Mark i̱ Holisso 10

Chapta Pokkolih (10)

Ittika̱chih Isht Imma Ya̱ Nan Isht Ímábachih

1Hihmat Jesus at yamma̱ ákanallittók, hihmat Judea yakni iyattók. Hihmat Jordan Bók i̱tannap onattók. Hihma̱ hima̱kma oklah lawa alhíha yat Jesus im áyalattók, hikma̱ im ábachih ósh a̱ttah bíkatok ósh, im ábachit hikit iyattók.

2Hihma̱, Pharisee alhíha kaniyómikat, Jesus at nána makáchi kat ik i̱tiballi ahnit oklah haksichih bannattók. Hitokósh oklah imóna cha i̱ponaklohmat, “Hattak at itikchi ka̱chi ka̱ alhpísa ho̱?” oklah im áchittók.

3Hihma̱ Jesus at áchihmat, “Moses i̱ Nán Alhpisa yat nátaho̱ ish mihcháchi̱ ho̱ makáchiho?” im áchittók.

4Hihma̱ afálammi̱t oklah imáchihmat, “Moses i̱ Nán Alhpisa yat, hattak at itikchi ya̱ ittika̱chi holisso íma cha kani pit chaffichá hi̱nah ho̱ makáchih,” im áchittók.

5Hihma̱ Jesus at áchihmat, “Hachim ánokfilla at kallo átoko̱, anno̱pa ma̱, Moses at i̱cho̱lit hachi̱ bohlittók. 6Hihókako̱, ammónah chásh ma̱, Chihówa yat yakni ikbih mat hattak hicha ohóyoh ikbittók. 7Makátoko̱ hattak at i̱ki hicha ishki i̱filammicha ohóyoh ittawáya. 8Hikmat hattak ma̱ hicha im ohóyoh mat haknip achaffa tobah ókih. Himakno̱, haknip tokloh kiyoshkih, hikásh, haknip achaffah ókih. 9Makátoko̱, Chihówa akósh ittafammichi toko̱, kanahat ik itti̱filammi̱cho káshkih,” im áchittók.

10Hihma̱ Jesus hicha iyákayya alhíha yat falámat chokka abóha oklah chokkówah ma̱, nána isht anópoli kásh ma̱ oklah apónaklochih mómattók. 11Hihma̱ Jesus at áchihmat, “Hattak at ittikchi ka̱chicha ohóyoh i̱la ittawáyakmat, ittikchi attókma̱ imayashshachi ókih. 12Hikma̱ ohoyohat i̱hattak ka̱chi cha hattak i̱la ittawáyakmat, mák mákósh i̱hattak áttokma̱ imayashshachi ókih,” im áchittók.

Jesus at Alla Chipo̱ta Alhiha Ya̱ Holítoblih

13Oklah kaniyómíkat im alla chipo̱ta alhíha ya̱, Jesus isht imálattók, ibbak o̱bohli cha holitobláchi̱ho̱. Hikako̱, Jesus iyákayya alhíha yat, ataklammit issá hi̱nah ahnit imano̱littók. 14Jesus at yappa̱ pisahmat, nokówattók. Hicha oklah i̱makáchihmat, “Alla chipo̱ta alhíha mat ik áyala, hikma̱ ataplichih hachinnanah. Kanah ósh alla chipo̱ta alhíha yappak ohmih okma̱, Chihówa im ápihlichíka yat iláp ókih. 15A̱lhi hachim anólilishkíh! Alla ossi ohmih ósh na̱ yimmi hash i̱shih kiyoh okmat, Chihówa im ápihlichíka ya̱ hash chokkowáchi̱h kiyoh ókih,” im áchittók. 16Hihmat Jesus at alla chipo̱ta alhíha ma̱ móma ka̱ shólittók. Hicha ibbak o̱bohli cha holítoblittók.

Hattak Yóchito

17Jesus at hina nówah ósh a̱yahma̱, hattak at balít imónattók. Hicha iyyi kaláha isht o̱ hikíya cha Jesus i̱ ponaklohmat, “Nán im ábachi achokma mah, nátaho̱ mihchilih okmákósh áyokcha̱ya billíya ishílá hi̱nah choh?” im áchittók.

18Jesus at afálammi̱t im áchihmat, “Katína achokmá ish sa hóchífoh? Chihówa akilla kásh achokmá ókih. 19Moses i̱ Nán Alhpisa ya̱ ish ikkánah: ‘Kanah ish abinnah, hash ittawayá kiyo kat hash ittibánosihinnah, nána ish ho̱kopannah, kanaha̱ ish á holabinnah, kanah ish haksichinnah, chishki hicha chi̱ki ish holítobláshkih,’” im áchittók.

20Hihma̱ hattak mat áchihmat, “Nán im ábachi mah, alla siyah mómah hikit himak ala ka̱, nán alhpisa pa̱ móma ka̱ i̱báti̱yali̱ ná himakkah,” im áchittók.

21Hihma̱ Jesus at hattak ma̱ ahchokmat písat kaníyattók. Hihmat hattak ma̱ i̱hollottók hicha áchihmat, “Nána achaffah mómaka̱ ish mihchih okmak áchi̱h. Nánah ósh chishno okmat móma ka̱ o̱t ka̱chi cha iskali ma̱ ilbashsha alhíha o̱t imah, ish mihchik makósh aba yakni ma, nán halbina yat chimásháchi̱h ókih. Hicha siyákayya,” im áchittók.

22Hihma̱ hattak mat yóchito fihnah átokósh Jesus at nána áchitok ma̱ haklohmat nokha̱kloh fihnah ósh kanallittók.

23Hihma̱ Jesus at iyákayya alhíha pit písacha im áchihmat, “Yóchito alhíha yat Chihówa im ápihlichíka chokkowáchi̱ ka̱ palammi fihnah ókih!” im áchittók. 24Hihma̱ Jesus iyákayya alhíha yat yappa̱ oklah haklohmat oklah noklhaka̱cha fihnattók. Hitoko̱ Jesus at oklah i̱makáchih mómah mat, “Siyákayya alhíha hachiyah mah! Chihówa im ápihlichíka chokkowáchi̱ ka̱ palammih ókih! 25Camel at chofak oshi inishkin álhopolláchi̱ ka̱, palammih ókih. Hikásh, hattak yóchito ato Chihówa im ápihlichíka chokkowáchi̱ ka̱, palammi kat i̱shahlih ókih,” im áchittók.

26Hihma̱ Jesus iyákayya alhíha yat yappa̱ haklohmat, oklah noklhaka̱cha kat i̱shahlittók. Hihmat oklah itti̱ponaklohmat, “Akma̱, katit kanahat áyokcha̱ya billíya isháchi̱hchi?” oklah ittim áchittók.

27Hihma̱ Jesus at oklah ha̱ ahchokmat pisat kaniya cha im áchihmat, “Oklah alhíha yat yappa̱ iláp aki̱li kat mihcha híkiyo, hihókako̱ Chihówa ato nánah ohmako̱ mihchá hi̱nah ókih,” im áchittók.

28Hihma̱ Peter at i̱makáchihmat, “Hapish náto, oklah í chi yákayyáchi̱ kat nána móma ka̱ oklah i mokoffitok ókih,” im áchittók.

29Hihma̱ Jesus at i̱makáchihmat, “A̱lhi hachim anólilíshkih, kanahat i̱chokka kiyokmat ittiyápishi, i̱tik, i̱ki, ishki, hicha, im alla alhíha, kiyokmat im osápa yómika̱, ano hicha am anno̱pa isht imma átok polla ná oklah mokoffik ma̱, 30Chihówa yat alhtoba imáchi̱h ókih. Yakni apaknaka pano̱, chokka alhíha hicha ittiyápishi, i̱tik, ishki, im alla alhíha hicha im osápa ya̱ talhípa achaffa (100) isht i̱ shahlih móma ka̱ oklah isháchi̱h. Hikásh nána isht ápalammi áyína kat awa̱t a̱yáchi̱h ókih. Hihókakósh nittak tikba mi̱ti ka̱, áyokcha̱ya billíya ya̱ isháchi̱h ókih. 31Hihátokósh himak ma̱yah pat la̱wa kat ti̱kba yatok kiya, nittak tikba mi̱tikano ishtayyópi áchi̱h. Hikma̱ himak ma̱ya la̱wa kat ishtayyópi átok mákósh, nittak tikbano̱ ti̱kbáchi̱h,” áchittók.

Jesus at Illáchih Kat Himakma Isht Anno̱polih

32Hihma̱ Jerusalem ilhkólih ósh ittanóho̱wah ma̱ Jesus at tikba a̱yattók. Yohmihma̱ iyákayya awahtokloh (12) alhíha yat oklah noklhaka̱chattók, hihma̱ iyákayya alhíha i̱la kat oklah nokshópattók. Hihma̱ himmona achaffah móma ka̱ Jesus at awahtokloh (12) alhíha ma̱ iláwít naksika isht íya cha, Jesus oklah akánihcháchi̱ ka̱, im anólih mómattók. Hihmat Jesus at áchihmat, 33“Jerusalem ilhkólih ósh oklah ilittanówah ókih, yammako̱, ano̱ Hattak Oshi Holittópa ya̱ kanah ókato, siyasanáli cha priest i̱ noshkobóka alhíha hicha Moses i̱ Nán Alhpisa im ábachi alhíha ya̱ pit oklah sa mokoffáchi̱h. Hikma̱ salláchi̱ ho̱ oklah ittimatahláchi̱h. Hikmat Jew kiyoh alhíha ho̱ pit sa mokoffáchi̱h ókih. 34Hikma̱ yómi kat yokpah oklah siya ikbit, siyo̱tofa yómáchi̱h. Oklah sa lhokka̱ha cha oklah sabáchi̱h. Hihókako̱, nittak o̱t isht tohchínakma̱, falámat taniláchi̱h ókih,” im áchittók.

James Hicha John at Jesus a̱ Nán Imasilhhah

35James hicha John, Zebedee oshi toklo mat, Jesus im ála cha i̱ ponaklohmat, “Nán im ábachi ma̱, nána ish pi̱ mihchá hi̱nah okma chi̱ ponaklot í nowa,” im áchittók.

36Hihma̱ Jesus at i̱ ponaklohmat, “Nátaho̱ chi̱ mihchiliho̱ chinnah?” im áchittók.

37Hihma̱ toklohmat im áchihmat, “Chim ápihlichíka ma̱ ish chokkwakma̱, í kanimápo kato chibbak isht a̱lhí imma í biníláchi̱ ka̱ ish atahla hi̱nah ho̱, hikmat í kaníma kato chibbak afábi imma í biníláçi̱ ka̱ ish atahla hi̱nah ho̱?,” im áchittók.

38Hi̱na Jesus at im áchihmat, “Nánaho̱ hash ponaklokat, hash akostini̱chih kiyoh ókih. Salbashshákah fihna okmakáchi̱h ókih, hitoko̱, hachishnák mákósh hash saba ilbashshakáchi̱ hoh? Hikmat sallik makáchi. Hachishnak mákósh hachilláchi̱ hoh?” im áchittók.

39Hihma̱ James hicha John ásh mat áchihmat, “A̱, í mihchá hi̱nah ókih,” im áchittók. Yohmih ma̱ Jesus at falammi̱chit imáchihmat, “Salbashshákáchi̱ ka̱ makohmih ósh, chilbashshakáchi̱h. Hikmat, salli ka̱ mak ohmih ósh, hachilláchi̱h. 40Hihókako̱, kanah ósh sabbak isht a̱lhí imma hicha affábi imma biníláchi̱ ka̱ anakósh nána áchili kak kiyoh ókih. Chihówa akósh nána atahli ak ókih,” im áchittók.

41Hihma̱, Jesus iyákayya i̱la alhíha pokkoli (10) kat yappa̱ oklah haklohmat, James hicha John oklah i̱nokówat kaniyattók.

42Hihókako̱ Jesus at iyákayya alhíha ya̱ i̱ pa̱ya cha im áchihmat, “Okloshi i̱la alhíha i̱ mi̱ko yómikat im oklah alhíha (their people) ya̱ o̱kallo ka̱ oklah hash ikkánah. Hicha mi̱ko alhíha mat im oklah alhíha ya̱ atóblichit ná mihchá hi̱nah im ahnit im anólit kaníyah ókih. 43Hihókako̱, yómi kano hash hobáchinnah. Hash kaníma kat tikba hikíya tobah chinnah okmat kanah mako̱ apilachi chiya okmakáchi̱h ókih. 44Hikma̱ hash kanímah ósh mómaka̱ i̱shahli tobah chinnah okmat oklah mómaka̱ i̱toksali okmakáchi̱h ókih. 45Hihátokósh, ano, Hattak Oshi Holittópa, yat kanah alhíha yat ik siyapíla ahnit alálitok kiyoh. Hihókakósh, kanah alhíha apilacháchi̱h ósh, hicha oklah la̱wa ka̱ lhakofi̱chiláchi̱ kat salláchi̱h ósh alálitok ókih,” im áchittók.

Jesus at Hattak Bartimeaus Inishkin Lapa Ya̱ Masáláchih

46Hihma̱ Jesus hicha iyákayya alhíha yat Jericho áyónattók. Hihmat ano̱ti yamma̱ ákanállilih ósh ittanoho̱wahma̱, oklah lawa alhíha yat iya̱kayyat ittanóho̱wattók. Hattak ná pi̱sa híkiyo, Bartimeaus hohchifo (yappat Timaeus oshi miya) yat hina lapálika nán asilhhah ósh binílittók. 47Hihmat Jesus, Nazareth ámi̱ti yat a̱ya ho̱ haklohmat, pit tappalat, “Jesus, David im áyo̱cholóli (descendant) chiyah mah, a̱ nokha̱kloh!” im áha̱chittók. 48Hihma̱ oklah la̱wa kat tappalat issá náh im ahni kat oklah i̱ makáchittók. Hihókako̱, hattak mat i̱shahlit tappalahmat, “Jesus, David im áyo̱cholóli chiyah mah, a̱ nokha̱kloh!” im áha̱chittók.

49Hihma̱ Jesus at o̱t hikíya cha áchihmat, “I̱pa̱yah, ikla!” im áchittók. Hihma, hattak pi̱sa híkiyo ma̱ oklah i̱pa̱yattók. Hicha oklah im áchihmat, “Chi nokshópannah! Wakáyah! Jesus at chi̱pa̱yah ókih,” oklah im áchittók. 50Hihma̱ hattak mat i̱ náfokka chito akka pilat toloblit hikíya cha Jesus im ónattók.

51Hihma̱ Jesus at i̱ponaklohmat, “Nátaho̱ chi̱ mihchilih ho̱ chinnah chó?” im áchittók. Hihma̱ hattak pi̱sa híkiyo kásh mat falammi̱chit áchihmat, “Nán im ábachi mah, pi̱sa tohbah sannah!” im áchittók.

52Hihma̱ Jesus at im áchihmat, “Ish íya hi̱nah. Chi yimmi hátokósh chi másálih ókih,” im áchittók. Hihma̱, ashshali̱t hattak mat pi̱sa hi̱nattók. Hihmat Jesus awa̱t hina a̱yattók.

Currently Selected:

Mark i̱ Holisso 10: CHTW

Highlight

Copy