GENESIS 13
13
Abram leh Lot anna Ṭhennâk
1Abram chu Kanaan simlei kângah a nupi leh a neih zawzawng hen Aigupta thawk hen a suak le, marlei ah a kal rawh. Lot khawm a sinah a kal bâk. 2Abram chu minei tak asi, dawrâ tla, kêl tla, ran rual leh ngûn leh tangka khawm a nei. 3Chu mun chu a kaltâk le, â ṭhial le, Bethel lei fûk hen a kal vima. A lânah mâichâm a siam le, a umnâk mun Bethel leh Ai karah mi mun a va tleng le, chunah chun 4mâichâm a siam le, chunah chun LALPA a sawnh.
5Lot khawm nih dawrâ tla, kêl tla, ran rual tla, dâwngsungkhur leh to-aw tla a nei bâk. 6Ran an nei vevê mi a tam tuk le, munkhat um ding hen ram ningnonâk nih a tinh lo rawh. 7Churawhchun, Abram ran zauhtu leh Lot ran zauhtu lakah remlonâk a hawng suak rawh. (Chu liau chun Kanaan mi leh Perizit mi tla chu ram lakah an um.)
8Abram nih Lot sinah, “Unau kan si ruangah na mi le ka mi tla hi remlo hen an um ding asi lo. 9Churuang chun a dang hen kan um râu lai. Zei ram tal na duh mi thîm rawh, kâng khat lei na kal chun kei kâng dangah ka kal lai,” a ti
10Lot nih a kiangkam Jordan Vakuam zawzawng chu a zauh le, Zoar lei kalnâk tî tamnâk lei tla, LALPA DÛM#13.10 LALPA DÛM chu Eden dûm zauhtirnâk asi. mawh Aigupta ram ah mi hâwi chu a muh. (chu chu Sodom leh Gomorah khuapi LALPA nih a râwk lânah mi chu asi.) 11Lot nih Jordan Vakuam zawzawng chu a rangah a thîm le, saklei kângah â ṭhial rawh. Chu chu an panih hen anna dangnâk chu asi. 12Abram chu Kanaan ram ah a um le, Lot chu tivakuam khuapi lakah Sodom kiangah a um. 13Chunah minung tla chu LALPA tlûnah an sual le, an ṭhalo.
Abram Hebron ah â Ṭhialnâk
14Lot nih a kaltâk nûnah LALPA nih Abram sinah, “Na umnâk thawk hen mun kip zauh le, 15na muh mi zawng chu nang leh na thlâk tla rangah nan tâ si kumza ding hen kan pêk awt asi. 16Âukhawm nih rêl châwklo rê ding hen thlâk tla ka nan pêk lai le, mi nih sep an rêl kho lo hâwi hen asi lai! 17Tuah kal le, ram pumpi zauh hep, a ektê hen nangmah rangah ka nan pêk awt mi asi ruangah,” a ti.
18Churawhchun, Abram chu a um mun a ṭhial le, Mamre mi thing thenhlimh kiang Hebron ah a va um rawh, chunah chun LALPA rangah mâichâm a siam.
Currently Selected:
GENESIS 13: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
