Daniel 3

Ibiyuntal na Sadrac duꞌun it pagdidingdingen nga dakulang apuy

[Mga 580 B.C.]

1Ta, duꞌun siꞌ it Babilonia, binwat it adiꞌ ngayti nga si Nabucodonosor, nagpabwat kanya it tiyaw-taw. Kalawas ya, may enem nga puluꞌ nga parasikwan. Bulawan i binwat. Kadakulaꞌ ya, may enem nga parasikwan. Ipiyapatindeg ya duꞌun it daranasan it Dura nga duꞌun nagat Babilonia ngayti. 2Pagkaꞌman it ipiyabwat ya ngayti baw nakapatindeg na, ipiyatawag ya i mga katimbang ya baw muꞌsa nga may mataꞌas nga katengdanan duꞌun it pagsasakpan ya ngayti. Tiningped ya ka isaꞌun ipabetang it kadakel nga magayeng pagsambaen i ipiyabwat ya ngayti nga tiyaw-taw. 3Iyan miyabut nay mga ipiyatawag ya ngayti, namagtingped na sira duꞌun it sarungaan it tiyaw-taw ngayti.

4Miyampang nay manigpaꞌrut, it pagꞌubsu-ubsun ya nay gaꞌmaran ya, ka ipiyaꞌrut ya, nga magꞌaat, “Kayti, ipagꞌurdin it aten nga muꞌsa, maski unu nga bangsa u ampang, 5nga kaꞌilangan nga sumamba i kadakel it tiyaw-taw ngaytu. Basta nagnegan it kadakel it taw i tingeg it mga pagꞌeypan baw mga turugtugun, ta, kaꞌilangan manluud na ka sambaen i tiyaw-taw ngaytu nga bulawan i binwat, nga ipiyapatindeg it adiꞌ tami nga si Nabucodonosor. 6Ta, in siyu-siyuy ega manluud baw sumamba, egay pagduwa-duwa nga ibuntal kanya duꞌun it pagdidingdingen nga dakulaꞌ nga apuy nga magdidigalang it panugu-sugu.”

7Aypaꞌ iyan ipiyatingeg nay mga pagꞌeypan baw mga turugtugun ngayti, muꞌsa nga nakagneg, nanluud na ka simnamba na sirat tiyaw-taw ngayti nga ipiyapatindeg it adiꞌ ngayti nga si Nabucodonosor.

8Temed ta, kat iting timpu, may mga mamimintuꞌ nga naꞌaduꞌun it adiꞌ, ka may ipiyagrikramu nira nga mga Judio. 9Maat nira it ki Nabucodonosor ngayting adiꞌ, “Adiꞌ namen, sana egay kaskedan it kaꞌgenan mu! 10Daꞌga baꞌ, kagalang-galang nga Adiꞌ, ipiyagꞌurdin mu nga manluud baw sumamba it ipiyabwat mu nga tiyaw-taw nga bulawan i kumpur makagneg it tingeg it mga pagꞌeypan baw mga turugtugun nga ipatingeg? 11Ta, in siyu-siyuy ega sumunud it ipiyagꞌurdin mu ngaytu, ibuntal kanya duꞌun it pagdidingdingen nga dakulang apuy nga magdidigalang it panugu-sugu. 12Magkaꞌampang namen ka may mga Judio nga egay guman-guman nirat ipiyagꞌurdin mu ngaytu. Si Sadrac, si Mesac baw si Abednego i paꞌaaten namen ngaytu, nga ipiyatindeg mu nga manigpamaalaꞌ situt Babilonia. Talagang daꞌsira magsirbi it mga diyus mu, pati tiyaw-taw ngayan nga bulawan nga ipiyapatindeg mu, ega pagsambaen nira.”

13Pagkagneg ni Nabucodonosor ngayti, simnikrab nga lagi i ereꞌeret nga iseg ya. Ipiyatawag yang lagi si Sadrac, si Mesac baw si Abednego ngayti. 14Pagꞌabut nira, maat it adiꞌ ngayti, “Unuytu, Sadrac, Mesac, Abednego? Unu, matuud nga daꞌkamu magsirbi it mga diyus ku, pati tiyaw-taw ngayan nga bulawan nga ipiyapatindeg ku, ega pagsambaen mi? 15Ta, begayan ku naga kamu it rugar nga sumunud it ipiyagꞌurdin ku ngaytu. Basta magnegan mi siꞌ i tingeg it mga pagꞌeypan baw mga turugtugun nga ipatingeg, in manluud kamu ka sumamba it ipiyabwat ku nga tiyaw-taw, magayen. Temed in daꞌkamu paꞌ sumamba, siguradu nga ibuntal kamu na duꞌun it pagdidingdingen nga dakulang apuy nga magdidigalang it panugu-sugu. Letganan ku in siyung diyus i makaribri it imyu kat alima ku.”

16Katubag i tulu ngayti, maat nira, “Kagalang-galang nga Adiꞌ, daꞌkami mangataldengan pasar it itung bagay. 17Yay matuud, in ibuntal kami duꞌun it apuy ngayti, iyan Ampuꞌang Diyus nga pagsirbiyan namen, kanya bay may kakayaan nga makabilwat it amen duꞌun baw rimibri it amen kat alima mu. 18Temed maski ega buwaten ya nga iribri ya kami, magayen in maꞌrutan mu, kagalang-galang nga Adiꞌ, nga ega sirbiyan namen i mga diyus mu, pati tiyaw-taw ngayan nga bulawan nga ipiyapatindeg mu, ega sambaen namen.”

19Pagkagneg it adiꞌ ngayti, nandarag kanyat pangise-iseg it kana Sadrac, Mesac baw si Abednego ngayti. Aypaꞌ ka isingkat ya nga dubliyen it pitung dubli i pasgu it apuy ngayti. 20Bawnga isingkat ya nga tulu ngayti, bayukun na it pirang kasundaluꞌan nga ega babasta-bastaen baw ibuntal sira duꞌun it pagdidingdingen ngayting dakulaꞌ nga apuy nga magdidigalang it panugu-sugu. 21Biyayuk na sirat mamagpapakay naga. Egay limbas nga maski unu nga pakayan nira. Pagkabayuk, ibiyuntal na sira duꞌun it dakulaꞌ ngayting apuy. 22Ta, paribasay maꞌigpit i sekat it adiꞌ nga dubliyen it pitung dubli i pasgu it apuy ngayti, sinikrab nga ipiyatay na nira i namagbuntal ngayti nga mga sundaluꞌ. 23Si Sadrac, si Mesac baw si Abednego ngayti, dayun-dayun nga timindag duꞌun it magdidigalang na ngayti nga panugu-sugut apuy.

24Ega naꞌlay, biglang timnindeg i adiꞌ ngayti nga si Nabucodonosor, baw yanay kerat-kerat it ingkut yat mga katimbang ya. Maat ya, “Daꞌga baꞌ, tulung kataawan lamang, nga pagbabayukun naga, i ibiyuntal ngayan?”

“Ta, tulu lamang bayan sira, kagalang-galang nga Adiꞌ,” maat i tubag it mga iningkut ya ngayti.

25“Ta unuka,” maat i adiꞌ ngayti, “epat na sira i magkaltegan ku nga mamagpanaw-panaw duꞌun it tengat deleg ngayti? Ungayti, daꞌsira na pagbabayukun baw ega mamagkaꞌuyub! Subung it ikaꞌpat nira ngayti, ega taw-tiyaw na lamang ka subung it esang diyus!”

26Minlep i adiꞌ ngayti nga si Nabucodonosor duꞌun it talaꞌep it magdidingding ngaytit apuy. Pagkapatpad ya, timnaꞌwag kanya, “Daliꞌ kamu na, Sadrac, Mesac baw Abednego! Manliꞌwan kamu na, kamu nga mga manigsirbi it Ampuꞌang Diyus nga Piyakamataꞌas.” Egay beken, nanliꞌwan nay tulu ngayti. 27Pagkaliꞌwan nira, minlep duꞌut kanira i mga katimbang it adiꞌ baw beken nga may mataꞌas nga katengdanan. Liniling nirat magayen temed maski adem, egay naltegan nira duꞌun it bilug it tulu ngayti. Egay maski sang dekeyeꞌ nga naꞌanteng nga buꞌuk nira, subung naga i pakayan nira. Baw maski kaꞌngit, egay naꞌarek nira.

28Pagkamuya ya, miyampang si Nabucodonosor ngayti. Maat ya, “Dapat nga bantugun i Ampuꞌang Diyus nga pagsirbiyan na Sadrac, Mesac baw si Abednego. May tiyaꞌeg ya nga anghil ya nga rimibri it mga manigsirbi ya ngaytu nga isiyarig nirat kanya i pati ginawa nira. Ka tinmed nira nga ega sumunud it ipiyagꞌurdin ku ngayti, maski maat ikagtas nat ginawa nira, ka ega talagay pagsambaen nira nga beken, in daꞌga Ampuꞌang Diyus na lamang. 29Aypaꞌ kayti, itu siꞌ i ipagꞌurdin ku. Garing kayti, maski siyu, maski unu kanya nga bangsa u maski unu nga ampang, nga mampang it maraꞌe-raꞌet kuntraꞌ kat Ampuꞌang Diyus nga pagsirbiyan na Sadrac, Mesac baw si Abednego, egay pagduwa-duwa nga ipakeleng-keleng ku sira baw isari ku pat paranggaꞌ i kababalayan nira. Sabap egay beken nga pagsambaen it taw nga magkaribri nga subung it binwat it Ampuꞌang Diyus ngaytu.”

30Ta, egay beken, tulu ngayting kataawan, ipiyataꞌas siꞌ it adiꞌ ngayti i mga katengdanan nira duꞌun it Babilonia.

Currently Selected:

Daniel 3: TBWONT

Highlight

Copy