ꠁꠘ꠆ꠎꠤꠟ ৩: ꠟꠥꠇ 23

ꠞꠥꠝꠣꠘ ꠢꠣꠇꠤꠝꠞ ꠍꠣꠝꠘꠦ ꠢꠎꠞꠔ ꠁꠍꠣ

1ꠔꠣꠞꠣ ꠢꠇꠟꠦ ꠄꠇꠟꠉꠦ ꠖꠟ ꠛꠣꠘ꠆ꠖꠤꠀ ꠁꠍꠣꠞꠦ ꠟꠁꠀ ꠞꠥꠝꠣꠘ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠉꠦꠟꠣ। 2ꠉꠤꠀ ꠁꠍꠣꠞ ꠛꠤꠙꠇ꠆ꠇꠦ ꠘꠣꠟꠤꠡ ꠖꠤꠟꠣ। ꠔꠣꠞꠣ ꠇꠁꠟꠣ, “ꠀꠝꠞꠣ ꠖꠦꠈꠍꠤ, ꠅꠃ ꠛꠦꠐꠣꠄ ꠀꠝꠞꠣꠞ ꠖꠦꠡꠞ ꠝꠣꠘꠡꠞꠦ ꠛꠤꠉꠠꠣꠁ ꠖꠦꠞ, ꠢꠦ ꠝꠣꠘꠡꠞꠦ ꠘꠤꠡꠦꠗ ꠇꠞꠦ ꠀꠝꠞꠣꠞ ꠛꠣꠖꠡꠣ ꠇꠂꠍꠞꠞꠦ ꠈꠣꠎꠘꠣ ꠖꠤꠔꠣ ꠘꠣ। ꠢꠦ ꠘꠤꠎꠦꠃ ꠛꠥꠟꠦ ꠀꠟ-ꠝꠍꠤ ꠘꠣꠝꠞ ꠄꠇ ꠛꠣꠖꠡꠣ।” 3ꠙꠤꠟꠣꠔꠦ ꠁꠍꠣꠞꠦ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠁꠢꠥꠖꠤ ꠅꠇꠟꠞ ꠛꠣꠖꠡꠣ ꠘꠤ?” ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠙꠘꠦ ꠎꠦꠟꠣ ꠇꠂꠘ, ꠅꠟꠣꠃ।” 4ꠔꠦꠃ ꠙꠤꠟꠣꠔꠦ ꠛꠠ ꠁꠝꠣꠝ ꠀꠞ ꠢꠇꠟ ꠝꠣꠘꠡꠞꠦ ꠇꠁꠟꠣ, “ꠀꠝꠤ ꠔ ꠁ ꠀꠡꠣꠝꠤꠞ ꠇꠥꠘꠥ ꠖꠥꠡꠃ ꠙꠣꠁꠞꠣꠝ ꠘꠣ।” 5ꠅꠁꠟꠦ ꠔꠣꠞꠣ ꠎꠤꠖ ꠇꠞꠤꠀ ꠇꠁꠟ, “ꠁ ꠛꠦꠐꠣꠄ ꠉꠣꠟꠤꠟ ꠎꠤꠟꠣ ꠕꠣꠇꠤ ꠀꠞꠝ꠆ꠛ ꠇꠞꠤꠀ ꠀꠡ꠆ꠔꠣ ꠄꠢꠥꠖꠤꠀ ꠎꠤꠟꠣꠞ ꠝꠣꠘꠡꠞꠦ ꠛꠤꠉꠠꠣꠁꠀ, ꠅꠈꠘ ꠀꠝꠞꠣꠞ ꠅꠘꠅ ꠀꠁꠀꠅ ꠢꠇ꠆ꠇꠟꠞꠦ ꠛꠤꠉꠠꠣꠁꠟꠣꠞ।”

6ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠎꠤꠇꠣꠁꠟꠣ, “ꠢꠦ ꠇꠤꠔꠣ ꠉꠣꠟꠤꠟꠞ ꠝꠣꠘꠥꠡ ꠘꠤ?” 7ꠢꠣꠇꠤꠝꠦ ꠎꠦꠛꠟꠣ ꠢꠥꠘꠟꠣ, ꠁꠍꠣꠞ ꠛꠣꠠꠤ ꠅꠁꠟ ꠞꠣꠎꠣ ꠢꠦꠞꠥꠖꠞ ꠅꠗꠤꠘꠞ ꠉꠣꠟꠤꠟ ꠎꠤꠟꠣꠔ, ꠢꠥꠘꠤꠀ ꠔꠣꠁꠘ ꠁꠍꠣꠞꠦ ꠢꠦꠞꠥꠖꠞ ꠉꠦꠍꠦ ꠙꠣꠑꠣꠁ ꠖꠤꠟꠣ, ꠇꠣꠞꠘ ꠢꠦꠞꠥꠖꠅ ꠅꠃ ꠡꠝꠄ ꠎꠦꠞꠥꠎꠣꠟꠦꠝꠅ ꠀꠍꠟꠣ।

8ꠁꠍꠣꠞꠦ ꠖꠦꠈꠤꠀ ꠢꠦꠞꠥꠖ ꠈꠥꠛ ꠈꠥꠡꠤ ꠅꠁꠟꠣ। ꠔꠣꠁꠘ ꠛꠃꠔ ꠖꠤꠘ ꠗꠞꠤ ꠁꠍꠣꠞꠦ ꠖꠦꠈꠔꠣ ꠌꠣꠁꠞꠣ। ꠀꠉꠦ ꠔꠣꠁꠘ ꠁꠍꠣꠞ ꠛꠦꠙꠣꠞꠦ ꠛꠃꠔꠔꠣ ꠢꠥꠘꠍꠤꠟꠣ, ꠄꠞꠟꠣꠉꠤ ꠔꠣꠘ ꠝꠘꠞ ꠀꠡꠣ ꠀꠍꠤꠟ, ꠁꠍꠣꠄ ꠔꠣꠘꠞꠦ ꠇꠥꠘꠥ ꠇꠦꠞꠣꠝꠔꠤ-ꠝꠥꠎꠦꠎꠣ ꠖꠦꠈꠣꠁꠛꠣ। 9ꠔꠣꠁꠘ ꠁꠍꠣꠞꠦ ꠛꠃꠔ ꠘꠝꠥꠘꠣꠞ ꠙ꠆ꠞꠡꠘ ꠇꠞꠟꠣ, ꠅꠁꠟꠦ ꠁꠍꠣꠄ ꠁꠔꠣꠞ ꠇꠥꠘꠥ ꠎꠥꠀꠙ ꠖꠤꠟꠣ ꠘꠣ। 10ꠀꠖꠣꠟꠔꠅ ꠃꠛꠣꠁꠀꠅ ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠦ ꠈꠥꠛ ꠉꠞꠝ ꠅꠁꠀ ꠁꠍꠣꠞ ꠛꠤꠙꠇ꠆ꠇꠦ ꠘꠣꠟꠤꠡ ꠢꠥꠘꠣꠘꠤꠔ ꠞꠁꠟꠣ। 11ꠄꠞꠟꠉꠦ ꠢꠦꠞꠥꠖꠦ ꠀꠞ ꠔꠣꠘ ꠍꠤꠙꠣꠁ ꠅꠇꠟꠦꠅ ꠁꠍꠣꠞꠦ ꠑꠣꠐ꠆ꠐꠣ-ꠝꠡꠇꠞꠣ, ꠛꠦꠁꠎ꠆ꠎꠔꠤ ꠇꠞꠟꠣ, ꠢꠦꠡ-ꠝꠦꠡ ꠔꠣꠘꠞꠦ ꠛꠣꠖꠡꠣꠁ ꠌꠇꠌꠇꠣ ꠟꠦꠛꠣꠍ ꠚꠤꠘ꠆ꠖꠣꠁꠀ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠚꠤꠞꠔ ꠙꠣꠑꠣꠁ ꠖꠤꠟꠣ। 12ꠄꠞ ꠀꠉꠦ ꠞꠣꠎꠣ ꠢꠦꠞꠥꠖ ꠀꠞ ꠢꠣꠇꠤꠝ ꠙꠤꠟꠣꠔꠞ ꠝꠣꠎꠦ ꠖꠥꠡꠝꠘꠤ ꠀꠍꠤꠟ, ꠅꠁꠟꠦ ꠅꠃ ꠖꠤꠘ ꠕꠣꠇꠤꠃ ꠔꠣꠞꠣꠞ ꠝꠣꠎꠦ ꠖꠥꠡ꠆ꠔꠤ ꠅꠁꠉꠦꠟ।

13ꠛꠣꠖꠦ ꠙꠤꠟꠣꠔꠦ ꠛꠠ ꠁꠝꠣꠝ, ꠝꠥꠞꠛ꠆ꠛꠤ ꠅꠇꠟ, ꠀꠞ ꠀꠝ ꠝꠣꠘꠡꠞꠦ ꠄꠇꠈꠣꠘꠅ ꠖꠟꠣ ꠇꠞꠤꠀ, 14ꠇꠁꠟꠣ, “ꠅꠃ ꠀꠡꠣꠝꠤꠞꠦ ꠔꠥꠝꠞꠣ ꠗꠞꠤꠀ ꠀꠘꠤꠀ ꠀꠝꠣꠞ ꠉꠦꠍꠦ ꠘꠣꠟꠤꠡ ꠖꠤꠟꠣꠄ, ꠢꠦ ꠢꠇ꠆ꠇꠟ ꠝꠣꠘꠡꠞꠦ ꠛꠤꠉꠠꠣꠁꠟꠣꠞ, ꠅꠁꠟꠦ ꠀꠝꠤ ꠔ ꠔꠥꠝꠞꠣꠞ ꠍꠣꠝꠘꠦꠃ ꠔꠣꠞꠦ ꠎꠦꠞꠣ ꠇꠞꠟꠣꠝ, ꠔꠦ ꠔꠥꠝꠞꠣ ꠎꠦꠟꠣ ꠘꠣꠟꠤꠡ ꠖꠤꠍ, ꠔꠣꠞ ꠝꠣꠎꠦ ꠔ ꠁꠟꠣ ꠇꠥꠘꠥ ꠖꠥꠡꠃ ꠙꠣꠁꠟꠣꠝ ꠘꠣ। 15ꠀꠞ ꠞꠣꠎꠣ ꠢꠦꠞꠥꠖꠦꠅ ꠘꠤꠌꠄ ꠔꠣꠞ ꠇꠥꠘꠥ ꠖꠥꠡ ꠙꠣꠁꠍꠂꠘ ꠘꠣ, ꠄꠞꠟꠣꠉꠤꠃ ꠔꠣꠁꠘ ꠔꠣꠞꠦ ꠀꠝꠣꠞ ꠉꠦꠍꠦ ꠚꠤꠞꠔ ꠙꠣꠑꠣꠁꠍꠂꠘ। ꠀꠝꠤ ꠖꠦꠈꠞꠣꠝ, ꠝꠃꠔꠞ ꠡꠣꠎꠣꠞ ꠎꠥꠇꠣ ꠇꠥꠘꠥ ꠖꠥꠡꠃ ꠢꠦ ꠇꠞꠍꠦ ꠘꠣ। 16ꠔꠦ ꠀꠝꠤ ꠔꠣꠞꠦ ꠍꠤꠋꠟꠣꠖꠤ ꠝꠣꠞꠤꠀ ꠍꠣꠠꠤ ꠖꠤꠝꠥ।” 17ꠀꠍꠟꠦ ꠢꠣꠇꠤꠝ ꠙꠤꠟꠣꠔꠞ ꠞꠦꠅꠀꠎꠅ ꠀꠍꠤꠟ, ꠔꠣꠁꠘ ꠀꠎꠣꠖꠤ ꠁꠖꠞ ꠅꠇ꠆ꠔꠅ ꠄꠇꠎꠘ ꠇꠄꠅꠖꠤꠞꠦ ꠈꠣꠟꠣꠍ ꠖꠤꠔꠣ।

18ꠅꠁꠟꠦ ꠝꠣꠘꠡꠦ ꠄꠇꠟꠉꠦ ꠌꠤꠟ꠆ꠟꠣꠁꠀ ꠇꠁꠟ, “ꠘꠣ, ꠘꠣ, ꠅꠉꠥꠞꠦ ꠝꠣꠞꠤꠟꠣꠅ। ꠛꠣꠞꠣꠛ꠆ꠛꠣꠞꠦ ꠍꠣꠠꠤ ꠖꠦꠅ।” 19ꠅꠃ ꠛꠣꠞꠣꠛ꠆ꠛꠣꠞꠦ ꠀꠉꠦ ꠎꠦꠟꠅ ꠢꠣꠞꠣꠁꠟ ꠅꠁꠍꠤꠟ, ꠢꠦ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠈꠥꠘ ꠀꠞ ꠡꠘꠔ꠆ꠞꠣꠡ ꠇꠞꠍꠤꠟ। 20ꠅꠁꠟꠦ ꠙꠤꠟꠣꠔꠦ ꠁꠍꠣꠞꠦ ꠍꠣꠠꠤ ꠖꠦꠅꠀꠞ ꠘꠤꠅꠔꠦ ꠢꠤꠞꠛꠣꠞ ꠔꠣꠞꠣꠞ ꠟꠉꠦ ꠛꠣꠔꠌꠤꠔ ꠇꠞꠟꠣ। 21ꠔꠣ-ꠅ ꠔꠣꠞꠣ ꠄꠇꠟꠉꠦ ꠌꠤꠟ꠆ꠟꠣꠁꠀ ꠃꠑꠟ, “ꠅꠉꠥꠞꠦ ꠍꠟꠤꠛꠅ ꠖꠦꠅ, ꠍꠟꠤꠛꠅ ꠖꠦꠅ।” (ꠍꠟꠤꠛ ꠅꠁꠟ ꠟꠣꠇꠠꠤꠖꠤ ꠛꠣꠘꠣꠁꠟ ꠝꠣꠘꠡꠞꠦ ꠟꠐꠇꠣꠁꠀ ꠝꠣꠞꠣꠞ ꠄꠇ ꠎꠤꠘꠤꠡ।) 22ꠙꠤꠟꠣꠔꠦ ꠔꠤꠘ-ꠔꠤꠘꠛꠣꠞ ꠔꠣꠞꠣꠞꠦ ꠎꠤꠇꠣꠁꠟꠣ, “ꠇꠦꠘꠦ? ꠁ ꠀꠡꠣꠝꠤꠄ ꠇꠤꠔꠣ ꠖꠥꠡ ꠇꠞꠍꠦ? ꠝꠃꠔꠞ ꠡꠣꠎꠣꠞ ꠎꠥꠇꠣ ꠔꠣꠞ ꠇꠥꠘꠥ ꠖꠥꠡꠃ ꠀꠝꠤ ꠙꠣꠁꠞꠣꠝ ꠘꠣ। ꠀꠝꠤ ꠈꠣꠟꠤ ꠍꠤꠋꠟꠣꠖꠤ ꠝꠣꠞꠤꠀ ꠔꠣꠞꠦ ꠍꠣꠠꠤ ꠖꠤꠝꠥ।” 23ꠅꠁꠟꠦ ꠔꠣꠞꠣ ꠝꠣꠁꠞꠝꠥꠈꠤ ꠅꠁꠀ, ꠌꠤꠟ꠆ꠟꠣꠁꠀ, ꠝꠤꠍꠤꠟ ꠟꠣꠉꠣꠁꠟꠣ, “ꠅꠉꠥꠞꠦ ꠍꠟꠤꠛꠅ ꠟꠐꠇꠣꠅ, ꠍꠟꠤꠛꠅ ꠟꠐꠇꠣꠅ।” ꠌꠤꠟ꠆ꠟꠣꠘꠤꠞ ꠌꠥꠐꠦ ꠔꠣꠞꠣꠞ ꠖꠣꠛꠤ ꠙꠥꠞꠣ ꠅꠁꠟ। 24ꠔꠣꠞꠣꠞ ꠖꠣꠛꠤ ꠝꠣꠚꠤꠇꠃ ꠙꠤꠟꠣꠔꠦ ꠞꠣꠄ ꠖꠤꠟꠣꠁꠟꠣ। 25ꠔꠣꠁꠘ ꠢꠎꠞꠔ ꠁꠍꠣꠞꠦ ꠔꠣꠞꠣꠞ ꠛꠖ ꠈꠣꠁꠡ ꠝꠣꠚꠤꠇ ꠔꠣꠞꠣꠞ ꠀꠔꠅ ꠍꠣꠠꠤ ꠖꠤꠟꠣ ꠀꠞ ꠢꠃ ꠈꠥꠘꠤ-ꠡꠘꠔ꠆ꠞꠣꠡꠤꠞꠦ ꠈꠣꠟꠣꠍ ꠖꠤꠟꠣꠁꠟꠣ।

ꠍꠟꠤꠛꠞ ꠃꠙꠞꠦ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠝꠃꠔ

26ꠢꠣꠇꠤꠝꠞ ꠞꠣꠄ ꠙꠣꠁꠀ ꠍꠤꠙꠣꠁ ꠅꠇꠟꠦ ꠁꠍꠣꠞꠦ ꠎꠣꠘꠦ ꠝꠣꠞꠤꠟꠤꠔꠣ ꠇꠞꠤ ꠁꠍꠣꠞꠦ ꠟꠁꠀ ꠎꠣꠁꠞꠣ। ꠅꠃ ꠡꠝꠄ ꠍꠣꠁꠝꠘ ꠘꠣꠝꠞ ꠇꠥꠞꠤꠘꠤ ꠄꠟꠣꠇꠣꠞ ꠄꠇꠎꠘ ꠝꠣꠘꠥꠡ ꠉꠣꠃ ꠕꠣꠇꠤ ꠐꠣꠃꠘꠅ ꠀꠅꠀꠔ ꠀꠍꠤꠟ। ꠔꠣꠞꠣ ꠅꠃ ꠛꠦꠐꠣꠞꠦ ꠗꠞꠤꠀ ꠟꠣꠇꠠꠤꠖꠤ ꠛꠣꠘꠣꠁꠟ ꠍꠟꠤꠛ ꠔꠣꠞ ꠇꠣꠘ꠆ꠖꠅ ꠔꠥꠟꠤꠀ ꠖꠤꠀ ꠇꠁꠟ, ꠢꠦ ꠅꠉꠥ ꠟꠁꠀ ꠁꠍꠣꠞ ꠈꠞꠦ ꠈꠞꠦ ꠎꠣꠁꠔ। 27ꠁꠍꠣꠞ ꠈꠞꠦ ꠈꠞꠦ ꠛꠃꠔ ꠝꠣꠘꠥꠡ ꠀꠍꠤꠟ, ꠄꠞꠣꠞ ꠟꠉꠦ ꠛꠃꠔ ꠛꠦꠐꠤꠘꠅ ꠀꠍꠟꠣ। ꠔꠣꠞꠣ ꠔꠣꠘ ꠟꠣꠉꠤ ꠛꠤꠟꠣꠙ ꠀꠞ ꠀꠢꠣꠎꠣꠞꠤ ꠇꠞꠤꠀ ꠛꠥꠇꠥꠔ ꠕꠣꠛꠣꠁꠀ ꠇꠣꠘ꠆ꠖꠘ ꠟꠣꠉꠣꠁꠟꠣ। 28ꠅꠁꠟꠦ ꠁꠍꠣꠄ ꠔꠣꠞꠣꠞ ꠛꠣꠄ ꠌꠣꠁꠀ ꠇꠁꠟꠣ, “ꠅ ꠎꠦꠞꠥꠎꠣꠟꠦꠝꠞ ꠝꠣꠁ ꠅꠇꠟ, ꠀꠝꠣꠞ ꠟꠣꠉꠤ ꠇꠣꠘ꠆ꠖꠤꠅ ꠘꠣ। ꠔꠥꠝꠞꠣ ꠘꠤꠎꠞ ꠟꠣꠉꠤ ꠀꠞ ꠘꠤꠎꠞ ꠙꠥꠀ-ꠙꠥꠠꠤꠞ ꠟꠣꠉꠤ ꠇꠣꠘ꠆ꠖꠅ। 29ꠢꠥꠘꠅ, ꠅꠝꠘ ꠄꠇ ꠖꠤꠘ ꠀꠁꠛ, ꠎꠦꠛꠟꠣ ꠝꠣꠘꠡꠦ ꠇꠁꠛꠣ ꠀꠐꠇꠥꠞꠣ ꠛꠦꠐꠤꠘꠃ ꠛꠠ ꠇꠙꠣꠟꠤ। ꠎꠦꠞꠣꠞ ꠇꠥꠘꠥ ꠢꠥꠞꠥꠔ꠆ꠔꠣꠃ ꠅꠁꠍꠦ ꠘꠣ, ꠛꠥꠇꠞ ꠖꠥꠗꠅ ꠇꠥꠘꠥꠖꠤꠘ ꠈꠣꠅꠀꠁꠍꠦ ꠘꠣ, ꠔꠣꠞꠣꠃ ꠇꠙꠣꠟꠤ। 30ꠢꠤ ꠡꠝꠄ ꠝꠣꠘꠡꠦ ꠛꠠ ꠛꠠ ꠙꠣꠠꠞꠦ ꠇꠁꠛ, ꠔꠥꠝꠞꠣ ꠀꠁꠀ ꠀꠝꠞꠣꠞ ꠃꠙꠞꠦ ꠙꠠꠅ। ꠙꠣꠠꠞ ꠐꠤꠟ꠆ꠟꠣ ꠅꠇꠟꠞꠦ ꠇꠁꠛ, ꠀꠝꠞꠣꠞꠦ ꠟꠥꠇꠣꠁꠀ ꠞꠣꠈꠅ। 31ꠔꠥꠝꠞꠣ ꠖꠦꠈꠞꠣꠄ ꠘꠣ ꠘꠤ, ꠔꠣꠎꠣ ꠉꠣꠍꠞꠦꠃ ꠁꠔꠣꠄ ꠅꠃ ꠢꠣꠟꠔ ꠇꠞꠞꠣ, ꠔꠦ ꠢꠥꠇꠘꠣ ꠉꠣꠍꠞ ꠇꠥꠘ ꠖꠡꠣ ꠅꠁꠛ।”

32ꠢꠎꠞꠔ ꠁꠍꠣꠞ ꠟꠉꠦ ꠇꠞꠤ ꠝꠣꠞꠣꠞ ꠟꠣꠉꠤ ꠍꠤꠙꠣꠁ ꠅꠇꠟꠦ ꠖꠥꠁꠎꠘ ꠖꠣꠉꠤ ꠀꠡꠣꠝꠤꠞꠦ ꠟꠁꠀ ꠀꠁꠟ। 33ꠛꠣꠖꠦ ꠝꠣꠕꠣꠞ-ꠈꠥꠟꠤ ꠘꠣꠝꠞ ꠎꠣꠉꠣꠔ ꠀꠘꠤꠀ, ꠔꠣꠞꠣ ꠁꠍꠣꠞꠦ ꠀꠞ ꠢꠃ ꠖꠥꠁꠅ ꠖꠣꠉꠤ ꠀꠡꠣꠝꠤꠞꠦ ꠉꠣꠍꠞ ꠐꠥꠇꠞꠣꠖꠤ ꠛꠣꠘꠣꠁꠟ ꠍꠟꠤꠛꠅ ꠟꠐꠇꠣꠁꠟ, ꠄꠇꠎꠘꠞꠦ ꠔꠣꠘ ꠒꠣꠁꠘ ꠉꠣꠟꠣꠔ, ꠀꠞꠇ ꠎꠘꠞꠦ ꠛꠣꠃ ꠉꠣꠟꠣꠔ ꠟꠐꠇꠣꠁꠟ। 34ꠅꠃ ꠡꠝꠄ ꠁꠍꠣꠄ ꠇꠁꠟꠣ, “ꠛꠣꠛꠣ, ꠄꠞꠣꠞꠦ ꠝꠣꠚ ꠇꠞꠤ ꠖꠤꠟꠣꠅ। ꠔꠣꠞꠣ ꠔ ꠛꠥꠎꠦꠞ ꠘꠣ ꠔꠣꠞꠣ ꠁꠔꠣ ꠇꠤꠔꠣ ꠇꠞꠦꠞ।”

ꠛꠣꠖꠦ ꠔꠣꠞꠣ ꠔꠣꠘ ꠇꠣꠙꠠ-ꠌꠥꠙꠠ ꠘꠤꠔꠣ ꠇꠞꠤ ꠟꠐꠣꠞꠤ ꠝꠣꠞꠤꠀ ꠛꠣꠐꠣ-ꠛꠣꠐꠤ ꠇꠞꠟꠣ। 35ꠛꠃꠔ ꠝꠣꠘꠡꠦ ꠃꠛꠣꠁꠀ ꠁꠔꠣ ꠖꠦꠈꠟꠣ, ꠅꠁꠟꠦ ꠔꠣꠞꠣꠞ ꠝꠥꠞꠛ꠆ꠛꠤ ꠅꠇꠟꠦ ꠁꠍꠣꠞꠦ ꠐꠤꠐꠇꠣꠞꠤ ꠝꠣꠞꠤꠀ ꠇꠁꠟꠣ, “ꠢꠦ ꠔ ꠛꠃꠔ ꠝꠣꠘꠡꠞ ꠎꠣꠘ ꠛꠣꠌꠣꠁꠔ, ꠢꠦ ꠎꠥꠖꠤ ꠢꠣꠍꠣꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ ꠅꠄ, ꠔꠦ ꠅꠈꠘ ꠔꠣꠞ ꠘꠤꠎꠞ ꠎꠣꠘꠅ ꠛꠣꠌꠣꠃꠇ।” 36ꠞꠥꠝꠣꠘ ꠍꠤꠙꠣꠁ ꠅꠇꠟꠦꠅ ꠔꠣꠘꠞꠦ ꠟꠁꠀ ꠝꠡꠇꠣꠞꠤ ꠇꠞꠟ, ꠔꠣꠞꠣ ꠐꠦꠋꠉꠣ ꠀꠋꠉꠥꠞꠞ ꠡꠞꠛꠔ ꠟꠁꠀ ꠔꠣꠘ ꠇꠣꠘ꠆ꠖꠣꠔ ꠉꠤꠀ ꠇꠁꠟꠣ, 37“ꠔꠥꠝꠤ ꠎꠥꠖꠤ ꠁꠢꠥꠖꠤ ꠅꠇꠟꠞ ꠢꠣꠍꠣꠞꠞ ꠛꠣꠖꠡꠣ ꠅꠅ, ꠔꠦ ꠅꠈꠘ ꠘꠤꠎꠞ ꠎꠣꠘ ꠛꠣꠌꠣꠅ ꠘꠣ।” 38ꠔꠣꠘ ꠝꠣꠕꠣꠞ ꠃꠙꠞꠦ ꠄꠇꠈꠣꠘ ꠡꠣꠁꠘꠛꠞ꠆ꠒ ꠟꠣꠉꠣꠁꠟ ꠅꠁꠟ, ꠢꠘꠅ ꠟꠦꠈꠣ ꠀꠍꠤꠟ, “ꠢꠦ ꠁꠢꠥꠖꠤꠞ ꠛꠣꠖꠡꠣ।”

39ꠅꠃ ꠡꠝꠄ ꠔꠣꠘ ꠟꠉꠦ ꠀꠞꠅ ꠎꠦ ꠖꠥꠁꠎꠘ ꠀꠡꠣꠝꠤꠞꠦ ꠍꠟꠤꠛꠅ ꠟꠐꠇꠣꠁꠟ ꠅꠁꠍꠤꠟ, ꠅꠔꠣ ꠄꠇꠎꠘꠦ ꠔꠣꠘꠞꠦ ꠐꠤꠐꠇꠣꠞꠤ ꠝꠣꠞꠤꠀ ꠇꠁꠟ, “ꠔꠥꠝꠤ ꠛꠥꠟꠦ ꠢꠃ ꠀꠟ-ꠝꠍꠤ? ꠔꠦ ꠅꠈꠘ ꠀꠝꠞꠣꠞꠦ ꠀꠞ ꠔꠥꠝꠣꠞꠦꠅ ꠛꠣꠌꠣꠅ ꠘꠣ।” 40ꠅꠈꠣꠘ ꠢꠥꠘꠤꠀ ꠖꠥꠍꠞꠣ ꠎꠘꠦ ꠄꠞꠦ ꠗꠣꠝꠇꠤ ꠖꠤꠀ ꠇꠁꠟ, “ꠔꠥꠝꠤ ꠇꠤꠔꠣ ꠀꠟ꠆ꠟꠣꠞꠦꠅ ꠒꠞꠣꠅ ꠘꠣ ꠘꠤ? ꠔꠥꠝꠤꠅ ꠔ ꠅꠃ ꠢꠝꠣꠘ ꠡꠣꠎꠣ ꠙꠣꠁꠞꠣꠄ। 41ꠀꠞ ꠀꠝꠞꠣ ꠔ ꠙꠣꠁꠞꠣꠝ ꠀꠝꠞꠣꠞ ꠃꠌꠤꠔ ꠡꠣꠎꠣ, ꠀꠝꠞꠣ ꠎꠦꠟꠣꠘ ꠇꠣꠝ ꠇꠞꠍꠤ ꠅꠃꠟꠣꠘ ꠙꠣꠁꠞꠣꠝ। ꠅꠁꠟꠦ ꠄꠁꠘ ꠔ ꠇꠥꠘꠥ ꠖꠥꠡꠃ ꠇꠞꠍꠂꠘ ꠘꠣ।” 42ꠛꠣꠖꠦ ꠢꠦ ꠇꠁꠟ, “ꠅ ꠁꠍꠣ, ꠀꠙꠘꠦ ꠚꠤꠞꠤꠀ ꠀꠁꠀ ꠎꠦꠛꠟꠣ ꠘꠤꠎꠦ ꠛꠣꠖꠡꠣꠁ ꠇꠞꠛꠣ, ꠅꠃ ꠡꠝꠄ ꠈꠣꠘꠅ ꠀꠝꠣꠞꠦ ꠁꠀꠖ ꠞꠣꠈꠂꠘ ꠎꠣꠘꠥ।” 43ꠔꠣꠁꠘ ꠇꠁꠟꠣ, “ꠀꠝꠤ ꠔꠥꠝꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠔꠥꠝꠤ ꠀꠁꠎ ꠕꠣꠇꠤꠃ ꠀꠝꠣꠞ ꠟꠉꠦ ꠀꠞꠡꠦ-ꠀꠎꠤꠝꠅ ꠕꠣꠇꠛꠣꠄ।”

44ꠅꠃ ꠡꠝꠄ ꠛꠦꠁꠟ ꠅꠘꠥꠝꠣꠘ ꠖꠥꠁꠚꠞ, ꠄꠞꠛꠣꠖ ꠕꠣꠇꠤ ꠎꠥꠢꠞꠞ ꠛꠣꠖ ꠙꠞ꠆ꠎꠘ꠆ꠔ ꠔꠤꠘ ꠊꠘ꠆ꠐꠣ ꠗꠞꠤ ꠀꠡ꠆ꠔꠣ ꠖꠦꠡ ꠀꠘ꠆ꠖꠣꠁꠞ ꠅꠁꠉꠦꠟ। 45ꠡꠥꠞꠥꠎꠞ ꠚꠞ ꠘꠤꠜꠤꠉꠦꠟ। ꠄꠞꠝꠣꠎꠦ ꠎꠦꠞꠥꠎꠣꠟꠦꠝꠅ ꠇꠣꠛꠣ ꠊꠞꠞ ꠙꠛꠤꠔ꠆ꠞ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠈꠣꠘ, ꠃꠙꠞꠦ ꠕꠣꠇꠤ ꠔꠟ ꠙꠞ꠆ꠎꠘ꠆ꠔ ꠍꠤꠠꠤꠀ ꠖꠥꠁ ꠐꠥꠇꠞꠣ ꠅꠁꠉꠦꠟ। 46ꠢꠦꠡꠦ ꠁꠍꠣꠄ ꠎꠥꠞꠦ ꠀꠅꠀꠎ ꠇꠞꠤꠀ ꠇꠁꠟꠣ, “ꠛꠣꠛꠣ, ꠀꠝꠣꠞ ꠞꠥꠢꠥ ꠔꠥꠝꠣꠞ ꠀꠔꠅ ꠡꠙꠤꠀ ꠖꠤꠟꠣꠁꠟꠣꠝ।” ꠅꠈꠣꠘ ꠇꠁꠀꠃ ꠀꠈꠦꠞꠤ ꠖꠝ ꠚꠣꠟꠣꠁꠀ ꠁꠘ꠆ꠔꠦꠇꠣꠟ ꠇꠞꠟꠣ। 47ꠞꠥꠝꠣꠘ ꠍꠤꠙꠣꠁꠞ ꠎꠦ ꠛꠠ ꠅꠚꠤꠡꠣꠞ ꠢꠘꠅ ꠙꠣꠞꠣ ꠖꠦꠅꠀꠔ ꠀꠍꠟꠣ, ꠄꠁꠘ ꠁꠍꠣꠞ ꠝꠃꠔꠞ ꠁ ꠢꠣꠟꠔ ꠖꠦꠈꠤꠀ ꠀꠟ꠆ꠟꠣꠞ ꠔꠣꠞꠤꠚ ꠇꠞꠤꠀ ꠇꠁꠟꠣ, “ꠘꠤꠌ꠆ꠌꠄ, ꠁ ꠛꠦꠌꠣꠠꠣ ꠈꠣꠐꠤ ꠖꠤꠘꠖꠣꠞ ꠝꠣꠘꠥꠡ ꠀꠍꠟꠣ।” 48ꠀꠞ ꠁꠔꠣ ꠖꠦꠈꠣꠞ ꠟꠣꠉꠤ ꠎꠔ ꠝꠣꠘꠥꠡ ꠖꠟꠣ ꠅꠁꠍꠟꠣ, ꠔꠣꠞꠣꠅ ꠁ ꠢꠣꠟꠔ ꠖꠦꠈꠤꠀ ꠛꠥꠇꠥꠔ ꠝꠣꠞꠤ ꠝꠣꠞꠤ ꠀꠢꠣꠎꠣꠞꠤ ꠇꠞꠤꠀ ꠚꠤꠞꠤꠀ ꠉꠦꠟꠣ। 49ꠁꠍꠣꠞ ꠙꠞꠤꠌꠤꠔ ꠎꠘ ꠅꠇꠟꠦ, ꠀꠞ ꠉꠣꠟꠤꠟ ꠎꠤꠟꠣ ꠕꠣꠇꠤ ꠎꠦꠔꠣ ꠛꠦꠐꠤꠘ ꠔꠣꠘ ꠟꠉꠦ ꠅꠁꠀ ꠀꠁꠍꠟꠣ, ꠔꠣꠞꠣ ꠢꠇ꠆ꠇꠟꠦ ꠖꠥꠞꠁ ꠃꠛꠣꠁꠀ ꠁꠔꠣ ꠖꠦꠈꠟꠣ।

ꠢꠎꠞꠔ ꠁꠍꠣꠞ ꠇꠄꠛꠞ

50-51ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠄꠇꠎꠘ ꠁꠎ꠆ꠎꠔꠤ ꠝꠦꠝ꠆ꠛꠣꠞ ꠀꠍꠟꠣ, ꠄꠘ ꠘꠣꠝ ꠁꠃꠍꠥꠚ, ꠄꠘ ꠛꠣꠠꠤ ꠀꠞꠤꠝꠣꠕꠤꠀ ꠉꠣꠃꠔ। ꠄꠁꠘ ꠔ ꠙꠞꠦꠎꠉꠣꠞ ꠀꠞ ꠢꠇ ꠝꠣꠘꠥꠡ, ꠁꠍꠣꠞꠦ ꠎꠣꠘꠦ ꠝꠣꠞꠣꠞ ꠅꠃ ꠇꠥ-ꠗꠣꠘ꠆ꠖꠣꠔ ꠔꠣꠁꠘ ꠔꠣꠞꠣꠞ ꠟꠉꠦ ꠞꠣꠎꠤ ꠅꠁꠟꠣ ꠘꠣ। ꠔꠣꠁꠘ ꠀꠟ꠆ꠟꠣꠞ ꠛꠣꠖꠡꠣꠁꠞ ꠟꠣꠉꠤ ꠛꠣꠞ ꠌꠣꠅꠀꠔ ꠀꠍꠟꠣ। 52ꠅꠃ ꠁꠃꠍꠥꠚ ꠢꠣꠇꠤꠝ ꠙꠤꠟꠣꠔꠞ ꠉꠦꠍꠦ ꠉꠦꠟꠣ, ꠉꠤꠀ ꠁꠍꠣꠞ ꠟꠣꠡ ꠘꠤꠔꠣ ꠌꠣꠁꠟꠣ। 53ꠛꠣꠖꠦ ꠢꠎꠞꠔ ꠁꠍꠣꠞ ꠟꠣꠡ ꠍꠟꠤꠛ ꠕꠣꠇꠤ ꠟꠣꠝꠣꠁꠀ, ꠇꠣꠚꠘ ꠚꠤꠘ꠆ꠖꠣꠁꠟꠣ, ꠀꠞ ꠙꠣꠔ꠆ꠔꠞ ꠈꠥꠖꠤꠀ ꠛꠣꠘꠣꠁꠟ ꠅꠃꠟꠣ ꠄꠇ ꠇꠄꠛꠞꠞ ꠝꠣꠎꠦ ꠖꠣꠚꠘ ꠇꠞꠟꠣ, ꠁ ꠇꠄꠛꠞꠅ ꠇꠥꠘꠥꠖꠤꠘ ꠀꠞ ꠇꠦꠃꠞꠞꠦ ꠖꠣꠚꠘ ꠇꠞꠣ ꠅꠁꠍꠦ ꠘꠣ।

54ꠁ ꠖꠤꠘ ꠀꠍꠤꠟ ꠁꠢꠥꠖꠤꠞ ꠎꠥꠝ꠆ꠝꠣꠞ ꠀꠉꠞ ꠖꠤꠘ, ꠕꠥꠠꠣ ꠛꠣꠖꠦꠃ ꠎꠥꠝ꠆ꠝꠣꠛꠣꠞ ꠡꠥꠞꠥ ꠅꠁꠎꠤꠛ। 55ꠀꠞ ꠎꠦꠔꠣ ꠛꠦꠐꠤꠘ ꠉꠣꠟꠤꠟ ꠕꠣꠇꠤ ꠁꠍꠣꠞ ꠟꠉꠦ ꠅꠁꠀ ꠀꠁꠍꠟꠣ, ꠔꠣꠞꠣ ꠁꠃꠍꠥꠚꠞ ꠈꠞꠦ ꠈꠞꠦ ꠉꠤꠀ ꠢꠃ ꠇꠄꠛꠞ ꠖꠦꠈꠟꠣ, ꠀꠞ ꠇꠤꠟꠣꠈꠣꠘ ꠔꠣꠘ ꠟꠣꠡ ꠖꠣꠚꠘ ꠇꠞꠣ ꠅꠁꠟ ꠄꠅꠔꠣ ꠖꠦꠈꠟꠣ। 56ꠛꠣꠖꠦ ꠔꠣꠞꠣ ꠚꠤꠞꠤꠀ ꠉꠤꠀ ꠢꠣꠞꠤ ꠀꠔꠞ-ꠉꠥꠟꠣꠙ ꠀꠞ ꠌꠘ꠆ꠖꠘ-ꠝꠟꠝ ꠛꠣꠘꠣꠁꠟꠣ, ꠢꠦꠡꠦ ꠡꠞꠤꠅꠔꠞ ꠢꠥꠇꠥꠝ ꠝꠣꠚꠤꠇ ꠎꠥꠝ꠆ꠝꠣꠞ ꠖꠤꠘ ꠎꠤꠞꠣꠁꠟꠣ।

Currently Selected:

ꠁꠘ꠆ꠎꠤꠟ ৩: ꠟꠥꠇ 23: sylN

Highlight

Copy