Malakai 2
2
Kɔraawiizi kizeehina karfaa wia
1Kenne Kɔraawiizi Fɔŋŋa Maa Hiŋ ŋɔ tɛɛ kizeehina, “Kizeehina, ii karfaarɛ keŋ. 2Di ii waa haŋ nuu, di ii waa haŋ aah siwii di ra tɔgzi n sɔŋ, n daŋ see ia nua, di see kuna la miŋ kissi ia ii dɔɔ la nua. Ɛɛh, n teŋ seeabuu nua, dikuubɛɛwiai, ii waa siwii aahwɛ di ra tɔgziŋ.
3N daŋ kuu ii wia, di tɛr ii naanna digna. N daŋ kpa ii hɔpizizenaa mbusu lizaa sela fihbina faa ii siwee, bá kpa ii ni a maa ha hul nyuu. 4Denii ii zum lugɔ minuu karfi ia wia naa, guŋ gil ń ni Levi dee nuukpaŋ la du de di ra la. Mìŋ́ Kɔraawiizi Fɔŋŋa Maa Hinnɛ ŋɔ guŋ.#Kur 3:11-13; 25:12 5Nuukpaŋ la miŋ gillɛ yaa dɔɔ la faa du ba benii. Miibɔɔ ni bɔsɔna nuukpannɛ n kpa tɛɛ baa. Guŋ gil ba ra tɔgziŋ, di ra ɔmiŋ werge. 6Ba baglaa maa faa ɛɛ wibiire, ba ŋmɛnɛ maa faa waa kara nuuwɛ lii ba nuuzi. N ni baa faa du de ni bampirsɔna, ba wia deŋli. Ba faa bir nɛkpila lii ba wichɔgaa biini.
7A dɛkkɔɔ kizeehina n dɔɔ Kɔraawiizi wia zumaa, nɛra ge ra na baglaa lii ba be, dikuu baŋ ɛɛ mìŋ́ Kɔraawiizi Fɔŋŋa Maa Hiŋ balaa wia. 8Ka iawaa gil a ŋmɛnɛɛrɛ ta, ii baglaa ge gil nɛkpila leuzi. Ii chɔgi n ni Levi dee nuukpaŋ labuu. 9Awia, n gillɔɔ Izrɛl hina hah ia, di ra du ia hiihzi nɛra maa see, dikuu iiŋ waa n ŋmɛnizi hiŋŋɛ ka nɔŋŋi baŋhina kaali baŋhina, n Gbɔgni hiŋaa wia biini. Mìŋ́ Kɔraawiizi Fɔŋŋa Maa Hinnɛ ŋɔ guŋ.”
Juda hina wia n nyaa wibii
10Mɛɛkpaŋ lɛi yaa maa dɔɔa? Kɔraawiizikpaŋ lɛi ma yaa maa? Ka ɛrɛɛ wiarɛ yaa waa kaa ra hiŋzi nuuŋɔɔlaa la yaa n duwɛɛ tɛɛ dɔŋai? Guŋ gillɔɔ yaa naabaala ni Kɔraawiizi nuukpaŋ la chɔgi.
11Juda hina waa kaa ra hiŋzi ba nuuŋɔɔlaa. Ba ɛɛ wikiiliire Izrɛl hɛri ni bolzeŋ Jɛrusalɛm biini. Juda hina paagi haana la n na kuari hɛrdumazi vugaa, guŋ gil Kɔraawiizi Dia la un nɔŋŋɛɛ la chɔg. 12Baal la maa n ɛɛ keŋ, di u du gunla maa, Kɔ́raawiizi lizuu lii Jekɔb nɛra biini, haali di u kpa mbusu lizaa kuna gba di wàá tɛɛ Kɔraawiizi Fɔŋŋa Maa Hiŋ.
13Wii la bɛl iiŋ kaa ra ɛɛu keŋ, ii kpa siniire taali mbusu lizibɔr la ni. Ii ra wiiu di ra chɛɛhgi, dikuu uŋ waa kaa kɛɛ di ra binni ii mbusu lizaa kuna gɛɛ di ra lɛɛa ni bɔsɔna di lii ii be wia. 14Ii ɔɔ pɛɛzi, “Ɛrɛɛ?” Guŋ ɛɛwɔɔ, dikuubɛɛwiai, Kɔraawiizi ra di ii ni ii bichalhaanaa daansɛɛ, dikuu ii chɔgi ii ni baa nuuŋɔɔlaa labuu, haali baŋ ɛɛ ii cheena, haana la ii ni baa n ŋɔ nuuzi ka kpa dɔŋa la.#Mat 19:4-9
15Kɔraawiizi lɛi gillɛ baal ni u haaŋ ɛɛ kpaŋaa? U gillɔɔ ba bɔrahɔna ni ba dunzi ɛɛ kpaŋ. Bɛɛ wiarɛ u ɛɛ gunnɛi? Dikuu unna nyiŋŋi ii biizi ra hiŋuu wia. Awia, ii ra du iihinaa tau wiimaa biini, di gilɛɛ waa chɔgi nuuŋɔɔlaa la ii ni ii bichalhaana n ŋɔwɛɛ tɛɛ dɔŋa la.
16Kɔraawiizi Fɔŋŋa Maa Hiŋ la Izrɛl hina n na hum la, ŋɔwɔɔrɛ, “N hah baal ni haaŋ dɔŋa vɛɛirɛ. Sihilii hinnɛ nɛr la n vɛɛ u haaŋ.”
Awia, ii ra du iihinaa tau wiimaa biini, di gilɛɛ waa chɔgi nuuŋɔɔlaa la ii ni ii haana n ŋɔwɛɛ tɛɛ dɔŋa la.
Kɔraawiizi seriya dii hɔpizii wia
17Ii wiŋɔzi bazi Kɔraawiizii.
Ii pɛɛzɔɔrɛ, “Ɛrɛɛ yaa ŋɔ a bazuuwei?”
Kenne ii ŋɔ, “Banla maa n ɛɛ wichɔgaa wia wessoo Kɔraawiizi be, ba wia paruu,” di kaa ŋɔ, “Kɔraawiizi la n na di seriya ni wibii la haa du denii naa?”
Currently Selected:
Malakai 2: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
