Daniel 9
9
Ipiyagpanalangin ni Daniel i siyudad it Jerusalem nga naꞌlay na nga ranggaꞌ
[Mga 539 B.C.]
1Iyan uꞌnang taꞌun it pagꞌadiꞌ duꞌut Babilonia ni Dario ngayti nga taga Media, nga anak ni Asuero, 2aku nga si Daniel, may natantuwan ku pasar it Jerusalem. Nasepsepan ku duꞌun it ampang it AMPUꞌANG DIYUS, nga ipiyasurat ya it prupitaꞌ nga si Jeremias, nga pitung puluꞌ nga taꞌun i ipiyabetang-betang nga kaꞌlay it ega paꞌ maꞌayus i karanggaꞌan it siyudad it Jerusalem ngayti.#9:2 Jeremias 25:11. 3Ta, it magꞌaꞌabut nay seked it iting timpu, aypaꞌ ka nanalangin aku duꞌun it Ampuꞌang Diyus. Nangabang aku duꞌun it kanya it may pagpuwasa baw magpapakay it maꞌerep baw inabuwan kuy pati bilug ku.#9:3 Mga iti ngayti nga pagbuwaten, adat it mga Judio in may dakulang magkasmekan baw in magpababaꞌ kat adapan it Ampuꞌang Diyus. 4Kat panalangin ku duꞌun it kanya ngaytu, inamin kuy mga kasalaꞌan namen nga mga taawan ya. Maat ku,
“Ampuꞌang Diyus nga magbebegbeg it muꞌsa, ikaw i landaw nga gunaan, nga dapat namen nga galangen it may iꞌlam. Pagtumanen mu i mga sanggup mu kat mga matuud nga magmaꞌal it imu baw kamatuudan nga magsunud it mga urdin mu. 5Talagang bangsa namen ngayni nga Israel, nagkasalaꞌan kami baw nakabwat it karaꞌe-raꞌetan. Nagpakikuntraꞌ kami it imu baw tiyalikudan namen i mga ipiyagꞌurdin mu. 6Piyasngelan namen i mga prupitaꞌ, sira nga mga manigsirbi mu, nga simnugid it ipagpaꞌrut mu duꞌun it mga adiꞌ namen, mga pagbayaꞌen baw mga kagiyaringanan namen, pati kapuꞌsaan it mga taw duꞌun it banwa namen ngayti.
11Talagang kapuꞌsaan it mga tungtung-inapuꞌ ni Israel, riyanggaꞌ namen i mga urdin mu. Nangindiꞌ kamit imu baw piyasngelan namen na ikaw. Aypaꞌ ka inabut kami it ukuman nga isiyumpa mu, nga magbebtang duꞌun it kasuratan ni Moises#9:11 Levitico 26:14-35, Deuteronomio 28:15-68. nga manigsirbi mu it tagnaꞌ. Eeꞌ baꞌ, riniga mu kami sabap it nagkasalaꞌan kami, kuntraꞌ it imu.
16Ampuꞌang Diyus, nga purus kataldengan i mga pagbuwaten mu, sana ega na isgan muy Jerusalem, nga piniliꞌ mu nga siyudad. Sabap it mga kasalaꞌan namen baw mga karaꞌe-raꞌetan nga nabwat it mga kagiyaringanan namen, talagang mga bangsa nga kat linibut it banwa namen, pagsindiren na nira i Jerusalem ngayti, pati kami nga mga taawan mu.
19Ampuꞌang Diyus, beteꞌ pagnegan mu aku. Pasinsiyaen mu naga kami. Sana Ampuꞌang Diyus, may sambung mu na baw panabang. Ikaw nga pagsirbiyan ku, sana ega na pakaꞌlayan mu. Tumabang ka na, ka yay kat ikabantug mu. Sabap pagkilalaen it katataawan nga, Jerusalem ngayti, siyudad nga piniliꞌ mu, baw kami, mga taawan mu.”
Currently Selected:
Daniel 9: TBWONT
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
