ꠁꠘ꠆ꠎꠤꠟ ৩: ꠟꠥꠇ 21

ꠠꠣꠠꠤ ꠛꠦꠐꠤꠞ ꠖꠣꠘ-ꠈꠄꠞꠣꠔ

1ꠢꠎꠞꠔ ꠁꠍꠣꠄ ꠌꠣꠁꠀ ꠖꠦꠈꠟꠣ, ꠗꠘꠤ ꠅꠇꠟꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠟꠤꠟ꠆ꠟꠣꠞ ꠒꠦꠉꠞ ꠝꠣꠎꠦ ꠖꠣꠘ-ꠈꠄꠞꠣꠔ ꠖꠤꠞꠣ। 2ꠄꠞꠝꠣꠎꠦ ꠖꠦꠈꠟꠣ, ꠈꠥꠛ ꠉꠞꠤꠛ ꠄꠇ ꠠꠣꠠꠤ ꠛꠦꠐꠤꠄꠅ ꠀꠁꠀ ꠒꠦꠉꠞ ꠝꠣꠎꠦ ꠖꠥꠁꠐꠣ ꠙꠄꠡꠣ ꠖꠣꠘ ꠇꠞꠟ। 3ꠖꠦꠈꠤꠀ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠅꠃ ꠉꠞꠤꠛ ꠠꠣꠠꠤ ꠛꠦꠐꠤꠄ ꠢꠇꠟ ꠕꠣꠇꠤ ꠛꠦꠡꠤ ꠖꠣꠘ ꠇꠞꠍꠦ। 4ꠇꠣꠞꠘ ꠛꠣꠇꠤ ꠢꠇꠟꠦ ꠈꠞꠌ ꠇꠞꠣꠞ ꠛꠣꠖꠦ ꠎꠦꠔꠣ ꠖꠦꠠꠤꠀ ꠞꠁꠍꠦ, ꠅꠘ ꠕꠣꠇꠤ ꠕꠥꠠꠣ ꠅꠋꠡ ꠒꠦꠉꠞ ꠝꠣꠎꠦ ꠖꠣꠘ ꠇꠞꠍꠦ। ꠅꠁꠟꠦ ꠁ ꠛꠦꠐꠤꠄ ꠘꠤꠎꠞ ꠅꠜꠣꠛ-ꠅꠘꠐꠘ ꠕꠣꠇꠟꠦꠅ, ꠔꠣꠁꠞ ꠇꠣꠝꠣꠁꠟ ꠢꠇ꠆ꠇꠟꠔꠣꠃ ꠖꠣꠘ ꠇꠞꠤꠟꠤꠍꠦ।”

ꠇꠤꠀꠝꠔꠞ ꠀꠉꠞ ꠀꠟꠣꠝꠔ

5ꠇꠄꠎꠘ ꠍꠣꠢꠣꠛꠤꠄ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠡꠞꠤꠚꠞ ꠛꠦꠙꠣꠞꠦ ꠝꠣꠔꠤꠟꠣ, ꠇꠁꠟꠣ, “ꠖꠦꠈꠞꠣ ꠘꠤ, ꠅꠔ ꠡꠥꠘ꠆ꠖꠞ ꠡꠥꠘ꠆ꠖꠞ ꠙꠣꠔ꠆ꠔꠞꠖꠤ ꠀꠞ ꠖꠣꠘ-ꠈꠄꠞꠣꠔꠖꠤ ꠊꠞꠈꠣꠘꠞꠦ ꠢꠣꠎꠣꠁꠟ ꠅꠁꠍꠦ।” 6ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠅꠃ ꠎꠔꠔꠣ ꠖꠦꠈꠞꠣꠄ, ꠅꠟꠣ ꠄꠇ ꠖꠤꠘ ꠀꠁꠛ, ꠎꠦꠛꠟꠣ ꠁꠔꠣ ꠄꠇ ꠙꠣꠔ꠆ꠔꠞꠞ ꠃꠙꠞꠦ ꠀꠞꠇ ꠙꠣꠔ꠆ꠔꠞ ꠞꠁꠔ ꠘꠣꠄ। ꠢꠇꠟꠔꠣ ꠝꠣꠐꠤꠞ ꠟꠉꠦ ꠝꠤꠡꠤꠎꠤꠛ।”

7ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠁꠔꠣ ꠇꠥꠘ ꠎꠝꠣꠘꠣꠔ ꠅꠁꠛ? ꠇꠥꠘ ꠀꠟꠣꠝꠔ ꠖꠦꠈꠟꠦ ꠛꠥꠎꠣ ꠎꠣꠁꠛ, ꠢꠤ ꠡꠝꠄ ꠅꠁꠉꠦꠍꠦ?” 8ꠔꠣꠁꠘ ꠇꠁꠟꠣ, “ꠢꠥꠡꠤꠀꠞ ꠞꠁꠅ, ꠇꠦꠃ ꠎꠣꠘꠥ ꠔꠥꠝꠞꠣꠞꠦ ꠛꠦ-ꠙꠕꠦ ꠘꠣ ꠘꠦꠄ। ꠛꠃꠔ ꠎꠘꠦ ꠀꠝꠣꠞ ꠘꠣꠝ ꠗꠞꠤ ꠀꠁꠀ ꠇꠁꠛ, ꠡꠝꠄ ꠅꠁꠉꠦꠍꠦ, ꠀꠝꠤꠃ ꠀꠟ-ꠝꠍꠤ। ꠅꠁꠟꠦ ꠔꠥꠝꠞꠣ ꠁꠔꠣꠞ ꠈꠞꠦ ꠎꠣꠁꠅ ꠘꠣ। 9ꠔꠥꠝꠞꠣ ꠎꠦꠛꠟꠣ ꠎꠥꠖ꠆ꠖ ꠀꠞ ꠉꠘ꠆ꠒꠉꠥꠟꠞ ꠈꠛꠞ ꠢꠥꠘꠛꠣꠄ, ꠒꠞꠣꠁꠅ ꠘꠣ। ꠇꠣꠞꠘ ꠙꠄꠟꠣ ꠁꠔꠣ ꠅꠁꠛꠃ ꠅꠁꠛ, ꠅꠁꠟꠦ ꠁꠔꠣ ꠔ ꠡꠦꠡ ꠘꠣꠄ।”

10ꠛꠣꠖꠦ ꠔꠣꠁꠘ ꠇꠁꠟꠣ, “ꠎꠣꠔꠤꠄ ꠎꠣꠔꠤꠞ ꠛꠤꠙꠇ꠆ꠇꠦ, ꠞꠣꠎꠣꠄ ꠞꠣꠎꠣꠞ ꠛꠤꠙꠇ꠆ꠇꠦ ꠎꠥꠖ꠆ꠖ ꠇꠞꠛ। 11ꠛꠠ ꠛꠠ ꠜꠂꠍꠣꠟ ꠅꠁꠛ, ꠎꠣꠉꠣꠄ ꠎꠣꠉꠣꠄ ꠘꠤꠖꠣꠘ ꠀꠞ ꠛꠦꠎꠥꠁꠔꠣ ꠛꠦꠝꠣꠞ-ꠀꠎꠣꠞꠦ ꠝꠣꠘꠥꠡ ꠝꠞꠛꠣ। ꠀꠍꠝꠣꠘꠅ-ꠅ ꠈꠥꠛ ꠒꠞ-ꠈꠚꠞ ꠘꠤꠡꠣꠘꠣ ꠀꠞ ꠀꠎꠛ ꠀꠎꠛ ꠇꠥꠖꠞꠔꠤ ꠟꠤꠟꠣ ꠎꠣꠁꠞ ꠅꠁꠛ।

12“ꠅꠁꠟꠦ ꠁꠔꠣ ꠊꠐꠣꠞ ꠀꠉꠦ ꠝꠣꠘꠡꠦ ꠔꠥꠝꠞꠣꠞꠦ ꠈꠦꠖꠣꠁꠛ, ꠗꠞꠛ। ꠛꠤꠌꠣꠞꠞ ꠟꠣꠉꠤ ꠝꠎꠟꠤꠍꠞ ꠍꠣꠝꠘꠦ ꠀꠎꠤꠞ ꠇꠞꠛ, ꠎꠦꠟꠅ ꠢꠣꠞꠣꠁꠛ। ꠀꠝꠣꠞ ꠘꠣꠝꠞ ꠟꠣꠉꠤ ꠔꠥꠝꠞꠣꠞꠦ ꠞꠣꠎꠣ-ꠛꠣꠖꠡꠣ ꠀꠞ ꠢꠣꠇꠤꠝ ꠅꠇꠟꠞ ꠍꠣꠝꠘꠦ ꠘꠦꠅꠀ ꠅꠁꠛ। 13ꠔꠦꠃ ꠀꠝꠣꠞ ꠘꠣꠝꠦ ꠔꠛꠟꠤꠉ ꠇꠞꠣꠞ ꠟꠣꠉꠤ ꠔꠥꠝꠞꠣ ꠡꠥꠎꠥꠉ ꠙꠣꠁꠛꠣꠄ। 14ꠅꠁꠟꠦ ꠔꠥꠝꠞꠣ ꠝꠘꠅ ꠞꠣꠈꠤꠅ, ꠇꠤꠔꠣ ꠎꠥꠀꠙ ꠖꠤꠔꠣꠄ, ꠁꠔꠣ ꠀꠉꠦ ꠌꠤꠘ꠆ꠔꠣ ꠇꠞꠣꠞ ꠇꠥꠘꠥ ꠎꠞꠥꠞ ꠘꠣꠄ। 15ꠇꠣꠞꠘ ꠀꠝꠤ ꠔꠥꠝꠞꠣꠞꠦ ꠅꠃꠟꠣ ꠎꠛꠣꠘ ꠀꠞ ꠢꠦꠇꠝꠔ ꠎꠥꠉꠣꠁꠀ ꠖꠤꠝꠥ, ꠔꠥꠝꠞꠣꠞ ꠛꠤꠙꠇ꠆ꠇ ꠅꠇꠟꠦ ꠁꠔꠣ ꠚꠤꠞꠣꠁꠔ ꠙꠣꠞꠔ ꠘꠣꠄ, ꠄꠞ ꠎꠥꠀꠙ ꠖꠤꠛꠣꠞꠅ ꠔꠣꠇ꠆ꠇꠔ ꠅꠁꠔ ꠘꠣꠄ। 16ꠔꠥꠝꠞꠣꠞ ꠝꠣ-ꠛꠣꠚ, ꠜꠣꠁ-ꠛꠤꠞꠣꠖꠞ, ꠈꠦꠡ-ꠇꠥꠐꠥꠝ ꠀꠞ ꠖꠥꠡ꠆ꠔ ꠅꠇꠟꠦꠅ ꠔꠥꠝꠞꠣꠞꠦ ꠗꠞꠣꠁꠀ ꠖꠤꠛꠣ। ꠔꠣꠞꠣ ꠔꠥꠝꠞꠣꠞ ꠇꠥꠘꠥ ꠇꠥꠘꠥ ꠎꠘꠞꠦ ꠎꠣꠘꠦ ꠝꠣꠞꠣꠁꠟꠤꠛꠣ। 17ꠀꠞ ꠀꠝꠣꠞ ꠘꠣꠝꠞ ꠟꠣꠉꠤ ꠔꠥꠝꠞꠣꠞꠦ ꠢꠇ꠆ꠇꠟꠦ ꠊꠤꠘ꠆ꠘꠣꠁꠛ। 18ꠅꠁꠟꠦꠅ ꠇꠥꠘꠥꠝꠘ꠆ꠔꠦꠃ ꠔꠥꠝꠞꠣꠞ ꠝꠣꠕꠣꠞ ꠄꠇꠍꠣ ꠌꠥꠟꠞꠅ ꠈꠦꠔꠤ ꠅꠁꠔ ꠘꠣꠄ। 19ꠔꠥꠝꠞꠣ ꠁꠝꠣꠘꠦ ꠝꠎꠛꠥꠔ ꠞꠁꠟꠦ, ꠘꠤꠎꠞ ꠢꠣꠍꠣꠞꠞ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞꠛꠣꠄ।

20“ꠔꠥꠝꠞꠣ ꠖꠦꠈꠛꠣꠄ, ꠍꠤꠙꠣꠁ ꠅꠇꠟꠦ ꠀꠁꠀ ꠌꠣꠁꠞꠅꠛꠣꠄ ꠕꠘꠦ ꠎꠦꠞꠥꠎꠣꠟꠦꠝꠞꠦ ꠊꠦꠞꠣꠅ ꠇꠞꠤꠟꠤꠞꠣ, ꠔꠦꠃ ꠛꠥꠎꠤꠟꠤꠅ, ꠎꠦꠞꠥꠎꠣꠟꠦꠝꠞ ꠛꠤꠘꠣꠡ ꠀꠁꠌ꠆ꠍꠦ। 21ꠢꠤ ꠡꠝꠄ ꠎꠣꠞꠣ ꠄꠢꠥꠖꠤꠀ ꠎꠤꠟꠣꠔ ꠕꠣꠇꠛꠣ, ꠔꠣꠞꠣ ꠙꠣꠠꠦꠖꠤ ꠉꠤꠀ ꠜꠣꠉꠃꠇ। ꠎꠣꠞꠣ ꠅꠃ ꠎꠦꠞꠥꠎꠣꠟꠦꠝꠅ ꠕꠣꠇꠛꠣ, ꠔꠣꠞꠣ ꠐꠣꠃꠘꠞ ꠛꠣꠞꠦ ꠎꠣꠃꠇ। ꠎꠣꠞꠣ ꠉꠣꠃ-ꠉꠦꠞꠣꠝꠅ ꠕꠣꠇꠛꠣ, ꠔꠣꠞꠣ ꠎꠣꠘꠥ ꠇꠥꠘꠥꠝꠘ꠆ꠔꠦꠃ ꠐꠣꠃꠘꠅ ꠘꠣ ꠀꠁꠘ। 22ꠇꠣꠞꠘ ꠁ ꠅꠇ꠆ꠔ ꠅꠁꠟ ꠀꠟ꠆ꠟꠣꠁ ꠉꠎꠛꠞ ꠅꠇ꠆ꠔ, ꠀꠟ꠆ꠟꠣꠞ ꠇꠣꠟꠣꠝꠞ ꠀꠄꠀꠔ ꠅꠇꠟ ꠙꠥꠞꠣ ꠅꠁꠛꠣꠞ ꠅꠇ꠆ꠔ। 23ꠁꠡ! ꠁ ꠡꠝꠄ ꠎꠦꠔꠣ ꠛꠦꠐꠤꠘ꠆ꠔꠞ ꠙꠦꠐꠅ ꠢꠥꠞꠥꠔ꠆ꠔꠣ ꠕꠣꠇꠛꠣ, ꠎꠦꠞꠣ ꠢꠥꠞꠥꠔ꠆ꠔꠣꠞꠦ ꠛꠥꠇꠥꠞ ꠖꠥꠗ ꠈꠣꠅꠀꠁꠛꠣ, ꠄꠞꠣꠞ ꠛꠃꠔ ꠇꠡ꠆ꠐ ꠅꠁꠛ! ꠖꠦꠡꠞ ꠃꠙꠞꠦ ꠛꠦꠎꠥꠁꠔꠣ ꠖꠥꠞ꠆ꠉꠔꠤ, ꠀꠞ ꠁꠢꠥꠖꠤ ꠅꠇꠟꠞ ꠃꠙꠞꠦ ꠉꠎꠛ ꠘꠣꠎꠤꠟ ꠅꠁꠛ। 24ꠔꠟꠥꠀꠞꠞ ꠔꠟꠦ ꠔꠣꠞꠣ ꠎꠣꠘ ꠈꠥꠀꠁꠛꠣ, ꠛꠘ꠆ꠖꠤ ꠅꠁꠀ ꠢꠇ꠆ꠇꠟ ꠎꠣꠔꠤꠞ ꠝꠣꠎꠦ ꠎꠣꠁꠛꠣ। ꠅꠃ ꠛꠤꠗꠞ꠆ꠝꠤ ꠎꠣꠔꠤꠞ ꠈꠦꠝꠔꠣꠞ ꠡꠝꠄ ꠙꠥꠞꠣ ꠅꠀꠞ ꠀꠉ ꠙꠞ꠆ꠎꠘ꠆ꠔ, ꠁ ꠎꠦꠞꠥꠎꠣꠟꠦꠝ ꠔꠣꠞꠣꠞ ꠙꠣꠅꠞ ꠔꠟꠦ ꠞꠁꠛ।

25“ꠌꠣꠘ-ꠡꠥꠞꠥꠎ ꠀꠞ ꠀꠍꠝꠣꠘꠞ ꠔꠦꠞꠣꠞ ꠝꠣꠎꠦ ꠘꠣꠘꠣꠘ ꠀꠟꠣꠝꠔ ꠖꠦꠈꠣ ꠎꠣꠁꠛ। ꠖꠥꠘꠤꠀꠞ ꠢꠇꠟ ꠖꠦꠡꠞ ꠝꠣꠘꠡꠞ ꠇꠡ꠆ꠐ ꠅꠁꠛ। ꠖꠞꠤꠀꠄ ꠃꠔꠣꠟ-ꠙꠣꠔꠣꠟ ꠇꠞꠛ। ꠓꠦꠃꠞ ꠀꠅꠀꠎꠦ ꠝꠣꠘꠥꠡ ꠛꠦꠖꠤꠡꠣ ꠟꠣꠉꠛꠣ। 26ꠖꠥꠘꠤꠀꠔ ꠇꠥꠘ ꠖꠡꠣ ꠊꠐꠤꠛ ꠅꠔꠣ ꠌꠤꠘ꠆ꠔꠣ ꠇꠞꠤꠀ ꠒꠞꠞ ꠌꠥꠐꠦ ꠝꠣꠘꠥꠡ ꠛꠦꠃꠡ ꠅꠁꠎꠤꠛ, ꠀꠍꠝꠣꠘꠤ ꠌꠣꠘ-ꠡꠥꠞꠥꠎ, ꠔꠦꠞꠣ ꠢꠇ꠆ꠇꠟꠔꠣ ꠀꠃꠟꠣ-ꠎꠣꠃꠟꠣ ꠅꠁꠎꠤꠛ। 27ꠅꠃ ꠡꠝꠄ ꠖꠦꠈꠛꠣꠄ, ꠀꠝꠤ ꠛꠤꠘ-ꠀꠖꠝꠦ ꠀꠟ꠆ꠟꠣꠞ ꠇꠥꠖꠞꠔꠤ ꠡꠇ꠆ꠔꠤ ꠀꠞ ꠘꠥꠞꠞ ꠝꠢꠤꠝꠣꠄ ꠝꠦꠊꠞ ꠈꠥꠐꠤꠔ ꠅꠁꠀ ꠖꠥꠘꠤꠀꠔ ꠔꠡꠞꠤꠚ ꠀꠘꠤꠀꠞ। 28ꠁꠔꠣ ꠢꠣꠟ-ꠢꠇꠤꠇꠔ ꠖꠦꠈꠟꠦ ꠔꠥꠝꠞꠣ ꠝꠎꠛꠥꠔ ꠅꠁꠅ, ꠝꠣꠕꠣ ꠃꠌꠣ ꠇꠞꠤꠅ, ꠛꠥꠎꠤꠟꠤꠅ ꠔꠥꠝꠞꠣꠞ ꠘꠣꠎꠣꠔ ꠗꠣꠞꠅ ꠀꠁꠌ꠆ꠍꠦ।”

29ꠁꠍꠣꠄ ꠔꠣꠞꠣꠞꠦ ꠅꠃ ꠝꠤꠍꠣꠟ ꠢꠥꠘꠣꠁꠟꠣ, ꠇꠁꠟꠣ, “ꠔꠥꠝꠞꠣ ꠒꠥꠝꠥꠞ ꠉꠣꠍ ꠀꠞ ꠅꠁꠘ꠆ꠘ ꠉꠣꠍꠣꠁꠘ꠆ꠔꠞ ꠛꠣꠄ ꠖꠦꠈꠅ, 30ꠁꠔꠣꠞ ꠘꠄꠀ ꠇꠥꠠꠤ-ꠙꠣꠔꠣ ꠛꠣꠞꠘꠤ ꠖꠦꠈꠟꠦꠃ ꠔꠥꠝꠞꠣ ꠛꠥꠎꠤꠟꠣꠅ, ꠉꠞꠝꠞ ꠖꠤꠘ ꠀꠁꠌ꠆ꠍꠦ। 31ꠅꠃꠟꠣ ꠔꠥꠝꠞꠣ ꠎꠦꠛꠟꠣ ꠖꠦꠈꠛꠣꠄ, ꠁꠔꠣ ꠢꠣꠟ-ꠢꠇꠤꠇꠔ ꠊꠐꠦꠞ, ꠔꠦ ꠛꠥꠎꠤꠟꠤꠅ ꠀꠟ꠆ꠟꠣꠞ ꠛꠣꠖꠡꠣꠁ ꠘꠎꠖꠤꠇ ꠀꠁꠌ꠆ꠍꠦ। 32ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠁꠔꠣ ꠢꠇ꠆ꠇꠟꠔꠣ ꠘꠣ ꠊꠐꠣꠞ ꠀꠉꠦ, ꠁ ꠎꠝꠣꠘꠣꠞ ꠝꠣꠘꠥꠡ ꠇ꠆ꠇꠄ ꠅꠁꠔꠣ ꠘꠣꠄ। 33ꠀꠍꠝꠣꠘ-ꠎꠝꠤꠘ ꠇ꠆ꠇꠄ ꠅꠁꠎꠤꠛ, ꠅꠁꠟꠦ ꠀꠝꠣꠞ ꠇꠣꠟꠣꠝ ꠇꠥꠘꠥꠖꠤꠘꠅ ꠇ꠆ꠇꠄ ꠅꠁꠔ ꠘꠣꠄ।

34“ꠔꠥꠝꠞꠣ ꠘꠤꠎꠦ ꠢꠥꠡꠤꠀꠞ ꠞꠁꠅ, ꠎꠣꠔꠦ ꠝꠎꠣꠞ ꠝꠎꠣꠞ ꠈꠣꠘꠤ, ꠝꠖ ꠈꠣꠁꠀ ꠐꠣꠟ ꠅꠀ ꠀꠞ ꠞꠥꠎꠤ-ꠞꠥꠎꠉꠣꠞꠞ ꠘꠦꠡꠣꠄ ꠀꠃꠟꠣ-ꠎꠣꠃꠟꠣ ꠘꠣ ꠅꠅ, ꠀꠞꠘꠣꠄ ꠢꠃ ꠖꠤꠘ ꠀꠁꠀ ꠀꠈꠔꠣꠃ ꠔꠥꠝꠞꠣꠞꠦ ꠚꠣꠘ꠆ꠖꠅ ꠢꠣꠞꠣꠁꠔ ꠙꠣꠞꠦ। 35ꠖꠥꠘꠤꠀꠞ ꠔꠣꠝꠣꠝ ꠝꠣꠘꠡꠞ ꠃꠙꠞꠦꠃ ꠢꠤ ꠖꠤꠘ ꠀꠎꠤꠞ ꠅꠁꠛ। 36ꠅꠁꠟꠦ ꠔꠥꠝꠞꠣ ꠢꠣꠝꠦꠡꠣ ꠢꠎꠣꠉ ꠞꠁꠅ, ꠀꠞ ꠖꠥꠀ ꠇꠞꠤꠅ, ꠎꠣꠔꠦ ꠅꠃ ꠎꠦꠔꠣ ꠎꠣꠁꠞ ꠅꠁꠛ ꠅꠔꠣ ꠙꠣꠞ ꠅꠁꠀ ꠢꠣꠞꠤ ꠀꠝꠣꠞ ꠍꠣꠝꠘꠦ ꠃꠛꠣꠘꠤꠞ ꠛꠟ ꠙꠣꠅ।”

37ꠁꠍꠣꠄ ꠙꠞꠔꠦꠇ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠁꠀ ꠘꠍꠤꠅꠔ ꠇꠞꠔꠣ। ꠛꠣꠖꠦ ꠞꠣꠁꠔ ꠅꠁꠟꠦ ꠔꠣꠁꠘ ꠛꠣꠞ ꠅꠁꠀ ꠎꠄꠔꠥꠘ ꠙꠣꠠꠅ ꠎꠣꠁꠔꠣꠉꠤ। 38ꠢꠇꠟ ꠝꠣꠘꠡꠦ ꠔꠣꠘ ꠛꠄꠀꠘ ꠢꠥꠘꠣꠞ ꠘꠤꠅꠔꠦ ꠛꠤꠀꠘ-ꠍꠛꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠁꠔꠣ।

Currently Selected:

ꠁꠘ꠆ꠎꠤꠟ ৩: ꠟꠥꠇ 21: sylN

Highlight

Copy