Daniel 6

Ibiyuntal si Daniel duꞌun it piyabanwaan it mga leon

[Mga 537 B.C.]

1Binwat it adiꞌ ngayti nga si Dario, miniliꞌ it sang gatus baw duwang puluꞌ i kadakel it gubirnadur ya, bawnga biyagiꞌ-bagiꞌ ya kat kanya-kanya nga pamaalaꞌan i kaꞌadiꞌan ya ngayti nga uyut nay Babilonia. 2Piniliꞌ ya gasiꞌ si Daniel baw duwa pang kataawan nga mamaalaꞌ it mga gubirnadur ngayti, isaꞌun egay sasaw it pikir it adiꞌ pasar it pagsasakpan ya ngayti. 3Ta it natanyag na nga inildawan si Daniel it ega basta-bastang kasepsep, nga subraꞌ paꞌ it beken nga mga manigpamaalaꞌ baw mga gubirnadur ngayti, aypaꞌ ka napikir it adiꞌ, nga si Daniel na ngayti i buwaten nga mamaalaꞌ it muꞌsang kaꞌadiꞌan ya ngayti.

4Aypaꞌ iyan duwa ngayti nga iba ya nga magpamaalaꞌ baw mga gubirnadur ngayti, sigi nga pikir nira it bagay nga ipagkasalaꞌan ni Daniel pasar it katengdanan ya, isaꞌun ega matabus i pagpikiren it adiꞌ sabap it kanya. Temed egay magkaparagan nira, ka si Daniel ngayti, pirmi nga magayen i pangatengdanan ya. Egay magkaꞌiway duꞌun it kanya. 5Ta it atkayti, maat nira, “Talagang egay maparagan tami nga makapatdek tami nga kasalaꞌan ya, puyrat iyan pagsambaen ya ngayan it kanya.” 6Aypaꞌ nagꞌupa-upakaten sira nga paꞌaduꞌun sirat adiꞌ. Pagꞌabut nira, maat nira, “Adiꞌ namen nga si Dario, sana egay kaskedan it kaꞌgenan mu! 7Kagalang-galang it imu, muꞌsa kami nga mga magpamaalaꞌ, mga gubirnadur baw beken nga mataꞌas i katengdanan situt kaꞌadiꞌan mu, may piyagꞌisun-isunan namen tu. Magayen siguru iꞌurdin mu, it egay kaꞌawaꞌan nga urdin, nga seledan it tulung puluꞌ nga aldaw, egay manalangin duꞌun it maski siyu nga diyus u in siyu nga taw, in daꞌga situ lamang it imu i panalangin. Kayti in siyu-siyuy ega sumunud it iꞌurdin mu ngaytu, buwaten it kanya, ibuntal duꞌun it dakulang kali nga piyabanwaan it mga leon. 8Aypaꞌ, kagalang-galang nga Adiꞌ, paliꞌwan ka it atkaytu nga urdin, bawnga pirmaꞌan mu isaꞌun ega maꞌugad, uyun nagat adat it mga urdin mi ngaytu nga taga Media baw Persia, urdin nga ega maꞌugad-ugad seked it kaꞌnu-kaꞌnu.” 9Ta egay beken, binwat nga matuud it adiꞌ ngayti nga si Dario i iti ngayti.

10Maski naꞌrutan ni Daniel nga may pinirmaꞌan it adiꞌ nga atkayti nga urdin, ipiyasigi ya naga i adat yat kaꞌlay. Miyuliꞌ kanya duꞌun it balay ya baw miyapyat duꞌun it esang seled nga duꞌun it dibwat. Bawnga limningkuꞌud kanya duꞌut patuꞌ it esang abri nga lalawagan nga ayun duꞌun it giyaringan ya nga banwa nga Jerusalem, ka nanalangin baw nagpasalamat duꞌun it Ampuꞌang Diyus. Binwat yay atkayti it tulung bisis it sang aldaw, subung nagat kaꞌlay ngayti nga buwat ya. 11Temed itu palan, pagsisipiꞌan kanya it mga magꞌinggit ngayti. Pagkamuya-muya nirat magpanalangin ngayti si Daniel baw magꞌangut it tabang it Ampuꞌang Diyus ya, 12dimnali-daliꞌ na sirat paꞌaduꞌun it adiꞌ, ka isiyugid nira. Maat nira, “Daꞌga baꞌ, kagalang-galang nga Adiꞌ, may pinirmaꞌan mu nga urdin nga seledan it tulung puluꞌ nga aldaw, egay manalangin duꞌun it maski siyu nga diyus u in siyu nga taw, in daꞌga asan lamang it imu? Baw daꞌga baꞌ, iyan ega sumunud it itu nga urdin, ibuntal kanya duꞌun it kali ngayti nga piyabanwaan it mga leon?”

Maat i tubag it adiꞌ ngayti, “Matuud yan. Baw uyun kat adat it mga urdin it Media baw Persia, ega na maꞌugad-ugad i urdin nga napirmaꞌan ku na.”

13“In maat baꞌ daꞌga, kagalang-galang nga Adiꞌ,” maat nira, “si Daniel ngayan nga kaꞌuyutan it mga dakepan nga taga Juda, ega bay guman-guman yat imu. Ega kat ulu yay ipiyagꞌurdin mu ngaytu. Kamatuudan, ipagpasigi yay panalangin yat tulung bisis it sang aldaw.” 14Pagkagneg it adiꞌ ngayti nga si Dario, ega nabaraꞌan kanya. Nagꞌapun i pamikir ya, in magꞌuꞌunu ya maribri si Daniel ngayti.

15Ta it ega paꞌ biyetanganan it ukuman si Daniel, mga magꞌinggit ngayti it kanya, naꞌaduꞌun siꞌ sira it adiꞌ. Maat nira siꞌ, “Kagalang-galang nga Adiꞌ, dedemdemen mu nga ega mapakay nga baꞌguun i maski unu nga urdin it mga taga Media baw Persia basta pinirmaꞌan nat adiꞌ.”

16Aypaꞌ ka isingkat nat adiꞌ nga ibuntal na si Daniel duꞌun it kali ngayti nga piyabanwaan it mga leon. Pagkapisiꞌ nirat ki Daniel, inaat kanya it adiꞌ ngayti, nga maat ya, “Sana iribri ka naga it Ampuꞌang Diyus nga pagsirbiyan mu ngayan it kamatuudan!”

17Ta, pagkabuntal it ki Daniel, limpenan nirat dakulaꞌ nga batu i balaꞌbaꞌan it kali ngayti. Bawnga binwat it adiꞌ, pati mga katimbang ya ngayti, inimandaꞌanan nirat mga siꞌsing nira nga pamimirmaꞌ i batu ngayti nga ilimpen isaꞌun masiguru nira nga ega riꞌnge-riꞌngen it maski siyu. 18Bawnga miyuliꞌ nay adiꞌ ngayti duꞌut balay ya. Naglinag, ega nakaꞌigaꞌ kanya, ega simnukdan kanyat pangaꞌen, baw ega ireg ya nga sasawun kanya it mga manigtugtug.

19Desang magpangyag na, nagbangun nay adiꞌ ngayti. Dimnali-daliꞌ kanyat paꞌaduꞌun it kali ngayti nga piyabanwaan it mga leon. 20Pagꞌabut ya duꞌun, pagsesmeken kanya nga timnaꞌwag. “Daniel,” maat ya, “nga manigsirbi it Ampuꞌang Diyus nga Egen, unu, kanya ngaytu nga pagsirbiyan mut kamatuudan, unu, ipiyagribri ya naga ikaw kat baꞌbaꞌ it mga leon ngayan?”

21Katubag si Daniel ngayti, “Sana egay kaskedan it kaꞌgenan mu, kagalang-galang nga Adiꞌ! 22Daꞌku naga bayni naꞌunu sabap, baꞌbaꞌ it mga leon ngayni, piyageget it anghil nga tiyaꞌeg it Ampuꞌang Diyus ku. Atkaytuy binwat ya sabap, kat panleteg ya, egay nabwat ku nga dapat ukumanan. Baw maski kat panleteg mu, kagalang-galang nga Adiꞌ, ega nagay nabwat ku nga karaꞌe-raꞌetan kuntraꞌ it imu.”

23Pagkagneg it adiꞌ ngayti, simnagya kanya nga banar. Egay beken, ipiyapaliꞌwan ya na si Daniel duꞌun it kali ngayti. Pagkapaliꞌwan it kanya, ega nga matuud i naltegan duꞌun it bilug ya nga maski sang dekeyeꞌ nga lasgas, sabap it pamayaꞌ baw pagsarig yat Ampuꞌang Diyus ya.

24Bawnga iyan mga nagꞌisun-isunun ngayti it kuntraꞌ it ki Daniel, ipiyabuntal nga muꞌsa it adiꞌ duꞌun it kali ngayti nga piyabanwaan it mga leon, sang siraan magꞌaꞌanak, egay ipiyaꞌped, pati mga asawa nira. Duꞌun paꞌ sirat lawang, pagsimit-simitan na sirat mga leon ngayti, unupat piyangengepꞌep i tuꞌlang nira.

25Sunud siꞌ nga binwat it adiꞌ, may ipiyasurat ya nga ilingkep yat muꞌsang mga banwa nga pagsasakpan ya. Magꞌaat i ipiyasurat ya,

“Kamu nga muꞌsa nga mga sinakepan ku, nga maski unung bangsa u ampang, sana manggayen nga banar baw maꞌimbeng i pangaꞌgenan mi.

26Kayti, ipagꞌurdin ku it muꞌsang pagsasakpan ku nga galangen mi it may iꞌlam i Ampuꞌang Diyus nga pagsirbiyan ni Daniel.

Sabap kanya i Ampuꞌang Diyus nga Egen, nga egay kaskedan it kaꞌgenan ya.

Baw kanya nga kaꞌadiꞌan, egay karanggaꞌan ya.

Talagang maneꞌteꞌ seked it kaꞌnu-kaꞌnu i pamegbeg ya.

27Kanya i Manriribri.

Magbuwat kanya it mga kalililuꞌang mga bagay duꞌun it langit baw situt banwa.

Kamatuudan, ipiyagribri ya si Daniel kat maꞌiꞌiseg nga mga leon.”

28Si Daniel ngayti, nagmagayen i pangaꞌgenan baw kabetangan ya it timpu it adiꞌ ngayti nga si Dario, baw timpu gasiꞌ it adiꞌ nga si Ciro nga taga Persia.

Currently Selected:

Daniel 6: TBWONT

Highlight

Copy