Luuk 5

Yeesu n yir u lugli hiŋra wia

(Mat 4:18-22; Maak 1:16-20)

1A hɔl bɛl Yeesu chigɔ Gɛnɛsarɛt muuzeŋ baŋgia. Nɛkpila ba wa faruu, di ra nyiŋŋi bá nuu Kɔraawiizi wiŋɔɔlii. 2Yeesu na muugbessi anɛɛ a muuzeŋ baŋgia. Nyinlaura baŋhina faa lii a biine, di ra chag ba asauzi. 3A nyinlaura bɛl sɔnnɛ Saimɔn. Yeesu zuu Saimɔn la muugbera ka ŋɔ ú huruu zuu nii la biini tama. U huruu zuu. Yeesu so a muugbera biini ra bagli nɛra la.

4Uŋ wa bagli nɛra la tuŋ, u ŋɔ Saimɔn be, “Saa a muugbera la bɔluŋ ga ta i asauzi lauri nyinni.”#Jɔɔn 21:3-8

5Saimɔn ŋɔ, “N Dɔɔri, Yaa nyiŋŋi nyinnii saŋkara maa guŋŋ wa kuuh. Yaa waa kummaa nawɛɛ. Ka hiŋ ŋɔ kennaa wia, yaa daŋ ta a asauzi.”

6Baŋ wa ta asauzi la, nyiŋkpila maa wa zuu a ni, a su di ra nyiŋŋi á chaahzi. 7Ba kamzi ba dɔŋahina n du muugbera bɛl biini dí ba ba wa hiini baa. Ba ba wa lizi nyinni la a su muugbessi anɛɛ la maa, haali a ra nyiŋŋi a muzi.

8Saimɔn Pitta n wa na guŋ, u giŋŋi Yeesu see di ŋɔ, “Ee, n Dɔɔri, lii n be! Wichɔgɛɛrii miŋ!”#Mat 8:34 9Nyiŋkpila la baŋ laurɛɛ la wia tir u ni banla maa n du u be labuu werge maa, awiarɛ u ŋɔ guŋ. 10A kaa tir u dɔŋahina nyinlaura Zɛbɛdi biibaala Jems ni Jɔɔn gba.

Denii Yeesu ŋɔ Saimɔn be, “Gilɛɛ ra ɔm. Hàá kaa ra kuuh nyinni kuuhni filaŋkeŋ. I daŋ jaa ra kuuh newea kuuhni.” 11Ba saa ba muugbessi ba baŋgia, di gil a maa ka ra hiŋuu.

Bɔchɔgaa hiŋ bɛl wia

(Mat 8:1-4; Maak 1:40-45)

12Yeesu kaa du bol bɛl biini, di bɔchɔgaa hiŋ bɛl ra ba. U bɔrahɔŋ maanii faa chɔkkɛ. A wiila hiŋ n wa na Yeesu, u giŋŋi u see ra fɔrguu, di ŋɔ, “N Dɔɔri, di a parii, i daŋ wer chaa n bɔchɔgaa naa.”

13Yeesu tɛr u nonii gbɔgzuu, ka ŋɔ, “A parimbuu. N chaaibuu la. Kakpaŋ, u bɔchɔgaa la tuŋ.”

14Yeesu ŋɔ u be werge maa, “A dazi í waa ŋɔ wiimaa ra tɛɛ nɛr maa, ka la Kɔraawiizi kizeehiŋ be ú ga nai. Di u wa nai, gil ú lizi mbusu tɛi gunla Moosis n faa bagli ia ŋɔ ií ra ɛɛ la, nɛ́ra zum lugɔ i jaa nyaaguu.”#Levi 14:1-32

15Yeesu n ŋɔ u be gunla, ka a ɛɛ pɛɛ. Nɛra ra ŋɔ u wia werge maa di ra jaa. Nɛkpila maa ɔɔ ra chaali u be bá nuu u wiŋɔzi, di kaa ra nyiŋŋi ú chaa baa. 16Yeesu gil baa ka ga zuu bɔduma ra suŋŋi wiizi de.

Gbɛrii bɛl chaai wia

(Mat 9:1-8; Maak 2:1-12)

17A hɔl bɛl, Yeesu n na bagli nɛra Kɔraawiizii wia, di Farisizi ni Kɔraawiizi Hɔnzunna baŋhina lii bola la maa n du Galilii ni Juda hɛssi ani Jɛrusalɛm, ba wa so de, di ra nuu u baglaa. Kɔraawiizi fɔŋŋa faa du u ni, u wer ra chaa nɛra. 18Denii baala baŋhina chi baal bɛl ba. U nonee ni u naazi maa siuzɔɔrɛ, u chɔɔ u kunchɔɔrikuna ni. Ba ra nyiŋŋi bá zuu bɔr la Yeesu n duwɛɛ la, di kpau dau u see. 19Ka nɛkpila su de werge ba waa bɔr nawɛɛ bá zuu, ka tinni sal di lau u yembɛl wil, di kpa u ni u kunchɔɔrikuna ga de choŋŋi Yeesu nɛra la baambaaŋ.

20Yeesu n wa na gunla baŋ yarduu la, u ŋɔ baal la be, “N baal, Kɔraawiizi gil i wichɔgaarɛ tɛi.”

21Denii Farisizi ni Kɔraawiizi Hɔnzunna la jaa ra pɛɛzi dɔŋa, “Lee baal naa liiyɛi? Beedee nɛdeere n na gbɛlli Kɔraawiizi gunnɛi? Anɛɛ n niŋ wer gil nɛra wichɔgaa tɛɛ baa, di Kɔraawiizi bɛŋ lɛiyɛi?”

22Yeesu wer zum gunla banna pɛɛzi dɔŋa la di ge pɛɛzi baa, “Ɛrɛɛ ii ra aani n wiŋɔzi naa ii bampiree biine kennei? 23Di n ŋɔ ‘N gil i wichɔgaarɛ tɛi,’ ani miŋ ŋɔ, ‘Izi ra vol,’ u bɛliirɛ n kpollenei? 24Ama, n na nyiŋŋuu ii zum lugɔ Mìŋ́ Newee Biibaal dɔɔ fɔŋŋaa durnya naa biini, ń wer gil nɛra wichɔgaa tɛɛ baa.” Awia, u jaa ŋɔ wiila hiŋ la be, “I benii n na ŋɔ la. Izi kpa i kunchɔɔrikuna ra la dia!” 25U izi kakpaŋ, di kpa u kunchɔɔrikuna la uŋ faa chɔɔ a ni la lii di chɔli Kɔraawiizi ra la dia. 26Ba maa ra binnuu, a tir baa werge maa. Ba ra chɔli Kɔraawiizi di ra ŋɔ, “Yaa na witittiire zinaa.”

Levi yiraa wia

(Mat 9:9-13; Maak 2:13-17)

27Denii Yeesu lii de ga na lampolɛɛri bɛl n soge u huma bɔr. U sɔnnɛ faa Levi. Yeesu ŋɔ u be, “Izi ra hiŋiŋ.” 28U gil u kuna maa ka izi di ra hiŋ Yeesu.

29Levi gil ba daali diuzenaa aŋhina u dia hɔɔhri Yeesu. U ni Yeesu ni lampolɛɛra kpila ni nɛra baŋhina so di ra di. 30Denii Farisizi ni Hɔnzunna balaa baŋhina waa guŋ sɛɛwɛ, di wa pɛɛzi Yeesu hiŋra, di ŋɔ, “Ɛrɛɛ wiarɛ ii ni lampolɛɛra ni wichɔgɛɛra ɔɔ kpau ra dei?”#Luuk 15:2-7

31Yeesu ŋɔ, “Nɛra la n dɔɔ alaanfia, baa lɛi ra nyiŋŋi nɛchaari bɔr. Ka banla n na wii la, baabuu ɔɔ ra nyiŋŋi u bɔr. 32Nɛnanaa lɛi n ba ń wa nyiŋŋi. Wichɔgɛɛraa n ba ń wa nyiŋŋi, bá wer gil ba biine chɔgi dikuu ba wichɔgaa wia di gilaa.”

Nuuvɔɔi wia pɛɛzaa

(Mat 9:14-17; Maak 2:18-22)

33Ba ŋɔ u be, “Jɔɔn Kɔraawiizi Niisɔɔri hiŋra ɔɔ ra vɔɔ nuarɛ werge, di ra suŋŋi wiizi. Farisizi la hiŋra ge gba ra ɛɛ guŋ. Ka ɛrɛɛ wiarɛ hiŋwaa hiŋra waa nua ra vɔɔi?”

34Yeesu pɛɛzi baa, “Nɛra la n na ɛɛ haŋfalii wia, ba daŋ sɛɛ vɔɔ nua haŋfalii jaari bee? Akai! 35Ama, saŋa bɛl daŋ wa hel bá lizi haŋfalii jaari la ba be. Denii bá jaa vɔɔ nua.”

36U ta sɛɛlii bɛl di ŋɔ, “Ba wàá wer kpa yakɔzfalii la baŋ haa waa chakkɛ u zugzi, di nyɛr tɔ wɛjɛbinii bɔɔ ú wer birgi. Di ba ɛɛ guŋ, yakɔzfalii la daŋ zugzi, di lau wɛjɛbinii la piili jaa. A yakɔza ge ni wɛjɛbinii la ge wàá wer ɛɛ kpaŋ. 37Ba wàá wer kpa siŋfalii du simbinii hur biini, ú wer birgi. Di ba ɛɛ guŋ ka siŋ la waa bii, hur la daŋ pozi, a siŋ maa ta, a hur ge chɔgi. 38Siŋfaliirɛ dɔɔ hurfalii. 39Nɛr la n zum simbinii nyɔɔi waa siŋfalii nyɔɔi ra nyiŋŋi. U daŋ ŋɔ lugɔ a binaa labuu wesse.”

Currently Selected:

Luuk 5: vag

Highlight

Copy