Malakai 1
1
1Kɔraawiizii pilli wia naa bagli Malakai, u ŋɔ tɛɛ Izrɛl hina.
Gunla Kɔraawiizi n nɔŋŋi Izrɛl hina wia
2Kɔraawiizi ŋɔwɔɔrɛ, “N nɔŋŋi iabuu.#Jɛrɛ 31:3
Ka ii pɛɛzi, ‘I nɔŋŋi yaabuu, wibii maa?’ ”
Kɔraawiizi kaa ŋɔ, “Ɛsau faa waa Jekɔb kpɛɛma ɛɛwɛ lɛiyaa?#Lug 25:22-34 Ka Jekɔb ni u naannaa n nɔŋŋi,#Room 9:13 3ka faa hah Ɛsau, di gil u giŋgimee hɛri birgi hɛribɔduma tɛɛ hohobiazi.”
4Aŋhinabe, Ɛsau naanna Ɛdɔm hina daŋ ŋɔ, “Haali baŋ puri yaa bola gba, ka yaa daŋ bir maa.”
Ka kenne Kɔraawiizi Fɔŋŋa Maa Hiŋ la ŋɔ, “Di ba maa, ka n daŋ bir purgaa. Nɛra daŋ yir ba hɛri Biinikpola Hina Hɛri, nɛra la Kɔraawiizi baaŋ n na fuuh ba ni saŋa maa la. 5Ii himmaa siwee daŋ na guŋ, ií ŋɔ, ‘Kɔraawiizi dɔɔ fɔŋŋaa, haali hɛssi la hina n dugli Izrɛl hɛri la gba ni.’ ”
Kɔraawiizi n hau u kizeehina ni wia
6Kɔraawiizi Fɔŋŋa Maa Hiŋ la ŋɔ u kizeehina be, “Biibambie dɛkkɔɔ u ra kpa u mɛɛ girme, balii ge ra ɛɛ u dɔɔri guŋ. Di minuu ii mɛɛ, lee girme la n dɛgiŋ la duɛi? Di minuu ii dɔɔri, ɛrɛɛ ɔmaarɛ ii ra ɔminnɛi? Hoi, n kizeehina! Iabuu ra gbɛlli n sɔŋ.
Ka ii pɛɛzi, ‘Ɛrɛɛ yaa ra gbɛlli i sɔnɛi?’
7Ii kpa diwee la n doŋŋe mìŋ́ Kɔraawiizi benii, di dau n mbusu lizibɔr la ni.
Ii kaa pɛɛzi, ‘Ɛrɛɛ yaa ɛɛ di chugii doŋai?’
Ii ŋɔwɔɔrɛ lugɔ Kɔraawiizi mbusu lizibɔr la waa girme kuŋ ɛɛwɛ. 8Iiŋ ɔɔ kpa sela la n nyuŋŋɛɛ gɛɛ n gbɛttɛ gɛɛ n na wii, di waa lizi mbusuzi la, lewaa lɛiyaa? Di ii kpaa gaa tɛɛ ii hɛri nabɔma, u bɔra daŋ sɔɔni ii wiaa? U daŋ hiini iaa? Mìŋ́ Kɔraawiizi Fɔŋŋa Maa Hinnɛ ra pɛɛzi ia guŋ.#Levi 22:22
9Too, di ii suŋŋi mìŋ́ Kɔraawiizi ŋɔ ń suŋ ii ni, n daŋ nuuwaa? Di ii kpa keŋ kuna lizi mbusu, n daŋ lɛɛawaa? Mìŋ́ Kɔraawiizi Fɔŋŋa Maa Hinnɛ ŋɔ guŋ.
10Ee, di ii bɛl vii tɔ n Dia dominuuzi, guŋ gil ii gilɛɛ ra chem ninjagazi mbusu lizibɔr ni, a vii bɔ! N bɔra waa sɔɔnɛɛ ii wia. Awia, màá lɛɛ ii mbusu lizaa kuna. 11Di lii wiizi furaa di ra la u cholaa, n daŋ dɔɔ sɔŋ hɛssi hina maa be. Ba daŋ kpa daahɛgsɔɔhsuma ni mbusu lizaa kuna la n waa doŋŋe n be, di lii yemmaa wa tɛŋ, dikuubɛɛwiai, n daŋ dɔɔ sɔŋ ba maa be. Mìŋ́ Kɔraawiizi Fɔŋŋa Maa Hinnɛ ŋɔ guŋ.
12Ka ii ra chɔg n sɔŋ, di ra ŋɔ n mbusu lizibɔr wia keŋ, ‘U doŋŋoo.’ Ii ra gbɛlli u diwee ge. 13Ií ŋɔwɔɔrɛ, ‘Wibaziire!’ Ii mir nuuzi di ra du u ni. Mìŋ́ Kɔraawiizi Fɔŋŋa Maa Hinnɛ ŋɔ guŋ.”
Kɔraawiizi ŋɔwɔɔrɛ, “Iiŋ ɔɔ kpa sela la n boŋŋee ni anla n gbɛttɛ gɛɛ anla n na wii, di waa lizi mbusuzi la, ń lɛɛawaa? 14Nɛr la n dɔɔ sebal la n wesse u sela biini, di ŋɔ nua lugɔ u daŋ kpau tɛŋ, ka bir lizi unla n waa kpeg wa tɛŋ, nuuseezi daŋ diu. N ɛɛ koorizenne, a dɛkkɔɔ hɛssi hina maa ra ɔmiŋ. Mìŋ́ Kɔraawiizi Fɔŋŋa Maa Hinnɛ ŋɔ guŋ.”#Yira 47:2
Currently Selected:
Malakai 1: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
