Daniel 2

Nanagaynep i adiꞌ nga si Nabucodonosor, nga naltegan ya, esang tiyaw-taw

[Mga 604 B.C.]

1Ta, kat ikadwang taꞌun it pagꞌadiꞌ ni Nabucodonosor duꞌun it Babilonia, kaꞌsa nanagaynep kanya. Talagang nalibegan nga banar it pikir ya nga ega na ikiyaꞌigaꞌ ya. 2Ta it atkayti, ipiyapisiꞌ ya i muꞌsang may mga kepetan, subung it mga makakaꞌrut nga mamimintuꞌ, mga manigmangmang, mga katungkulan baw mga mamimintuꞌ nga manigpaꞌyag it mga tagaynep. Ipiyapisiꞌ sirat adiꞌ ngayti ka ipaꞌyag niray tiyagaynep ya ngayti. Pagꞌadap nira duꞌun it adiꞌ, 3maat ya it kanira, “Nanagaynep aku, tagaynep nga magkalibegan na ngaytut pikir ku it seked kayti. Ireg ku nga maꞌrutan i kaꞌulugan ya.”

4Katubag i mga mamimintuꞌ ngayti nga manigpaꞌyag it mga tagaynep. Maat nira, “Adiꞌ namen, sana egay kaskedan it kaꞌgenan mu! Ituturan mu nat amen nga mga manigsirbi mu i tiyagaynep mu ka isaꞌun kapaꞌyag namen i kaꞌulugan ya.”

5Temed tiyubag sirat adiꞌ ngayti, “Pintuꞌun mi na in unuy tagaynep ku bawnga isugid mi i kaꞌulugan ya. Ka ituy napikir kut egay pagduwa-duwa. Basta ega yan kasugid mi, siguradu nga ipakeleng-keleng ku kamu baw isari ku pat paranggaꞌ i kababalayan mi. 6Takaꞌ in maꞌusay mi ga baw makapaꞌyag i tagaynep ku ngaytu, siguradu nga tumbasan ku kamu it kagayenan. Begayan ku kamu it magagayeng bagay baw ega basta-bastang galang. Sigi na! Usayen mi nay tiyagaynep ku ngaytu baw ipaꞌyag mi nay kaꞌulugan ya.”

7Ta, siyaꞌupan niray tubag nira ngayti, nga magꞌaat, “Kagalang-galang nga Adiꞌ, ituturan mu daꞌan it amen nga manigsirbi mu i tiyagaynep mu ngayan, ka isaꞌun kapaꞌyag namen i kaꞌulugan ya.”

8Maat siꞌ it adiꞌ ngayti, “Namuyaan ku palan nga pagꞌatrasuun mi lamang i uras, sabap it nagnegan mi i napikir ku ngayan, 9nga ibetangan kut imyu it egay pagduwa-duwa in ega maꞌusay mi i tagaynep ku baw makapaꞌyag it aken i kaꞌulugan ya. Napagꞌisun-isunan mi nga teꞌag-teꞌagen baw ambutan mi aku. Ka pagꞌiꞌinawaren mi siguru nga mugad i kat pikir ku in pakaꞌlayan mi. Ala, sigi! Usayen mi na i tagaynep ku ngaytu, isaꞌun mamayaꞌ aku nga kaya mi nga ipaꞌyag i kaꞌulugan ya.”

10Katubag i mga mamimintuꞌ ngayti nga manigpaꞌyag it tagaynep, “Talagang egay taw situt sinirungat langit nga magkabwat it ipagpabwat mu ngayan. Ega gasiꞌ i adiꞌ, nga maski sang unu nay keseg baw kabantugan ya, nga murdin it atkayan kat mga may kepetan nga makakaꞌrut nga mamimintuꞌ baw manigpaꞌyag it tagaynep. 11Talagang makuriꞌ nayang buwaten i ipagtaꞌeg mu ngayan. Yay matuud, mga diyus lamang i makabwat kayan. Temed ta, daꞌsira magtataꞌid situt denaꞌ nga kaꞌibaan it taw.”

12Sabap it iti nga tubag, miyereꞌeret nay iseg it adiꞌ ngayti nga kulput na. Aypaꞌ ka ipiyagꞌurdin ya na nga imatayen i muꞌsang mga makakaꞌrut nga may kepetan duꞌun it Babilonia. 13Egay beken, ipiyapanaw nay urdin ngayti nga imatayen i mga may kepetan baw makakaꞌrut. Ta, unupat may timnulus it kana Daniel baw mga kaꞌibaan ya ngayti, ka imatayen gasiꞌ.

14Ta it atkayti, paribasay si Daniel, masepsep nga taw, siyugi-sugid ya si Arioc nga kapitan it mga guwardiya it pamalay-balay it adiꞌ. Ka ipiyakarguꞌ it ki Arioc ngayti i pangimatay it mga may kepetan. 15Iningkut yay kapitan, nga maat ya, “Unuka miyurdin nat atnakayang kabeꞌgat i adiꞌ?” Egay beken, itiyuturan ni Arioc it ki Daniel i pasar it tagaynep ngayti. 16Pagkaꞌrut ni Daniel, naꞌaduꞌun kanya it adiꞌ. Inupakat ya nga begayan naga kanya it timpu, ka ipaꞌyag ya i tagaynep ngayti.

17Pagkaꞌupakat ni Daniel, miyuliꞌ na kanya. Itiyuturan ya duꞌun it kana Ananias, Misael baw duꞌun it ki Azarias i iti nga bagay. 18Inupakat ni Daniel i mga kaꞌibaan ya ngayti nga pasanguꞌ-sanguꞌ sirang muꞌsa duꞌun it Ampuꞌang Diyus nga duꞌun it langit, nga magbebegbeg it muꞌsa. Angutun nira i tabang ya pasar it patagu-taguꞌ nga kaꞌulugan it tagaynep ngayti, isaꞌun daꞌsira maꞌimatay nga kaꞌibaan it mga makakaꞌrut ngayti nga may kepetan duꞌut Babilonia. 19Ta, iti nga delem, subuk ipiyatagaynep it Ampuꞌang Diyus it ki Daniel i inangut ya ngayti nga kaꞌulugan. Egay beken, biyantug ni Daniel i Ampuꞌang Diyus ngayti nga duꞌun it langit nga magbebegbeg it muꞌsa. 20Maat ya,

“Ampuꞌang Diyus, dapat nga bantugun ka it egay katupusan.

Talagang ega basta-basta i kasepsep mu baw keseg it guna mu. 21Ikaw i magpabaꞌgu it timpu. Ikaw i magpatindeg baw magꞌiriꞌ it mga pagkaꞌadiꞌ.

Ikaw i magbegay it kasepsep kat mga masepsep, baw kakayaan gasiꞌ kat mga mapipikir.

22Ikaw i magpalbaw it mga matꞌed baw mga patagu-taguꞌ nga bagay.

Maꞌyag it imu i maski kat kadleman paꞌ, baw duꞌun it imu i muꞌsang kaꞌyagan.

23Pagbantugun ku ikaw baw pagpasalamatan, ikaw nga Ampuꞌang Diyus it mga kagiyaringanan ku.

Ka binggayan mu aku it kasepsep baw kakayaan.

Kayti ibinggay mut aken i pagꞌangutun ku ngaytu asat imu, ka ipiyaꞌrut mut aken i tagaynep ngaytu it adiꞌ.”

Ipiyaꞌyag ni Daniel i kaꞌulugan it tagaynep ngayti

24Ta it atkayti na, naꞌaduꞌun siꞌ si Daniel it ki Arioc ngayti nga piyakarguꞌan it pangimatay it mga makakaꞌrut nga may kepetan duꞌun it Babilonia. Pagꞌabut ya, maat ya, “In mapakay, ega mu daꞌan pangimatayen i mga makakaꞌrut nga may kepetan. Ibaan mu aku it paꞌaduꞌun it adiꞌ ka ipaꞌyag ku i tagaynep ya.”

25Tiyaban ni Arioc it mereg-ereg si Daniel duꞌun it adiꞌ. Pagꞌabut nira, maat ya, “Kagalang-galang nga Adiꞌ, may naparagan ku nga esang taw, nga kaꞌuyutan it mga dakepan nga taga Juda, nga makapaꞌyag kunuꞌ it tagaynep mu.”

26Si Daniel ngayti nga piyangaranan nat ki Beltsasar, iningkut it adiꞌ. “Unu,” maat ya, “matuud nga makaꞌusay mut aken i tagaynep ku baw makasugid muy kaꞌulugan ya?”

27Katubag si Daniel, maat ya, “Itu nga kaꞌulugan nga pagꞌangutun mu ngaytu, talagang ega baytu makapaꞌyag it maski siyu nga may kepetan, mga makakaꞌrut nga mamimintuꞌ, mga manigmangmang u mga mamimintuꞌ nga manigpaꞌyag it tagaynep. 28Temed may esa duꞌun it langit nga magpalbaw it patagu-taguꞌ nga mga kaꞌulugan. Ampuꞌang Diyus tu kanya. Kayti, kat ipiyatagaynep ya ngayan it imu, kagalang-galang nga Adiꞌ, ipagpaꞌrut yat imu i in unuy magꞌabut kat pagdadarapaꞌen. Ta, atkaytuy tiyagaynep mu ngayan baw kaꞌulugan ya nga ipiyalteg it imu, iyan magbubuntul ka duꞌun it irigaꞌan mu.

29Kaꞌsang delem ngayan nga magbubuntul ka duꞌun it irigaꞌan mu, pagpanawun it pikir muy mga bagay nga magꞌabut kat pagdadarapaꞌen. Ta it pagpikiren muy atkayti, iyan Ampuꞌang Diyus, kanya nga magpalbaw it mga patagu-taguꞌ nga kaꞌulugan, ipiyalteg yat imu i mga magꞌabut ngaytu asan it malangbusan. 30Baw yay matuud, ipiyaꞌrut it aken i itung bagay, ega sabap it subraꞌ aku na it muꞌsang taw nga makakaꞌrut, in daꞌga isaꞌun lamang maꞌrutan mu i kaꞌulugan ya, baw masepsepan mu i pagpanawun ngayan it pikir mu.

31Tagaynep mu, kagalang-galang nga Adiꞌ, maat magleteg ka it esang dakulaꞌ nga banar baw magsilaw na nga tiyaw-taw. Maat magtitindeg tu duꞌun it sarungaan mu baw kaiꞌlaman na nga pagletganan. 32Ulu ya, bulawan nga bulun. Pirak nga binwat i deꞌgan ya baw mga alima ya. Tinaꞌi baw mga paꞌa ya, tumbaga i binwat. 33Mga kapusuꞌan ya, basiꞌ. Baw mga kararapa ya, sang peꞌtek, basiꞌ, sang peꞌtek, piyadsen nga lugtaꞌ nga dakut. 34Iyan sigi paꞌ nga leteg mu, sakaling may batu nga napiꞌsang nga gimnaring duꞌun it bukid. Batu ngayti, ega taw i nagpiꞌsang. Pagbaliling ya, nakaꞌiguꞌ duꞌun it aꞌay it tiyaw-taw ngayti. Egay beken, narunut-runut i naꞌiguꞌ ngayti nga aꞌay ya. 35Bawnga pagkaꞌanu siꞌ kayti, naꞌinek-inek nga muꞌsa i basiꞌ ngayti kat bilug ya, pati dakut ngayti, tumbaga, pirak baw bulawan ngayti. Egay naꞌped. Naꞌinek-inek nga muꞌsa, nga subung nat padek duꞌun it lusung. Bawnga ipinrad nga muꞌsa it deres. Egay maski unu nga naꞌped. Ta, baw siꞌ nga piꞌsang it batu ngayti, nga nakaꞌiguꞌ it tiyaw-taw ngayti, dimnakulaꞌ nat atna. Namalyu nang bukid nga ega teꞌe-teꞌeng, ka ikiyapnuꞌ nat muꞌsang banwa.

36Daꞌga baꞌ, kagalang-galang nga Adiꞌ, atkayan nay tiyagaynep mu? Ta, ipaꞌyag ku nat imu i kaꞌulugan ya. 37Ikaw i piyakamabantug nga adiꞌ. Ka inildawan ka it Ampuꞌang Diyus it pamegbeg baw ega basta-bastang keseg, kakayaan, baw kabantugan. 38Talagang ipiyagꞌildaw yat imu nga masakepan muy muꞌsang taw, ramu-ramu baw mga manu-manuk kat muꞌsang mga rugar. Ikaw i pagpaꞌiguꞌan it bulawan ngayti nga ulu.

39Mabut kat pagdadarapaꞌen nga may dumaꞌeg it kaꞌadiꞌan ngaytu it Babilonia. Temed kabantugan it kaꞌadiꞌan nga ipatindeg it dumaꞌeg ngaytu, ega kasbung it kabantugan it kaꞌadiꞌan mu ngaytu. Yay pagpaꞌiguꞌan it pirak ngayan. Temed ega naga maneꞌteꞌ ka may mabut nga ikatlung kaꞌadiꞌan nga iyan siꞌ i mandaꞌeg. Ikatlu ngaytu, yay pagpaꞌiguꞌan it tumbaga. Itu siꞌ i sumakep it muꞌsang banwa. 40Bawnga mabut nga daꞌgen i ikatlu ngaytu it ikaꞌpat. Ikaꞌpat ngaytu, yay pagpaꞌiguꞌan it basiꞌ, ka in unuy kadsen it basiꞌ ngaytu, yay kabilangan ya, ka talagang panranggaꞌen ya i muꞌsang daꞌgen ya. 41Ta, it naltegan mu nga kararapa it tiyaw-taw ngayti, sang peꞌtek basiꞌ, sang peꞌtek piyadsen nga dakut, atkayan nagay ikaꞌpat ngaytu nga kaꞌadiꞌan, aypaꞌ ka mabagiꞌ tu. Temed maski atkayan, may keseg ya naga, sabap it sang peꞌtek, basiꞌ naga. 42Baw paribasay kararapa ya ngayti, ipiyagragiꞌ nga basiꞌ baw piyadsen nga dakut, kat kaꞌadiꞌan ngaytu magragiꞌ gasiꞌ i keseg baw kalubayan. 43Ka maragiꞌan sira it belag nga duguꞌ sabap it pagꞌasa-asawaen, temed ega nagay pagꞌurunyun it ikaꞌpat ngaytu nga kaꞌadiꞌan, subung nagat basiꞌ baw dakut nga lamang ipiyagragiꞌ temed yay matuud, ega maglapet.

44Kat timpu it mga adiꞌ it ikaꞌpat ngaytu nga kaꞌadiꞌan, iyan Ampuꞌang Diyus nga duꞌut langit nga magbebegbeg it muꞌsa, patindeg kanyat kaꞌadiꞌan nga egay karanggaꞌan ya seked it kaꞌnu-kaꞌnu, baw egay maski siyu nga makasakep kaytu. Baw mabut nga ranggaꞌen yay beken ngaytu nga mga kaꞌadiꞌan, temed ega talagay kaꞌawaꞌan it itu ngaytung kaꞌadiꞌan nga ipatindeg it Ampuꞌang Diyus.#2:44 Natuman tu duꞌun it ki Jesus (Lucas 1:33). 45Iyan i pagpaꞌiguꞌan it naltegan mu ngayti nga batu nga napiꞌsang nga gimnaring duꞌun it bukid, nga batu ngayti, ega taw i nagpiꞌsang. Eeꞌ baꞌ, yanagay kaꞌulugan it batu ngayti nga nanranggaꞌ it basiꞌ, tumbaga, pirak baw bulawan ngayti seked it naꞌinek-inek ya.

Ampuꞌang Diyus nga subrang mabantug, ipiyaꞌrut yat imu, kagalang-galang nga Adiꞌ, i in unuy magꞌabut kat pagdadarapaꞌen. Tiyagaynep mu ngayan, kamatuudan yan talaga. Baw nakasiguru naga i paꞌyag ya.”

46Egay beken, nanluud i adiꞌ ngayti nga si Nabucodonosor duꞌun it sarungaan ni Daniel ka nagbegay it galang. Bawnga ipiyagꞌurdin ya nga pasalamatan si Daniel it may mga begay baw kamangyan. 47Maat ya it ki Daniel, “Nasiguru ku na nga Ampuꞌang Diyus mu, mataꞌas paꞌ kanya it muꞌsang mga beken nga pagsambaen it taw. Kanyay Ampuꞌan it muꞌsang mga adiꞌ. Kanya i magpalbaw it mga patagu-taguꞌ nga kaꞌulugan. Nasiguru kuytu sabap it nakapaꞌyag muy kaꞌulugan it tiyagaynep ku ngaytu.”

48Bawnga ipiyatindeg it adiꞌ ngayti si Daniel kat ega basta-bastang katengdanan, nga gubirnadur it puꞌun nga prubinsiya it Babilonia. Baw dakel talaga nga pasalamat i ipiyagbegay yat kanya. Binwat ya paꞌ si Daniel nga piyakapagbayaꞌen it muꞌsang mga makakaꞌrut nga may kepetan duꞌun it Babilonia ngayti. 49Baw ega diyaꞌga it adiꞌ ngayti i inangut ni Daniel nga rumraan i mga kaꞌibaan ya nga si Sadrac, si Mesac baw si Abednego nga manigpamaalaꞌ duꞌun it Babilonia ngayti. Temed si Daniel ngayti, duꞌun it pamalay-balay it adiꞌ i kanyang pagpangatengdananan.

Currently Selected:

Daniel 2: TBWONT

Highlight

Copy