Sam 103
103
Hae God i lavem yumi tumas
(Sing ya, Deved i wokem.)
(Tok i go long ol man.)
1!Oltaem mi mi mas presem Hae God!
!Long olgeta laef blong mi,
mi mas presem tabu nem blong hem!
2Mi mi mas presem hem,
mo mi no save fogetem
we hem i kaen tumas long mi.
3Hem i stap fogivim mi,
i stap tekemaot ol sin blong mi.
Hem i stap tekemaot ol sik blong mi,
i mekem mi mi gud bakegen,
4mo i stap lukaot gud long mi
blong mi mi no ded.
Hem i lavem mi tumas,
mo i sore tumas long mi,
nao oltaem hem i stap mekem
i gud tumas long mi.
5Oltaem hem i stap mekem mi mi harem gud
long ol gudgudfala samting ya
we hem i stap givim long mi,
mo i mekem mi mi stap yang,
mi stap strong oltaem,
olsem bigfala pijin ya igel.*
6Taem Hae God i mekem kot,
oltaem hem i stap givhan long man
we narafala man i stap mekem
i no stret long hem.
Oltaem hem i stap mekem rod
blong man olsem i kasem ol samting
we hem i gat raet blong kasem.
7Bifo, hem i stap soemaot ol plan blong hem long Moses,
mo i letem ol laen* blong Isrel*
oli luk ol bigbigfala wok blong hem.
8 #
Jem 5.11
Hae God, hem i gat sore,
mo oltaem hem i glad tumas
blong mekem i gud long man.
Hem i no save kros kwik,
fasin blong hem we oltaem i stap lavem man tumas,
hem i gud we i gud, i bitim mak.
9Hem i no save gohed oltaem
blong tok strong long man,
mo kros blong hem
i no save stap olwe.
10Hem i no save panisim yumi
stret long mak blong ol sin blong yumi,
mo hem i no save givimbak
ol fasin nogud ya long yumi
we yumi stap mekem long hem.
11Fasin ya blong hem
we oltaem hem i stap lavem ol man
we oli stap ona long hem,
hem i gud tumas.
Lav ya blong hem i bigfala tumas,
i hae moa i bitim skae antap.
12Ol sin ya blong yumi,
hem i stap tekemaot olgeta
i go longwe we longwe long yumi,
olsem we saed long is
i stap longwe long saed long wes.
13Fasin blong Hae God,
oltaem hem i stap mekem i gud tumas
long olgeta we oli stap ona long hem,
olsem we ol papa oli stap mekem
long ol pikinini blong olgeta.
14Hem i savegud
we hem i mekem yumi long graon.
Oltaem hem i stap tingbaot
we yumi kamaot long asis nomo.
15Yumi man,
laef blong yumi i olsem gras nomo.
Yumi olsem wael flaoa,
we i gru, i kam strong,
16be win i blu long hem,
nao i lus, man i no moa save luk bakegen.
17-18Be ol man we oli stap ona long Hae God,
oltaem bambae hem i stap lavem olgeta,
gogo i no save finis.
Mo sipos olgeta we oli stap kamaot biaen long olgeta
oli stap holem promes* ya
we hem i mekem wetem ol olfala blong olgeta,
mo oli stap obei long ol loa blong hem,
gudfala fasin blong hem
bambae i stap oltaem long olgeta,
gogo i no save finis.
19Hae God, hem i King.
Hem i stap long ples blong hem long heven,
mo i stap rul long olgeta samting.
20Yufala ol enjel, yufala i strong,
mo yufala i gat paoa.
Oltaem yufala i stap obei
long ol tok blong Hae God,
mo yufala i stap lesin
long ol samting we hem i talem.
!Yufala i mas presem hem!
21Yufala olgeta long heven,
yufala i man blong wok blong Hae God.
Yufala i gat paoa,
mo yufala i stap mekem ol samting we hem i wantem.
!Yufala i mas presem hem!
22Yufala olgeta samting
we Hae God i mekem yufala,
yufala i stap long evri ples
we hem i stap rul long hem.
!Yufala i mas presem hem!
!Mi mi mas presem Hae God!
Currently Selected:
Sam 103: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.
