Luuk 4
4
Yeesu ɛɛi na wia
(Mat 4:1-11; Maak 1:12-13)
1Kɔraawiizi Dumnanii izi Yeesu werge, di gil u lii Jɔɔdan muu paga la, u kpogluu zuu hɛribɔduma biini. 2Un du de la, Sitaani ba u be di wa ɛɛu na, ú vii ɛɛ wichɔgaa guŋŋ hɔpizaa tokkoanɛɛ. Denii lɔzi waa kpu Yeesu, dikuubɛɛwiai, u faa waa kummaa diwee a hɔpizaa tokkoanɛɛ hiŋ biini.
3Sitaani ŋɔ u be, “Di i ɛɛ Kɔraawiizi Biibaal himmaanii, amɔ, í ŋɔ bia naa be á birgi paanuuzi í hee.”
4Yeesu ŋɔ u be, “Ba sɛbɔɔrɛ Kɔraawiizi Hɔŋ biini, di ŋɔ, ‘Diwee bɛŋ lɛi ra tɛɛ nɛr miibɔɔ.’ ”#Gbɔg 8:3
5Sitaani kaa kpogluu tinni bizeŋ nyuu, di gil u binni durnya kossi maa ni a girme. U wer na a maa kakpaŋ. 6Sitaani ŋɔ u be, “N daŋ kpa annii maa fɔŋŋa ni a girme tɛi. Mìŋ́ dɔɔ a maa fɔŋŋa ń kpa tɛɛ nɛr la maa minna nyiŋŋi. 7Awia, di i sɛɛwɔ lugɔ í sɛɛ n dɔɔra, di ra jaamiŋ lugɔ n ɛɛ Kɔraawiizii, n daŋ gil i dɔɔ a maa.”
8Yeesu ŋɔ u be, “Ba faa sɛbɔɔrɛ Kɔraawiizi Hɔŋ biini di ŋɔ, ‘A jaami Kɔraawiizi la hinna hum la bɛŋ.’ ”
9Denii Sitaani kpogluu zuu bolzeŋ Jɛrusalɛm, di ga kpau chiŋŋi Kɔraawiizi Dia bɔr la n la chiŋ werge, ka ŋɔ u be, “Di i ɛɛ Kɔraawiizi Biibaal himmaanii, amɔ, í kutti lii bɔnnaa chol hɛri, 10dikuubɛɛwiai, ba faa sɛbɔɔrɛ Kɔraawiizi Hɔŋ biini, di ŋɔ,
‘Kɔraawiizi daŋ gil
u mɛlikazi du i tau.#Yira 91:11-12
11A daŋ lallii chiŋ,
í gilɛɛ wa kpa i naa
ra lɔ bii.’ ”
12Yeesu ŋɔ u be, “Ba faa sɛbɔɔrɛ Kɔraawiizi Hɔŋ biini, di ŋɔ, ‘Gilɛɛ waa ɛɛ wia di ŋɔ í ɛɛ i Dɔɔri Kɔraawiizi la hinna hum la di na.’ ”#Gbɔg 6:16
13Sitaani n wa ɛɛ annii maa di da u zɛɛ guŋŋ wa tuŋ, u jaa giluu mɔɔ ka ŋmɛnɛbɛl ú kaa wa na bɔr kaa daruu.
Yeesu n faari u huma Galilii wia
(Mat 4:12-17; Maak 1:14-15)
14Yeesu ge bir la Galilii hɛri. Kɔraawiizi Dumnanii fɔŋŋa du u ni. Ba ra ŋɔ u wia de paga maa. 15U ɔɔ ra bagli baa ba jaamaa diini biine. Ba maa ra tɛu sɔŋ.
16Denii u ba Nazarɛf, bol la uŋ faa duwɛɛ u bichalli saŋa la, di zuu ba jaamaa dia gunla uŋ ɔɔ ra ɛɛ ba Heezaa Hɔpizii la di chi ú karmi Kɔraawiizi Hɔŋ la.#Mat 13:53-58; Maak 6:1-6 17Ba kpa Kɔraawiizi dɔgtɛɛ Aizaaya Hɔŋ tɛu. U pilluu di nyiŋŋi bɔr la uŋ faa sɛbɛɛ, di ŋɔ,
18“Kɔraawiizi Dumnanii izimbuu werge,
dikuubɛɛwiai,
u lizimbuu
ń lizi amaniyesuma
tɛɛ nyaara.
U humimbuu ń wa ŋɔ hindɔɔi wia
tɛɛ banla baŋ tɔ dia,
di gil nyuŋŋa siwee pilli
bá wer ra na.
Di lizi banla banna sunni la,
ba dɔma nonee biini,#Aiza 61:1-2
19di ŋɔ nɛr maa be lugɔ saŋa la
Kɔraawiizi n niŋ hiini
baa la helloo.”
20Denii u lau hɔŋ la tɔ di kpa tɛɛ a dia balii ka so. Banla maa n du jaamaa dia la biini ra binnuu. 21U jaa ra ŋɔ wia ra tɛɛ baa, di ŋɔ, “Wia naa miŋ karmɛɛ di lii Kɔraawiizi Hɔŋ biini naa, a wia ɛɛwɔɔ zinaa naa iinna nuu n be naa.”
22Uŋ wa bagli baa tuŋ, nɛra la maa ra tɛu sɔŋ. A tir baa werge uŋ wette ra ŋɔ wiŋɔzi la n wesse werge la wia. Ba ra pɛɛzi dɔŋa wia, di ra ŋɔ, “Joosɛf biibaal lɛiyaa?”
23U ŋɔ ba be, “Ii daŋ ta sɛɛlii naa tɛŋ, ‘Nɛchaari, chaa i hiŋ. Wia la hiŋ ɛɛwɛ Kapɛniɔm yaa nuu a wia la, a ɛɛ a widizi i himmaa bol bɔnnaa.’
24Ií gil n ŋɔ wibii maa tɛɛ ia. Ba waa Kɔraawiizi dɔgtɛɛ wia ra sɛɛ u himmaa bol. 25Saŋa la Kɔraawiizi dɔgtɛɛ Ɛlija n faa du de, di gil Kɔraawiizi lau dooŋ binni ahoro ni keza, lɔchuma chol bɔr maa la, Izrɛl hɛri faa waa luhaana nyaawɛ a saŋa,#1Koo 17:8-16 26ka Kɔraawiizi faa waa Ɛlija hummɛ ba bɛl maa be, ka humuu luhaaŋ bɛl, n du Saidɔn hɛri bol bɛl banna yir Zarɛfaf be. 27Gunnɛ bɔchɔgaa hina kpila faa du Izrɛl hɛri Kɔraawiizi dɔgtɛɛ Ɛlisa saŋa la. Waa bɛl maa chaawɛ ka chaa Naaman la n lii Siiria hɛri la bɛŋ.”#2Koo 5:1-14
28Nɛra la n du jaamaa dia la n wa nuu guŋ, ba maa baana ra fuuh. 29Ba izi lau Yeesu lii ba bol. Ba bol la ge faa hɔŋ bizeŋ nyuurɛ. Ba kpogluu la bɔr la ni hɛri n nɛɛwɛ, bá vii huruu ha hɛri ú siu. 30Ka Yeesu ga ba baambaaŋ kaali.
Tinnanchɔgii hiŋ bɛl wia
(Maak 1:21-28)
31Denii u la Kapɛniɔm la n du Galilii hɛri, di gaa bagli baa ba Heezaa Hɔpizii biini. 32U baglaa la tir baa werge, dikuubɛɛwiai, u ŋɔabuu lugɔ u himmaa n dɔɔ a fɔŋŋa.
33Baal bɛl faa du jaamaa dia la biini. Tinnanchɔgii bɛl faa ɔɔ ra izuu. U ŋɔ fɔŋŋa ni, 34“Aa! Nazarɛf hinuu Yeesu, bɛɛ i ra nyiŋŋi yaa benei? I ballɔɔ í wa chɔgi yaa gɛɛ? N zumiibuu. Hinuu Kɔraawiizi biinanii la.”
35Yeesu ŋɔ u be, “Gil kɔɔi ka wa lii a baal ni.” Tinnanchɔgii la izi a baal, di kpau ha hɛri ba baambaaŋ ka lii. Baal la yemmaa waa piree.
36A tir ba maa. Ba ra pɛɛzi dɔŋa, “Beedee baglaarɛ kennei? Ii waa na gunla u wiŋɔzi la n dɔɔ fɔŋŋa, u wer ŋɔ tinnanchɔgaa be, dí a wa lii, a wa liiyaa?” 37Ba ra ŋɔ u wia bɔr maa de paga.
Nɛkpila chaai wia
(Mat 8:14-17; Maak 1:29-34)
38Yeesu izi lii a jaamaa dia ga zuu Saimɔn dia. Di Saimɔn hilahaaŋ faa ra wii, u bɔra faa wenzi bambambam. Ba suŋŋi Yeesu lugɔ ú binnuu na. 39U ba wa chi u be di ŋɔ wiila la lii. A lii. A haaŋ izi kakpaŋ di ra hum baa.
40Bɔr n wa duanɛɛ, banla maa n dɔɔ wiila hina kpa baa ba Yeesu be. U kpa u nonee sagzi ba maa ni, di chaa baa. 41Tinnanchɔgaa ge gba lii bakpila ni. A tinnanchɔgaa ɔɔ ŋɔ fɔŋŋa ni, “Hinuu Kɔraawiizi Biibaal la.” Ka u hau a ni, waa sɛɛwɛ a ra ŋɔ wia, dikuubɛɛwiai, a zummɔ lugɔ u ɛɛ Kristo labuu.
Jaamaa diini biine baglaa wia
(Maak 1:35-39)
42Hɔɔŋ waa pizɛɛ, u ga zuu bɔduma bɛl. Nɛkpila kaa lii nyiŋŋi u bɔr de. Baŋ wa nau, ba faa waa sɛɛwɛ ú kaali ka ka baa. 43Ka u ŋɔ ba be, “A dɛkkɔɔ miŋ lizi Kɔraawiizi Kora wia amaniyesuma naa di ra tɛɛ bola la n kawɛɛ gba. A humaa Kɔraawiizi humiŋ ń wa hum la.” 44Awia, u jaa ra bagli Kɔraawiizi wia Juda hɛri jaamaa diini biine maa.
Currently Selected:
Luuk 4: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
