ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 16
16
1ꠢꠎꠞꠔ ꠁꠍꠣꠄ ꠀꠞꠅ ꠇꠁꠟꠣ, “ꠀꠝꠤ ꠁꠔꠣ ꠎꠣꠘꠣꠁ ꠖꠤꠟꠣꠝ, ꠎꠣꠔꠦ ꠔꠥꠝꠞꠣ ꠈꠞꠟꠣꠝꠤ ꠘꠣ ꠎꠣꠅ। 2ꠝꠣꠘꠡꠦ ꠔꠥꠝꠞꠣꠞꠦ ꠡꠝꠣꠎ ꠕꠣꠇꠤ ꠛꠣꠞ ꠇꠞꠤ ꠖꠤꠛꠣ। ꠅꠟꠣ ꠡꠝꠄ ꠀꠁꠛ, ꠎꠣꠞꠣ ꠔꠥꠝꠞꠣꠞꠦ ꠈꠥꠘ ꠇꠞꠛ, ꠔꠣꠞꠣ ꠝꠘꠅ ꠇꠞꠛ ꠁꠔꠣ ꠀꠟ꠆ꠟꠣꠞ ꠄꠛꠣꠖꠔ ꠇꠞꠦꠞ। 3ꠔꠣꠞꠣ ꠁꠔꠣ ꠇꠞꠛ, ꠇꠣꠞꠘ ꠔꠣꠞꠣ ꠉꠣꠁꠛꠤ ꠛꠣꠚꠞꠦꠅ ꠌꠤꠘꠍꠦ ꠘꠣ, ꠀꠝꠣꠞꠦꠅ ꠌꠤꠘꠍꠦ ꠘꠣ। 4ꠀꠝꠤ ꠁꠔꠣ ꠀꠉꠦꠃ ꠇꠁꠀ ꠞꠣꠈꠟꠣꠝ, ꠎꠣꠔꠦ ꠡꠝꠄ ꠀꠁꠟꠦ ꠝꠘꠅ ꠅꠄ, ꠀꠝꠤ ꠔꠥꠝꠞꠣꠞꠦ ꠅꠔꠣ ꠇꠁꠍꠟꠣꠝ। ꠀꠝꠤ ꠙꠄꠟꠣ ꠕꠣꠇꠤ ꠁꠔꠣ ꠇꠁꠍꠤ ꠘꠣ, ꠇꠣꠞꠘ ꠀꠝꠤ ꠔ ꠔꠥꠝꠞꠣꠞ ꠟꠉꠦ ꠟꠉꠦꠃ ꠀꠍꠟꠣꠝ।
ꠡꠣꠁꠎ꠆ꠎꠉꠤꠞ ꠞꠥꠢꠥꠞ ꠇꠣꠝ-ꠇꠣꠎꠞ ꠘꠝꠥꠘꠣ
5“ꠢꠥꠘꠅ, ꠀꠝꠣꠞꠦ ꠎꠦꠁꠘ ꠙꠣꠑꠣꠁꠍꠂꠘ, ꠀꠝꠤ ꠅꠈꠘ ꠔꠣꠘ ꠉꠦꠍꠦ ꠎꠣꠁꠀꠞꠉꠤ, ꠔꠣ-ꠅ ꠔꠥꠝꠞꠣ ꠇꠦꠃ ꠀꠝꠣꠞꠦ ꠎꠤꠇꠣꠁꠞꠣꠄ ꠘꠣ, ꠀꠝꠤ ꠇꠁ ꠎꠣꠁꠞꠣꠝ। 6ꠛꠞꠋ ꠀꠝꠤ ꠔꠥꠝꠞꠣꠞꠦ ꠁꠔꠣ ꠇꠁꠍꠤ, ꠄꠞꠟꠣꠉꠤ ꠔꠥꠝꠞꠣꠞ ꠝꠘꠅ ꠈꠥꠛ ꠖꠥꠈ ꠀꠁꠍꠦ। 7ꠔꠦꠛꠃ ꠀꠝꠤ ꠢꠇ ꠇꠕꠣ ꠇꠁꠞꠣꠝ, ꠀꠝꠣꠞ ꠎꠣꠅꠀꠈꠣꠘ ꠔꠥꠝꠞꠣꠞ ꠟꠣꠉꠤ ꠜꠣꠟꠣ, ꠀꠝꠤ ꠘꠣ ꠉꠦꠟꠦ ꠔ ꠢꠃ ꠡꠣꠁꠎ꠆ꠎꠉꠤꠞ ꠞꠥꠢꠥ ꠀꠁꠔꠣ ꠘꠣꠄ। ꠀꠝꠤ ꠉꠦꠟꠦꠉꠤ ꠔꠣꠘꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠝꠥ। 8ꠔꠣꠁꠘ ꠀꠁꠀ ꠉꠥꠘꠣꠞ ꠛꠦꠙꠣꠞꠦ, ꠀꠟ꠆ꠟꠣꠞ ꠝꠞ꠆ꠎꠤ ꠝꠣꠚꠤꠇ ꠌꠟꠣꠞ ꠛꠦꠙꠣꠞꠦ ꠀꠞ ꠀꠟ꠆ꠟꠣꠞ ꠛꠤꠌꠣꠞꠞ ꠛꠦꠙꠣꠞꠦ ꠝꠣꠘꠡꠞꠦ ꠢꠎꠣꠉ ꠇꠞꠛꠣ। 9ꠔꠣꠁꠘ ꠉꠥꠘꠣꠞ ꠛꠦꠙꠣꠞꠦ ꠢꠎꠣꠉ ꠇꠞꠛꠣ, ꠇꠣꠞꠘ ꠝꠣꠘꠡꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ ꠘꠣ। 10ꠀꠟ꠆ꠟꠣꠞ ꠝꠞ꠆ꠎꠤ ꠝꠣꠚꠤꠇ ꠌꠟꠣꠞ ꠛꠦꠙꠣꠞꠦ ꠢꠎꠣꠉ ꠇꠞꠛꠣ, ꠇꠣꠞꠘ ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠉꠦꠍꠦ ꠎꠣꠁꠀꠞꠉꠤ, ꠔꠥꠝꠞꠣ ꠀꠝꠣꠞꠦ ꠀꠞ ꠖꠦꠈꠔꠣꠄ ꠘꠣꠄ। 11ꠛꠤꠌꠣꠞꠞ ꠛꠦꠙꠣꠞꠦ ꠢꠎꠣꠉ ꠇꠞꠛꠣ, ꠇꠣꠞꠘ ꠖꠥꠘꠤꠀꠞ ꠝꠥꠘꠤꠛ ꠁꠛꠟꠤꠍꠞ ꠛꠤꠌꠣꠞ ꠅꠁꠉꠦꠍꠦ।
12“ꠔꠥꠝꠞꠣꠞꠦ ꠀꠞꠅ ꠛꠃꠔꠔꠣ ꠇꠅꠀꠞ ꠀꠍꠦ, ꠅꠁꠟꠦ ꠅꠈꠘ ꠁꠔꠣ ꠇꠁꠟꠦ ꠡꠁꠎ꠆ꠎ ꠇꠞꠔꠣꠄ ꠙꠣꠞꠔꠣꠄ ꠘꠣꠄ। 13ꠢꠃ ꠢꠇ ꠞꠥꠢꠥ ꠀꠁꠀ ꠢꠣꠞꠤ ꠙꠕ ꠖꠦꠈꠣꠁꠀ ꠔꠥꠝꠞꠣꠞꠦ ꠙꠥꠞꠣꠙꠥꠞ ꠢꠇꠈꠣꠘ ꠎꠣꠘꠣꠁꠛꠣ। ꠔꠣꠁꠘ ꠔ ꠘꠤꠎ ꠕꠣꠇꠤ ꠇꠥꠘ꠆ꠔꠣ ꠇꠁꠔꠣ ꠘꠣꠄ, ꠈꠣꠟꠤ ꠎꠦꠔꠣ ꠢꠥꠘꠂꠘ, ꠅꠔꠣꠃ ꠇꠁꠛꠣ। ꠀꠞ ꠎꠦꠔꠣ ꠊꠐꠛ, ꠅꠔꠣꠃ ꠎꠣꠘꠣꠁꠛꠣ। 14ꠀꠝꠤ ꠎꠦꠔꠣ ꠇꠁ, ꠔꠣꠁꠘ ꠀꠁꠀ ꠅꠔꠣꠃ ꠔꠥꠝꠞꠣꠞ ꠉꠦꠍꠦ ꠎꠣꠁꠞ ꠇꠞꠛꠣ। ꠅꠟꠣꠈꠣꠘ ꠔꠣꠁꠘ ꠀꠝꠣꠞ ꠝꠢꠤꠝꠣ ꠎꠣꠁꠞ ꠇꠞꠛꠣ। 15ꠉꠣꠁꠛꠤ ꠛꠣꠚꠞ ꠎꠦꠔꠣ ꠀꠍꠦ, ꠁꠔꠣ ꠢꠇꠟꠔꠣꠃ ꠀꠝꠣꠞ। ꠄꠞꠟꠣꠉꠤ ꠀꠝꠤ ꠇꠁꠞꠣꠝ, ꠀꠝꠤ ꠎꠦꠔꠣ ꠇꠁ, ꠔꠣꠁꠘ ꠅꠔꠣꠃ ꠔꠥꠝꠞꠣꠞ ꠉꠦꠍꠦ ꠎꠣꠁꠞ ꠇꠞꠛꠣ।”
ꠃꠝ꠆ꠝꠔ ꠅꠇꠟꠞꠦ ꠛꠥꠎ ꠖꠦꠅꠀ
16ꠢꠎꠞꠔ ꠁꠍꠣꠄ ꠇꠁꠟꠣ, “ꠕꠥꠠꠣ ꠛꠣꠖꠦ ꠔꠥꠝꠞꠣ ꠀꠞ ꠀꠝꠣꠞꠦ ꠖꠦꠈꠔꠣꠄ ꠘꠣꠄ, ꠢꠤꠞꠛꠣꠞ ꠕꠥꠠꠣ ꠛꠣꠖꠦ ꠖꠦꠈꠛꠣꠄ।” 17ꠁꠈꠣꠘ ꠢꠥꠘꠤꠀ ꠇꠄꠎꠘ ꠍꠣꠢꠣꠛꠤꠄ ꠝꠣꠔꠣ-ꠝꠣꠔꠤ ꠇꠞꠟꠣ, “ꠔꠣꠁꠘ ꠁꠔꠣ ꠇꠤꠔꠣ ꠝꠣꠔꠂꠘ, ‘ꠕꠥꠠꠣ ꠛꠣꠖꠦ ꠔꠥꠝꠞꠣ ꠀꠞ ꠀꠝꠣꠞꠦ ꠖꠦꠈꠔꠣꠄ ꠘꠣꠄ, ꠢꠤꠞꠛꠣꠞ ꠕꠥꠠꠣ ꠛꠣꠖꠦ ꠖꠦꠈꠛꠣꠄ’, ꠔꠣꠁꠘ ꠢꠤꠞꠛꠣꠞ ꠇꠁꠞꠣ, ‘ꠀꠝꠤ ꠛꠣꠚꠞ ꠉꠦꠍꠦ ꠎꠣꠁꠞꠣꠝꠉꠤ।’ 18ꠔꠦ ꠔꠣꠁꠘ ꠎꠦ ꠕꠥꠠꠣ ꠡꠝꠄꠅꠞ ꠇꠕꠣ ꠇꠁꠞꠣ, ꠁꠈꠣꠘ ꠇꠤꠔꠣ? ꠔꠣꠁꠘ ꠇꠤꠔꠣ ꠝꠣꠔꠤꠞꠣ, ꠀꠝꠞꠣ ꠔ ꠛꠥꠎꠞꠣꠝ ꠘꠣ।”
19ꠢꠎꠞꠔ ꠁꠍꠣꠄ ꠛꠥꠎꠤꠟꠤꠟꠣ, ꠔꠣꠘ ꠍꠣꠢꠣꠛꠤ ꠅꠇꠟꠦ ꠅꠃ ꠛꠦꠙꠣꠞꠦ ꠔꠣꠘꠞꠦ ꠇꠥꠘ꠆ꠔꠣ ꠎꠤꠇꠣꠁꠔꠣ ꠌꠣꠁꠞꠣ, ꠛꠥꠎꠤꠀ ꠔꠣꠁꠘ ꠇꠁꠟꠣ, “ꠀꠝꠤ ꠎꠦ ꠇꠁꠍꠤ, ‘ꠕꠥꠠꠣ ꠛꠣꠖꠦ ꠔꠥꠝꠞꠣ ꠀꠞ ꠀꠝꠣꠞꠦ ꠖꠦꠈꠔꠣꠄ ꠘꠣꠄ, ꠢꠤꠞꠛꠣꠞ ꠕꠥꠠꠣ ꠛꠣꠖꠦ ꠖꠦꠈꠛꠣꠄ’ ꠅꠔꠣ ꠟꠁꠀ ꠔꠥꠝꠞꠣ ꠝꠣꠔꠣ-ꠝꠣꠔꠤ ꠇꠞꠞꠣꠄ ꠘꠤ? 20ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ, ꠔꠥꠝꠞꠣ ꠇꠣꠘ꠆ꠖꠤꠛꠣꠄ ꠀꠞ ꠀꠢꠣꠎꠣꠞꠤ ꠇꠞꠛꠣꠄ, ꠅꠁꠟꠦ ꠁ ꠖꠥꠘꠤꠀꠞ ꠝꠣꠘꠡꠦ ꠈꠥꠡꠤ ꠇꠞꠛꠣ। ꠔꠥꠝꠞꠣ ꠅꠈꠘ ꠖꠥꠈ-ꠇꠡ꠆ꠐ ꠇꠞꠛꠣꠄ, ꠅꠁꠟꠦ ꠛꠣꠖꠦ ꠁ ꠖꠥꠈ ꠞꠁꠔ ꠘꠣꠄ, ꠄꠞ ꠛꠖꠟꠣ ꠈꠥꠡꠤ ꠇꠞꠛꠣꠄ। 21ꠛꠣꠁꠌ꠆ꠌꠣ ꠅꠀꠞ ꠡꠝꠄ ꠛꠦꠐꠤꠘ꠆ꠔꠞ ꠈꠥꠛ ꠇꠡ꠆ꠐ ꠅꠄ, ꠅꠁꠟꠦ ꠅꠁꠀ ꠢꠣꠞꠟꠦ ꠘꠄꠀ ꠀꠅꠟꠣꠖꠞ ꠚꠥꠞ꠆ꠔꠤꠄ ꠝꠘ ꠜꠞꠤ ꠎꠣꠄ, ꠢꠤ ꠇꠡ꠆ꠐꠞ ꠇꠕꠣ ꠀꠞ ꠝꠘꠅ ꠕꠣꠇꠦ ꠘꠣ। 22ꠅꠃ ꠟꠣꠈꠣꠘ ꠔꠥꠝꠞꠣꠅ ꠅꠈꠘ ꠖꠥꠈ-ꠇꠡ꠆ꠐ ꠇꠞꠞꠣꠄ, ꠅꠁꠟꠦ ꠢꠤꠞꠛꠣꠞ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠀꠝꠣꠞ ꠖꠦꠈꠣ ꠅꠁꠛ, ꠢꠃ ꠡꠝꠄ ꠈꠥꠡꠤꠄ ꠔꠥꠝꠞꠣꠞ ꠖꠤꠟ ꠜꠞꠤꠎꠤꠛ, ꠁ ꠈꠥꠡꠤ ꠇꠦꠃ ꠇꠣꠠꠤꠀ ꠘꠤꠔ ꠙꠣꠞꠔ ꠘꠣꠄ।
23“ꠢꠤ ꠡꠝꠄ ꠔꠥꠝꠞꠣ ꠀꠝꠣꠞ ꠉꠦꠍꠦ ꠇꠥꠘ꠆ꠔꠣ ꠌꠣꠁꠔꠣꠄ ꠘꠣꠄ। ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠁꠞꠣꠝ, ꠔꠥꠝꠞꠣ ꠀꠝꠣꠞ ꠘꠣꠝꠦ ꠀꠝꠣꠞ ꠉꠣꠁꠛꠤ ꠛꠣꠚꠞ ꠉꠦꠍꠦ ꠎꠦꠔꠣ ꠌꠣꠁꠛꠣꠄ, ꠔꠣꠁꠘ ꠔꠥꠝꠞꠣꠞꠦ ꠖꠤꠛꠣ। 24ꠅꠈꠘꠅ ꠔ ꠔꠥꠝꠞꠣ ꠀꠝꠣꠞ ꠘꠣꠝꠦ ꠇꠥꠘ꠆ꠔꠣ ꠌꠣꠁꠍ ꠘꠣ। ꠌꠣꠅ, ꠔꠦꠃ ꠙꠣꠁꠛꠣꠄ, ꠎꠣꠔꠦ ꠔꠥꠝꠞꠣꠞ ꠈꠥꠡꠤ ꠙꠥꠞꠣ ꠅꠄ।
25“ꠀꠝꠤ ꠔꠥꠝꠞꠣꠞꠦ ꠃꠖꠣꠢꠞꠘ ꠖꠤꠀ ꠅꠃ ꠔꠣꠟꠤꠝ ꠖꠤꠟꠣꠝ। ꠅꠁꠟꠦ ꠅꠟꠣꠈꠣꠘ ꠡꠝꠄ ꠀꠁꠛ, ꠎꠦꠛꠟꠣ ꠀꠝꠤ ꠇꠥꠘꠥ ꠃꠖꠣꠢꠞꠘ ꠍꠣꠠꠣ, ꠀꠝꠣꠞ ꠉꠣꠁꠛꠤ ꠛꠣꠚꠞ ꠛꠦꠙꠣꠞꠦ ꠈꠥꠟꠣ-ꠝꠦꠟꠣ ꠛꠥꠎꠣꠁꠝꠥ। 26ꠢꠃ ꠖꠤꠘꠃ ꠔꠥꠝꠞꠣ ꠀꠝꠣꠞ ꠘꠣꠝꠦ ꠌꠣꠁꠛꠣꠄ। ꠀꠝꠤ ꠔ ꠁꠈꠣꠘ ꠇꠁꠞꠣꠝ ꠘꠣ, ꠀꠝꠤ ꠔꠥꠝꠞꠣꠞ ꠅꠁꠀ ꠉꠣꠁꠛꠤ ꠛꠣꠚꠞ ꠉꠦꠍꠦ ꠝꠤꠘꠔ ꠇꠞꠝꠥ। 27ꠔꠣꠁꠘ ꠘꠤꠎꠦꠃ ꠔꠥꠝꠞꠣꠞꠦ ꠝꠣꠄꠀ ꠇꠞꠂꠘ, ꠇꠣꠞꠘ ꠔꠥꠝꠞꠣ ꠀꠝꠣꠞꠦ ꠝꠣꠄꠀ ꠇꠞꠍ ꠀꠞ ꠄꠇꠤꠘ ꠇꠞꠍ ꠎꠦ, ꠀꠝꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠤ। 28ꠀꠍꠟꠦ, ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠅꠃ ꠖꠥꠘꠤꠀꠔ ꠀꠁꠍꠤ ꠀꠞ ꠖꠥꠘꠤꠀ ꠍꠣꠠꠤꠀ ꠔꠣꠘ ꠉꠦꠍꠦꠃ ꠎꠣꠁꠞꠣꠝ।”
29ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠇꠁꠟꠣ, “ꠢꠥꠎꠥꠞ ꠖꠦꠈꠃꠇ꠆ꠇꠣ, ꠅꠈꠘ ꠔ ꠀꠙꠘꠦ ꠈꠥꠟꠣ-ꠝꠦꠟꠣꠃ ꠝꠣꠔꠤꠞꠣ, ꠇꠥꠘꠥ ꠃꠖꠣꠢꠞꠘ ꠖꠤꠞꠣ ꠘꠣ। 30ꠅꠈꠘ ꠀꠝꠞꠣ ꠛꠥꠎꠟꠣꠝ, ꠀꠙꠘꠣꠞ ꠅꠎꠣꠘꠣ ꠇꠥꠘ꠆ꠔꠣ ꠘꠣꠁ, ꠀꠞ ꠀꠙꠘꠣꠞꠦ ꠇꠦꠃ ꠇꠥꠘ꠆ꠔꠣ ꠎꠤꠇꠣꠘꠤꠞꠅ ꠘꠣꠁ। ꠉꠔꠤꠇꠦꠃ ꠀꠝꠞꠣ ꠄꠇꠤꠘ ꠇꠞꠟꠣꠝ, ꠀꠙꠘꠦ ꠀꠟ꠆ꠟꠣꠞ ꠉꠦꠍ ꠕꠣꠇꠤꠃ ꠀꠁꠍꠂꠘ।” 31ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠅꠈꠘ ꠄꠇꠤꠘ ꠅꠁꠍꠦ ꠘꠤ? 32ꠢꠥꠘꠅ, ꠅꠟꠣ ꠡꠝꠄ ꠀꠁꠅꠞ, ꠄꠝꠘꠇꠤ ꠀꠁꠌ꠆ꠍꠦ, ꠎꠦꠛꠟꠣ ꠔꠥꠝꠞꠣ ꠖꠟ ꠍꠣꠠꠤꠀ ꠀꠝꠣꠞꠦ ꠕꠁꠀ ꠎꠣꠞꠎꠤꠞ ꠎꠣꠉꠣꠔ ꠜꠣꠉꠤꠛꠣꠄ। ꠅꠁꠟꠦ ꠀꠝꠤ ꠔ ꠄꠇꠟꠣ ꠘꠣꠄ, ꠀꠝꠣꠞ ꠉꠣꠁꠛꠤ ꠛꠣꠚ ꠀꠝꠣꠞ ꠟꠉꠦ ꠟꠉꠦ ꠀꠍꠂꠘ। 33ꠀꠝꠤ ꠔꠥꠝꠞꠣꠞꠦ ꠁꠔꠣ ꠇꠁꠟꠣꠝ, ꠎꠣꠔꠦ ꠔꠥꠝꠞꠣ ꠀꠝꠣꠞ ꠟꠉꠦ ꠝꠤꠡꠤꠀ ꠀꠍ ꠉꠔꠤꠇꠦ ꠝꠘꠅ ꠡꠣꠘ꠆ꠔꠤ ꠙꠣꠅ। ꠁ ꠖꠥꠘꠤꠀꠔ ꠔꠥꠝꠞꠣ ꠖꠥꠈ-ꠝꠍꠤꠛꠔꠅ ꠀꠍ, ꠔꠣ-ꠅ ꠝꠘꠅꠛꠟ ꠞꠣꠈꠤꠅ, ꠀꠝꠤꠃ ꠖꠥꠘꠤꠀꠞꠦ ꠎꠄ ꠇꠞꠍꠤ।”
Currently Selected:
ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 16: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
