawm u takhra bo. 20Nawi kyh naichi my ly, “Vawinam my nam nai pathu na a hi ly; ati mana nai ni i leu tangai mo?” napi. 21Kalangchi ly, “Hini ly vawinam my nam nai i leu thui nai ny y leang. Vawinam ly mei kamju ai angvang hai thai ai a?” napi.

Juda chengchi my Isu ai nagi y nai

22Naibaly Jerusalem avang y Khai Takhra nai pawi awm: huni ly kaseih kha y. 23Naibaly Isu ly achura yhm kalen pui Solomon i charai y aleaung i, Judachi ly ni i ahawi y jeu u iy ni teng y, 24“Nang ly kaichi ai paleung bi hai ai nai mana tanrei kra ai rai mo? Nang ly Krista ne nabaly hawihai chai pyn naimy thui pi jau bei,” napi. 25Naibaly Isu my nichi teng y, “Kang thui pi bo ly, nangchi ym y be; Ngaai i amyn y hini kai i atiti sa naichi ly kai i satang pany hai nai na a. 26Na i py nangchi ly kai i beram theung i ny y nai deaungkho y ym u y ly. 27Kai i beramchi ly kai i raawi thai, kai py nichi ai kapany, nichi py kai teng y abang u i, 28kai ly nichi teng y deungtasarei hengra kapei; nichi ly deungtasa ryrei tamo y ai; ami py kai i kiu i nai ang lawm pi y leang. 29Nichi ai kai teng y au nai keung Ngaai ly bawibawichi tleaung y len keh nai ne: ami py Ngaai i kiu i nai ang lawm pi thai y leang. 30Kai hawi Ngaai hawi ly bomrei ne,” nanai pathang.

31Naibaly Judachi ly ni ai aphi ai nai lengseaung akhui u bi. 32Naibaly Isu my nichi teng y, “Ampo teng i nai atiti kahawi sa naichi neangneang ly kang patei bo; huni atiti sa naichi theung y mani nai y mo kai ai lengseaung y aphi ai tau u nai ly?” nanai pathang. 33Judachi my ni teng y, “Atiti sa nai kahawi deaungkho y nang ai lengseaung y aphi y leang; Tameuh ai thui tamawn naira y hawi, nang ly khumi na iy Tameuh amlawn nai deaungkho y teu,” nanai pathang.#Lev 24.16 34Isu my nichi teng y, “Nangchi i Reita y, ‘Nangchi ly tameuhchi na a kang napi,’ nanai tajiu nai ny y a? 35Tameuh i leu nga naichi ai malawn py tameuhchi napi baly (naibaly Tameuh i cha-iu leu sai ai taphra thai y leang) 36‘Kai ly Tameuh i Chapo ne,’ kang napi nai deaungkho y, Ampo i khaileaung pri y pato nai hawi khai takhra nai keung teng y, ‘Nang ly Tameuh ai thui tamawn,’ na u lawh a? 37Kai ly Ngaai i kalop sa nai ny y baly kai ai ym u moh. 38Na i py kai ly sa nai ne baly, Ngaai ly kai teng y awm nanai hawi, kai ly Ngaai teng y awm, nanai py nangchi tangai iy pany thai ai nai, kai ai ym u y i py kai i atiti sa nai ly ym u,” nanai pathang. 39Hunaibaly nichi ly mymy ai patiu ai nai hau bi, na i py mymy ly nichi i kiu i nai tleaung veng.

40Naibaly mymy ly Johan i angchei khala i baptis sa naira Jordan vai mang y chei veng i, hu y awm jo. 41Naibaly khumi neangneangchi ly ni teng y chei i, “Johan ly atiti rengrang mang ly sai py so y leang; na i py hini khumi i satang Johan i thui nai ngierei ly teng parai he,” napi. 42Naibaly hu y ly khumi neangneangchi ly mymy ai ym u bo.

Currently Selected:

JOHAN 10: KCL02

Highlight

Copy