Dutronome 18
18
Fasin blong lukaot long ol pris
1Nao Moses i talem se, “Ol laen* blong Livae,* we ol pris* oli kamaot long olgeta, bambae olgeta oli no kasem graon nating long kantri ya blong yufala blong holem i blong olgeta.#18.1: Narafala rod blong tanem fas haf blong tok ya blong Moses i olsem. Ol laen blong Livae oli pris, mo bambae olgeta oli no kasem graon nating long kantri ya blong yufala blong holem i blong olgeta. Bambae oli stap laef long ol presen nomo, wetem ol narafala sakrefaes we bambae yufala i givim i go long Hae God. 2#Nam 18.20Bambae oli no holem wan pis graon nating long kantri ya se i blong olgeta, olsem we ol narafala laen blong yumi oli gat. Gudfala samting we bambae oli kasem, Hae God bambae i stamba blong evri samting long laef blong olgeta, olsem we hem i promes.*
3“Oltaem, taem yufala i kilim buluk no sipsip no nani blong mekem sakrefaes, yufala i mas givim han blong hem mo jo blong hem, mo stomak blong hem i go long ol pris. 4Mo yufala i mas givim ol fas samting we yufala i kasem long wok blong yufala tu i go long olgeta, we hemia ol kakae mo waen mo olifoel,* wetem hea blong sipsip we i fastaem blong yufala i katem. 5Long olgeta laen blong yumi, Hae God i jusumaot ol laen blong Livae nomo blong oli pris blong hem, mo laen ya bambae i holem wok ya gogo i no save finis.
6“Hae God bambae i jusumaot ples blong mekem wosip blong yufala, mo sipos wan man we i laen blong Livae i aot long wan taon blong yufala, i go stap long ples ya, 7bambae hem i save mekem ol wok long ples ya long nem blong Hae God, stret olsem we ol narafala laen blong Livae oli stap mekem. 8Bambae hem i save kasem kakae stret olsem we ol narafala laen blong hem oli kasem, be hem i save holem ol samting tu we ol famle blong hem bambae oli givim long hem.”
Bambae yufala i no folem ol rabis fasin blong ol hiten man
9Nao Moses i talem se, “Hae God i God blong yumi, mo long taem ya we bambae yufala i kam holem kantri ya we hem bambae i givim long yufala, bambae yufala i no mas folem ol rabis fasin blong olgeta we oli stap long ples ya. 10#Lev 19.26; Eks 22.18Bambae yufala i no mas bonem ol pikinini blong yufala long olta, olsem we olgeta oli stap mekem blong mekem sakrefaes. Mo yufala i mas lukaot gud blong yufala i no folem fasin blong olgeta blong go luk ol kleva, mo blong makemgud ol smosmol saen we oli luk, mo blong mekem singsing long man, 11#Lev 19.31mo blong wokem ol bisnes blong masing mo posen, mo blong singaot long ol devel blong dedman blong oli givhan long olgeta. 12Ol fasin ya i nogud we i nogud, Hae God i no laekem nating ol man we oli stap mekem olsem, i agens long olgeta, mo from samting ya, taem yufala i stap go long kantri ya, bambae hem i stap ronemaot ol man blong hem. 13#Mat 5.48Oltaem, tingting blong yufala i mas stap strong long Hae God nomo.”
Hae God i promes blong sanem wan profet i kam long olgeta
14Nao Moses i talem se, “Long kantri ya we bambae yufala i holem i blong yufala, ol man we oli stap long hem naoia oli stap folem ol tok blong ol kleva, mo blong ol man we oli stap makem ol saen, be Hae God i God blong yumi, mo hem i no save letem nating blong yumi mekem fasin ya. 15#Wok 3.22; 7.37Bambae hem i putumap wan profet blong yufala olsem mi, we man ya bambae i kamaot long yumi nomo mo bambae yufala i mas obei long hem.#18.15: Narafala rod blong tanem tok blong vas ya i olsem. Oltaem bambae hem i stap putumap ol profet blong yufala olsem mi, we bambae oli kamaot long yumi nomo, mo bambae yufala i mas obei long olgeta.
16“Bifo, long taem ya we yumi stap long hil ya Sinae, ol olfala blong yufala oli talem long Hae God se oli fraet, oli no wantem harem hem i toktok long olgeta bakegen, mo oli no moa wantem luk bigfala faea ya we hem i kamtru long olgeta long hem, from we oli fraet se bambae oli ded. 17Nao from samting ya, Hae God i talem long mi se, “Tok ya we oli talem i stret nomo. 18Bambae mi mi putumap wan profet blong olgeta olsem yu, we bambae i kamaot long olgeta. Mi bambae mi talem ol tok blong mi long hem, mo hem bambae i go talemaot ol tok ya long olgeta. 19#Wok 3.23Hem bambae i tok long nem blong mi, mo man we i no wantem lesin long hem, mi bambae mi panisim hem.#18.19: Narafala rod blong tanem tok blong tufala vas ya i olsem. Oltaem bambae mi mi putum ol profet blong olgeta olsem yu, we bambae oli kamaot long olgeta. Mi bambae mi talem ol tok blong mi long olgeta, mo olgeta bambae oli go talemaot ol tok ya long ol man. 19 Olgeta bambae oli tok long nem blong mi, mo man we i no wantem lesin long olgeta, mi bambae i panisim hem. 20Be sipos wan profet i talemaot sam toktok long nem blong mi, we mi mi no talem long hem blong i mekem olsem, bambae yufala i mas kilim hem i ded. Mo ol profet we oli tok long nem blong ol narafala god, bambae yufala i mas kilim olgeta ya tu oli ded.
21“Be maet bambae yufala i talem se, ‘?Be bambae yumi save olsem wanem we tok ya i no kamaot long Hae God?’ 22I gat rod blong hem. Sipos wan profet i stap toktok long nem blong Hae God, be ol samting we hem i stap talem oli no kamtru, hemia i soemaot we tok ya i no blong Hae God. Profet ya i stap toktok long paoa blong hem nomo, mo from samting ya, bambae yufala i no mas fraet long hem.”
Currently Selected:
Dutronome 18: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.