ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 17
17
ꠃꠝ꠆ꠝꠔꠞ ꠟꠣꠉꠤ ꠝꠥꠘꠣꠎꠣꠔ
1ꠅꠈꠣꠘ ꠇꠁꠀ ꠢꠣꠞꠤ ꠢꠎꠞꠔ ꠁꠍꠣꠄ ꠀꠍꠝꠣꠘꠞ ꠛꠣꠄ ꠌꠣꠁꠀ ꠖꠥꠀ ꠇꠞꠟꠣ, “ꠛꠣꠛꠣ, ꠡꠝꠄ ꠅꠁꠉꠦꠍꠦ। ꠔꠥꠝꠤ ꠔꠥꠝꠣꠞ ꠙꠥꠔꠞ ꠝꠢꠤꠝꠣ ꠎꠣꠁꠞ ꠇꠞꠅ, ꠎꠣꠔꠦ ꠙꠥꠔꠦꠅ ꠔꠥꠝꠣꠞ ꠝꠢꠤꠝꠣ ꠎꠣꠁꠞ ꠇꠞꠔꠣ ꠙꠣꠞꠂꠘ। 2ꠔꠥꠝꠤ ꠔꠣꠘꠞꠦ ꠢꠇꠟ ꠝꠣꠘꠡꠞ ꠃꠙꠞꠦ ꠈꠦꠝꠔꠣ ꠖꠤꠍ, ꠎꠣꠔꠦ ꠔꠥꠝꠤ ꠎꠦꠞꠣꠞꠦ ꠔꠣꠘ ꠀꠔꠅ ꠡꠙꠤꠍ, ꠄꠞꠣꠞꠦ ꠔꠣꠁꠘ ꠀꠈꠦꠞꠤ ꠎꠤꠘ꠆ꠖꠦꠉꠤ ꠖꠦꠁꠘ। 3ꠄꠇꠝꠣꠔ꠆ꠞ ꠢꠇ ꠀꠟ꠆ꠟꠣꠞꠦ ꠝꠣꠘꠤ ꠔꠥꠝꠣꠞꠦ ꠀꠞ ꠔꠥꠝꠤ ꠎꠦꠘꠞꠦ ꠙꠣꠑꠣꠁꠍ, ꠢꠃ ꠁꠍꠣ ꠀꠟ-ꠝꠍꠤꠞꠦ ꠌꠤꠘꠣꠃ ꠅꠁꠟ ꠀꠈꠦꠞꠤ ꠎꠤꠘ꠆ꠖꠦꠉꠤ। 4ꠔꠥꠝꠤ ꠀꠝꠣꠞꠦ ꠎꠦ ꠇꠣꠝ ꠖꠤꠍ, ꠁ ꠇꠣꠝ ꠀꠖꠣꠄ ꠇꠞꠤꠀ ꠖꠥꠘꠤꠀꠔ ꠔꠥꠝꠣꠞ ꠝꠢꠤꠝꠣ ꠎꠣꠁꠞ ꠇꠞꠍꠤ। 5ꠔꠦ ꠛꠣꠛꠣ, ꠖꠥꠘꠤꠀ ꠙꠄꠖꠣ ꠇꠞꠣꠞ ꠀꠉꠦ ꠔꠥꠝꠣꠞ ꠖꠞꠛꠣꠞꠅ ꠀꠝꠣꠞ ꠎꠦ ꠝꠢꠤꠝꠣ ꠀꠍꠤꠟ, ꠔꠥꠝꠣꠞ ꠉꠦꠍꠞ ꠅꠃ ꠝꠢꠤꠝꠣ ꠅꠈꠘ ꠀꠝꠣꠞꠦ ꠢꠤꠞꠛꠣꠞ ꠖꠦꠅ।
6“ꠁ ꠖꠥꠘꠤꠀꠞ ꠝꠣꠎꠞ ꠎꠦꠞꠣꠞꠦ ꠀꠝꠣꠞ ꠀꠔꠅ ꠡꠙꠤꠍ, ꠀꠝꠤ ꠄꠞꠣꠞ ꠉꠦꠍꠦ ꠔꠥꠝꠣꠞꠦ ꠎꠣꠁꠞ ꠇꠞꠍꠤ। ꠔꠣꠞꠣ ꠔ ꠔꠥꠝꠣꠞꠃ ꠀꠍꠟꠣ, ꠔꠥꠝꠤꠃ ꠔꠣꠞꠣꠞꠦ ꠀꠝꠣꠞ ꠀꠔꠅ ꠡꠙꠤꠍ। ꠔꠣꠞꠣ ꠔꠥꠝꠣꠞ ꠢꠥꠇꠥꠝ ꠝꠣꠘꠤꠀ ꠌꠟꠍꠦ। 7ꠔꠣꠞꠣ ꠅꠈꠘ ꠛꠥꠎꠍꠦ, ꠔꠥꠝꠤ ꠎꠦꠔꠣ ꠀꠝꠣꠞꠦ ꠖꠤꠍ, ꠁꠔꠣ ꠔ ꠔꠥꠝꠣꠞ ꠉꠦꠍ ꠕꠣꠇꠤꠃ ꠀꠁꠍꠦ। 8ꠇꠣꠞꠘ ꠅꠁꠟ, ꠔꠥꠝꠤ ꠎꠦꠔꠣ ꠔꠛꠟꠤꠉ ꠇꠞꠣꠞ ꠢꠥꠇꠥꠝ ꠖꠤꠍ, ꠀꠝꠤ ꠅꠔꠣ ꠎꠣꠘꠣꠁꠍꠤ। ꠀꠞ ꠔꠣꠞꠣꠅ ꠁꠔꠣꠞꠦ ꠇꠛꠥꠟ ꠇꠞꠤꠀ ꠀꠍꠟꠈꠣꠘ ꠛꠥꠎꠤꠟꠤꠍꠦ ꠎꠦꠘ, ꠀꠝꠤ ꠔꠥꠝꠣꠞ ꠉꠦꠍ ꠕꠣꠇꠤꠃ ꠀꠁꠍꠤ। ꠔꠣꠞꠣ ꠄꠇꠤꠘꠅ ꠇꠞꠍꠦ, ꠔꠥꠝꠤꠃ ꠀꠝꠣꠞꠦ ꠙꠣꠑꠣꠁꠍ। 9ꠔꠦ ꠀꠝꠤ ꠔ ꠢꠇꠟꠞ ꠟꠣꠉꠤ ꠝꠤꠘꠔ ꠇꠞꠤꠀꠞ ꠘꠣ, ꠈꠣꠟꠤ ꠔꠥꠝꠤ ꠎꠣꠞꠣꠞꠦ ꠀꠝꠣꠞ ꠀꠔꠅ ꠖꠤꠍ, ꠄꠞꠣꠞ ꠟꠣꠉꠤꠃ ꠝꠤꠘꠔ ꠇꠞꠞꠣꠝ, ꠔꠣꠞꠣ ꠔ ꠔꠥꠝꠣꠞꠃ। 10ꠀꠝꠣꠞ ꠎꠔꠔꠣ ꠀꠍꠦ ꠢꠇ꠆ꠇꠟꠔꠣꠃ ꠔꠥꠝꠣꠞ, ꠀꠞ ꠔꠥꠝꠣꠞ ꠢꠇ꠆ꠇꠟꠔꠣꠃ ꠀꠝꠣꠞ। ꠄꠞꠣꠞ ꠝꠣꠎꠖꠤꠃ ꠀꠝꠣꠞ ꠝꠢꠤꠝꠣ ꠎꠣꠁꠞ ꠅꠞ।
11“ꠅ ꠙꠛꠤꠔ꠆ꠞ ꠛꠣꠛꠣ, ꠁ ꠖꠥꠘꠤꠀꠔ ꠀꠝꠤ ꠀꠞ ꠛꠦꠡꠤ ꠡꠝꠄ ꠘꠣꠄ, ꠅꠁꠟꠦ ꠔꠣꠞꠣ ꠁ ꠖꠥꠘꠤꠀꠔ ꠀꠍꠂꠘ, ꠀꠝꠤ ꠔ ꠔꠥꠝꠣꠞ ꠉꠦꠍꠦ ꠀꠁꠞꠣꠝ। ꠔꠥꠝꠤ ꠀꠝꠣꠞꠦ ꠔꠥꠝꠣꠞ ꠎꠦ ꠘꠣꠝ ꠖꠤꠍ, ꠅꠃ ꠘꠣꠝꠞ ꠛꠟꠦ ꠄꠞꠣꠞꠦ ꠛꠣꠌꠣꠅ, ꠎꠣꠔꠦ ꠀꠝꠞꠣ ꠎꠦꠟꠣ ꠄꠇ, ꠔꠣꠞꠣꠅ ꠅꠟꠣ ꠄꠇ ꠅꠁꠔꠣ ꠙꠣꠞꠂꠘ। 12ꠀꠝꠤ ꠎꠔꠖꠤꠘ ꠔꠣꠞꠣꠞ ꠟꠉꠦ ꠀꠍꠟꠣꠝ, ꠅꠔꠖꠤꠘ ꠔꠥꠝꠣꠞ ꠖꠦꠅꠀ ꠅꠃ ꠘꠣꠝꠞ ꠉꠥꠘꠦ ꠔꠣꠞꠣꠞꠦ ꠛꠣꠌꠣꠁꠍꠤ। ꠔꠣꠞꠣꠞꠦ ꠙꠣꠞꠣ ꠖꠤꠀ ꠞꠣꠈꠍꠤ, ꠔꠣꠞꠣ ꠇꠦꠃ ꠛꠤꠘꠣꠡ ꠅꠁꠍꠦ ꠘꠣ। ꠈꠣꠟꠤ ꠎꠣꠞ ꠛꠤꠘꠣꠡ ꠅꠀꠞ ꠇꠕꠣ, ꠢꠦ-ꠃ ꠛꠤꠘꠣꠡ ꠅꠁꠍꠦ, ꠎꠣꠔꠦ ꠀꠟ꠆ꠟꠣꠞ ꠇꠣꠟꠣꠝꠞ ꠇꠕꠣ ꠚꠟꠦ।
13“ꠔꠦ ꠅꠈꠘ ꠀꠝꠤ ꠔꠥꠝꠣꠞ ꠉꠦꠍꠦ ꠀꠁꠞꠣꠝ, ꠖꠥꠘꠤꠀꠔ ꠞꠁꠔꠦꠃ ꠁꠔꠣ ꠔꠣꠞꠣꠞꠦ ꠎꠣꠘꠣꠁ ꠖꠤꠟꠣꠝ, ꠎꠣꠔꠦ ꠀꠝꠣꠞ ꠈꠥꠡꠤꠄ ꠔꠣꠞꠣꠞ ꠖꠤꠟ ꠜꠞꠤ ꠎꠣꠄ। 14ꠔꠥꠝꠤ ꠀꠝꠣꠞꠦ ꠎꠦꠔꠣ ꠎꠣꠘꠣꠁꠍ, ꠀꠝꠤꠅ ꠔꠣꠞꠣꠞꠦ ꠅꠔꠣ ꠎꠣꠘꠣꠁꠍꠤ। ꠀꠝꠤ ꠎꠦꠟꠣ ꠁ ꠖꠥꠘꠤꠀꠞ ꠘꠣꠄ, ꠔꠣꠞꠣꠅ ꠅꠟꠣ ꠁ ꠖꠥꠘꠤꠀꠞ ꠘꠣꠄ, ꠄꠞꠟꠣꠉꠤ ꠖꠥꠘꠤꠀꠞ ꠝꠣꠘꠡꠦ ꠔꠣꠞꠣꠞꠦ ꠊꠤꠘ꠆ꠘꠣꠁꠍꠦ। 15ꠀꠝꠤ ꠔꠥꠝꠣꠞ ꠉꠦꠍꠦ ꠀꠛꠖꠣꠞ ꠇꠞꠞꠣꠝ ꠘꠣ, ꠔꠥꠝꠤ ꠔꠣꠞꠣꠞꠦ ꠖꠥꠘꠤꠀ ꠕꠣꠇꠤ ꠘꠤꠔꠣꠄꠉꠤ, ꠛꠞꠋ ꠅꠃ ꠀꠛꠖꠣꠞ ꠇꠞꠞꠣꠝ, ꠔꠥꠝꠤ ꠔꠣꠞꠣꠞꠦ ꠁꠛꠟꠤꠍꠞ ꠀꠔ ꠕꠣꠇꠤ ꠢꠦꠚꠣꠎꠔ ꠇꠞꠅ। 16ꠀꠝꠤ ꠎꠦꠟꠣ ꠅꠃ ꠖꠥꠘꠤꠀꠞ ꠘꠣꠄ, ꠅꠃꠟꠣ ꠔꠣꠞꠣꠅ ꠁ ꠖꠥꠘꠤꠀꠞ ꠘꠣꠄ। 17ꠔꠥꠝꠤ ꠔꠣꠞꠣꠞꠦ ꠔꠥꠝꠣꠞ ꠢꠇ ꠖꠤꠀ ꠈꠣꠍ ꠢꠤꠡꠣꠛꠦ ꠞꠣꠈꠅ। ꠔꠥꠝꠣꠞ ꠇꠣꠟꠣꠝꠃ ꠅꠁꠟ ꠅꠃ ꠢꠇ। 18ꠔꠥꠝꠤ ꠎꠦꠟꠣ ꠀꠝꠣꠞꠦ ꠖꠥꠘꠤꠀꠔ ꠙꠣꠑꠣꠁꠍ, ꠅꠃꠟꠣ ꠀꠝꠤꠅ ꠔꠣꠞꠣꠞꠦ ꠖꠥꠘꠤꠀꠞ ꠝꠣꠎꠦ ꠙꠣꠑꠣꠁꠍꠤ। 19ꠀꠝꠤ ꠔꠣꠞꠣꠞ ꠟꠣꠉꠤ ꠘꠤꠎꠞꠦ ꠈꠣꠍ ꠇꠞꠤ ꠞꠣꠈꠍꠤ, ꠎꠣꠔꠦ ꠔꠣꠞꠣꠞꠦꠅ ꠢꠇ ꠖꠤꠀ ꠈꠣꠍ ꠢꠤꠡꠣꠛꠦ ꠞꠣꠈꠣ ꠅꠄ।
20“ꠔꠦ ꠀꠝꠤ ꠈꠣꠟꠤ ꠄꠞꠣꠞ ꠟꠣꠉꠤ ꠝꠤꠘꠔ ꠇꠞꠤꠀꠞ ꠘꠣ, ꠔꠣꠞꠣꠞ ꠟꠣꠉꠤꠅ ꠝꠤꠘꠔ ꠇꠞꠞꠣꠝ, ꠎꠦꠞꠣ ꠄꠞꠣꠞ ꠇꠕꠣ ꠢꠥꠘꠤꠀ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠛ। 21ꠀꠝꠤ ꠝꠤꠘꠔ ꠇꠞꠤꠀꠞ ꠔꠣꠞꠣ ꠢꠇꠟ ꠎꠣꠘꠥ ꠄꠇ ꠅꠄ। ꠛꠣꠛꠣ, ꠔꠥꠝꠤ ꠎꠦꠟꠣ ꠀꠝꠣꠞ ꠟꠉꠦ ꠀꠍ ꠀꠞ ꠀꠝꠤꠅ ꠎꠦꠟꠣ ꠔꠥꠝꠣꠞ ꠟꠉꠦ ꠀꠍꠤ, ꠅꠃꠟꠣ ꠔꠣꠞꠣꠅ ꠎꠣꠘꠥ ꠀꠝꠞꠣꠞ ꠟꠉꠦ ꠝꠤꠟꠤꠀ ꠞꠂꠘ। ꠔꠦꠃ ꠖꠥꠘꠤꠀꠞ ꠝꠣꠘꠡꠦ ꠄꠇꠤꠘ ꠇꠞꠛꠣ, ꠔꠥꠝꠤꠃ ꠀꠝꠣꠞꠦ ꠙꠣꠑꠣꠁꠍ। 22ꠔꠥꠝꠤ ꠀꠝꠣꠞꠦ ꠎꠦ ꠝꠢꠤꠝꠣ ꠖꠣꠘ ꠇꠞꠍ, ꠀꠝꠤ ꠁꠔꠣ ꠔꠣꠞꠣꠞꠦ ꠖꠣꠘ ꠇꠞꠍꠤ, ꠎꠣꠔꠦ ꠀꠝꠞꠣ ꠎꠦꠟꠣ ꠄꠇ, ꠅꠃꠟꠣ ꠔꠣꠞꠣꠅ ꠄꠇ ꠅꠁꠔꠣ ꠙꠣꠞꠂꠘ। 23ꠔꠥꠝꠤ ꠎꠦꠟꠣ ꠀꠝꠣꠞ ꠝꠣꠎꠦ ꠀꠍ, ꠅꠟꠣ ꠀꠝꠤꠅ ꠔꠣꠞꠣꠞ ꠝꠣꠎꠦ ꠀꠍꠤ। ꠅꠃ ꠟꠣꠈꠣꠘ ꠔꠣꠞꠣ ꠎꠣꠘꠥ ꠙꠥꠞꠣꠙꠥꠞ ꠄꠇ ꠅꠁꠔꠣ ꠙꠣꠞꠂꠘ। ꠔꠦꠃ ꠖꠥꠘꠤꠀꠞ ꠝꠣꠘꠡꠦ ꠛꠥꠎꠛ, ꠔꠥꠝꠤꠃ ꠀꠝꠣꠞꠦ ꠙꠣꠑꠣꠁꠍ, ꠀꠞ ꠔꠥꠝꠤ ꠀꠝꠣꠞꠦ ꠎꠦꠟꠣ ꠝꠣꠄꠀ ꠇꠞ, ꠅꠃꠟꠣ ꠔꠣꠞꠣꠞꠦꠅ ꠝꠣꠄꠀ ꠇꠞꠅ। 24ꠛꠣꠛꠣ, ꠀꠝꠤ ꠌꠣꠁꠞꠣꠝ, ꠔꠥꠝꠤ ꠎꠦꠞꠣꠞꠦ ꠀꠝꠣꠞ ꠀꠔꠅ ꠡꠙꠤꠍ, ꠀꠝꠤ ꠎꠦꠈꠣꠘꠅ ꠀꠍꠤ, ꠔꠣꠞꠣꠅ ꠎꠣꠘꠥ ꠀꠝꠣꠞ ꠟꠉꠦ ꠢꠘꠅ ꠞꠂꠘ ꠀꠞ ꠀꠝꠣꠞ ꠝꠢꠤꠝꠣ ꠖꠦꠈꠂꠘ। ꠁ ꠝꠢꠤꠝꠣ ꠔ ꠔꠥꠝꠤꠃ ꠀꠝꠣꠞꠦ ꠖꠣꠘ ꠇꠞꠍ, ꠇꠣꠞꠘ ꠖꠥꠘꠤꠀ ꠙꠄꠖꠣ ꠇꠞꠣꠞ ꠀꠉ ꠕꠣꠇꠤꠃ ꠔꠥꠝꠤ ꠀꠝꠣꠞꠦ ꠝꠣꠄꠀ ꠇꠞꠍ।
25“ꠅ ꠢꠇ ꠁꠘꠍꠣꠚꠇꠣꠞꠤ ꠛꠣꠛꠣ, ꠖꠥꠘꠤꠀꠞ ꠝꠣꠘꠡꠦ ꠔꠥꠝꠣꠞꠦ ꠌꠤꠘꠦ ꠘꠣ, ꠅꠁꠟꠦ ꠀꠝꠤ ꠔ ꠌꠤꠘꠤ। ꠀꠞ ꠔꠥꠝꠤꠃ ꠎꠦꠘ ꠀꠝꠣꠞꠦ ꠙꠣꠑꠣꠁꠍ, ꠁꠈꠣꠘ ꠄꠞꠣ ꠛꠥꠎꠤꠟꠤꠍꠦ। 26ꠄꠞꠣꠞ ꠉꠦꠍꠦ ꠀꠝꠤ ꠔꠥꠝꠣꠞ ꠘꠣꠝ ꠎꠣꠁꠞ ꠇꠞꠍꠤ, ꠀꠉꠦꠖꠤ ꠀꠞꠅ ꠇꠞꠝꠥ, ꠎꠣꠔꠦ ꠔꠥꠝꠤ ꠀꠝꠣꠞꠦ ꠎꠦꠟꠣ ꠝꠣꠄꠀ ꠇꠞ, ꠅꠟꠣ ꠝꠣꠄꠀ ꠔꠣꠞꠣꠞ ꠜꠤꠔꠞꠦꠅ ꠕꠣꠇꠦ ꠀꠞ ꠀꠝꠤ ꠔꠣꠞꠣꠞ ꠟꠉꠦ ꠝꠤꠡꠤꠀ ꠕꠣꠇꠤ।”
Currently Selected:
ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 17: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
