GENESIS 12

Pathian Nih Abram A Kawhnâk

1LALPA nih Abram sinah, “Na umnâk ram, na rualsia leh na pa in mâk le, ram ka nan zauhtir ding mi leiah kal rawh. 2Thlâk tam tak ka nan pêk lai le, phun rokual tak an hawng si lai. Mal ka nan sâwm lai le, chun minthang tak hen ka nan siam lai, malsâwmnâk na si khonâk ding hen.

3Mal a nan sâwmtu chu mal ka sâwm lai,

sikhawmsele siat an barhtu chu siat ka barh lai.

Chun nangmah ruangah phun zawzawng mal ka sâwm lai,” a ti

4Abram chu kum 75 asi ah LALPA nih a simh mi hâwi hen Haran thawk hen a suak rawh. Chun Lot chu a sinah a kal bâk. 5Abram nih a nupi Sarai, a unaupa fapa Lot leh a neih zawzawng Haran ah mi a to-aw zawzawng a nei mi chu a put na le, Kanaan ram lei fûk hen anna thawh rawh.

Kanaan ram an va tleng rawh chun, 6Sekem mun thenhlimh ah More thing thenhlimh tiang hen ram chu a va ṭawl le, (chu liau chun Kanaan mi tla chu, chu ram ah an um liau asi.) 7LALPA chu Abram sinah â langh le, “Hi ram hi na thlâk tla ka pêk ding mi ram chu asi,” a ti. Abram nih chun LALPA a sinah a langhtu sinah mâichâm a siam.

8Chu nûnah chun Bethel khuapi saklei tlâng ram ah â ṭhial le, chunah chun um mun a khuar. Thlanglei ah Bethel a um le, saklei kângah Ai khua a um. Chunah khawm chun mâichâm a siam le, LALPA a sawnh. 9Chunah mi chu â ṭhial vima le, Kanaan simlei a fûk vima.

Aigupta Ram ah Abram Umnâk

10Sikhawmsele Kanaan ram ah pâm a hawng tlung le, pâm a fâk thlo ruangah Abram chu Aigupta simlei kângah sâwtlotê va um ding hen a kal rawh. 11Aigupta ramri a kanh awt rawh chun a nupi Sarai sinah,”Nang chu nunau mêlṭha tak na si. 12Aigupta mi nih an muh chun ka nupi ah an ruat lai le, kei chu an ka thah lai le, nang lam chu an zuah lai. 13A farnu kasi ti piak na; churawhchun kei rangah nungnâk leh ṭhadektê zauhkhenhnâk asi lai,” a ti

14Aigupta ramri a kanh rawh chun Aigupta mi tla nih a nupi chu thungâi a mêlṭha an ti. 15Mi lian tla nih an muh le, a mêlṭhat zia chu lalchem an simh; churawhchun lal in ah an kalpi rawh. 16Amah ruang chun Abram chu lalchem nih thungâi a dâwt le, dawrâ rual, kêl rual, sanatung tla, sal tla leh sangâwngsâu a pêk.

17Sikhawmsele lalchem nih Sarai a lâk mi ruangah chun lalchem leh a lal in ah mi tla lakah LALPA nih râi ṭihnungkâi tak a fial. 18Churawhchun, lalchem nih Abram sinah mi a fial le, “Zei rangah ka lakah hi hâwi hen thil na ti? Na nupi asi mi zei rangah na hawng ka simh lo? 19Ka farnu asi ti hen zei rangah na sim le, nupi ah na ka umpitir? Na nupi hi lâk le, suak!” a ti 20Lalchem nih a mi tla chu thu a pêk le, chu ram thawk hen Abram chu a nupi leh a neih zawzawng hen an suaktir rawh.

Currently Selected:

GENESIS 12: BCLBV

Highlight

Copy