Dutronome 19
19
Ol taon we i blong go haed long hem
(Namba 35.9-28; Josua 20.1-9)
1 #
Jos 20.1-9
Nao Moses i talem se, “Olgeta. Hae God i God blong yumi, mo long taem ya we bambae hem i kilim ol man blong kantri ya we hem bambae i givim long yufala, mo yufala i holem ol taon ya blong olgeta, mo yufala i stap gud long ol haos blong olgeta, 2-3bambae yufala i mas seraot kantri ya long tri distrik. Nao yufala i mas jusumaot tri taon wanwan long trifala distrik ya, we trifala taon ya, i isi blong ol man oli save go haed long trifala. Nao sipos wan man i kilim wan narafala man i ded, bambae hem i save ronwe blong go haed long wan long trifala taon ya. 4Sipos wan man i kilim wan narafala man i ded, we hem i no tingting nating blong mekem olsem, mo narafala man ya i no enemi blong hem, bambae hem i save ronwe blong go haed long wan long trifala taon ya. 5Wan eksampol, sipos wan man wetem fren blong hem, tufala i wokbaot i go long bus blong katem wud, mo man ya i stap katemdaon wan tri, nao akis blong hem i kamaot, i go kasem fren ya blong hem nao i ded wantaem, ale man ya i save ronwe i go haed long wan long trifala taon ya, blong hem i stap gud long ples ya. 6Sipos i gat wan taon nomo, maet bambae i longwe tumas, nao famle blong dedman ya we i mas givimbak fasin ya i kros tumas, nao i save ronem man ya, gogo i kasem hem, i kilim hem i ded. Be man ya we i kilim fren ya blong hem i ded, hem i no tingbaot nating blong mekem olsem. 7Taswe mi mi talem strong long yufala, se yufala i mas jusumaot trifala taon, blong man i save go haed long wan long trifala long taem olsem.
8“Hae God i God blong yumi, mo long taem ya we hem bambae i mekem kantri blong yufala i kam bigwan moa olsem we hem i talem long ol bubu blong yumi bifo, mo i givim olgeta graon ya long yufala we hem i promes* blong givim, 9bambae yufala i mas jusumaot tri narafala taon bakegen. Mo sipos yufala i stap mekem olgeta samting we mi mi stap talem long yufala naoia, mo yufala i stap lavem hem, mo yufala i stap folem ol tok ya blong hem, hem bambae i givim olgeta graon ya i go long yufala. 10Nao bambae yufala i mas jusumaot tri narafala taon ya, blong ol man we oli mekem akseden nomo olsem, bambae oli no save ded from. Nao bambae i no gat man i save jajem yufala, se yufala i mekem we ol man ya oli ded blong nating nomo long kantri ya we hem i givim long yufala.
11“Be sipos wan man i mekem plan blong kilim narafala man i ded from we i enemi blong hem, nao i kilim hem i ded, mo i ronwe blong go haed long wan long ol taon ya, 12bambae ol lida long ples blong hem oli mas sanem tok i go, blong hem i kambak. Nao oli mas putum hem long han blong famle blong dedman ya we i mas givimbak fasin ya long hem, blong famle ya i kilim hem tu i ded. 13Man olsem, yufala i mas kilim hem i ded we yufala i no gat sore. Oltaem yufala i mas kilim man we i mekem olsem, blong yufala i save stap gud.”
Ol mak blong graon we oli stap longtaem finis
14 #
Dut 27.17
Nao Moses i talem se, “Hae God i God blong yumi, mo long taem ya we bambae yufala i stap long kantri ya we hem bambae i givim long yufala, bambae olgeta we bambae oli kamaot biaen long yufala oli no mas seftem mak blong graon blong man we i stap klosap long olgeta we bambae yufala i putum.”
Ol tok blong ol man we oli witnes
15 #
Nam 35.30; Dut 17.6; Mat 18.16; Jon 8.17; 2 Kor 13.1; 1 Tim 5.19; Hib 10.28 Nao Moses i talem se, “Sipos yufala i stap stretem wan trabol, mo i gat wan man nomo i stap talemaot poen agens long wan narafala man, bambae yufala i no save jajem narafala man ya. Man we i stap talemaot poen ya i mas gat tu witnes blong hem, no moa long tu witnes blong talemaot we narafala man ya i mekem i no stret. 16Be sipos wan man i stap talemaot poen agens long wan narafala man, mo i stap giaman blong traem spolem hem, 17bambae tufala i mas go long ples blong mekem wosip we Hae God bambae i jusumaot, nao ol pris* wetem ol jaj we oli stap wok long ples ya bambae oli jajem poen blong tufala. 18Ol jaj ya oli mas luklukgud long poen ya, mo sipos man ya i stap giaman nomo blong spolem wan narafala laen* blong hem, 19bambae hem i mas kasem panis we Loa i putum from poen ya we hem i stap giaman long hem, se narafala man ya i mekem. Nao long fasin ya, bambae yufala i save tekemaot rabis fasin ya long ples blong yufala. 20Nao sipos ol narafala man oli harem nius blong samting ya, bambae oli fraet, mo bambae i no moa gat man i save mekem rabis fasin ya bakegen long ples blong yufala samtaem. 21#Eks 21.23-25; Lev 24.19,20; Mat 5.38Sipos wan man i mekem olsem, bambae yufala i mas panisim hem, we yufala i no gat sore. Sipos hem i kilim wan man i ded, yufala i mas kilim hem i ded. Sipos hem i spolem ae blong wan man, yufala i mas spolem ae blong hem. Sipos hem i brekem tut blong wan man, yufala i mas brekem tut blong hem. Sipos hem i brekem han blong wan man, yufala i mas brekem han blong hem. Mo sipos hem i brekem leg blong wan man, yufala i mas brekem leg blong hem.”
Currently Selected:
Dutronome 19: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.
