Mark i̱ Holisso 9

Chapta Chakkalih (9)

1Hihmat Jesus at oklah alhíha ya̱ i̱makáchihmat, “A̱lhi hachim áchilíshkih, yappa̱ hiyohma̱ya ka̱ kaniyómi kat, oklah illih alhlhi kat, Chihówa im ápihlichíka yat lha̱koh ósh mi̱ti ka̱ oklah pisáchi̱h ókih,” im áchittók.

Jesus at O̱t I̱lat Tahah

2Nittak hannálih (6) o̱t iyahma̱, Jesus at Peter, James, hicha John, akillahó ilawíli cha nanih cháha apaknaka isht iyattók. Hihma̱ iyákayya alhíha mat oklah pi̱sa ná Jesus at o̱t i̱lat tahattók. 3Hihma̱ i̱ náfokka yat shohmalálit tohbikat oktosha mák i̱shahlittók. Tóhbit kaniya ka̱, kanah at mako̱mihchit tohbicha hína kiyottók. 4Hihma̱ Moses hicha Elijah at oklah a̱t imí hayákattók. Hicha Jesus a̱ im anópolih ósh hi̱littók.

5Yohmih ma̱ Peter at Jesus im áchihmat, “Nán im ábachi mah, yappa̱ oklah íma̱yaka̱ achokmah ókih. Chokka osi tohchína (3) oklah kilikbi. Achaffa kato chishno okma̱, ano̱ti achaffa kato Moses ilap okma̱, ano̱ti achaffa kato, Elijah ilap,” im áchittók. 6Peter hicha toklohmat nokshópa fihna hatoko̱, Peter at nána ácha hi̱nah kat ik ikkanot kaniyahósh yot makáchittók.

7Hihma̱ hosho̱ti at a̱t o̱hosho̱tikattók (overshadowed). Hihma̱ hosho̱ti ma̱ anno̱pa yat ámi̱ti kat áchihmat, “Yappat Siyóshi, i̱ sa hollo yókih. Nánaho̱ áchika̱, oklah o̱h i̱ happonakloh!” im áchittók.

8Hihma̱, iyákayya tohchína kásh mat ashshali̱t folótówat hoyot oklah kaniyattók hihókakósh Jesus illah ósh iba hiki̱ya ka̱ oklah pi̱sattók.

9Yohmitoko̱ Jesus hicha iyákayya alhíha kásh mat nanih cháha akkowát oklah mi̱tihma̱, nána oklah pi̱satokat, kanah ik imano̱loho̱ Hattak Oshi Holittópa yat illi tokat falámat tánih okmako̱, kanah imano̱láchi̱h o̱ Jesus at i̱makáchittók.

10Hihátoko̱, nána oklah pi̱satokat, kanah oklah ik imano̱lottók. Hihókakósh Jesus at “illi tokósh falámat tánih,” áchi ka̱sh ma̱, nátaho̱ makáchi tokchi ahnit oklah isht itti̱mano̱polittók.

11Hihmat iyákayya alhíha kásh mat Jesus oklah i̱ponaklohmat, “Katína Moses i̱ Nán Alhpisa im ábachi alhíha yat áchikat, Elijah ásh Christ a̱ ti̱kba aláchi̱h oklah áchih cho?” oklim áchittók.

12Hihma̱ Jesus at áchihmat, “Elijah at ti̱kba alah polláchi̱h, hicha nána móma kat alhtaháchi̱ ka̱ tikba̱lit atahla̱chi̱h. Hihókako̱ Holisso Holittópa yat áchikat, Hattak Oshi Holittópa yat ayilbashshaka malhlhi fihnachi̱h, hicha oklahat nán isht ik ahobálo káchi̱h áchih kiyo ho? 13A̱lhi hachim áchilíshkih, Elijah at alattók. Hihma̱ oklah alhíha yat ákanihchi bannah okmat oklah ámihchittók ókih, Holisso Holittópa yat yohmáchi̱ áchittóka̱,” oklah im áchittók.

Jesus Alla Nakni Ya̱ Shilombish Okpolo Akohchih

14Jesus hicha iyákayya tohchíni kásh mat falámat iyákayya alhíha i̱la̱ ka̱ foka oklah ónattók. Oklah lawakat áfolótah kaníyaka̱ oklah pisattok, hikma̱ Moses i̱ Nán Alhpisa im ábachi alhíha yat iyákayya alhíha ma̱ ittachówah ósh ma̱yattók. 15Hihma̱ oklah lawa alhíha yat Jesus oklah pisah akíni kat, oklah noklhaka̱chah fihnattók hicha yilhípat im áyonat o̱t oklah ayokpachittók.

16Hihma̱ Jesus at áchihmat, “Nátah isht immaho̱ hash ittachówah átoko?” áchittók.

17Hihma̱ oklah lawa alhíha ma̱, hattak achaffa kat áchihmat, “Nán im ábachi mah, siyoshi isht chim alálitok. Shilombish okpolo yat anokfo̱kka hatoko̱ ano̱pola híkiyoh. 18Shilombish okpolo yammat siyóshi hoklit ishik mat akka pilah, hikma̱ itahka mat itokchit yat poshpokit kaniyah (foaming at the mouth) hicha innoti ya̱ kata̱lichit kaniyattók alhlhih. Hitokmat o̱t tahak ma̱ kallot itto̱la bíka. Hitoko̱ shilombish okpolo ma̱ ákohcháchi̱ ka̱, chiyákayya alhíha ya̱ i̱ponaklolitok, hihókako̱ oklah kocha híkiyotok,” im áchittók.

19Hihma̱ Jesus at áchihmat, “Ná yimmi yat ik hachim ikshoh. Kati̱kak alhlhi ho̱ hachi takla a̱ttaláchi̱ho̱? Kati̱h alhlhikak isht hachiyá takla ha̱maláchi̱h? Alla nakni ma̱ isht am álah,” im áchittók.

20Hihma̱ alla ma̱ isht oklah áyalattók. Hihma̱ shilombish okpolo mat Jesus pisah akíni kat alla nakni ma̱ ihaknip móma ka̱ halahlittók. Hihma̱ alla nakni mat akka ittolah mat tonólittók. Hihmat itahka ma̱ itokchi yat poshpokit hikít iyattók.

21Hihma̱ Jesus at alla nakni ma̱ i̱ki i̱ponaklohmat, “Yakohmittóka̱ kati̱h fókka?” im áchittók. Hihma̱ hattak ímáchihmat, “O̱sih móma ka̱. 22Shilombish okpolo mat lowak ano̱ka pit pilah kiyokmat oka ano̱ka pit pilah bíka, abih bannahósh. Yohmih átoko̱, pi̱ nokha̱kloh! Hicha nánah ish mihchá hi̱nah okmat, piyapíla,” im áchittók.

23Jesus at áchihmat, “Kati̱na ‘Hi̱nah okmat,’ ish áchih choh? Kanah ósh ná yimmi ókat a̱lhih okma̱ nánah mákósh yohmáhi ókih,” im áchittók.

24Makfihnah ma̱ alla nakni i̱ki ásh mat tappalahmat, “Sa yimmi ókih! I̱shahlit yimmiláchi̱ka̱ siyapílah,” im áchittók.

25Hihma̱ oklah alhíha yat palhkit lawat ittahobat hikít iyaka̱, Jesus at pisattók. Hicha shilombish okpolo yat, alla nakni ma̱ anokfo̱kka toka̱, sholombish okpolo ma̱ i̱nokówat, “Shilombish ha̱kla hikiyo hicha anno̱pola hikyo chiyahat, alla pa̱ akohchah. Himma̱kma ish áchokówannah, chimáchilih ókih,” im áchittók Jesus at.

26Yohmi ma̱ shilombish okpolo mat taklholálittók hicha alla ma̱ íhaknip móma ka̱ wanníchit ka̱chittók, hihmat ákohchattók. Hihma̱ alla mat illi ahóbattók hitoko̱ oklah la̱wa kat áchihmat, “Alla nakni mat illih ókih,” oklah áchittók. 27Hihókako̱, Jesus at alla ma̱ ibbak halálli cha apílat wakáyachittók.

28Hihma̱, Jesus hicha iyákayya alhíha yat falámat chokka ilhkóli cha iláp akillah ósh ma̱yah ma̱, iyákayya alhíha yat Jesus i̱ponaklohmat, “Katína hapish náto shilombish okpolo ma̱ oklah í kocha híkiyotok?” im áchittók.

29Hihma Jesus at áchihmat, “Iki̱pocha anno̱pa ilbashsha asilhlha akilla okmásh shilombish okpolo yohmi kano kocha hi̱nah ókíh,” im áchittók.

Jesus at Illáchi̱ Kat Himákma̱ Isht Anno̱polih

30Jesus hicha iyákayya alhíha yat yamma̱ oklah ákanalli cha Galilee yakni lhopólittók. Hihókako̱ Jesus at kaniyako̱ oklah ma̱ya ka̱ kanahat ik ikkánoh kiya ahnittók, iyákayya alhíha ma̱ nán im ábachit a̱ttah átokósh. 31Hihmat Jesus at áchihmat, “Kanah ókato, ano, Hattak Oshi Holittópa ya̱ siyasanálicha oklah alhíha pit i̱samokoffáchi̱h ókih. Hikma̱ oklah alhíha yat sabáchi̱h. Hihókako̱ nittak o̱t ishit atohchinak ma̱, falámat tániláchi̱h ókih,” áchittók. 32Hihókako̱, Jesus iyákayya alhíha yat nána ho̱ isht anópoli ka̱ oklah ik ikkánottók. Hikmat oklah ponakláchi̱ kat oklah nokshópattók.

Katíma Kash Itti̱shahliho̱?

33Jesus hicha iyákayya alhíha yat Capernaum tamáhah ayonattók. Hihma̱ chokka abóha oklah o̱t chokkówa ma̱ Jesus at iyákayya alhíha i̱ponaklohmat, “Hina oklah ila̱yakásh ma̱, nátaho̱ ishit hash ittachówatok?” im áchittók. 34Oklah ittanóho̱wahma̱, iyákayya alhíha yat kaníma kásh itti̱shahli okmat ikkánah bannakat ittachówatok átokósh, oklah nána ik áchottók.

35Jesus at biníli cha iyákayya awah toklo (12) alhíha yat oklah im ayittahoba chi̱ho̱ im anolittok. Hihmat i̱makáchihmat, “Kanah ósh móma i̱shahli toba bannah okmat, ti̱kbak ano ili ákola̱sichíh hicha kanah mako̱ apilachi tobak makáchi̱h!” im áchittók.

36Hihmat alla yat itto̱ma hiki̱ya toka̱, íshi cha iyákayya alhíha tikba hilíchittók. Hihmat, alla ma̱ pit shóli cha, áchihmat, 37“Anák átok polla ná alla osi ya̱ ish ayokpachikmat (welcome), anákmáko̱ issiyá mihchih ókih. Hikmat, anáko̱ issiyá ayokpachih okmat Chihówa ít sa chaffichitok mak máko̱ ish ayokpachih ókih,” im áchittók.

Kanah ósh Hapiyasanálih Kiyoh Okmat Hapibá Chaffah

38Yamohmi mat, John at Jesus a̱ i̱makáchihmat, “Nán im ábachi mah, hattak at chi hohchifo ya̱ lhopólichih ósh hattak alhíha ya̱ shilombish okpolo alhíha ákocháwihlih ósh a̱tta ná ípi̱satok ókih. Hihókakósh, hapibá achaffa kiyoh átoko̱, ‘Yamma̱ mihchit issah,’ oklah ilimáchitok,” im áchittók.

39Hihókako̱, Jesus at oklah i̱makáchihmat, “Hash issachinnah! Kanahat sa hohchifo isht lhopólichih ósh nána kat yohmáhi ik ahóbo ka̱ mihchikat, ano̱ti folo̱tat nán ik achokmo siya makácháchi̱h kiyoh. 40Hikma̱ kanah ósh hapiyásanálih kiyoh okmat hapibá chaffah ókih. 41A̱lhi hachim áchilih ókih! Is siyákayya átok polla na, kanahat sa hohchifo isht álhopólichih ósh okassa chipítah okma̱, Chihówa yat alhtoba (reward) imáchi̱h ókih.

Nán Áyashshachi Mihchichih

42Kanah ósh alla chipi̱ta alhíha siyanokchito yakómika̱ achaffo̱nah kiya nan áyashshachih mihchichih okmat, tali wíki yósh iko̱la ya̱ ishit tallakchiho̱, oka chito áhofóbi oklah píla ná áyilli kásh imi̱shahlahi ókih. 43Hitoko̱ hachibbak at hachi ayashshachichih okma̱, tablih! Hachibbak at achaffa illah ósh áyokcha̱ya billíya hash ishi kako̱ achokma kat, hachibbak tokloh ósh lowak at moshóláchi̱h kiyoh ma̱ pit chokkowa kak i̱shahlih ókih. 44[Lowak chito ma̱ chokáni oshi (maggots) at illáchi̱h kiyoh hikmat, lowak at moshóláchi̱h kiyoh ókih.] 45Hikmat hachiyyi yat hachi áyashshachichih okma̱, tablih. Hahiyyi yat achaffa illah ósh áyokcha̱ya billíya hash ishi kako̱ achokma kat, hachiyyi tokloh ósh lowak átaha iksho ma̱ pit chokwa kak i̱shahlih ókih. 46[Lowak chito ma̱ chokáni oshi (maggots) at illáchi̱h kiyoh hikmat, lowak at moshóláchi̱h kiyoh ókih.] 47Hachi nishkin at hachi áyashshachichih okma̱, kohchi. Nishkin at achaffa illah hash i̱shih ósh aba yakni chokkowakano achokma kat, nishkin tokloh ósh lowak átaha iksho ma̱ pit chokwa kak i̱shahlih ókih. 48Lowak chito ma̱ chokáni oshi at illáchi̱h kiyoh, hikmat lowak at moshóláchi̱h kiyoh ókih. 49Oklah moyyómakat ná ilbashsháka lawa ka̱ lhopólachi̱h ókih. Hikmat ná ilbashsháka yappa̱ lhopolachi̱kat lowak ak ohmachi̱h ókih.

50Hapi yat achokmah. Hihókakósh hapi yat homi kat i̱ kaniya okma̱, nána isht alhpísah kiyoh. Hihoka̱ hapi i̱homi lawa mako̱ oklóhohmi, hicha itti̱no̱ktala ósh (peace with each other) hash ma̱ya chikih,” áchittók.

Currently Selected:

Mark i̱ Holisso 9: CHTW

Highlight

Copy