AMTAW 28

Melita tlawn y tym nai

1Naibaly kaichi ly chymme naimy lawi nai bo y tlawn amyn ly Meliti ne, nanai pany bo. 2Naibaly cheng takhrachi my pahen ala nai pahen y alam na, kani nai nai y hawi padeng nai deaungkho y mai sa i, kaichi bawibawi ai ang kawn. 3Naibaly Pawla ly theng angeangrei acheaung iy, mai y teih i, bi nai deaungkho y pavui theu nai mymy i kiu y patiu i, atang cheng jo. 4Naibaly cheng takhrachi my ly mymy i kiu y pavui atang kalangkang jo nai niu i, “Hini khumi ly kasi nga nai khumi ngaw ngaw khyh, pangli i dengdairei chymme naimy lawi i py, vawitheung tha ai nai Keung my mymy ai heng ai nai pei y nai bo hi ly,” na u leungtang. 5Na i py ni my ly pavui ai mai y katheng pawp i, ati sai py no y. 6Naibaly nichi my ly bau na mo, nanai athang khai; naibaly kra parai pa-rei ajeng jo i, pipi no y leang, nanai pany baly, nichi i paleung ly mymy mang y dawn ali teang i, “Mani tameuh mo na a hi ly,” na u lawh.

7Naibaly huni meingtym ahawi y huni tlawn i areng keh, amyn Publia i meingtym awm; huni khumi ly kaichi ai ang kawn i ni kani thomrei kawn parai naimy anga hai. 8Naibaly Publia i ampo ly keaung no nai hawi jeuchi man nai jawn jo; naibaly Pawla ly mymy teng y kun i chiu sa, naibaly mymy i tlang tleaung y kiu tamam i ni ai hawi sa pi bo. 9Huna nai sa pajau iy huni tlawn i khumi takhra no awm nai ngiereichi ly jeu u i, nichi ai py hawi sa pi bawibawi bo; 10hunichi my ly kaichi ai khrikhri pa-rei tahm khai i palo na; naibaly kaichi chei ai bo nabaly kaichi i aly ngai nai ngierei paleaung y khai pi chup chup.

Pawla Rom y tym nai

11Naibaly lo thomrei nai khala y Amjo Amnau Kangphi ka-ma-ra awm nai Aleksandria avang i paleaung ly kaseih y tlawn y awm nai bo, kaichi huni paleaung mang chei bo. 12Naibaly kaichi Surakusa avang y tym i hu y kani thomrei awm. 13Hu i dengdairei chei akawi vui i, Rikion avang y tym; naibaly kanirei nai kha y tokalawi ali aho i, khawn pa-nyh y ly Puteoli avang y tym bi; 14hu y ly amjo amnauchi hawi avum i mymychi teng y kani saryhrei awm ai nai ang parawi; hunai kamta kaichi Rom avang mang y tym bo. 15Naibaly amjo amnauchi ly kaichi i satang thai bo nabaly hu i dengdairei Apia Seng hawi, Charai Thomreira lamchung ai nai ang jeu; naibaly Pawla hunichi ai niu baly Tameuh teng y kawn nai leu thui i, paleung ham naira nga bo.

16Naibaly kaichi ly Rom avang y kun baly tavaimi chungvairei lu ly theaung tla naichi ai samrang ai typ nai tavaimichi i lu teng y au; na i py Pawla ai ly mymy ai typ nai keung tavaimi leaungrei hawi mymy tlairei awm ai nai pei bo.

17Naibaly kani thomrei nai khala y Pawla ly Juda miteaung keh ngiereichi ai palau achu; naibaly achu i mymy ly nichi teng y, “Amjo amnauchi awi, khumi bawibawi hawi achi i amsi sangumchi i reitara y kai ati sai py so y i py, 18Jerusalem dengdairei Romchi i kiu y kai ai patiu hai; naibaly nichi my ly kai ai deng pajau iy, dei ai ataing nai kai i tlang tleaung y ati sai py by y nai deaungkho y ang palawi ai nai tau. 19Na i py huni ly Judachi my ei nai deaungkho y kai ly Kaisara teng y tym y ai nai awm pajau y; na i py kai i chengchi ai sai py seu ai nai ny y leang.#Ataw 25.11 20Hunira y mo aniu ai nai hawi arum ai nai kang palau nai teu; Israelachi i athang khai naira y kai hini sengkry kapachu nai teu,” napi.

21Naibaly nichi my ly ni teng y, “Nang i satang Judai pri i dengdairei cha py ngo y, amjo amnauchi ami py hi y ang jeu iy, nang i tlang tleaung y leu hawi y nai ati sai py tapheaung vai y, thui py thui vai y. 22Na i py hini kamkawm ai ly meingtym tleirei my cheh lawh veng, nanai kaichi pany i, nang ly mana dawn mo, nanai kaichi pany ai nai ngai he,” napi.

23Naibaly nichi ly mymy ai kani adeu i, mymy i anga nai yhm y mymy teng y khumi neangneang jeu u, naibaly mymy ly khawn mang i dengdairei dym mang y khrairei huni leu ly thui pi pachai i, Tameuh i peang nai satang pany hai; Mosi i Reita cha-iu leu hawi amochi i cha-iu leu y py Isu mang y mymychi ai parawi ryry. 24Naibaly phyreichi ly mymy i leu thui nai ly ym i, phyreichi ly ym y leang. 25Naibaly mymychi tengtawi adyh y i, Pawla my leu sairei thui nai bo y theu u pawn bo; “Phailo Kachai ly amo Isaia i labeaung y nangchi i amsi sangumchi teng y thui nai ly teng parai:

26‘Hini chengchi teng y chei iy thui pi;#Is 6.9–10

Kano y ly thai ai i, dawn naira y ly pipi pany thai

ai ny y;

Niu mang ly niu ai i, pany naira y ly pipi pany thai

ai ny y;

27hini chengchi i paleung ly kyh chawn veng bo i,

Nichi i kano py pang panang veng i,

Mychi i mei py pasym teang;

Ti y baly nichi i mei my niu lawh iy,

Nichi i kano my thai lawh ai i,

Nichi i paleung my pany thai lawh ai.

Naibaly nichi ly ali teang lawh iy

Kai ly nichi ai hawi so pi vui lawh na,’

nanai napi nai ly.

28Hunaibaly Tameuh i paheng nai leu ly Cheng Takhrachi teng y taviu bo, nanai pany u, nichi ly tangai py tangai ai,” napi. 29[Naibaly mymy ly hina nai leu katheu pajau iy, Judachi ly chei i mymychi tengtawi khri pa-rei aei na.]

30Naibaly mymy ly saneng nyhrei mymy i yhm alai naira y awm i, 31mymy teng y kun nai ngierei ai kawn iy, Tameuh i peang nai satang thui pi, Areng Isu krista i leu py vam parai pa-rei my patiu i, ami py mymy ai paka y.

Currently Selected:

AMTAW 28: KCL02

Highlight

Copy