Daniel 4

Nanagaynep siꞌ si Nabucodonosor, nga nakapaꞌyag siꞌ ni Daniel i kaꞌulugan ya

[Mga 595 B.C.]

1Kaꞌsa, may ipiyasurat it adiꞌ nga si Nabucodonosor, nga ilingkep yat muꞌsang banwa nga pagsasakpan ya. Magꞌaat i ipiyasurat ya,

“Kamu nga muꞌsa nga mga sinakepan ku, nga maski unu nga bangsa u ampang, sana manggayen nga banar baw maꞌimbeng i pangaꞌgenan mi.

2Ireg ku nga ituturan it imyu i mga tandaꞌanan nga mga kalililuꞌang bagay kat pangaꞌgenan ku nga binwat it Ampuꞌang Diyus nga Piyakamataꞌas.

3Kanya ngaytu, subraꞌ talaga nga ega basta-basta i mga tandaꞌanan nga mga kalililuꞌang bagay nga pagbuwaten ya.

Baw kaꞌadiꞌan ya, talagang egay kaskedan. In daꞌga seked it kaꞌnu-kaꞌnu, kanya i magbebegbeg it muꞌsa.

4Tagnaꞌ, aku nga si Nabucodonosor, nangaꞌgenan it magayen nga pangaꞌgenan duꞌun it mabakas nga balay ku baw pirmi nga sakyan i muꞌsa. 5Temed kaꞌsa, nga magbubuntul aku duꞌun it irigaꞌan ku, nanagaynep aku it kaiꞌlaman na nga panagaynep. Talagang nalibegan it pikir ku i naltegan ku ngayti. 6Aypaꞌ binwat ku, ipiyatawag ku i muꞌsang mga makakaꞌrut nga may kepetan situt Babilonia ngaytu, ka isaꞌun kapaꞌyag nira i kaꞌulugan it tiyagaynep ku ngayti. 7Natiꞌmes i muꞌsang mga makakaꞌrut nga mamimintuꞌ, mga manigmangmang, mga mamimintuꞌ nga manigpaꞌyag it tagaynep baw mga may pananamayaꞌ. Itiyuturan kut kanira i tiyagaynep ku ngayti temed daꞌsira nakapaꞌyag it kaꞌulugan ya. 8Ta it atkayti na, miyadap sinit aken si Daniel, nga piyangaranan namen it Beltsasar nga pinsiꞌ kat ngaran it diyus ku nga si Bel. Kat pasepsep ku, si Beltsasar ngaytu, talagang pagpanakman kanya it mga ega basta-bastang mga diyus. Ipiyagꞌusay ku nat kanya i tiyagaynep ku ngayti.

9Maat ku, ‘Beltsasar, nga pagbayaꞌen it mga makakaꞌrut nga mamimintuꞌ, magkaꞌrutan ku nga pagpanakman ka it mga ega basta-bastang mga diyus, aypaꞌ ka magkapaꞌyag muy maski unu nga patagu-taguꞌ nga kaꞌulugan. Usayen ku i tiyagaynep ku ka ipaꞌyag mut aken i kaꞌulugan ya. 10Ka magpaꞌa-paꞌaat i tiyagaynep ku ngayti, maat may sang puꞌun nga piyakamataus nga kayu nga magtutubuꞌ nga magtetenga-tengaꞌ it banwa. 11Maat timnaus nang timnaus seked it subuk magtutumbur na duꞌut langit i ugbus ya, baw magkalawag na it katataawan kat paꞌari-aring rugar situt sinirungat langit. 12Maat maluꞌgum i daꞌun it kayu ngayti, baw nanluyut it buwaꞌ nga magayeng pagkaꞌnen. Iyan mga ramu-ramu, magpapaꞌlung na duꞌun, baw mga manu-manuk, mamagpugad na duꞌut sanga ya ngayti. Talagang muꞌsa nga giyuna, duꞌun na i pagpisiꞌan it pagkaꞌnen.

13Maat naltegan ku i esang anghil nga nanlampud nga garing duꞌun it langit, nga esa kanya it mga manigbantay. 14Maat gimnaꞌuy kanya nga magꞌaat, “Pukanen nay iyan nga kayu. Panigbasen nay mga sanga ya baw raprapen i mga daꞌun ya. Iyan buwaꞌ ya ngayan, isari nat pamuntal. Pandinggawun i mga magpapaꞌlung ngayan nga ramu-ramu, pati mga manu-manuk ngayang mamagpupugad asat sanga ya. 15Temed iyan tuꞌud ya baw mga gamut ya, pataꞌnan lamang. Ega riꞌnge-riꞌngen. Buwaten, lulupan it basiꞌ baw tumbaga, bawnga pataꞌnan na lamang asat pagpupꞌunan ya ngayan.

Eeꞌ baꞌ, kanya ngaytu nga pagpaꞌiguꞌan kaytu, pataꞌnan lamang nga magkaꞌemeg it namug baw pakiꞌibaan it mga ramu-ramu duꞌun it kadidikutan. 16Gantiyan i pikir ya it pikir it ramu-ramu, seledan it pitung taꞌun.

17Ituꞌun ngaytu, ukuman nga ibiyetangan it mga anghil nga manigbantay. Ibiyetangan niray atkaytu isaꞌun matantuwan it muꞌsang katataawan nga Ampuꞌang Diyus nga Piyakamataꞌas, kanyay magbebegbeg it muꞌsa. Kanya i magpaꞌadiꞌ it in siyuy ireg ya nga papagꞌadiꞌen, abir in timawaꞌ nga taw.”’

18Maat ku, ‘Itu naytuy tiyagaynep ku, Beltsasar. Kayti ipaꞌyag mut aken i kaꞌulugan ya. Ka egaytu nakapaꞌyag it aken it maski siyu it mga makakaꞌrut nga may kepetan situt kaꞌadiꞌan ku. Takaꞌ in ikaw, pagsisiguruun ku nga kapaꞌyag mut aken, sabap pagpanakman ka it mga ega basta-bastang mga diyus.’

19Ta, si Daniel ngayti, nga pagpangaranan na ngaytit ki Beltsasar, naꞌlay nga ega nakariꞌe-riꞌeng ka talagang nalibeg i pikir ya. Inaat ku kanya, ‘Beltsasar, ega naga palibegan mut pikir mu i tiyagaynep ku ngayan u kaꞌulugan ya.’

Katubag kanya, maat ya, ‘Agalen ku, sana mga kalaban mu i pagpaꞌiguꞌan it tiyagaynep mu ngaytu, baw kaꞌulugan ya, sana sira naga i abutun! 20Ka iyan tiyagaynep mu ngaytu nga kayu nga dimnakulaꞌ, nga timnaus seked it subuk magtutumbur nat langit i ugbus ya, baw magkalawag na it katataawan kat paꞌari-aring rugar situt sinirungat langit, 21baw madaꞌunun, nanluyut it buwaꞌ nga magkakaꞌen it kadakel, pagpapaꞌlungan it mga ramu-ramu baw pagpugadan it mga manu-manuk, 22egaytuy beken nga pagpaꞌulugan in daꞌga ikaw, kagalang-galang nga Adiꞌ. Sabap nagmabantug ka baw kiminseg. Subuk magrarapat nat langit i kabantugan mu, ka pagsasakpen mu na i maski alaid nga mga banwa.

23Bawnga may naltegan mu nga esang anghil, nga esa it mga manigbantay, nga nanlampud nga gimnaring duꞌun it langit. Inaat ya nga pukanen nay kayu ngaytu baw ramaten, temed ega riꞌnge-riꞌngen i tuꞌud baw mga gamut ya, in daꞌga, lulupan it basiꞌ baw tumbaga, bawnga pataꞌnan na lamang duꞌun it pagpupꞌunan ya. Inaat ya paꞌ nga, pagpaꞌiguꞌan kaytu, pataꞌnan lamang nga maꞌemeg it namug baw pakiꞌibaan it mga ramu-ramu duꞌun it kadidikutan, seledan it pitung taꞌun. 24Ta, ituytu i kaꞌulugan ya kayan, kagalang-galang nga Adiꞌ. Iyan ngayan, Agalen ku, ukuman nga ibiyetangan it imu it Ampuꞌang Diyus nga Piyakamataꞌas. 25Talagang mabut nga subuk imugawun ka, nga ega na situt taawan i taꞌidan mu. Kaꞌibaan mu nay mga ramu-ramu, baw kumaꞌen ka it dikut nga subung it mga bakaꞌ. Pataꞌnan ka nga magkaꞌemeg it namug, seledan it pitung taꞌun. Atkaytu i pangaꞌgenan mu seked it matantuwan mu nga Ampuꞌang Diyus nga Piyakamataꞌas i magbebegbeg it muꞌsa. Kanya i magpaꞌadiꞌ it in siyuy ireg ya nga papagꞌadiꞌen. 26Ta sabap gasiꞌ it sekat ngayan nga, tuꞌud ya baw mga gamut, pataꞌnan lamang asat pagpupꞌunan ya, ireg sugiden kayan, maꞌuliꞌ mu naga i kaꞌadiꞌan mu kat timpu nga kilalaen mu nga Ampuꞌang Diyus i magbebegbeg it muꞌsa. 27Aypaꞌ, kagalang-galang nga Adiꞌ, in mapakay pagnegan mu i masugid ku. Sana indiꞌan mu nay karaꞌe-raꞌetan mu. Baꞌguun mu nay adat mu. Magayen na nga adat i adaten mu, nga maꞌildaw ka na it mga makukuriꞌ. Ka barang in atkayan, maneꞌteꞌ naga nga maꞌimbeng i pangaꞌgenan mu.’ ”

Natuman naga duꞌun it ki Nabucodonosor i tiyagaynep ya ngayti

[Mga 595 seked it 588 B.C.]

28Maat pay ipiyasurat it adiꞌ nga si Nabucodonosor, “Ta, muꞌsa ngayti, nagꞌabut nga matuud it aken. 29Nagtaꞌlib i sang puluꞌ may duwang bulan garing it pagpaꞌyag ngayti ni Daniel it tiyagaynep ku. Kaꞌsa magpanaw-panaw aku duꞌun it mapatag nga atep it mabakas ngaytung balay ku situt Babilonia. 30Maat ku, ‘Talagang mabantug i siyudad ngaytu, nga puꞌun nga siyudad it Babilonia. Akuy nagpatindeg#4:30 May siyudad nga lagi duꞌun, temed ireg sugiden ni Nabucodonosor, kanya i nagpalayaw baw nagpabakas seked it ega talaga basta-basta i kabantugan it siyudad ngayti. kaytu kat ega basta-bastang keseg ku, baw binwat ku nga bagay talaga nga mataꞌidan it adiꞌ, baw arandeman it kadakulat kabantugan it pagkaꞌadiꞌ ku.’

31Ega paꞌ natupus i pagꞌampangen ku ngayti, may nagnegan ku nga ampang nga gimnaring duꞌun it langit, nga magꞌaat, ‘Adiꞌ nga Nabucodonosor, pagnegan muytu. Awaꞌen naytuy kaꞌadiꞌan ngaytu kat pamegbeg mu. 32Kayti subuk imugawun ka, nga ega na situt taawan i taꞌidan mu. Kaꞌibaan mu nay mga ramu-ramu baw kumaꞌen ka na it dikut nga subung it mga bakaꞌ. Seledan it pitung taꞌun i kaꞌlay it atkaytuy kabetangan mu, seked it kilalaen mu nga Ampuꞌang Diyus nga Piyakamataꞌas i magbebegbeg it muꞌsa. Kanya i magpaꞌadiꞌ it in siyuy ireg ya nga papagꞌadiꞌen.’

33Iti nga lagi, natuman kat kaꞌgenan ku i inaat it ampang ngayti nga nagnegan ku. Ka subung akut inimugaw situt taawan. Nagpapuꞌun aku nat kumaꞌen it dikut nga subung na it bakaꞌ. Naꞌemeg aku nat namug, baw miyabwatay nay buꞌuk ku nga subung nat bulbul it agila. Mga kukuꞌ ku, atnat kukuꞌ it manu-manuk nga makukuꞌun.

34Temed pagtaꞌlib it ipiyagtirminu nga timpu, aku nga si Nabucodonosor, timningaraꞌ duꞌun it langit, bawnga nagꞌuliꞌnan siꞌ i pikir ku nga lagi. Aypaꞌ ka piyasalamatan ku i Ampuꞌang Diyus nga Piyakamataꞌas. Biyantug baw giyalang ku kanya ngaytu nga egen it egay kaskedan.

Kanya nga pamegbeg, egay katupusan ya. Maneꞌteꞌ i kaꞌadiꞌan ya seked it kaꞌnu-kaꞌnu.

35Muꞌsa palan nga taw situt sinirungat langit, egay kuwintaꞌ.

In unuy kaꞌirgan ya, iyan i pagbuwaten ya kat mga anghil duꞌun it langit baw kat katataawan situt denaꞌ.

Ega talagay mapakay nga mamasul it kanya u makaparuri it pagbuwaten ya.

36Iyan nagꞌuliꞌnan siꞌ i pikir ku, natanggap ku siꞌ i paggalang baw kabantugan ku kat pagkaꞌadiꞌ ku. Namagꞌadap sit aken i mga katimbang ku baw beken nga may mataꞌas nga katengdanan. Nakatiꞌen-tiꞌen aku siꞌ kat pagkaꞌadiꞌ ku baw subrang dimnakulaꞌ i kabantugan ku. 37Aypaꞌ ka aku nga si Nabucodonosor, magbantug baw magbegay it galang baw magpamatuud it kataꞌasan it Adiꞌ nga duꞌun it langit. Sabap muꞌsa nga buwat ya, purus tamaꞌ baw mataldeng. Baw talagang magkabwat ya nga ipagpababaꞌ i mga mapiyataꞌas-taꞌas.”

Currently Selected:

Daniel 4: TBWONT

Highlight

Copy