ꠁꠘ꠆ꠎꠤꠟ ৩: ꠟꠥꠇ 22

ꠢꠎꠞꠔ ꠁꠍꠣꠞ ꠖꠥꠈ-ꠇꠡ꠆ꠐ ꠀꠞ ꠝꠃꠔ (২২:১-২৩:৫৬)

ꠢꠎꠞꠔ ꠁꠍꠣ ꠀꠟ-ꠝꠍꠤꠞꠦ ꠎꠣꠘꠦ ꠝꠣꠞꠤꠟꠤꠛꠣꠞ ꠚꠘ꠆ꠖꠤ

1ꠁꠢꠥꠖꠤ ꠅꠇꠟꠞ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ ꠇꠣꠍꠣꠔ ꠀꠁꠟ, ꠅꠃ ꠁꠖꠞ ꠘꠣꠝ ꠀꠎꠣꠖꠤ ꠁꠖ। 2ꠁꠛꠣꠄ ꠝꠃꠟꠣꠘꠣ ꠀꠞ ꠛꠠ ꠁꠝꠣꠝ ꠅꠇꠟꠦ ꠙꠞꠣꠝꠤꠡ ꠇꠞꠟꠣ, ꠢꠎꠞꠔ ꠁꠍꠣꠞꠦ ꠀꠝ ꠝꠣꠘꠡꠞ ꠉꠦꠍ ꠕꠣꠇꠤ ꠟꠥꠇꠣꠁꠀ ꠇꠤꠟꠣ ꠎꠣꠘꠦ ꠝꠣꠞꠔꠣ। ꠔꠣꠞꠣ ꠀꠝ ꠝꠣꠘꠡꠞꠦ ꠈꠥꠛ ꠒꠞꠣꠁꠔꠣ।

ꠁꠢꠥꠖꠣ ꠁꠡ꠆ꠇꠣꠞꠤꠀꠔꠞ ꠛꠦꠁꠝꠣꠘꠤ

3ꠅꠃ ꠡꠝꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ, ꠄꠘ ꠘꠣꠝ ꠁꠢꠥꠖꠣ ꠁꠡ꠆ꠇꠣꠞꠤꠀꠔ, ꠄꠘ ꠜꠤꠔꠞꠦ ꠡꠄꠔꠣꠘ ꠢꠣꠝꠣꠁꠟ। 4ꠄꠁꠘ ꠁꠍꠣꠞꠦ ꠗꠞꠣꠁꠀ ꠖꠦꠅꠀꠞ ꠟꠣꠉꠤ ꠟꠥꠇꠣꠁꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠉꠦꠟꠣ। ꠉꠤꠀ ꠢꠘꠞ ꠖꠣꠞꠉꠣ ꠀꠞ ꠛꠠ ꠁꠝꠣꠝ ꠅꠇꠟꠞ ꠟꠉꠦ ꠙꠞꠣꠝꠤꠡ ꠇꠞꠟꠣ, ꠇꠥꠘ ꠘꠝꠥꠘꠣꠄ ꠁꠍꠣꠞꠦ ꠔꠣꠞꠣꠞ ꠀꠔꠅ ꠗꠞꠣꠁ ꠖꠦꠅꠀ ꠎꠣꠄ। 5ꠔꠦꠃ ꠁꠝꠣꠝ ꠅꠇꠟ ꠈꠥꠛ ꠈꠥꠡꠤ ꠅꠁꠀ ꠅꠀꠖꠣ ꠇꠞꠟꠣ, ꠔꠣꠘꠞꠦ ꠗꠞꠣꠁꠀ ꠖꠤꠟꠦ ꠔꠣꠞꠦ ꠛꠈꠡꠤꠡ ꠖꠤꠛꠣ। 6ꠄꠔꠦ ꠁꠢꠥꠖꠣꠅ ꠞꠣꠎꠤ ꠅꠁꠀ ꠝꠣꠘꠡꠞ ꠀꠚꠞꠈꠦ, ꠔꠣꠘꠞꠦ ꠗꠞꠣꠁ ꠖꠦꠅꠀꠞ ꠡꠥꠎꠥꠉ ꠔꠥꠇꠣꠘꠤꠔ ꠞꠁꠟ।

ꠢꠎꠞꠔ ꠁꠍꠣꠞ ꠀꠈꠦꠞꠤ ꠝꠦꠎꠛꠣꠘꠤ

7ꠛꠣꠖꠦ ꠀꠎꠣꠖꠤ ꠁꠖ ꠀꠁꠟ, ꠅꠃ ꠁꠖꠞ ꠖꠤꠘ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠦꠅꠀ ꠅꠄ। 8ꠔꠦꠃ ꠁꠍꠣꠄ ꠍꠣꠢꠣꠛꠤ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠢꠥꠇꠥꠝ ꠖꠤꠟꠣ, “ꠔꠥꠝꠞꠣ ꠉꠤꠀ ꠀꠝꠞꠣꠞ ꠟꠣꠉꠤ ꠁꠖꠞ ꠈꠣꠘꠤ ꠔꠤꠀꠞ ꠇꠞꠅ, ꠀꠝꠞꠣ ꠢꠇꠟ ꠀꠁꠀ ꠄꠇꠟꠉꠦ ꠈꠣꠁꠝꠥ।” 9ꠄꠞꠣ ꠎꠤꠇꠣꠁꠟꠣ, “ꠢꠥꠎꠥꠞ, ꠀꠙꠘꠣꠞ ꠈꠤꠀꠟ ꠇꠤꠔꠣ, ꠀꠝꠞꠣ ꠇꠥꠘꠣꠘꠅ ꠉꠤꠀ ꠈꠣꠘꠣ ꠔꠤꠀꠞ ꠇꠞꠔꠣꠝ?” 10ꠔꠣꠁꠘ ꠇꠁꠟꠣ, “ꠢꠥꠘꠅ, ꠐꠣꠃꠘꠅ ꠢꠣꠝꠣꠁꠀ ꠢꠣꠞꠟꠦ ꠔꠥꠝꠞꠣ ꠖꠦꠈꠛꠣꠄ, ꠄꠇ ꠛꠦꠐꠣꠄ ꠙꠣꠘꠤꠞ ꠈꠂꠟꠣ ꠜꠞꠤꠀ ꠟꠁꠀ ꠎꠣꠁꠞꠣ। ꠔꠥꠝꠞꠣ ꠄꠘ ꠈꠞꠦ ꠈꠞꠦ ꠎꠣꠁꠅ, ꠉꠤꠀ ꠄꠁꠘ ꠎꠦ ꠊꠞꠅ ꠢꠣꠝꠣꠁꠛꠣ, 11ꠢꠃ ꠊꠞꠞ ꠝꠣꠟꠤꠇꠞꠦ ꠇꠁꠅ, ‘ꠢꠥꠎꠥꠞꠦ ꠎꠤꠇꠣꠁꠍꠂꠘ, ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠀꠎꠣꠖꠤ ꠁꠖꠞ ꠈꠣꠘꠤ ꠎꠦ ꠊꠞꠅ ꠈꠣꠁꠔꠣ, ꠁ ꠝꠥꠍꠣꠚꠤꠞ ꠈꠣꠘꠣ ꠇꠥꠀꠁ?’ 12ꠢꠦ ꠔꠥꠝꠞꠣꠞꠦ ꠃꠙꠞꠞ ꠔꠣꠟꠣꠔ ꠢꠣꠎꠣꠁꠟ-ꠙꠣꠠꠣꠁꠟ ꠛꠠ ꠄꠇ ꠇꠥꠑꠣ ꠖꠦꠈꠣꠁꠀ ꠖꠤꠛ। ꠢꠘꠅ ꠉꠤꠀ ꠔꠥꠝꠞꠣ ꠞꠣꠘ꠆ꠖꠣ-ꠛꠣꠠꠣ ꠇꠞꠤꠅ।” 13ꠢꠣꠍꠣꠃ ꠔꠣꠞꠣ ꠉꠤꠀ ꠔꠣꠘ ꠇꠕꠣ ꠝꠣꠚꠤꠇ ꠢꠇꠟꠔꠣ ꠙꠣꠁꠟꠣ, ꠙꠣꠁꠀ ꠀꠎꠣꠖꠤ ꠁꠖꠞ ꠈꠣꠘꠤꠅ ꠔꠤꠀꠞ ꠇꠞꠟꠣ।

14ꠛꠣꠖꠦ ꠡꠝꠄ ꠀꠁꠟꠦ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤ ꠟꠁꠀ ꠈꠣꠘꠤꠔ ꠛꠁꠟꠣ। 15ꠛꠁꠀ ꠇꠁꠟꠣ, “ꠀꠝꠣꠞ ꠛꠠ ꠈꠤꠀꠟ ꠀꠍꠤꠟ ꠝꠍꠤꠛꠔꠞ ꠝꠥꠈꠣꠝꠥꠈꠤ ꠅꠁꠛꠣꠞ ꠀꠉꠦ, ꠀꠈꠦꠞꠤ ꠁꠖꠞ ꠈꠣꠘꠤ ꠈꠣꠘ ꠔꠥꠝꠞꠣꠞꠦ ꠟꠁꠀ ꠈꠣꠁꠔꠣꠝ। 16ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠀꠟ꠆ꠟꠣꠞ ꠛꠣꠖꠡꠣꠁꠞ ꠀꠍꠟ ꠝꠞ꠆ꠎꠤ-ꠝꠥꠘꠡꠣ ꠙꠥꠞꠣꠙꠥꠞ ꠢꠣꠍꠤꠟ ꠘꠣ ꠅꠀ ꠙꠞ꠆ꠎꠘ꠆ꠔ, ꠀꠝꠤ ꠀꠞ ꠇꠥꠘꠥ ꠁꠖꠞ ꠈꠣꠘꠤ ꠈꠣꠁꠔꠣꠝ ꠘꠣꠄ।”

17ꠛꠣꠖꠦ ꠔꠣꠁꠘ ꠡꠞꠛꠔꠞ ꠙꠤꠀꠟꠣ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠀ ꠇꠁꠟꠣ, “ꠅꠃ ꠚꠥꠐꠣꠁꠘ ꠔꠥꠝꠞꠣ ꠛꠣꠐꠤꠀ ꠈꠣꠁꠟꠣꠅ। 18ꠀꠞ ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠀꠟ꠆ꠟꠣꠞ ꠛꠣꠖꠡꠣꠁ ꠘꠣ ꠀꠅꠀ ꠙꠞ꠆ꠎꠘ꠆ꠔ, ꠀꠝꠤ ꠀꠞ ꠀꠋꠉꠥꠞꠞ ꠇꠥꠘꠥ ꠡꠞꠛꠔ ꠈꠣꠁꠔꠣꠝ ꠘꠣꠄ।”

19ꠄꠞꠛꠣꠖꠦ ꠞꠥꠐꠤ ꠀꠔꠅ ꠟꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠟꠣ। ꠞꠥꠐꠤ ꠐꠥꠇꠞꠣꠁꠀ ꠍꠣꠢꠣꠛꠤ ꠅꠇꠟꠞꠦ ꠖꠤꠟꠣ, ꠇꠁꠟꠣ, “ꠝꠘꠅ ꠇꠞꠤꠅ ꠁꠐꠣ ꠀꠝꠣꠞ ꠇꠣꠄꠀ, ꠅꠃ ꠇꠣꠄꠀ ꠀꠝꠤ ꠔꠥꠝꠞꠣꠞ ꠟꠣꠉꠤ ꠡꠙꠤ ꠖꠤꠝꠥ। ꠀꠝꠣꠞꠦ ꠝꠘꠅ ꠇꠞꠣꠞ ꠟꠣꠉꠤ ꠔꠥꠝꠤꠔꠣꠁꠘꠅ ꠅꠟꠣ ꠇꠞꠤꠅ।”

20ꠈꠣꠅꠀꠞ ꠛꠣꠖꠦ ꠡꠞꠛꠔꠞ ꠙꠤꠀꠟꠣ ꠀꠔꠅ ꠟꠁꠀ ꠇꠁꠟꠣ, “ꠀꠝꠣꠞ ꠟꠃꠞ ꠎꠞꠤꠀꠄ ꠀꠟ꠆ꠟꠣꠞ ꠟꠉꠦ ꠝꠣꠘꠡꠞ ꠝꠤꠟꠘꠞ ꠎꠦ ꠘꠄꠀ ꠃꠍꠤꠟ꠆ꠟꠣ ꠘꠣꠎꠤꠟ ꠅꠞ, ꠅꠃ ꠙꠤꠀꠟꠣ ꠅꠁꠟ ꠄꠞ ꠘꠤꠡꠣꠘꠣ। ꠀꠝꠣꠞ ꠅꠃ ꠟꠃ ꠔꠥꠝꠞꠣꠞ ꠘꠣꠎꠣꠔꠞ ꠟꠣꠉꠤ ꠖꠤꠝꠥ। 21ꠔꠦ ꠖꠦꠈꠞꠣꠄ ꠘꠤ! ꠀꠝꠣꠞꠦ ꠎꠦꠉꠤꠄ ꠗꠞꠣꠁꠀ ꠖꠤꠛ, ꠢꠦ ꠅꠈꠘ ꠀꠝꠣꠞ ꠟꠉꠦ ꠅꠃ ꠖꠡ꠆ꠔꠣꠞꠈꠣꠘꠣꠔ ꠛꠁꠀ ꠈꠣꠞ। 22ꠀꠟ꠆ꠟꠣꠄ ꠎꠦꠟꠣ ꠢꠥꠇꠥꠝ ꠇꠞꠍꠂꠘ, ꠀꠝꠤ ꠛꠤꠘ-ꠀꠖꠝꠞ ꠝꠃꠔ ꠔ ꠅꠟꠣꠃ ꠅꠁꠛ। ꠢꠣꠄꠞꠦ ꠢꠣꠄ! ꠟꠣꠘ꠆ꠘꠔꠤ ꠢꠃ ꠀꠖꠝ, ꠎꠦꠉꠤꠄ ꠀꠝꠣꠞꠦ ꠗꠞꠣꠁꠀ ꠖꠤꠛ।” 23ꠍꠣꠢꠣꠛꠤ ꠅꠇꠟꠦ ꠄꠇꠦ-ꠅꠁꠘ꠆ꠘꠞꠦ ꠎꠤꠇꠣꠁꠟꠣ, “ꠔꠦ ꠀꠝꠞꠣꠞ ꠝꠣꠎꠞ ꠇꠥꠘ ꠝꠣꠘꠡꠦ ꠁꠟꠣ ꠇꠣꠝ ꠇꠞꠛ?”

ꠇꠥꠘ ꠎꠘ ꠢꠇꠟ ꠕꠣꠇꠤ ꠛꠠ

24ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠞ ꠝꠣꠎꠦ ꠇꠥꠘ ꠎꠘ ꠢꠇꠟ ꠕꠣꠇꠤ ꠛꠠ, ꠅꠔꠣ ꠟꠁꠀ ꠔꠣꠞꠣꠞ ꠝꠣꠎꠦ ꠔꠞ꠆ꠇꠣ-ꠔꠞ꠆ꠇꠤ ꠟꠣꠉꠤꠉꠦꠟ। 25ꠔꠦꠃ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠛꠤꠗꠞ꠆ꠝꠤ ꠖꠦꠡꠞ ꠞꠣꠎꠣ ꠅꠇꠟꠦ ꠔꠣꠞꠣꠞ ꠙ꠆ꠞꠎꠣꠞ ꠃꠙꠞꠦ ꠝꠥꠘꠤꠛꠉꠤꠞꠤ ꠖꠦꠈꠣꠁꠘ। ꠔꠣꠞꠣꠞ ꠎꠝꠤꠖꠣꠞꠞꠦ ꠇꠅꠀ ꠅꠄ ꠎꠘꠉꠘꠞ ꠖꠥꠡ꠆ꠔ। 26ꠅꠁꠟꠦ ꠔꠥꠝꠞꠣ ꠁꠟꠣꠘ ꠅꠁꠅ ꠘꠣ। ꠔꠥꠝꠞꠣꠞ ꠝꠣꠎꠦ ꠎꠦꠁꠘ ꠢꠇꠟ ꠕꠣꠇꠤ ꠛꠠ, ꠄꠁꠘ ꠢꠇꠟꠞ ꠢꠥꠞꠥ ꠅꠃꠇ। ꠀꠞ ꠎꠦꠁꠘ ꠘꠦꠔꠣ, ꠄꠁꠘ ꠈꠣꠖꠤꠝꠖꠣꠞꠞ ꠟꠣꠈꠣꠘ ꠅꠃꠇ। 27ꠇꠅ ꠌꠣꠁꠘ ꠇꠥꠘ ꠎꠘ ꠛꠠ? ꠎꠦꠁꠘ ꠈꠣꠘꠣ ꠈꠣꠁꠘ, ꠘꠣ ꠎꠦ ꠈꠣꠖꠤꠝꠖꠣꠞꠤ ꠇꠞꠦ? ꠎꠦꠁꠘ ꠈꠣꠘꠣ ꠈꠣꠁꠘ ꠄꠁꠘꠃ ꠘꠣꠄ ꠘꠤ? ꠔꠦ ꠀꠝꠤ ꠘꠤꠎꠦꠃ ꠔ ꠔꠥꠝꠞꠣꠞ ꠈꠣꠖꠤꠝꠖꠣꠞꠤ ꠇꠞꠤꠀꠞ।

28“ꠢꠥꠘꠅ, ꠀꠝꠣꠞ ꠢꠇꠟ ꠛꠣꠟꠣ-ꠝꠍꠤꠛꠔꠅ ꠔꠥꠝꠞꠣ ꠀꠝꠣꠞ ꠟꠉꠦ ꠟꠉꠦ ꠀꠍꠟꠣꠄ। 29ꠀꠞ ꠀꠝꠣꠞ ꠛꠣꠔꠥꠘꠤ ꠛꠣꠚꠦ ꠀꠝꠣꠞꠦ ꠎꠦꠟꠣ ꠉꠖꠤ ꠀꠞ ꠈꠦꠝꠔꠣ ꠖꠣꠘ ꠇꠞꠍꠂꠘ, ꠀꠝꠤꠅ ꠅꠃꠟꠣ ꠔꠥꠝꠞꠣꠞꠦ ꠈꠦꠝꠔꠣ ꠖꠣꠘ ꠇꠞꠞꠣꠝ। 30ꠅꠃ ꠈꠦꠝꠔꠣ ꠙꠣꠁꠀ, ꠔꠥꠝꠞꠣꠅ ꠀꠝꠣꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠁꠀ ꠀꠝꠣꠞ ꠟꠉꠦ ꠛꠁꠀ ꠈꠣꠘꠣ-ꠙꠤꠘꠣ ꠈꠣꠁꠛꠣꠄ, ꠀꠝꠣꠞ ꠟꠉꠦ ꠉꠖꠤꠔ ꠛꠁꠀ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠉꠥꠡ꠆ꠐꠤꠞ ꠛꠤꠌꠣꠞ-ꠀꠖꠣꠟꠔ ꠇꠞꠛꠣꠄ।

ꠢꠎꠞꠔ ꠙꠤꠔꠞꠞ ꠛꠦꠙꠣꠞꠦ ꠀꠉꠣꠝ ꠈꠛꠞ

31“ꠍꠣꠁꠝꠘ, ꠍꠣꠁꠝꠘ, ꠢꠥꠘꠅ, ꠗꠣꠘ-ꠌꠣꠃꠟ ꠎꠦꠟꠣ ꠌꠣꠁꠘꠖꠤ ꠌꠣꠘꠤꠀꠁꠘ, ꠡꠄꠔꠣꠘꠦꠅ ꠔꠥꠝꠞꠣꠞꠦ ꠅꠟꠣ ꠌꠣꠘꠤꠀꠁꠔ ꠌꠣꠁꠍꠦ। 32ꠅꠁꠟꠦ ꠔꠥꠝꠣꠞ ꠟꠣꠉꠤ ꠀꠝꠤ ꠀꠞꠎ ꠇꠞꠍꠤ, ꠔꠥꠝꠣꠞ ꠁꠝꠣꠘ ꠎꠣꠘꠥ ꠇꠝꠎꠥꠞ ꠘꠣ ꠅꠄ। ꠔꠦ ꠔꠥꠝꠤ ꠄꠇꠛꠣꠞ ꠉꠦꠟꠦꠉꠤꠅ ꠔꠃꠛꠣ ꠇꠞꠤꠀ ꠎꠦꠛꠟꠣ ꠚꠤꠞꠔ ꠀꠁꠛꠣꠄ, ꠅꠃ ꠡꠝꠄ ꠔꠥꠝꠣꠞ ꠅꠃ ꠜꠣꠁꠀꠁꠘ꠆ꠔꠞ ꠁꠝꠣꠘꠤ ꠛꠟꠅ ꠝꠎꠛꠥꠔ ꠇꠞꠤꠅ।” 33ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠤ ꠔ ꠀꠙꠘꠣꠞ ꠟꠉꠦ ꠅꠁꠀ ꠎꠦꠟꠅ ꠎꠣꠁꠔꠦ, ꠛꠣ ꠎꠣꠘ ꠖꠤꠔꠦꠅ ꠔꠤꠀꠞ ꠀꠍꠤ।” 34ꠔꠣꠁꠘ ꠇꠁꠟꠣ, “ꠙꠤꠔꠞ, ꠀꠝꠤ ꠔꠥꠝꠣꠞꠦ ꠇꠁꠞꠣꠝ, ꠀꠁꠎ ꠙꠔꠣꠛꠣꠟꠣ ꠝꠥꠞꠉꠣꠄ ꠛꠣꠋ ꠖꠤꠛꠣꠞ ꠀꠉꠦꠃ, ꠔꠥꠝꠤ ꠔꠤꠘ-ꠔꠤꠘꠛꠣꠞ ꠇꠁꠛꠣꠄ, ꠔꠥꠝꠤ ꠀꠝꠣꠞꠦ ꠌꠤꠘꠅ ꠘꠣ।”

35ꠛꠣꠖꠦ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠀꠝꠤ ꠎꠦꠛꠟꠣ ꠔꠥꠝꠞꠣꠞꠦ ꠐꠦꠇꠣꠞ ꠕꠟꠤ, ꠉꠣꠁꠐ-ꠛꠥꠍꠇꠤ ꠁꠔꠣ ꠇꠥꠘ꠆ꠔꠣ ꠘꠣ ꠖꠤꠀ ꠈꠣꠟꠤ ꠙꠣꠅꠄ ꠙꠣꠑꠣꠁꠍꠟꠣꠝ, ꠢꠤ ꠡꠝꠄ ꠔꠥꠝꠞꠣꠞ ꠇꠥꠘ꠆ꠔꠣꠞ ꠅꠜꠣꠛ ꠅꠁꠍꠤꠟ ꠘꠤ?” ꠔꠣꠞꠣ ꠇꠁꠟꠣ, “ꠎꠤ ꠘꠣ, ꠇꠥꠘꠥ ꠅꠜꠣꠛ ꠅꠁꠍꠦ ꠘꠣ।” 36ꠁꠍꠣꠄ ꠇꠁꠟꠣ, “ꠔꠦ ꠅꠈꠘ ꠀꠝꠤ ꠇꠁ, ꠅꠈꠘ ꠎꠣꠞ ꠐꠦꠇꠣꠞ ꠕꠟꠤ ꠛꠣ ꠉꠣꠁꠐ-ꠛꠥꠍꠇꠤ ꠀꠍꠦ, ꠢꠦ ꠅꠔꠣ ꠟꠉꠦ ꠞꠣꠈꠃꠇ। ꠎꠣꠞ ꠔꠟꠥꠀꠞ ꠘꠣꠁ, ꠢꠦ ꠔꠣꠞ ꠌꠣꠖ꠆ꠖꠞ ꠛꠦꠌꠤꠀ ꠔꠟꠥꠀꠞ ꠈꠞꠤꠖ ꠇꠞꠃꠇ। 37ꠙꠣꠇ ꠇꠣꠟꠣꠝꠞ ꠀꠄꠀꠔꠅ ꠔ ꠟꠦꠈꠣ ꠀꠍꠦ, ꠔꠣꠘꠞꠦ ꠘꠣꠚꠞꠝꠣꠘ ꠅꠇꠟꠞ ꠇꠣꠔꠣꠞꠅ ꠝꠤꠟꠣꠁꠟ ꠅꠁꠛ। ꠁ ꠀꠄꠀꠔ ꠔ ꠀꠝꠣꠞ ꠃꠙꠞ ꠖꠤꠀꠃ ꠚꠟꠤꠛ। ꠀꠝꠣꠞ ꠛꠦꠙꠣꠞꠦ ꠎꠔꠔꠣ ꠟꠦꠈꠣ ꠀꠍꠦ, ꠁꠔꠣ ꠢꠇ꠆ꠇꠟꠔꠣ ꠅꠈꠘ ꠚꠟꠤꠎꠣꠞ।” 38ꠔꠦꠃ ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠢꠥꠎꠥꠞ ꠖꠦꠈꠃꠇ꠆ꠇꠣ, ꠁꠘꠅ ꠖꠥꠈꠣꠘ ꠔꠟꠥꠀꠞ ꠀꠍꠦ।” ꠔꠣꠁꠘ ꠇꠁꠟꠣ, “ꠅꠔꠣꠃ ꠔ ꠛꠃꠔ।”

ꠎꠄꠔꠥꠘ ꠙꠣꠠꠅ ꠢꠎꠞꠔ ꠁꠍꠣꠞ ꠔꠇꠟꠤꠚ

39ꠈꠣꠘꠣ-ꠙꠤꠘꠣꠞ ꠛꠣꠖꠦ ꠁꠍꠣ ꠛꠣꠞ ꠅꠁꠀ ꠛꠞꠣꠛꠞꠇꠥꠞ ꠟꠣꠈꠣꠘ ꠢꠃ ꠎꠄꠔꠥꠘ ꠙꠣꠠꠅ ꠉꠦꠟꠣ, ꠍꠣꠢꠣꠛꠤ ꠅꠇꠟꠅ ꠔꠣꠘ ꠈꠞꠦ ꠈꠞꠦ ꠉꠦꠟꠣ। 40ꠢꠘꠅ ꠉꠤꠀ ꠢꠣꠞꠟꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠖꠥꠀ ꠇꠞꠅ, ꠎꠣꠔꠦ ꠇꠥꠘꠥ ꠙꠞꠤꠇ꠆ꠇꠣꠔ ꠘꠣ ꠙꠠ।” 41ꠇꠁꠀ ꠢꠣꠞꠤ ꠍꠣꠢꠣꠛꠤ ꠅꠇꠟꠞ ꠉꠦꠍ ꠕꠣꠇꠤ ꠌꠣꠁꠞ ꠘꠟ ꠙꠞꠤꠝꠣꠘ ꠖꠥꠞꠁ ꠉꠤꠀ, ꠎꠣꠘꠥ ꠙꠣꠔꠤꠀ ꠖꠥꠀ ꠇꠞꠣꠔ ꠛꠁꠟꠣ। 42ꠔꠣꠁꠘ ꠇꠁꠟꠣ, “ꠛꠦꠢꠦꠡ꠆ꠔꠤ ꠛꠣꠛꠣ, ꠔꠥꠝꠣꠞ ꠁꠌ꠆ꠍꠣ ꠅꠁꠟꠦ ꠝꠍꠤꠛꠔꠞ ꠁ ꠙꠤꠀꠟꠣꠐꠣ ꠀꠝꠣꠞ ꠉꠦꠍ ꠕꠘꠦ ꠢꠞꠣꠁꠟꠣꠅ। ꠅꠁꠟꠦ ꠀꠝꠣꠞ ꠁꠌ꠆ꠍꠣꠄ ꠘꠣꠄ, ꠔꠥꠝꠣꠞ ꠁꠌ꠆ꠍꠣꠄꠃ ꠅꠃꠇ।” 43ꠔꠦꠃ ꠛꠦꠢꠦꠡ꠆ꠔ ꠕꠣꠇꠤ ꠄꠇ ꠚꠤꠞꠤꠡ꠆ꠔꠣ ꠀꠁꠀ ꠁꠍꠣꠞꠦ ꠖꠞꠡꠘ ꠖꠤꠀ ꠔꠣꠘ ꠛꠟ ꠛꠣꠠꠣꠁꠟꠣ। 44ꠛꠣꠖꠦ ꠔꠣꠁꠘ ꠝꠘꠞ ꠖꠥꠈꠦ ꠙꠦꠞꠦꠡꠣꠘ ꠛꠘꠤꠀ ꠀꠞꠅ ꠇꠣꠔꠞ ꠅꠁꠀ ꠖꠥꠀ ꠇꠞꠟꠣ। ꠄꠞꠟꠣꠉꠤ ꠔꠣꠘ ꠉꠔꠞꠞ ꠊꠣꠝ ꠟꠃꠞ ꠚꠥꠐꠣꠞ ꠟꠣꠈꠣꠘ ꠝꠣꠐꠤꠔ ꠙꠠꠔ ꠟꠣꠉꠟ। 45ꠖꠥꠀ ꠡꠦꠡ ꠇꠞꠤꠀ ꠍꠣꠢꠣꠛꠤ ꠅꠇꠟꠞ ꠇꠣꠘ꠆ꠖꠣꠔ ꠀꠁꠀ ꠖꠦꠈꠟꠣ, ꠝꠘꠞ ꠖꠥꠈꠦ ꠇꠣꠔꠞ ꠅꠁꠀ ꠔꠣꠞꠣ ꠊꠥꠝꠣꠁ ꠉꠦꠍꠂꠘ। 46ꠖꠦꠈꠤꠀ ꠔꠣꠞꠣꠞꠦ ꠇꠁꠟꠣ, “ꠊꠥꠝꠣꠁꠞꠣꠄ ꠇꠦꠘꠦ? ꠃꠑꠤꠀ ꠖꠥꠀ ꠇꠞꠅ, ꠎꠣꠔꠦ ꠙꠞꠤꠇ꠆ꠇꠣꠔ ꠘꠣ ꠙꠠ।”

47ꠁꠍꠣ ꠝꠣꠔꠅ ꠞꠁꠍꠂꠘ, ꠅꠃ ꠡꠝꠄ ꠀꠈꠔꠣꠃ ꠢꠤꠈꠣꠘꠅ ꠛꠃꠔ ꠝꠣꠘꠥꠡ ꠀꠁꠟꠣ। ꠄꠞꠣꠞ ꠢꠇ꠆ꠇꠟꠞ ꠀꠉꠦ ꠀꠍꠤꠟ ꠁꠢꠥꠖꠣ, ꠢꠦ ꠁꠍꠣꠞ ꠛꠣꠞꠅꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ। ꠁꠢꠥꠖꠣꠄ ꠔꠣꠘꠞꠦ ꠢꠥꠋꠉꠣ ꠖꠤꠛꠣꠞ ꠟꠣꠉꠤ ꠇꠣꠘ꠆ꠖꠣꠔ ꠀꠁꠟ। 48ꠁꠍꠣꠄ ꠔꠣꠞꠦ ꠇꠁꠟꠣ, “ꠁꠢꠥꠖꠣ, ꠀꠝꠤ ꠛꠤꠘ-ꠀꠖꠝꠞꠦ ꠢꠥꠋꠉꠣ ꠖꠤꠀ ꠗꠞꠣꠁ ꠖꠤꠞꠣꠄ ꠘꠤ?”

49ꠅꠃ ꠡꠝꠄ ꠁꠍꠣꠞ ꠇꠣꠘ꠆ꠖꠣꠔ ꠎꠦꠞꠣ ꠀꠍꠟꠣ, ꠔꠣꠞꠣ ꠛꠥꠎꠤꠟꠤꠟꠣ ꠇꠤꠔꠣ ꠅꠞ। ꠛꠥꠎꠤꠀ ꠇꠁꠟꠣ, “ꠢꠥꠎꠥꠞ, ꠅꠔꠣꠞꠦ ꠀꠝꠞꠣꠞ ꠔꠟꠥꠀꠞꠖꠤ ꠝꠣꠞꠔꠣꠝ ꠘꠤ?” 50ꠇꠁꠀꠃ ꠄꠇ ꠍꠣꠢꠣꠛꠤꠄ ꠔꠟꠥꠀꠞꠖꠤ ꠍꠦꠖ ꠝꠣꠞꠤ ꠙꠞꠗꠣꠘ ꠁꠝꠣꠝꠞ ꠉꠥꠟꠣꠝꠞ ꠒꠣꠁꠘꠞ ꠇꠣꠘ ꠇꠣꠐꠤꠟꠤꠟꠣ। 51ꠅꠁꠟꠦ ꠁꠍꠣꠄ ꠇꠁꠟꠣ, “ꠛꠣꠖ ꠖꠦꠅ, ꠀꠞ ꠝꠣꠞꠤꠅ ꠘꠣ।” ꠅꠈꠣꠘ ꠇꠁꠀ ꠔꠣꠁꠘ ꠢꠤ ꠉꠥꠟꠣꠝꠞ ꠇꠣꠘ ꠀꠔꠣꠁ ꠖꠤꠀ ꠔꠣꠞꠦ ꠜꠣꠟꠣ ꠇꠞꠤꠟ꠆ꠟꠣ।

52ꠢꠎꠞꠔ ꠁꠍꠣꠞꠦ ꠀꠐꠇ ꠇꠞꠣꠔ ꠎꠔ ꠛꠠ ꠁꠝꠣꠝ, ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠖꠣꠞꠉꠣ, ꠀꠞ ꠝꠥꠞꠛ꠆ꠛꠤ ꠅꠇꠟ ꠀꠁꠍꠟꠣ, ꠁꠍꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ, “ꠝꠣꠘꠡꠦ ꠌꠥꠞ-ꠒꠣꠇꠣꠁꠔ ꠗꠞꠔꠦ ꠎꠦꠟꠣ ꠟꠣꠑꠤ-ꠍꠥꠟꠚꠤ ꠟꠁꠀ ꠎꠣꠁꠘ, ꠔꠥꠝꠞꠣ ꠀꠝꠣꠞꠦ ꠗꠞꠣꠔ ꠅꠃꠟꠣ ꠀꠁꠍ ꠘꠤ? 53ꠀꠝꠤ ꠔ ꠙꠞꠔꠦꠇ ꠖꠤꠘꠃ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠔꠥꠝꠞꠣꠞ ꠍꠣꠝꠘꠦ ꠀꠍꠟꠣꠝ, ꠢꠤ ꠡꠝꠄ ꠀꠝꠣꠞꠦ ꠗꠞꠟꠣꠄ ꠘꠣ ꠇꠦꠘꠦ? ꠅ, ꠅꠈꠘ ꠘꠤꠌꠄ ꠔꠥꠝꠞꠣꠞ ꠡꠝꠄ, ꠀꠘ꠆ꠖꠣꠁꠞꠞ ꠞꠣꠎꠔ꠆ꠔ ꠌꠣꠟꠥ ꠅꠁꠍꠦ।”

ꠢꠎꠞꠔ ꠙꠤꠔꠞꠞ ꠅꠡ꠆ꠛꠤꠇꠣꠞ

54ꠖꠥꠡꠝꠘꠞ ꠖꠟꠦ ꠁꠍꠣꠞꠦ ꠀꠐꠇ ꠇꠞꠤꠀ ꠙꠞꠗꠣꠘ ꠁꠝꠣꠝꠞ ꠛꠣꠠꠤꠔ ꠟꠁꠀ ꠉꠦꠟꠣꠉꠤ। ꠍꠣꠢꠣꠛꠤ ꠙꠤꠔꠞ ꠖꠥꠞꠁ ꠢꠞꠤ ꠢꠞꠤ ꠁꠍꠣꠞ ꠈꠞꠦ ꠅꠁꠀ ꠉꠦꠟꠣ। 55ꠃꠑꠣꠘꠞ ꠝꠣꠎꠦ ꠛꠣꠇ꠆ꠇꠣ ꠝꠣꠘꠡꠦ ꠀꠉꠥꠁꠘ ꠗꠞꠣꠁꠀ ꠔꠣꠛꠣꠘꠤꠔ ꠟꠣꠉꠟꠣ, ꠙꠤꠔꠞꠅ ꠅꠘꠅ ꠀꠁꠀ ꠡꠞꠤꠇ ꠅꠁꠟꠣ। 56ꠅꠃ ꠡꠝꠄ ꠄꠇ ꠛꠣꠘ꠆ꠖꠤ ꠛꠦꠐꠤꠄ ꠀꠉꠥꠘꠤꠞ ꠚꠞꠞ ꠝꠣꠎꠦ ꠙꠤꠔꠞꠞꠦ ꠖꠦꠈꠤꠀ ꠜꠣꠟꠣ ꠇꠞꠤ ꠌꠣꠁꠀ ꠇꠁꠟ, “ꠅꠃ ꠛꠦꠐꠣꠅ ꠢꠉꠥꠞ ꠟꠉꠦ ꠀꠍꠤꠟ।”

57ꠙꠤꠔꠞꠦ ꠇꠁꠟꠣ, “ꠘꠣ ꠛꠦꠐꠤ, ꠀꠝꠤ ꠄꠞꠦ ꠌꠤꠘꠤꠃ ꠘꠣ।” 58ꠕꠥꠠꠣ ꠛꠣꠖꠦ ꠀꠞꠇ ꠎꠘꠦ ꠙꠤꠔꠞꠞꠦ ꠖꠦꠈꠤꠀ ꠇꠁꠟ, “ꠔꠥꠝꠤꠅ ꠅꠔꠣꠞ ꠟꠉꠞ ꠄꠇꠎꠘ।”

ꠔꠣꠁꠘ ꠇꠁꠟꠣ, “ꠘꠣ ꠛꠣ, ꠀꠝꠤ ꠘꠣꠄ।” 59ꠀꠞꠅ ꠄꠇꠖ ꠊꠘ꠆ꠐꠣ ꠛꠣꠖꠦ ꠀꠞꠇ ꠎꠘꠦ ꠛꠠ ꠉꠟꠣꠄ ꠇꠁꠟ, “ꠅꠄ, ꠅꠄ, ꠅꠉꠥꠅ ꠄꠞ ꠟꠉꠦ ꠀꠍꠤꠟ, ꠄꠅ ꠔ ꠉꠣꠟꠤꠟꠞ ꠝꠣꠘꠥꠡ।” 60ꠔꠣꠁꠘ ꠇꠁꠟꠣ, “ꠖꠥꠞ ꠛꠦꠐꠣ! ꠔꠥꠝꠤ ꠁꠔꠣ ꠇꠤꠔꠣ ꠝꠣꠔꠅ, ꠇꠥꠘ꠆ꠔꠣ ꠛꠥꠎꠤ ꠘꠣ।”

ꠙꠤꠔꠞꠦ ꠅꠔꠣ ꠇꠁꠞꠣ, ꠄꠞꠝꠣꠎꠦ ꠀꠈꠔꠣꠃ ꠝꠥꠞꠉꠣꠄ ꠛꠣꠋ ꠖꠤꠟꠣꠁꠟ। 61ꠔꠦꠃ ꠁꠍꠣꠄ ꠝꠥꠈ ꠚꠤꠞꠣꠁꠀ ꠙꠤꠔꠞꠞ ꠛꠣꠄ ꠌꠣꠁꠟꠣ। ꠌꠣꠁꠔꠦꠃ ꠙꠤꠔꠞꠞ ꠝꠘꠅ ꠅꠁꠉꠦꠟꠉꠤ, ꠢꠥꠎꠥꠞꠦ ꠔ ꠀꠉꠦꠃ ꠇꠁꠍꠟꠣ, “ꠀꠁꠎ ꠙꠔꠣꠛꠣꠟꠣ ꠝꠥꠞꠉꠣꠄ ꠛꠣꠋ ꠖꠤꠛꠣꠞ ꠀꠉꠦꠃ, ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ, ꠔꠥꠝꠤ ꠀꠝꠣꠞꠦ ꠌꠤꠘ ꠘꠣ।” 62ꠔꠦꠃ ꠙꠤꠔꠞ ꠛꠣꠞꠦ ꠉꠤꠀ ꠈꠥꠛ ꠇꠣꠘ꠆ꠖꠘ ꠇꠣꠘ꠆ꠖꠤꠟꠣ।

ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠍꠣꠝꠘꠦ ꠢꠎꠞꠔ ꠁꠍꠣ

63ꠢꠎꠞꠔ ꠁꠍꠣꠞꠦ ꠗꠞꠤꠀ ꠀꠘꠤꠀ ꠙꠣꠞꠣꠖꠣꠞ ꠅꠇꠟꠦ ꠔꠣꠘꠞꠦ ꠑꠣꠐ꠆ꠐꠣ-ꠝꠡꠇꠞꠣ ꠀꠞ ꠝꠣꠁꠞ-ꠗꠁꠞ ꠇꠞꠟ। 64ꠔꠣꠘ ꠌꠃꠈ ꠛꠣꠘ꠆ꠖꠤꠀ ꠇꠁꠟ, “ꠢꠂ, ꠔꠥꠁ ꠛꠥꠟꠦ ꠘꠛꠤ, ꠔꠦ ꠅꠈꠘ ꠉꠣꠁꠛꠤ ꠇꠅ ꠌꠣꠁꠘ, ꠔꠞꠦ ꠇꠦꠉꠤꠄ ꠝꠣꠞꠟ?” 65ꠅꠃꠟꠣ ꠀꠞꠅ ꠛꠃꠔꠔꠣ ꠇꠁꠀ ꠔꠣꠘꠞꠦ ꠛꠦꠁꠎ꠆ꠎꠔ ꠇꠞꠟ।

66ꠞꠣꠁꠔ ꠙꠥꠀꠘꠤꠞ ꠛꠣꠖꠦ ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠝꠥꠞꠛ꠆ꠛꠤꠀꠘ, ꠛꠠ ꠁꠝꠣꠝ ꠀꠞ ꠀꠟꠤꠝ ꠅꠇꠟ ꠖꠟꠣ ꠅꠁꠟꠣ, ꠀꠞ ꠁꠍꠣꠞꠦ ꠔꠣꠞꠣꠞ ꠍꠣꠝꠘꠦ ꠀꠘꠣꠁꠀ ꠇꠁꠟꠣ, 67“ꠔꠥꠝꠤ ꠎꠥꠖꠤ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ ꠅꠅ, ꠔꠦ ꠀꠝꠞꠣꠞꠦ ꠇꠅ।” ꠁꠍꠣꠄ ꠇꠁꠟꠣ, “ꠀꠝꠤ ꠇꠁꠟꠦꠅ ꠔ ꠔꠥꠝꠤꠔꠣꠁꠘ ꠄꠇꠤꠘ ꠇꠞꠔꠣꠄ ꠘꠣꠄ। 68ꠇꠥꠘ꠆ꠔꠣ ꠎꠤꠇꠣꠁꠟꠦꠅ ꠎꠥꠀꠙ ꠖꠤꠔꠣꠄ ꠘꠣꠄ। 69ꠅꠁꠟꠦ ꠀꠝꠤ ꠛꠤꠘ-ꠀꠖꠝ ꠅꠈꠘ ꠕꠣꠇꠤꠃ ꠀꠞꠡꠦ-ꠀꠎꠤꠝꠅ ꠀꠟ꠆ꠟꠣꠞ ꠒꠣꠁꠘꠞ ꠇꠥꠞꠍꠤꠔ ꠛꠁꠝꠥ।” 70ꠔꠦꠃ ꠢꠇ꠆ꠇꠟꠦ ꠎꠤꠇꠣꠁꠟ, “ꠔꠦ ꠔꠥꠝꠤꠃ ꠇꠤꠔꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ ꠘꠤ?” ꠔꠣꠁꠘ ꠇꠁꠟꠣ, “ꠅꠄ, ꠔꠥꠝꠤꠔꠣꠁꠘꠃ ꠔ ꠇꠁꠞꠣꠄ, ꠀꠝꠤꠃ ꠢꠦꠁꠘ।” 71ꠔꠦꠃ ꠔꠣꠞꠣ ꠢꠇ꠆ꠇꠟꠦ ꠇꠁꠟ, “ꠔꠦ ꠀꠞ ꠡꠣꠄ-ꠡꠣꠇ꠆ꠇꠤꠖꠤ ꠇꠤꠔꠣ ꠇꠞꠔꠣꠄ? ꠀꠝꠞꠣ ꠘꠤꠎꠞ ꠇꠣꠘꠦꠃ ꠔ ꠔꠣꠞ ꠎꠛꠣꠘꠛꠘ꠆ꠖꠤ ꠢꠥꠘꠟꠣꠝ।”

Currently Selected:

ꠁꠘ꠆ꠎꠤꠟ ৩: ꠟꠥꠇ 22: sylN

Highlight

Copy