Jeremi 32
32
Jeremi achte yon jaden
1Senyè a pale ak Jeremi yon lòt fwa ankò. Lè #Jer 39.1,2 sa a Sedesyas te gen dizan depi li te wa peyi Jida, Nebikadneza te gen dizwitan depi li te wa lavil Babilòn. 2Lame #Jer 33.1; 37.21; 39.14 wa Babilòn lan te sènen lavil Jerizalèm. Yo te arete pwofèt Jeremi, yo te fèmen l nan lakou palè wa Jida a kote gad yo ye a. 3Se #Jer 34.2,3 Sedesyas, wa peyi Jida a, ki te fè fèmen pwofèt la la, paske li t'ap fè l repwòch dèske li te bay mesay sa a nan non Bondye Senyè a: M'ap lage lavil Jerizalèm nan men wa Babilòn lan. L'ap pran l. 4Wa Sedesyas p'ap chape anba men moun Kalde yo. M'ap lage l nan men wa Babilòn lan. L'a konparèt devan wa a, y'a pale yonn ak lòt, je nan je. 5Apre #Jer 39.7 sa, y'a mennen Sedesyas lavil Babilòn, li va rete la jouk m'a regle avè l. Menm si nou goumen ak moun Babilòn yo, nou p'ap janm genyen lagè a. Se Senyè a menm ki di sa.
6Lè sa a, Jeremi rakonte ki jan Senyè a te pale avè l. Senyè a te di l konsa:
7— Anamèl, #Lev 25.25; Rit 4.4; Jer 1.1 kouzen ou lan, pitit Chaloum, tonton ou bò papa, pral vin wè ou. Li pral mande ou pou achte yon jaden li genyen lavil Anatòt, paske se ou menm ki fanmi pi pre ak li, se ou menm an premye ki gendwa achte l.
8Se konsa, jan Senyè a te fè m konnen an, kouzen m Anamèl vin jwenn mwen nan lakou palè kote gad yo ye a. Li mande m pou m achte yon jaden li te genyen lavil Anatòt, nan peyi moun Benjamen yo. Li di se mwen an premye ki gendwa achte l paske se mwen ki fanmi pi pre ak li. Konsa, se mwen ki pou achte l nan men l.
Lè sa a, mwen vin sèten se Senyè a menm ki te pale avè m. 9M achte #Jen 23.16; Zak 11.12; Mat 26.15 jaden an nan men Anamèl, pitit tonton m lan, mwen peze lajan pou m ba li a. Lajan an te rive disèt pyès an ajan. 10Apre sa, mwen siyen de papye tè yo, mwen mete sò m sou yonn. Mwen fè temwen yo siyen tou, mwen fè kontwole pèz lajan an nan balans. 11Apre sa, mwen pran de papye tè yo. Sa ki te sele a te gen kontra lavant lan jan lalwa mande l la. Lòt papye a te rete tou louvri. 12Mwen #Eza 8.2; Jer 36.4 renmèt papye tè yo bay Bawouk, pitit gason Nerija, pitit pitit Makseja, devan Anamèl, kouzen m lan, devan lòt temwen ki te siyen papye tè yo, devan tout moun peyi Jida ki te la nan lakou gad palè a. 13Devan yo tout, mwen di Bawouk konsa:
14— Men lòd Senyè ki gen tout pouvwa a, Bondye pèp Izrayèl la, bay. Pran de papye tè sa yo, sa ki sele a ak sa ki tou louvri a, mete yo nan yon ti kannari pou yo ka konsève pandan lontan. 15Paske yon lè yo va achte kay, jaden ak pye rezen nan peyi a ankò. Se Senyè a menm ki di sa.
Jeremi lapriyè Bondye
16Apre mwen te fin bay Bawouk, pitit gason Nerija a, papye tè yo, mwen lapriyè Senyè a, mwen di l:
17— Aa, #Jen 18.14; Eza 37.16 Senyè, Bondye! Se avèk fòs kouray ou, se avèk gwo pouvwa ou ou te fè syèl la ak latè a. Anyen pa twò difisil pou ou. 18Ou #Egz 20.6; Eza 9.6; 65.6,7; Jer 10.16 fè mil jenerasyon nan yon fanmi wè jan ou gen bon kè. Men tou, ou fè pitit peye pou peche papa ak manman yo te fè. Ou se yon Bondye ki gen pouvwa, ki gen fòs. Yo rele ou: Senyè ki gen tout pouvwa a. 19Plan #Sòm 66.3,5; Eza 28.29; Jer 16.17; 17.10 travay ou, se gwo zafè. Yo pa ka konte bèl bagay ou fè yo. Je ou louvri sou tou sa moun ap fè, pou bay chak moun sa yo merite dapre sa yo fè, dapre jan yo mennen bak yo. 20Depi #Ney 9.10; Sòm 135.9 nan tan lontan rive jouk jounen jòdi a, ou te fè mirak ak mèvèy nan peyi Lejip, nan peyi Izrayèl ak nan tout lòt nasyon yo. Konsa, kounyeya yo konnen ou toupatou. 21Ou #Det 4.34 fè nou sòti kite peyi Lejip ak fòs ponyèt ou ak gwo kouray ou. Ou te fè anpil mirak ak anpil mèvèy, anpil bagay ki te fè moun pè. 22Ou #Det 26.15 te ba yo peyi ou te pwomèt ou t'ap bay zansèt yo a, peyi kote lèt ak siwo myèl koule tankou dlo. 23Yo #Da 9.10-12 rive nan peyi a, yo pran l pou yo, men yo derefize koute ou. Yo pa viv jan ou te mande yo viv la. Yo pa fè tou sa ou te ba yo lòd fè a. Se konsa, ou voye tout gwo malè sa a sou yo jòdi a.
24Moun #Jer 6.6; 14.12 Babilòn yo sènen lavil la, y'ap anpile tè nan pye miray yo, y'ap pwoche pou yo pran lavil la. Nou ta mèt di lavil la nan men yo deja. Lagè, grangou ak move maladi fin kraze kouray moun yo. Ou wè sa ou te di a rive vre. 25Wi, sa ki rete pou lavil la tonbe nan men moun Babilòn yo pa anyen. Poukisa atò, Senyè Bondye, ou ban m lòd achte jaden sa a pou lajan kach devan temwen?
Senyè a reponn Jeremi
26Senyè a pale ak Jeremi ankò, li di l konsa:
27— Mwen #Jen 18.14; Nonb 16.22 menm Senyè a, mwen se Bondye tout moun sou latè. Pa gen anyen ki twò difisil pou m fè. 28Se poutèt sa, mwen menm mwen di ou: m'ap lage lavil sa a nan men moun Babilòn yo, nan men Nebikadneza, wa yo a! Y'ap pran lavil la. 29Moun #Jer 7.18; 19.13; 21.10 Babilòn k'ap atake lavil la pral antre ladan l. Y'ap mete dife, y'ap boule l. Y'ap mete dife nan kay kote moun yo te fè m fache anpil la, lè yo te moute anwo twati a pou boule lansan pou Baal, pou fè ofrann diven pou lòt bondye. 30Paske, #Jer 3.25; 25.6,7 moun Izrayèl yo ak moun Jida yo, se sa ki mal ase y'ap fè depi nan konmansman. Wi, moun Izrayèl yo, se fache y'ap fè m fache ase ak tou sa y'ap fè a. Se Senyè a menm ki di sa. 31Lavil #2 Wa 23.27 Jerizalèm sa a, depi jou yo te bati l la rive jouk jòdi a, se kòlè l'ap fè m fè, se move san l'ap fè m fè. Kifè kounyeya, mwen pa ka wè l devan je m ankò. 32Akòz #Jer 2.26 tou sa moun peyi Izrayèl yo ak moun peyi Jida yo te fè ki mal, m about ak yo tout, ni wa yo, ni chèf yo, ni prèt yo, ni pwofèt yo, ni moun peyi Jida yo, ni moun lavil Jerizalèm yo. 33Yo #Jer 2.27; 7.13; Eze 8.16 vire do ban mwen. Malgre mwen pat janm sispann montre yo sa pou yo fè, yo pat vle koute m, yo pa vle aprann. 34Yo #Jer 7.30 mete vye zidòl yo nan Tanp yo te mete apa pou mwen an, yo fè Tanp lan pa nan kondisyon pou sèvi m ankò. 35Yo #Lev 18.21; 1 Wa 16.19; Jer 7.31 bati lotèl pou Baal nan Fon Benn-inon an, yo ofri pitit gason yo ak pitit fi yo pou yo touye pou Molòk, bagay mwen pat janm ba yo lòd fè, bagay ki pat janm vin nan lide m. Lè yo fè bagay degoutan sa a, yo fè pèp Jida a tonbe nan peche.
Bondye pwomèt sa va chanje
36Senyè a, Bondye pèp Izrayèl la, pale ak Jeremi, li di l konsa:
— Kounyeya mwen ta renmen di yon lòt bagay sou lavil Jerizalèm. Ou te di ansanm ak lòt yo: Lagè, grangou ak move maladi ap fini ak lavil la, l'ap tonbe nan men wa Babilòn lan. 37Enben, #Jer 21.5; 23.3; Eze 34.25 wi! Mwen te fache sou yo, mwen te move anpil, mwen te fè gwo kòlè. Lè sa a, mwen gaye yo nan yon bann peyi. Men, mwen pral sanble yo, m'ap mennen yo tounen isit la ankò pou yo ka viv san kè sote. 38Lè #Jer 30.22; 31.33 sa a, yo menm y'a tounen pèp ki apa pou mwen an ankò, mwen menm m'a tounen Bondye yo ankò. 39Sèl #Eze 11.19 lide m'ap mete nan tèt yo tout, sèl anvi m'a ba yo tout, se pou yo gen krentif pou mwen tout tan. Se va pou byen yo ak pou byen pitit pitit yo. 40M'ap #Eza 55.3; Eze 16.60 pase yon kontra ak yo ki p'ap janm kase. M'ap pran angajman mwen p'ap janm lage yo. Mwen p'ap janm sispann fè yo byen. Wi, m'a fè yo gen krentif pou mwen ak tout kè yo. Konsa, yo p'ap janm vire do ban mwen ankò. 41M'a #Jer 24.6 pran plezi pou m fè yo byen. M'a travay ak tout kè m ak tout nanm mwen pou yo pran rasin nèt nan peyi a.
42Senyè a #Jer 31.28 di ankò: Menm jan se mwen menm ki te fè gwo malè sa a rive pèp la, konsa tou, se mwen menm ki pral ba yo tout bon bagay mwen te pwomèt m'ap ba yo. 43W'ap #Jer 32.15; 33.10 di ansanm ak lòt moun yo: Peyi a fini. Pa gen yon moun, pa gen yon bèt ladan l. Yo lage peyi a nan men moun Babilòn yo. Men yon lè, moun va achte tè nan peyi a ankò. 44Wi, #Jer 17.26; 30.3 nan tout peyi Benjamen an, nan tout ti bouk ki nan vwazinay lavil Jerizalèm yo, nan tout lavil Jida yo, nan lavil ki nan mòn yo, nan tout lavil ki nan plenn yo, bò lanmè, ak nan sid peyi a, moun va achte jaden, y'a pase papye tè, y'a sele yo, y'a fè temwen siyen yo. Paske m'ap fè pèp la tounen nan peyi a ankò. Se mwen menm Senyè a ki di sa.
Currently Selected:
Jeremi 32: HAT98
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Haitian Creole DC Bible © Societé Biblique Haïtienne, 1998.