Mark i̱ Holisso 11

Chapta Awah Achaffa (11)

Jesus at Jerusalem Tamáhah o̱t Chokkowa

1Jesus hicha iyákayya alhíha yat Jerusalem tamáhah bili̱ka oklah áyalahmat, Bethphage tamáhah hicha Bethany tamáhah, Olives Nanih Cháha (Mount of Olives) itto̱ma ma̱ oklah o̱t atápachittók. Hihma̱ Jesus at iyákayya toklo kano tikba̱lit pit chaffichittók. 2Hicha Jesus at im áchihmat, “Tamáhah, tikba ít tala̱yah ma̱ óhittiyáchih. O̱t hash chokkówah akíni kat, issobah haksobis faláya himitta, kanahat o̱binílit pisa kiyo ka̱, hash ahócháchi̱h ókih. Hikmat, isht talakchi ma̱ i̱ sho̱ffi cha issoba haksobis faláya himitta ma̱ isht hash samálá chikih. 3Hikma̱ kanahat katína ish mihchih ahnit chi ponaklokma̱, ‘Chitókaka yat bannah ókih. Ashshali̱t falammi̱t isht aláchi̱h akínih ókih,’ hash ácha chikih,” im áchittók.

4Hitoko̱, tokloh mat ittiyáchittók. Hicha issobah haksobis faláya himitta mat okissa itto̱ma ma talakchih ósh hina ima pit hiki̱ya ná o̱t ahóchit oklattók. Isht talakchi ma̱ sho̱ffih ósh a̱shwah ma̱, 5kaniyómi kat oklah hiyohma̱ya tokósh, oklah i̱ponaklohmat, “Katína issobah haksobis faláya ma̱ isht talakchi i̱sho̱ffih ósh hash ashwah?” oklah im áchittók. 6Hihma̱ Jesus at nánaho̱ i̱makáchi kásh ma̱, oklah alhíha im anólihma̱ isht ittiyáchá hi̱nah ka̱ oklah i̱ haklottók.

7Jesus iyákayya toklo kásh mat issobah haksobis faláya ásh ma̱ iláwít Jesus isht imónattók. Hihmat oklah ínáifokka ya̱ issobah haksobis faláya ma̱ innalli o̱patálittók. Hihma̱ Jesus at o̱binílittók. 8Oklah alhíha la̱wa kat i̱náfokka ya̱ hina apaknaka o̱patalittók. Hihma̱ oklah i̱la kato Jesus ayoppacháchi̱ kat iti hashtap oklah tablittók hicha hina apaknaka o̱patálittók.

9Hihma̱ Jesus tikba ittanóho̱wa, hicha olbal ittanóho̱wa áyína kat oklah tappalat, “Chihówa holítoblit ayoppachih! Chihówa yat holitoblih ókih, yammakósh Chihówa átok polla ná alah óka̱! 10Chihówa yat holítoblih ókih, David, hapi̱ ti̱kba a̱ttah chásh ma̱ im áyo̱cholóli yat hapi̱ mi̱ko yósh mi̱ti ka̱! Chihówa aba yakni biníli ma̱, oh holítoblit ayoppachih!” áchittók.

11Jesus at Jerusalem o̱t chokkówa cha Jew im Áyittanáha Chito (Jewish Temple) pit chokówattók hihmat nánah mako̱ pist tahlittók. Hihókako̱, nittak at shobit tahah átoko̱ Jesus hicha iyákayya awahtokloh (12) yómi kat Bethany tamáhah falámat ilhkólittók.

Jesus at Bihhi Chito Api Nán Im apísah

12O̱t onnah ma̱ Jesus hicha iyákayya alhíha yat Bethany tamáhah ma̱ ákanalittók. Ittanóho̱wah ma̱, Jesus at hokchaffottók. 13Mishihma ma̱ bihhi chito (fig) api yat hashtap (leaves) alótah ósh hiki̱ya ka̱ Jesus at pit pi̱sattók. Hihmat bihhi chito at iti lapohma̱yak mah nánakma̱ pist iyattók. Hihókako̱, bihhi chito yat offo hi̱nah ka̱ hashi yat onah kiyoh ki̱shattók, hitoko̱ bihhi chito at ikshottók. 14Hihma̱, Jesus at api ma i̱makáchihmat, “Himma̱kma̱, kanahat nán ani (fruit) ya̱ chim áyi̱páchi̱h kiyoh ókih,” im áchittók. Yappa̱ makáchika̱, Jesus iyákayya alhíha yat oklah ha̱klottók.

Jesus at Jew Im Áyittanáha Chito Iyah

15Jesus hicha iyákayya alhíha yat Jerusalem oklah áyonahmat, Jew im Áyittanáha Chito ma̱ wahnota tali áfolóta o̱t chokówattók. Hihmat kanahat nán áka̱chih kiyokmat ná cho̱pah ósh o̱t ma̱ya ka̱ pisahmat, Jesus at yómi ka̱ kochawihlit tahlittók. Hicha iskali ittatóba alhíha ya̱ i̱ nán átalóli filimmittók. Hikmat, pachi yoshóba (dove) ka̱pila alhíha akmáko̱ im ábiníli filimmit pilattók. 16Hikmat oklah alhíha yat nána ka̱ ka̱piláchi̱h ósh Jew im Áyittanáha Chito áyonak ma̱, Jesus at lhopolla híkiyo ahnittók. 17Hihmat Jesus at oklah alhíha ya̱ nán im ábachit hikít iyattók. Hicha áchihmat, “Holisso Holittópa yat áchikat, ‘A̱ chokka yat okloshi alhíha móma kat anno̱pa ilbashsha áyasilhha chokka áchi̱h ókih,’ áchittók. Hihókako̱ ná ho̱kopa alhíha yat áloma yo̱ oklah hash im ikbishkih!” im áchittók. 18Hihma̱ priest i̱noshkobóka alhíha hicha Moses i̱ Nán Alhpissa im ábachi alhíha yat nána ho̱ áchitoka̱ oklah haklottók. Hihmat, kanihchih ósh oklah aba̱ hi̱nah kat hoyot ikít ilhkólittók. Hicha, Jesus a̱ oklah i̱ nokshópattók, oklah moyyóma kat Jesus at nánaho̱ ábachi ka̱ oklah anoklhaka̱chah fihnah átoko̱. 19Okítiyá ho̱sihma̱, Jesus hicha iyákayya alhíha yat tamáhah ma̱ oklah ákanallittók.

Bihhi Chito Api Isht Imma Ya̱ Nan Isht Imábachih

20A̱toko̱ o̱t onnah ma̱ Jesus hicha iyákayya alhíha yat ilhkólih ósh ittanóho̱wah mat bihhi chito api ásh at illit, shilat taha, hikmat akshish móma kat shilat taha óka̱ oklah pi̱st o̱t ilhkólittók. 21Hihma̱ Peter at pit ikkanattók Jesus at api ma̱ nánaho̱ imáchitoka̱. Hihmat Peter at áchihmat, “Nán im ábachi mah, pisah! Api ya̱ bihhi chito at ik offo káchi̱ho̱ ish im apísa kásh at shilat taha,” im áchittók.

22Hihma̱ Jesus at iyákayya alhíha ya̱ i̱makáchihmat, “Chihówa oh i̱ yimmih! 23A̱lhi hachim áchilíshkih, Chihówa ish i̱ yimmi hicha, chiyimmi kat a̱lhi hokma̱ nanih cháha pa̱, wakáya cha oka chito pit tolobli, hash im áchá hi̱nah, hikma̱ yohma̱chi̱h ókih. 24Hitoko̱, yappa̱ hachi̱ makálih ókih, anno̱pa ilbashsha hash asilhhakmat, nánaho̱ hash asilhlhatokat, hash ísháchi̱h kat yimmi ho, hikma̱ Chihówa yat chimma chi̱h ókih. 25Anno̱pa ilbashsha asilhháchi̱h ósh hash hikíyak mat, ti̱kbak ano kanahat ná ik alhpíso chiya mihchitok ma̱ hash i̱ kashoffáshkih. Yohmik ma̱ Chi̱ki aba biníli mat hachishnak ma̱ nán ik álhpíso hash mihchitoka̱ hachi̱ kashoffáchi̱h ókih. 26Hihókakósh kanah hash i̱ kashoffih kiyoh okma, Chi̱ki aba biníli at hachishnak ma̱ ná ik alhpíso hash mihchitok a̱ hachi̱ kashoffáchi̱h kiyoh ókih,” im áchittók.

Oklah Alhíha Yat, Jesus a̱ I̱ponakloh, Kanah Ósh Nán Alhpisa Imatoka̱

27Jesus hicha iyákayya alhíha yat Jerusalem falámat áyonattók. Hihmat, Jew im Áyittanáha Chito wahnota tali áfolóta (courtyard) ma̱ nówat lhopólih ósh ittanoho̱wahma̱, priest i̱ noshkobóka alhíha, Moses i̱ Nán Alhpisa im ábachi alhíha, hicha Jew tikba hikíya alhíha yat Jesus oklah imónattók. 28Hihmat oklah i̱ponaklohmat, “Nána yómi ka̱ ish mihchi ka̱, katah ósh ish mihchá hi̱nah ka̱ chi̱ mokófa toko̱ ish míchih? Katah ósh ish míchachi̱ ka̱ tikba chihílichí toko̱?” im áchittók.

29Hihma̱ Jesus at afalámmi̱t im áchihmat, “Ná ponaklo achaffa ka̱ hachi̱ ponakloh sannah. Hikma̱, hassam anólikma̱, ná míchílikat, kanímmáko̱ nán alhpisa áyishíli tokat chim anóliláshkih. 30Katah ósh John at kana ha̱ baptismochá hi̱na ka̱, nán alhpisa imátok cho? Chihówa aba yakni biníli másh imátoko̱, cho, hattak alhíha akósh imatok? amano̱lih,” im áchittók.

31Hihma̱ yómi kat oklah ittimáchihmat, “Chihówa ásh John a̱ nán alhpisa imátok, iláchá híkiyoh. Yappa̱ ímakáchikma̱, Jesus at, ‘Katína, John átokma̱, hachik i̱ yimmitok ó?’ áchit hapi̱ ponakláchi̱ kat. 32Hikmat, ano̱ti nánit hattak alhíha akósh John at baptismochá hi̱na ka̱ nán alhpisa imátok oklah iláchá híkiyoh,” oklah áchittók. Oklah alhíha móma kat John at hopayyih holittópa yo̱ oklah yimmih átoko̱, oklah alhíha ma̱ i̱ nokshópattók.

33Hitokósh Jesus oklah i̱makáchihmat, “Oklah kil ikkánoshkih,” im áchittók. Hihma̱ Jesus at áchihmat, “Akma̱ hachim anóliláchi̱h kiyoh ókih, nána yómi ka̱ mihchili ka̱, kanah ósh nán alhpisa amatoka̱,” im áchittók.

Currently Selected:

Mark i̱ Holisso 11: CHTW

Highlight

Copy