Maarko 9

Tũhũẽẽnĩt cĩ Yeesu

1Baa aduhaak Yeesu nuyyiook cĩgĩnnĩg hĩ lothippit anneek, “Haduhaakuung dĩdĩ, aattĩg eeta ũgẽẽgĩ hõrggẽẽnaa cunuung ꞌcĩg hatĩ hõllõngaa adaahĩ nga hĩcĩnĩt habuccieet cĩ Nyekuci ngaatĩ akuuni ꞌtirriaana.”

2Ma baa urutaa cĩ waathinniook tõrkõnõn, ikia ũũhĩ Yeesu Pẽẽtũrũ hĩ ꞌJeemith hĩ Yõaannẽ, õõkõr õõ muuraa ꞌcĩ uuni ĩĩcĩ õõ aattiyyi ẽmmẽn aitiõõ eeta tõõ. Ma nĩngaata, ũtũhũĩ Yeesu hẽbẽrẽẽnnĩĩ cĩggĩĩng, 3hattaalito ceremwaana cĩgĩnnĩg hĩĩtõ õõppẽr hĩllõõanit, hiittiõõ hõllõngaa aduhõõ hĩ ꞌcĩg occa ũũny ẽẽtĩ umwaa loota nĩnga vẽlẽk. 4Ma ho, iita uppwaattak Eliijja#9:4 Eliijja: Baa ĩĩn nẽẽ põrõvẽtaac cĩ Nyekuci ꞌcĩ baa õkõõĩ Nyekuci hẽẽtahujjieen rũgẽtẽẽt. Tigiil thõõth cĩnnĩ ꞌBuuhaa ꞌcĩ ĩĩn 1 ĩcĩ Habueetu 17-21. hĩ Mũũꞌtha ĩhõõggõ nĩngaata nẽ othooꞌthio hĩ Yeesu.

5Nĩngĩtĩ õthõõthĩkĩ Pẽẽtũrũ Yeesu annẽẽkĩ, “ꞌLimmannioohit, ẽllẽẽmĩth gẽrrẽẽt ngaatĩ haattiyyi naag vẽlẽk ngaati, hẽtẽhẽnyta da tuggẽẽt iyyio, cunni hõdẽĩ, hĩ cĩ Mũũꞌtha nẽ ĩĩ hõdẽĩ cĩ Eliijja.” 6Baa ẽrẽk Pẽẽtũrũ thõõth ꞌcĩ aĩ huduha, hĩnĩngĩtĩ baa iꞌngolli nẽẽ thõõth icci gẽrrẽẽt.

7Ma ho, uppwaanna diith ꞌcĩ aku ammũlũũnyan ĩhõõggõ nẽ ĩthĩhĩt molook umwa diithatõõ ꞌcĩ õthõõth aĩ, “Loholeec caannĩ ꞌcĩ hamĩna cieeni, ĩthĩhĩt ĩnõõnnõ!”#Tigiil Waraga ꞌcĩ ĩĩn 2 Pẽẽtũrũ 1:17 8Ma hĩdĩĩkoothong, ma abbuudi nẽẽg ko, ammũdeek hinnia õõt Mũũꞌtha hĩ Eliijja, ĩĩ Yeesu dioo ꞌcĩ idionganĩ.

9Ma baa ulluuccia nẽẽg muuraa hujjieen iita loota, ikia itilo Yeesu ĩhõõggõ ĩĩnnĩk, “Ma hooyyu haduhaaku eet umwa ꞌgiiaa acinnu niig ko, ĩꞌthõng hũrũga Ngeertĩ Eeto daahĩtha.” 10Baa aꞌthũũnnĩ nẽẽg thõõth ꞌcĩ ilootĩ Yeesu ĩhõõggõ ho, tananga baa ĩccaad nẽẽg thõõth baa õthõõth Yeesu aĩ, “Harũgna hatĩ daahĩtha.”

11Ma nĩngaata, ijinit nẽẽg Yeesu ĩĩttĩk, “Inni ꞌlimmanniooha cĩg nyattal cĩ Mũũꞌtha hĩĩtõ, occa uwwattaa Eliijja ĩĩcĩ oou nga hikia Krĩstõ ho?”

12Ẽdẽcĩ Yeesu ĩhõõggõ anneek, “Occa uwwattaa Eliijja ĩĩcĩ oou, hátĩ hikia hũkũmaneek ꞌgii vẽlẽk. Nẽ inni hẽtẽhẽẽdĩ ꞌBuuhaa cĩ Nyekuci hĩĩ, adiim accananni Ngeertĩ Eeto nẽ ĩdĩmanit eeta ĩnõõnnõ ꞌbuth gẽrrẽẽt ko?#Tigiil ꞌBuuk cĩ Iꞌthaia 53:1-12 13Nẽẽthĩ, haduhaakuung naa ngagiita, ikia Eliijja ẽlẽk nẽ ĩdĩmatteek eeta ĩnõõnnõ thooꞌthiok ꞌcĩg abathĩ ꞌcĩg adiim nẽẽgĩ, hĩcĩ eheeddi ꞌBuuhaa cĩ Nyekuci.”#9:13 Ikia Eliijja ẽlẽk: Ma õthõõth Yeesu ngaati Eliijja, õthõõth nẽẽ Yõaannẽ Batitta. Tigiil Maarko 1:1-9; 6:14-29.

Aaꞌnyĩk Yeesu buulenit hũbũna

(Tigiil Maatteeo 17:14-20; ꞌLuuka 9:37-43a)

14Ma baa oboddia Yeesu hĩ nuyyiook cĩgĩnnĩg ĩĩn iyyio ho, ummuddieek lothippit cĩ eetu arũmĩ hõdẽĩ hĩ nuyyiook cĩgĩnnĩg ũgĩ. Baa ẽppẽhanõõ ꞌlimmanniooha cĩg nyattaalak ko hĩ ĩhõõggõ. 15Ma nĩngaata, ukullieek eeta ꞌjieen gẽrrẽẽt ngaatĩ acĩnĩ Yeesu, nĩngĩtĩ avviri õõ ĩꞌthaaĩ ĩnõõnnõ.

16Ma ho, ijin Yeesu nuyyiook cĩgĩnnĩg ĩĩnnĩk, “Ne ꞌcĩ ẽppẽhanoonnu niig hĩ ꞌlimmanniook cĩg nyattaalak ko?”

17Ma ngaati, õthõõth hinnia ẽẽtĩ umwaa lothippitatõõ aĩ, “ꞌLimmannioohit, haꞌnyahaakii nganiit buulenit caannĩ, hĩnĩngĩtĩ aꞌnyak lori ꞌcĩ abathĩ nẽ hõllõngaa õthõõthĩ. 18Nẽ ma ikia aggam lorii ꞌcĩ abathĩ ho buulenit, ẽttẽẽdĩ ĩnõõnnõ looc, aaꞌnyĩk huduu ũtũgĩ nẽ aaꞌnyĩk hadak nyĩgĩt nẽ aaꞌnyĩk hõkõm ẽlẽ kak. Baa haduhaahi nuyyiook cugunnig hitiggiaacõ lori nicci, aꞌnyaman hinnia ĩhõõggõ ũdũt.”

19Ma nĩngaata, uduhaak Yeesu lothippit ĩĩnnĩk, “Niig eeta ꞌcĩg aitioonnuung lemiiniti tõõ ho, ĩꞌthõng ꞌthẽk hatĩ ningina ꞌcĩ occa harũmẽẽnĩ naag hĩ ngagiit? Nẽ ĩꞌthõng hatĩ ningina ꞌcĩ occa hemeeꞌthuung naa ngagiit? Aꞌnyaktahaangu nganĩĩt buulenit ngaati!”

20Nĩngĩtĩ aꞌnyahaanĩ nẽẽg buulenit hĩ Yeesu. Ma baa acĩn lorii ꞌcĩ abathĩ Yeesu ho, ikia õtõmõõĩ buulenit hĩdĩĩkoothong hẽttẽẽdĩ looc hẽvẽvvẽr huduu ũtũgĩ. 21Ma ho, ijin Yeesu maaꞌnyĩ loholeeco ĩĩnnĩk, “Nganingina ꞌcĩ aayyi nẽẽ hoti ho?”

Ẽdẽcĩ maaꞌnyĩ buuletto aĩ, “Nganĩngĩtĩ hĩdĩꞌthẽẽtõ. 22Adhuheek ĩnõõnnõ lorii ꞌcĩ abathĩ ho hõdõõkõthĩ ꞌgwoyyiatõõ hode maamĩtõõ hatĩ adiim aruk ĩnõõnnõ. Nẽẽthĩ, má occa adĩmani ꞌgiimwa, tamaatĩheet ngagĩĩt nẽ eleeta.”

23Ẽdẽcĩ Yeesu ĩnõõnnõ anneek, “Inni nii ĩnnĩhaa nganĩĩt occa adĩmani ꞌgiimwa ho? Ammũjĩ hẽlẽggĩ vẽlẽk hĩ eet ꞌcĩ aꞌnyak lemiinit.”

24Ma nĩngaata, utulu maaꞌnyĩ loholeeco nĩĩcĩ noho ĩĩ, “Haꞌnyahi naa lemiinit ꞌcĩ hidici haaga, ẽlaa nuun ꞌtoorĩka hĩĩ maka!”

25Ma baa acĩn Yeesu lothippit ngaatĩ ẽẽjẽhaanĩ hõbõktõ hĩ ĩhõõggõ ojoonu ho, ikia eggerenyeek lori ꞌcĩ abathĩ ho ĩĩnnĩk, “Lorii ꞌcĩ adĩĩtennii ĩĩna nẽ hõllõngaa othoothi ho, haduhaakii naa hanneekii, duhuna ẽllaa cĩ loholeeco nẽ ma ꞌthẽk nga haduhuni ẽllaa cĩnnĩ tarĩ!”

26Ma ho, urruuo lorii ꞌcĩ abathĩ ho nẽ õtõmõõĩ loholeec gẽrrẽẽt, nĩngĩtĩ aduknaanĩ ũũnnĩkĩ ĩnõõnnõ. Ma nĩngaata, ikia aau loholeec hĩ daakiahiti nẽ baa ĩĩtõ eeta vẽlẽk nĩngaata, “Adaaha!” 27Nĩngĩtĩ ẽẽlĩ Yeesu loholeec, aggamĩ aꞌthiit cĩnnĩ nẽ õdõng hĩbĩl ꞌjieena.

28Ma baa urutaa ꞌcĩ uduhutti Yeesu ꞌcieetõõ hĩ nuyyiook cĩgĩnnĩg, õõt aauto ẽmmẽn nẽ iita ijinit nuyyiooha cĩgĩnnĩg ĩnõõnnõ ĩĩcĩ burki ĩĩttĩk, “Inni hatĩ hanyamaneet ngagĩĩt ngaatĩ hiiggiayyia lori ꞌcĩ abathĩ hata?”

29Ẽdẽcĩ Yeesu ĩhõõggõ anneek, “Laiinit dioo ꞌcĩ occa iiggiayyu niig lori ꞌcĩ abathĩ hata.”

Õthõõth Yeesu thõõth cĩ daahĩth cĩnnĩ tarĩ

(Tigiil Maatteeo 17:22-23; ꞌLuuka 9:43b-45)

30Nĩngĩtĩ ũũnnĩkĩ Yeesu hĩ nuyyiook cĩgĩnnĩg nĩngĩtĩho nẽ edecit ꞌgõõl ꞌcĩ õkõ ꞌGalileea. Baa hõllõngaa adiim Yeesu hagaacõ eeta nĩngĩtĩ õõĩ nẽẽg ko, 31hĩnĩngĩtĩ baa alliman nẽẽ nuyyiook cĩgĩnnĩg anneek, “Õhõppõõcanoothĩk hatĩ Ngeertĩ Eeto athĩnĩĩ cĩg eet ꞌcĩg hatĩ õõ aruk ĩnõõnnõ. Nẽ urutaa cĩ waathinniook iyyio, arũgna hatĩ nẽẽ daahĩtha.” 32Nẽẽthĩ, baa hõllõngaa athĩhĩ nuyyiooha thõõth ꞌcĩ aduha Yeesu ho nẽ itieelli ngaatĩ ajini ĩnõõnnõ thõõth tĩho.

Nganĩ cobbi?

(Tigiil Maatteeo 18:1-5; ꞌLuuka 9:46-48)

33Ma baa iita õdõlanit Yeesu hĩ nuyyiook cĩgĩnnĩg ꞌtaaũn cĩ Kapernaumĩ, ikia ũũk aau nẽẽ ꞌcieetõõ nẽ ijin nuyyiook cĩgĩnnĩg ĩĩnnĩk, “Neegi aa ẽppẽhanoonnu niig aangaani ꞌgõõla?” 34Nẽẽthĩ, baa ĩjjaaki nẽẽg, hĩnĩngĩtĩ baa ẽppẽhanõõ ꞌgõõla, hĩnĩngĩtĩ thõõth ꞌcĩ aĩ, nganĩ cobbi hõrggẽẽnaa cĩnĩĩng.

35Nĩngĩtĩ aayyi Yeesu loota nẽ ũtũvva ꞌthooyyiak ꞌcĩg ĩĩn õmmõtõ hĩ ꞌramma ho nẽ ĩĩnnĩk, “Má adiim eet umwaa uwwattĩ, aꞌnyĩĩk hudtuura nẽ ĩĩ dticciannioohit cĩ ꞌgõõnõgĩ vẽlẽk.”

36Ma ho, ittiha Yeesu loholeec ꞌcĩ hidici nẽ aaꞌnyĩk hĩbĩl hõrggẽẽnaa cĩnĩĩng. Nĩngĩtĩ õdõngĩ athĩnĩĩ cĩgĩnnĩg nẽ ĩĩnnĩk ĩhõõggõ, 37“Ẽẽtĩ ꞌcĩ ẽlẽmĩ loholeec ꞌcĩ hidici ꞌcĩ aaĩ hĩ ciee ꞌthaarĩĩ cĩgannĩg, ẽlẽmma nganĩĩta nẽ ẽẽtĩ ꞌcĩ ẽlẽmma nganĩĩta, hõllõngaa ẽlẽmma nganĩĩt diooni, ẽlẽmĩ eet baa ĩꞌthõõannaa nganĩĩt buúk.”

Eet ꞌcĩ hõllõngaa abũrreet ngagĩĩta ĩĩn cĩnaac

(Tigiil ꞌLuuka 9:49-50)

38Baa aduhaak Yõaannẽ Yeesu anneek, “ꞌLimmannioohit, baa hadtuuhanna naag eet umwa iiggia loriẽẽt ꞌcĩg abathĩ ꞌthaarĩĩ cugunnig nẽ hĩĩttĩha ĩnõõnnõ bĩlõ, hĩnĩngĩtĩ hõllõngaa ĩĩn nẽẽ eet cĩnaac.”

39Nĩngĩtĩ annẽẽkĩ Yeesu ĩhõõggõ, “Ma habĩllu ĩnõõnnõ, hĩnĩngĩtĩ aitiõõ eet umwaa ꞌcĩ adĩman thõõth ꞌcĩ ĩnaat eeta ꞌthaarĩĩ cĩgannĩg nẽ õthõõtha nganĩĩt ꞌbuth tõõ. 40Hĩnĩngĩtĩ ẽẽtĩ ꞌcĩ hõllõngaa abũrreet ngagĩĩta, ĩĩn nẽẽ eet cĩnaac. 41Haduhaakuung naa ngagiit thõõth dĩdĩ, má aaꞌnyuung ẽẽtĩ umwaa maam ꞌcĩg ahuddu ꞌthaarĩĩ cĩgannĩg, hĩnĩngĩtĩ iiginnu niig cĩg Krĩstõ, ammũda hatĩ eet tĩho ꞌbaaninit cĩnnĩ.”

ꞌTĩmmaniinit cĩ ꞌthẽccaanõ

(Tigiil Maatteeo 18:6-9; ꞌLuuka 17:1-2)

42“Nẽ má aaꞌnyĩk ẽẽtĩ umwaa loholeec hõrggẽẽnaa cĩ lõhõlĩ iccig ẽlẽmma nganĩĩt ko hĩdĩman ꞌthẽccan, occa abũnnaa ngaatĩ hẽcẽbẽẽkĩ bẽẽ cobbi iꞌnyiaawaa cĩ eet tĩho nẽ hudhukteek bũlũcatõõ. 43Má aaꞌnyi nganiit aꞌthiiti cunni dĩman ꞌthẽccan, ꞌtẽẽdak tuu. Mẽẽn ngaatĩ adukni rũgẽtaa ꞌcĩ aalla ooo aꞌnyahi aꞌthiit hõdẽẽthõng, hĩllõõan ngaatĩ aꞌnyahĩ athĩn vẽlẽk nẽ uuhu ꞌgwoyyiatõõ ꞌcĩ aalla ooo,#9:43 ꞌGwoo ꞌcĩ aalla ũdũt: Ĩĩn ciee ꞌgwoo ꞌcĩ atũũthĩ Nyekuci eet ꞌcĩg abũrĩ ĩnõõnnõ hatĩ kõr cĩ decciaanĩt cĩ lootu. Tigiil ꞌBuuk cĩ Terethiitto 20:7-15. 44ngaatĩ ‘aattiyyi huluta ꞌcĩg hõllõngaa adaahĩ nẽ hõllõngaa adĩĩtĩ ꞌgwaa ũdũt.’ 45Nẽ má aaꞌnyi nganiit ꞌthõõtĩ cunni dĩman ꞌthẽccan, ꞌtẽẽdak tuu. Mẽẽn ngaatĩ ahuulẽnĩĩ nẽ uduhunuu rũgẽt ꞌcĩ aalla ooo, hĩllõõan ngaatĩ aꞌnyahĩ ꞌthoo vẽlẽk nẽ udhuhoothihuu ꞌgwoo ꞌcĩ aalla ooo, 46ngaatĩ ‘aattiyyi huluta ꞌcĩg hõllõngaa adaahĩ nẽ hõllõngaa adĩĩtĩ ꞌgwaa ũdũt.’ 47Má eterꞌtheeki nganiit hẽbẽrẽẽcĩ cunni dĩman ꞌthẽccan, ꞌtõkõcaak tuu, hĩnĩngĩtĩ mẽẽn ngaatĩ adukni habuccieet cĩ Nyekuci hatĩ aꞌnyahi hebereec hõdẽẽthõng hĩllõõan ngaatĩ aꞌnyahĩ hẽbẽrĩ ꞌramma nẽ udhuhoothihuu ꞌgwoyyiaa ꞌcĩ aalla ooo, 48ngaatĩ

“ ‘Aattiyyi huluta ꞌcĩg hõllõngaa adaahĩ

nẽ hõllõngaa adĩĩtĩ ꞌgwaa ũdũt.’#Tigiil ꞌBuuk cĩ Iꞌthaia 66:24

49Ammũda hatĩ eeta vẽlẽk ꞌcannan ꞌgwoyyia.

50“Ĩĩn immilla ꞌgii ꞌcĩ abũnnaa, nẽẽthĩ, má iittiõõ hõllõngaa ammũccarĩĩ, occa hatĩ aaꞌnyiku niig hikia hũmmũccar tarĩ hutuno? Aꞌnyahit muhẽẽnĩt hõrggẽẽnaa cunuung hũbũna haau hĩ immilla nẽ aauttu lõꞌngõõc hĩ ꞌgoonogu.”

Currently Selected:

Maarko 9: did

Highlight

Copy