GENESIS 14
14
Abram nih Lot Rangah
Ruang a Suahnâk
1Lalchem pali, Babulon ah mi Shinar lalchem Amraphel, Ellasar lalchem Ariok, Elam lalchem Kedorlamer, Goim lalchem Tidal 2chu lalchem dang panga tla: Sodom lalchem Bera, Gomorah lalchem Birsa, Admah lalchem Shinab, Zeboim lalchem Semeber leh Bela (mawh Zoar) lalchem tla chu do ding hen an suak rawh. 3Hi lalchem panga tla hi Sidim Vakuam ah anna bawp le, chu chu tu liauah Tipi Thi asi. 4Kum leinih sung chu Kedorlamer thuneihnâk tangah an um le, a kum leithumnâk ah lam chun a lakah an hel rawh. 5A kum leilinâk ah chun Kedorlamer leh amah bawptu tla chu an kawrsen tla hen an hawng le, Asterot Karnaim a mi Rephaim, Ham ah mi Zuzim, Seva-Kiriathaim phâi a mi Emim, 6Edom tlângah mi Hor tla chu an neh na rawh, ramkaro kiangah mi Elparan tiang hen an ṭhâwl na. 7Churawhchun, an hawng a let le, Kades leiah an hawng kîr nawlh, (chu chu Enmispat ti asi.) Amalek ram zawzawng tla an neh le, Hazazon Tamar mi Amor tla khawm an neh na.
8Churawhchun, Sodom lalchem, Gomorah lalchem, Admah lalchem, Zeboim lalchem leh Bela lalchem hi lalchem panga tla nih chun an kawrsen tla Sidim Vakuam ah an pumh na le, 9Elam lalchem, Goim lalchem, Babulon lalchem, Ellasar lalchem, pali tla rangah an do. 10Chu tivakuam chu lawngthlîng khur hen a khat thlo le, Sodom lalchem leh Gomorah lalchem chu râl an tuk mi an teknâk ah khur lakah an tlâ le; lalchem dang pathum tla lam chu tlâng leikângah an tek le, an suak. 11Lalchem pali tla nih chun Sodom leh Gomorah mi thil zeizawng an buh tla hen an lâk le, an kal ving. 12Abram unaupa fapa Lot chu Sodom ah um mi asi le, amah leh a thilneih hen an lâk hep.
13Sikhawmsele, minung pakhat a suak le, Amor mi Mamre tâ thing thenhlimh kiangah um mi Abram Hebrai mi chu a va simh. Mamre leh a unaupa Eskol leh Aner chu Abram ṭangpitu an si. 14Abram nih a unaupa fapa chu an tleih ving tih a theih rawh chun, a umnâk mun ah râltuktu ding mi chu a pumh na le, an ektê hen 318 an tling. Chun, lalchem pali tla chu Dan tiang hen an ṭhâwl na. 15Chunah chun a murui hen a siam na le, an mêlma tla chu zân ah an va do na le, an neh na. Damaska marlei kângah Hobah tiang hen an dûm na, 16an thil lâk rawh mi khawm a suh nawlh na le, a unaupa fapa Lot, a thil neih leh a sinah mi nunau tla, midang an tleih mi zawzawng a suh nawlh hep na.
Melkizedek nih Abram Mal a Sâwm
17Abram chu Kedorlamer leh lalchem dang tla a neh na mi chu a hawng kîr le, Saveh Vakuam ah Sodom lalchem nih a va dawng. (Saveh Tivakuam hi Lalchem Tivakuam khawm an ti.) 18Melkizedek Salem lalchem, Chungnungchem Pathian bâwlpu nih chun Abram rangah sang leh uain a put piak le, 19mal a sâwm le, “Chungnungchem Pathian tual leh vân siamtu nih Abram chu malsâwm seh! 20Chungnungchem Pathian na mêlma lakah nehnâk a nan pêktu chu sawr hen um seh!” a ti. Chun, Abram nih Melkizedek rangah a thil lâk parâ lû ah pakhat a pêk.
21Chun, Sodom lalchem nih chun Abram sinah “Thil na suh mi vial kil le, ka minung tla vial hawng ka pêk ko,” a ti.
22Abram nih a sinah, “LALPA Pathian Chungnungchem, tual leh vân Siamtu sinah, 23na thil zeikhawm lâk lo ding hen lazâi leh pheikawk renhnâk tê men lâk lo ding hen siat kâ sirh. Abram chu ‘keimah nih ka neihtir mi,’ na ti lonâk ding hen. 24Na tâ rerêng zeikhawm ka rangah ka lâk awtlo. Ka minung tla tâ cho lo chu. Sikhawmsele, hawng ka bawptu, Aner, Eskol leh Mamre nih chun an vo lâk na seh,” a ti.
Currently Selected:
GENESIS 14: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
