Sam 102
102
Prea blong wan yang man we i stap long trabol
(Tok i go long Hae God.)
1Hae God.
Plis yu lesin long prea blong mi.
Mi mi stap krae blong yu givhan long mi,
plis yu harem mi.
2Mi mi stap long trabol.
Plis yu no tanem
fes blong yu i gowe long mi.
Mi mi stap krae long yu.
Plis yu lesin long mi,
yu ansa long mi kwiktaem.
3Bodi blong mi i stap hot olsem faea,
mo laef blong mi i olsem smok
we win i karem i go.
4Mi mi kam olsem gras
we san i bonem i drae.
Mo mi no moa save harem nating
se mi hanggri.
5Mi stap harem nogud mi krae gogo
mi kam bunbun olgeta,
we skin blong mi i go fas gud
long ol bun blong mi.
6Mi mi stap mi wan,
olsem wael pijin we i stap long draeples,
olsem hoknaet we i stap hem wan long olfala haos,
we i no moa gat man i stap long hem.
7Mi stap ledaon, be mi no save slip.
Mi olsem wan pijin we i no gat fren blong hem,
we hem i stap sidaon antap long haos.
8Oltaem ol enemi blong mi
oli stap tok nogud long mi,
i stat long moning go kasem sapa.
Olgeta we oli stap laf long mi
oli stap yusum nem blong mi
blong singaot* trabol i kam long man.
9-10Yu yu harem nogud long mi,
mo yu kros tumas long mi,
nao asis i kam kakae blong mi
mo wota blong ae blong mi i miksap
wetem wota blong mi blong dring.
Yu yu holem mi,
yu sakem mi mi go longwe.
11Laef blong mi i stap go kwiktaem
olsem san we klosap i go lus.
Mi mi olsem gras we i drae finis.
12Be yu, Hae God,
bambae yu yu King oltaem
gogo i no save finis.
Olgeta man we bambae oli stap kam biaen
bambae oli stap tingbaot yu.
13Naoia, i gud yu yu sore long Saeon,*
yu girap, yu givhan long hem,
from we taem i kam finis blong yu sore long hem,
naoia i prapa taem blong hem.
14I nomata we ol enemi blong yu
oli spolem ples ya finis,
be mifala ol man blong yu,
mifala i stap laekem hem yet.
Nating we ples ya i kam nogud finis,
be mifala i stap sore long hem yet.
(Tok i go long ol man.)
15Olgeta man blong ol narafala kantri
bambae oli fraet gud long Hae God,
mo olgeta king long wol
bambae oli fraet long bigfala paoa blong hem.
16Taem hem i wokem Saeon i gud bakegen,
bambae hem i kamtru
long bigfala laet ya we i soemaot paoa blong hem.
17Yumi ol man blong hem
mo hem i bin lego yumi
be bambae hem i harem prea blong yumi,
bambae hem i lesin long yumi.
18-20Hae God i stap long tabu ples blong hem long heven,
i lukluk i kamdaon long wol.
Hem i harem krae blong ol man
we oli stap long kalabus.
Olgeta we kot i jajem olgeta finis
se oli mas ded,
hem i mekem olgeta oli fri.#102.18-20: Narafala rod blong tanem tok ya long medel blong trifala vas ya i olsem. Hem i harem krae blong yumi, we yumi stap long kalabus. Yumi ya we kot i jajem yumi finis se yumi mas ded, hem i mekem yumi fri.
I gud yumi raetemdaon ol samting ya
we Hae God i mekem,
blong ol man we oli no bon yet
bambae oli save ridim,
nao bambae oli stap presem hem from.
21-22Nao sipos ol man blong olgeta kantri mo olgeta kingdom
oli kam wanples blong mekem wosip long Hae God
long Saeon,
bambae oli save talemaot nem blong hem
mo bambae oli save presem hem.
23Mi mi yangfala yet,
be Hae God i mekem mi mi no moa strong,
hem i katem laef blong mi i kam sotfala.
24Mi mi talem se,
“Hae God, yu yu God blong mi.
Yu yu no save ded,
bambae yu stap oltaem.
Plis yu no tekemaot mi naoia
we mi mi no olfala yet.
25 #
Hib 1.10-12
Bifo olgeta,
yu yu mekem wol ya,
mo long han blong yu nomo
yu mekem evri samting we i stap long skae.
26Olgeta samting ya bambae oli lus,
bambae oli brobrok olsem klos,
be yu bambae yu stap oltaem nomo.
Bambae yu yu sakem olgeta samting ya
olsem klos we i kam olfala finis
nao bambae oli lus olgeta.
27Be yu,
oltaem yu yu stap sem mak nomo,
mo neva bambae laef blong yu i finis.
28Mifala i man blong wok blong yu.
Ol pikinini blong mifala
bambae oli stap gud, oli sef,
mo olgeta we bambae oli stap kamaot biaen long olgeta,
bambae yu yu lukaot gud long olgeta.
Bambae oli stap gud oltaem long han blong yu.”
Currently Selected:
Sam 102: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.
