Malakai 3
3
1Kɔraawiizi Fɔŋŋa Maa Hiŋ la ŋɔwɔɔrɛ, “Ií ra nuu! N daŋ hum n huŋhunni bɛl n niŋ tɔ see, di wa ɛɛ sirya ń na ba. Denii kakpaŋ, ii Dɔɔri la iinna binni u ŋmɛnɛɛ la ba u Dia, nuukpaŋ balii la wia n na par ia la daŋ ba.”#Mala 4:5; Mat 11:10; Luuk 1:76
2Ka anɛɛ n niŋ wer chi u see u balaa hɔpizii naanɛi? Anɛɛ n niŋ wer na u hiŋ a saŋai? U daŋ ɛɛ lugɔ zugzi niŋ gɛɛ chagri fanfanni.#Jowɛ 2:11 3U daŋ so lugɔ nɛr la n ɔɔ ŋmɛɛri saliŋhuŋŋu di lizi a doŋa ra ha. Gunnɛ ú lizi Levi dee doŋa ha, ka kuari baa lugɔ saliŋ ni saliŋhuŋŋu. Denii Kɔraawiizi dɔɔ nɛra la wia n deŋlee, ba waa lizi mbusuzi kuna di ra tɛu, 4Kɔraawiizi jaa sɛɛ di lɛɛ Juda ni Jɛrusalɛm hina mbusuzi lizaa kuna gunla uŋ faa ra lɛɛa faala la.
5Kɔraawiizi Fɔŋŋa Maa Hiŋ la ŋɔwɔɔrɛ, “Awia, n daŋ ba ii be di wa di ia seriya. N daŋ ɛɛ manaŋ di wa di banla n na di hiri, banla n na sɛm, banla n na di daansɛɛkara, banla n na fini ba paahdiire, banla n na sunni luhaana ni lalbiizi ani banla n waa hɔɔhra ra di seriya ni wibii, dikuu baŋ wanna ɔm wia.”
Kɔraawiizi finaa wia
6Kɔraawiizi Fɔŋŋa Maa Hiŋ ŋɔwɔɔrɛ, “Mìŋ́ Kɔraawiizi waa birgaa dɔɔwɛ. Awia, Jekɔb naanna, maa ia ra dim.#Aiza 48:9; Liyi 3:22 7Di haŋ chi ii naabaala ge naabaala saŋa la maa, ii vɛɛ n widaulaarɛ. Ií bir ba n be, ń ge bir ba ii be di lɛɛ ia.
Ka ii pɛɛzi, ‘Ɛrɛɛ ya ɛɛ di bir ba i benei?’
8‘A wesso newee n na fini mìŋ́ Kɔraawiizia? Ka gunnɛ ii ra ɛɛŋ la.’
Ka ii pɛɛzi, ‘Ɛrɛɛ yaa ra finiinei?’
Ií ra finimbuu dikuu iiŋ wanna tɛɛ ii kuna fifi bɔkpaŋkpaŋa ni sunzaazi la iin niŋ tɛŋ wia. 9Ii hɛri hina naa maanii n see nua, dikuu iinna finiŋ wia. 10Ií kpa ii kuna fifi bɔkpaŋkpaŋa maa ba n Dia kuna dauribɔr, gúŋ gil diwee du de. Ií ɛɛŋ guŋ na, n daŋ kissi ia, ii na kuna werge maa. Ii wàá wer dɔɔ diini ii dawaa.#Sɛɛ 3:9 11N daŋ gil purmaazi gilɛɛ waa di ii pattikuna, ii grepu daazi ge nɔŋ nɛnnɛ. 12Denii hɛssi hina maa yir ia bɔsɔna hina, dikuu ii hɛri n niŋ du sum werge wia.
13Ií chagzimbuu. Mìŋ́ Kɔraawiizii ŋɔ guŋ.
Ka ii pɛɛzi, ‘Ɛrɛɛ yaa chagziinɛi?’
14Ii ŋɔwɔɔrɛ, ‘Yaa hummɔɔ ra tɛɛ Kɔraawiizi, ka a ɛɛ pɛɛ. Beedee tɔnaa yaa na lii u widaulaa hiŋaa biini, ka ra bar lugɔ nɛra la n na wii Kɔraawiizi Fɔŋŋa Maa Hiŋ seei? 15Ka filaŋkeŋ, yaa ra yir barabara hinaa bɔsɔna hina. Aahna lɛi lugɔ wichɔgɛɛra ɔɔ ra nyɛɛluu. Banla ge n na karsi Kɔraawiizi ra lii wia biini.’ ”
16Ka banla n na ɔm Kɔraawiizi la ŋɔ wiarɛ di ra tɛɛ dɔŋa, Kɔraawiizi keŋŋi digna di ra nuu. Ba sɛbi banla n na ɔm Kɔraawiizi di ra tɔgzuu la sɔnaa du hɔŋ biini Kɔraawiizi see, bá ra liizi ba wia.#Lii 32:32-33; Yira 56:8
17Kɔraawiizi Fɔŋŋa Maa Hiŋ la ŋɔwɔɔrɛ, “Ba daŋ ɛɛ n hora hɔpizii la min niŋ chaali n nɛra la miŋ nɔŋŋɛɛ werge maa la. N daŋ na ba sinyɛna di lɛɛ baa, gunla baal n ɔɔ na u bie la n na humuu sinyɛna, di lɛɛu la.#Yira 103:13 18Denii ii na gunla Kɔraawiizi n na ɛɛ nɛra la wia n deŋlee, a kur gunla unna ɛɛ biinikpola hina wia la. Banla n na hum Kɔraawiizi ni banla n wɔɔ ra hum wia wàá ɛɛ kpaŋ.”
Currently Selected:
Malakai 3: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
