ROM 1

1Pawla, Isu Krista i miseaung amtaw thau nai lawn ai nai palau nai, Tameuh i Satang Kahawi thui pi ai nai khai takhra nai ly, 2huni Satang Kahawi mymy i Chapo achi i Areng Isu 3Krista i molam ly Tameuh my jangni y mymy i cha-iu kachai y ly mymy i amochi i labeaung y adeu bo; ni ly mymy i tlang mang y ly Davida i kangpreang y tapen nai ne, 4naibaly chai naira phailo mang y ly Tameuh i Chapo ne, nanai ly kadeichi theung i nai angthau bi nai deaungkho y sa thai naira y khri pa-rei pany hai bo; huni ly Isu Krista achi i Areng ne; 5mymy i amyn deaungkho y cheng cheaungkhang theung i khumichi ai ly ym naira patawm hai ai nai, kaichi ly mymy deaungkho y pahenra hawi amtaw thau nai keung lawn ai naira py nga bo; 6hunichi theung y ly nangchi ai py Isu Krista i lawn ai nai ang palau nai ne; 7Rom avang i Tameuh i ngai parai nai, khumi kachai lawn ai nai palau naichi bawibawi teng y, Tameuh achi i Ampo hawi Areng Isu Krista teng i dengdairei pahenra hawi awmnem naira ly nangchi teng y awm sy.

Kawn naimy chiu sa nai

8Nangchi i ym naira ly khaileaung pri verei y amthang nai deaungkho y kai ly nangchi bawibawi i tlang tleaung y Isu Krista i saho y kai i Tameuh teng y kawn nai leu kathui manme nai ne. 9Naibaly kai ly kai i chiu sa naira y ly anawn y naimy nangchi i amyn katabawi jojo; 10vai nangchi teng y kang jeu ai nai Tameuh i kangai y ati mora y py neng ka-vo kanga thai ai nai kahnei, nanai mymy i Chapo i Satang Kahawi y kai i phailo y mymy i kalop kasa reng nai Tameuh ly kai ai pany nai keung ne. 11Naibaly nangchi ly khaw pa-rei awm thai ai nai, phailo mang i atiti pei nai ly nangchi ai phy nga hai thai ai nai, kang niu ai nai khri pa-rei ngai na; 12ati mana nai mo nabaly nangchi i ym naira hawi kai i ym naira my achi vanrei awm hai nem thai ai nai kangai nai ne.

13Naibaly amjo amnauchi awi, Cheng Takhra takhrachi theung y kai i athai kanga nai kamta ly, nangchi theung y py athai kanga thai ai nai kai ly nangchi teng y tlen neangneang kang jeu ai nai tau bo, nanai nangchi pany y ai nai kangai y leang; na i py vai khrairei kai ai ang paka jojo.#Ataw 19.21 14Kai ly Krikchi hawi Cheng Takhrachi teng y py, khumi kachengchi hawi cheng y naichi teng y py kalai awm. 15Hunaibaly kai ly nangchi, Rom avang y awm naichi teng y py Satang Kahawi ly pajau nai ryrei thui pi ai nai kangvei rym nai ne.

Satang Kahawi i sa thai naira

16Kai ly Satang Kahawi ai ly kakaji hai y leang; huni ly ami py ym nai ngierei i vui ly paheng ai naira lawn ai nai Tameuh i atiti sa thai naira ne; angchei y ly Judachi i vui ne, naibaly krikchi i vui py ne teang. 17Naibaly ym naira veang ryh veang ryh ai nai, hunira y ly Tameuh i hawi nai sai amteng hai nai ne; “Khumi kahawi ly ym naira y heng ai,” nanai tajiu nai kamta.#Hab 2.4

Khumichi i kamngo

18Leu meitang ai hawi y naira y paka nai keungchi i Tameuh ai tahm khai y naira hawi, hawi y naira bawibawichi i tlang tleaung y py kani pri mang i dengdairei Tameuh i kado theu naira amteng nai ne; 19Tameuh my nichi ai pany hai chum veng nai deaungkho y Tameuh i satang pany ai nai ly mymychi i paleung y pany hai nai awm lawh veng. 20Ati mana nai mo nabaly mymy i atiti niu thai y naitachi ly, khaileaung palum angchei kha i dengdairei chaipyn pa-rei my niu nai bo; atiti sa naira y amteng nai ne; huni ly mymy i deungtasarei atiti sa thai naira hawi, mymy ly Tameuh ne nai sai py; hunai deaungkho y nichi ly akhi ai naira ngo y leang: 21nichi ly Tameuh ai pany u iy, mymy ai ly Tameuh kamta tahm py khai u y, kawn nai leu py thui u y; nichi ly sai py ny y nai dawn u lawh i, mymychi i pany thai naira by y nai paleung ly veng bo.#Eph 4.17–18 22Nichi ly kacheng apalawn u iy kamthu y lawn veng, naibaly dei thai y nai Tameuh i nang parai naira ai ly dei thai nai khumichi hawi, 23tavochi hawi, mawi kheu palyhrei awm naichi hawi, avah naichi i myn hawi py katheung u bo.#Leu 4.16–18

24Hunai deaungkho y Tameuh my mymychi i tlang y angji ngailai pa-rei asa u ai nai, mymychi i paleung i ngai phi teng y nai kamta atiti chai y naichi sa ai nai au lawh iy hi pi vui bo; 25nichi ly Tameuh i leu meitang ai ly ka-chawi hawi katheung iy, Sa Nai Keung ai chiu nai tleaung y ly mymy i sa nai ai chiu iy huni i kalop sa u lawh. Sa Nai Keung ai ly deungtasarei palo nai ne. Amen.

26Huni deaungkho y Tameuh my nichi ai angji ngailai pa-rei paleaung ai nai au lawh iy hi pi vui bo; mymychi i neampachychi py mymychi i awm nai reita tapen nai ly reita kamta awm u y i, takhra sa u veng bo; 27neampachochi py neampachychi ai reita kamta teaung nai ly anawn vui iy, khri pa-rei paleaung nai nichi leaung leaungrei angai leungtang iy, neampacho tengtawi hawi y parai pa-rei my asa u i, mymychi i kamngo vang nga ai nai ly mymychi y nga u bo.

28Naibaly nichi ly Tameuh ai pany ai ngai u y nai deaungkho y, atiti apu y naichi sa ai nai ly mymy ai ngai y nai paleung awm ai nai au lawh iy, Tameuh my hi pi vui bo; 29hunaibaly hawi y nairachi, kamngo nairachi, atakaw nairachi, taphra ai ngai nairachi bawibawi my kawi u veng bo; paleung no nairachi, khumi ai padei nairachi, ajo naichi, tapawp naichi. awm nai sai hawi y naichi my kawi u veng bo; 30arum paviu atyhtyh naichi, khumi ai preaung naichi, Tameuh ai niu ngai y naichi, kamlaichi, am-e naichi, apalo naichi, atiti kamngo kangtha patheu nai keungchi, amhm ampo i leu tangai y naichi, 31pany thai naira by y naichi, leu adeu nai taphra nai keungchi, tapen ahawi nai tamen naira by y naichi, pahen nai paleung by y naichi ne; 32hunai ka-tawm atiti sa nai keungchi ly dei ai nai ataing, nanai Tameuh my khai rym nai ly pany u jo iy, mymychi my sa nai khyh py ny y naimy, khumi takhrachi i sa reng naira y py kawn u lawh.

Currently Selected:

ROM 1: KCL02

Highlight

Copy