Daniel 1

Nabetangan ni Daniel baw mga kaꞌibaan ya nga diyakepan it adiꞌ it Babilonia

[Mga 606 B.C.]

1Iyan tulu na nga taꞌun i pagꞌadiꞌ ni Joaquim, nga adiꞌ it Juda, miyabut i adiꞌ it Babilonia nga si Nabucodonosor, ka kiyulung yay siyudad it Jerusalem. 2Ta, diyaꞌeg si Joaquim ngayti, ka ipiyaꞌalima kanya it Ampuꞌang Diyus duꞌun it ki Nabucodonosor ngayti. Riyangpasan pay Templo, nga papagsambaan nirat Ampuꞌang Diyus, ka piyataꞌnan it Ampuꞌang Diyus si Nabucodonosor nga may pisiꞌen ya nga mga kagamitan duꞌun. Mga iti ngayti, tiyaban yat miyuliꞌ duꞌun it Babilonia bawnga idiyuꞌun yat pagdawaꞌan it kamanggadan nga duꞌun it balay nga papagsambaan it pagbete-beteꞌen nga diyus ya.

3Ipiyagꞌurdin gasiꞌ ni Nabucodonosor ngayti it ki Aspenaz, nga piyakamataꞌas nga katimbang ya, nga miliꞌ it in pirang kataawan nga mga Israelita nga kat duguꞌ it adiꞌ baw mga matataꞌas gasiꞌ nga duguꞌ it mga taw. 4Piliꞌen ya, mga lalaki nga mangaꞌwaꞌen paꞌ, nga makulaꞌsi baw magayeng pagletganan i pamilug nira, nga egay maski unu nga mintiraꞌ. Kaꞌilangan, malumuy ulu, madaliꞌ matulduꞌan, matalastas baw masepsep, mga taw nga mapakay mangatengdanan kat seled it pamalay-balay it adiꞌ. Mga itu ngaytu, tulduꞌan it ampang it taga Babilonia baw adalen it mga kasuratan it mapipikir nga mga taga duꞌun. 5Ipiyagꞌurdin gasiꞌ it adiꞌ nga garing kat sadili ya nga pangaꞌen baw pagꞌimnun i ipakaꞌen it kanira it aldaw-aldaw. Adalen sira it tulung taꞌun i tupusun bawnga pasirbiyen na sira duꞌun it adiꞌ.

6Uyut it napiliꞌ ngayti, may epat nga kataawan nga kat kuyunang mga tungtung-inapuꞌ ni Juda, nga si Daniel, si Ananias, si Misael baw si Azarias. 7Piyamaggantiyan nat piyakamataꞌas ngayting katimbang i mga ngaran nira. Piyangaranan nat pangaran kat ampang it taga Babilonia. Si Daniel ngayti, si Beltsasar na. Si Ananias, si Sadrac na. Si Mesac nay si Misael ngayti. Baw si Azarias, si Abednego na.

8Temed talagang pagpipikiren na ni Daniel nga maski sukdan, ega sumukdan it pangaꞌen ngayti nga pangaꞌen it adiꞌ baw pagꞌimnun ya ngayti, ka ega ireg ya nga rumaꞌway kanya kat panleteg it Ampuꞌang Diyus. Aypaꞌ ka inupakat ya si Aspenaz nga ega na iti i ipakaꞌen it kanira. 9Ta, kat pabetang-betang it Ampuꞌang Diyus, ireg it piyakamataꞌas ngayti nga katimbang nga paltegan ya si Daniel it magayeng nakem baw pabayaꞌ-bayaꞌan kanya. 10Takaꞌ maski atkayti, maat ya nagat ki Daniel, “Iyan lamang baꞌ, magꞌiꞌlam akut adiꞌ nga agalen ku, ka kanya mismu i nagsekat it in unuy kaꞌnen baw imnun mit aldaw-aldaw. Ta, in mamuyaan ya nga malulubay kamu, nga ega na surubung it mga kaꞌebay-ebayan mi, ega yay pagduwa-duwa nga papunggutan ya akut ulu.”

11Ta it atkayti, iyan siꞌ i inupakat ni Daniel, manigpamaalaꞌ nga piyaꞌarigra it piyakamataꞌas ngayti nga katimbang it ki Daniel ngayti, pati mga kaꞌibaan ya nga si Ananias, si Misael baw si Azarias. 12Maat ya, “Magayen, sukdanan mu kami it seledan it sang puluꞌ nga aldaw. Ipasdaꞌ it amen, inglay lamang, baw danum na lamang i pagꞌimnun namen. 13Pagkaꞌayaw it kapuluꞌ ngaytu, letganan mu nay amen nga bilug baw bilug it mga kamangaꞌwaꞌ namen ngaytu nga pagpakaꞌnen it pangaꞌen it adiꞌ, in unuy piyagbelagan. Bawnga padisir ka it amen uyun it in unuy mamuyaan mu.” 14Ta, napakay i manigpamaalaꞌ ngayti. Egay beken, siyukdanan ya na sira it seledat sang puluꞌ nga aldaw.

15Pagkaꞌayaw it sang puluꞌ nga aldaw, limniꞌwan nga makukulaꞌsi ga sira baw nanggayen gay bilug, magayen pat bilug it kamangaꞌwaꞌ nira ngayti nga pagpakaꞌnen it pangaꞌen it adiꞌ. 16Ta it atkayti, inglay na lamang ngayti i ipagpasdaꞌ ya it kanira baw danum na lamang ngayti i ipagpaꞌinum. Ega na pangaꞌen baw pagꞌimnun ngaytit adiꞌ.

17Talagang inildawan it Ampuꞌang Diyus i epat ngayti nga kamangaꞌwaꞌan, nga maꞌrutan nirang banar i muꞌsang ipagpangadal it kanira. Puyra paꞌ it iti, binggayan ya si Daniel it ega basta-bastang kasepsep. Magkasepsepan yay kaꞌulugan it kalasi-kalasi nga bagay nga pagtagaynepen baw maski mga bagay nga subuk pagtagaynepen, lamang ega magꞌigaꞌ.

18Pagkaꞌayaw it tulung taꞌun nga ipiyagꞌaat ngaytit adiꞌ nga kaꞌlay it adalan it mga kamangaꞌwaꞌan ngayti, ipiyaꞌadap na sira ni Aspenaz duꞌut adiꞌ nga si Nabucodonosor. 19Inesa-esa sira it adiꞌ it pakisugi-sugid, namuyaan ya nga subrang makakaꞌrut i epat ngayti, si Daniel, si Ananias, si Misael baw si Azarias na ngayti. Aypaꞌ ka riyumraan sira nga mga katimbang it adiꞌ ngayti. 20Yay matuud, kat muꞌsang mga bagay nga iꞌabang it kanira, namuyaan it adiꞌ ngayti nga ega basta-basta i kasepsep it epat ngayti. Talagang daꞌeg paꞌ niray muꞌsang makakaꞌrut nga mamimintuꞌ baw manigmangmang duꞌun it kaꞌadiꞌan ya ngayti.

Currently Selected:

Daniel 1: TBWONT

Highlight

Copy