AMTAW 27

Pawla ly Rom y sampho mang chei nai

1Naibaly Itali pri y kaichi chei ai nai leu atlym bo nabaly, Pawla hawi theaung y tla nai khumi takhra amichi mo Awkusta i kamkawm tavaimi chungvairei lu amyn Julia napi nai teng y au. 2Naibaly Adramutini avang i paleaung Asia pri pangli peang i meingtym takhra y chei ai naira y atang i, kaichi pangli y chei bo; Makedonia pri i khumi Aristarka, Thesalonika avang i awm nai ly kaichi teng y awm. 3Naibaly khawn mang y ly Sidon avang y tym. Naibaly Julia my ly Pawla ai hawihai dawn hai i, amcheng ai nai ahawichi teng y pavai ai nai pei. 4Naibaly hu i dengdairei pangli y chei bi i, ali my ny y nai mang y hm nai deaungkho y kaichi ly Kupra tlawn palem ali ka-deng mang chei. 5Naibaly Kiliki pri hawi Pamphulia pri ka-bih mang y pangli angpeang nai bo y ly, Lukia pri y Mura avang y tym bo. 6Hu y ly tavaimi chungvairei lu my ly Aleksandria avang i paleaung Itali pri y chei ai nai niu i, hu y kaichi ai atang hai. 7Naibaly kani kra parai parai naimy kangjai kangjai chei i, Knidos avang kataw y rai parai naimy tym tanga iy, ali my ang paka nai deaungkho y Salmoni peang, Krit tlawn palem ali ka-deng mang chei; 8naibaly rai parai naimy tui peang ahawi y chei i, Katheaung Apu nanai meingtym y tym bo; huni ahawi y ly Lasai avang awm.

9Naibaly kani neangneang sum nai hawi, paleaung mang chei ai nai ka-jei awm nai deaungkho y py (Biu Hai nai neng chi veng bo i), Pawla my nichi ai pachei i nichi teng y, 10“Areng awi, vai achi paleaung mang chei nai ly phra naira hawi, khrikhri pa-rei chau ai nai tym ai nanai kai pany, vawn hawi paleaung khyh ny y leang, amychi i hengra py,” napi. 11Na i py tavaimi chungvairei lu ly Pawla i leu thui nai tleaung y ly paleaung kry nai lu hawi paleaung keung i leu thui nai ym keh lawh. 12Naibaly kaseih kamdeng awm ai nai ly huni katheaung y avo y nai deaungkho y, nawi keh naichi my ly hu i dengdairei pangli y chei iy, Phawiniksi avang y tym tanga iy, hu y kaseih kamdeng awm ai nai arum; huni ly Krit tlawn katheaung harei ne, tosyh nisi katheaung hawi, tokalawi nisi katheaung mang beu nai ne.

Pangli y ali kamchai theu nai

13Naibaly tokalawi mang i ali theu pryn theu pryn nai kha y mymychi i kangai nga bo, nanai athang khai u i, cheuha atheu iy, Krit tlawn peang mang chei pajeaung veangveang. 14Na i py kra y nai sala chy y my tlawn salo mang i dengairei ali ho parai nai theu kathiu, huni ali ly Eurakuilo napi reng nai ne: 15naibaly paleaung y ali akawi chawm khyp i, ali mo mang y pahi pajau y nai deaungkho y pataw jo i, hm veangveang bo. 16Naibaly amyn Kawda, tlawn theangchi chy palem ali ka-deng mang chei i, rai parai naimy paleaung chy ai ly la pajau tanga bo; 17naibaly kateang kalau pajau nai bo y ama hai ai nai, vuinawn la iy, paleaung anui mang y pi i kawm, hunaibaly Surti y ke ai nai jei i ali ka kateangchi patlym iy, hm veangveang bo. 18Naibaly khawn mang y ly tui sampyh y pachaw veangveang nai deaungkho y paleaung i ka-pai vawnchi ly aphi ache bo; 19naibaly khawn pa-thom y ly mymychi i kiu kypkyp y paleaung i vawn aphi bi bo. 20Naibaly kani py ka-sichi py kra parai pa-rei kaichi ai ang y i, ali khu my py khri pa-rei hm na i, heng ai nai athang khai naira ha py by y bo.

21Naibaly kra parai pa-rei biu cho y naimy awm nai bo y Pawla my ly nichi theung y angdo iy, “Arengchi awi, Krit tlawn i dengdairei chei y naimy kai i leu tangai i khyly, hini phra naira hawi chau ai naira ly tym ai ny y. 22Na i py vai ly awmnem ai nai kang pachei; nangchi theung y ami py hengra tamo y leang mang, paleaung naini tama ai. 23Ati mana nai mo nabaly vaivum kai i ahawi y Tameuh i kani pri i amtaw thau nai angdo i (kai ly mymy i ne, mymy i kalop py kasa), 24‘Pawla, jei moh, nang ly kaisara i mo y angdo ai nai tla; naibaly khen cham, paleaung mang nang hawi chei ahawi nai bawibawichi py Tameuh my nang ai ang pei nai mang,’ ang napi. 25Hunai deaungkho y arengchi awi, awmnem naimy awm u; kai ai ang thui pi nai kamta awm thlethle ai, nanai kai ly Tameuh ai kaym. 26Na i py mani tlawn y mo ang pa ai,” napi.

27Naibaly Adria pangli y ali my hi mang hu mang hm lawh i, vum holai palyhrei nai vum y ly aneng hyh khala y mo, paleaung kry naichi ly mani pri y mo tym ai nai dawn; 28hunaibaly tui kathiu pata u i lam apomrei awm, nanai pany; naibaly kra y nai sala y pata bi i, lam holai pangrei awm, nanai pany. 29Naibaly paleaung kalawi mang y cheuha palyhrei pala, ti y baly lengseaung pareaung y pa lawh na, nanai jei i, khutawi nai sala ajeng keaung na. 30Naibaly paleaung kry naichi ly paleaung lu mang y cheuhachi pala ai nai ka-tawm sa i, paleaung chy ly pangli y pala iy paleaung kalen ai khai su ai nai tau; 31hunai thym khala y Pawla my ly tavaimi chungvairei lu hawi tavaimichi teng y, “Hinichi ly paleaung kalen y awm jo y baly nangchi lawi pajau y leang,” napi. 32Hunaibaly tavaimichi ly vuinawn o baw i, paleaung chy tla hai vui bo.

33Naibaly khutawi ai bo nabaly Pawla my khumi bawibawichi ai biu cha ai nai parawi i, “Nangchi ati sai py cho y naimy ajeng nai biu hai jo i, vaini ly kani holai palyhrei awm bo. 34Hunai deaungkho y kawn parai naimy biu cho u ba; nangmychi heng ai nai chy bo; nangchi theung y ami py sam amairei py tamo y leang mang,” napi. 35Naibaly mymy ly huni leu thui pajau iy tako la i, khumi bawibawi i mo Tameuh teng y kawn nai leu thui bo; naibaly kadi iy cha amteaung bo. 36Naibaly nichi py paleung awmnem naimy awm i, biu cha teang bo. 37Naibaly kaichi paleaung i khumi bawibawi ly chungvai nyh pa-thom vui saryh taja leaung tariurei awm. 38Naibaly cha angkhyh nai bo y choh ly pangli tui y aphi i, paleaung jang hai kyh bo.

Sampho phra nai

39Naibaly kani si iy manira i kacheng mo nanai pany y, na i py mani tuili katheaung mo palang awm nai niu i, hunira y pajau i khyly paleaung ahai hai ai nai tau. 40Naibaly cheuha pakheng nai vui o baw iy pangli y daw jo; huni hawi vanrei tami naira thang naichi ly su iy mo mang i alika ly ali hm ai nai kamrawi atheu kalau iy, palang mang y tapai bo. 41Na i py tui ry kaho nyhrei stiu nai meingtym y kun vui i, paleaung ai ly kacheng y deng hai bo; naibaly paleaung lu mang ly ke thleng thleng i amchyh pajau y naimy awm jo, kalawi mang ly khrikhri pa-rei tui sampyh thi nai deaungkho y kawi amteaung bo. 42Naibaly tavaimichi ly theaung y tla naichi ai padei ai nai arum, ti y baly amichi my tui y jau iy preang lawh na, nanai jei. 43Na i py tavaimi chungvairei lu ly Pawla ai lawi hai ai nai ngai i, mymychi i atiti tau nai ly kam bo; tui jau kawp nai ngiereichi ly pangli y tlenrei my taba pawn iy kacheng y angpeang ai nai hawi, 44khumi takhra phyrei ly dengkeaung pheichi tleaung y, phyreichi ly paleaung i vawn takhrachi tleaung y angpeang ai nai leu pei; hunai kamta ly nichi bawibawi kacheng y chymme naimy tym bebe bo.

Currently Selected:

AMTAW 27: KCL02

Highlight

Copy