Maarko 10

Alliman Yeesu thõõth cĩ ngerootto

(Tigiil Maatteeo 19:1-12; ꞌLuuka 16:18)

1Baa ikia ũtũngeek Yeesu looc cĩ Kapernaumĩ nẽ ũũk ĩĩcĩ looc cĩ ꞌJudeea nẽ ũũk abaahĩ lĩĩl cĩ hidioo cĩ ꞌJõrdanĩ. Baa aalla aluttiaak lothippiti cobbi gẽrrẽẽt ĩnõõnnõ tarĩ, nĩngĩtĩ allimanĩ ĩhõõggõ hĩ gõõng hõdõõkõthĩ.

2Ma nĩngaata, iita ummuddieek Variꞌtheei ũgẽẽgĩ ĩnõõnnõ nẽ ĩttĩmanit ngaatĩ ajini annẽẽkĩ, “Ẽlẽmĩ nyattalĩ ngaatĩ occa õõgĩ ẽẽtĩ ngaa cĩnnĩ?”

3Ma ho, ẽdẽc Yeesu ĩhõõggõ ĩĩnnĩk, “Aduhaakuung baa nyattalĩ cĩ Mũũꞌtha ngagiit anneekuung neegi?”

4Ẽdẽcĩ nẽẽg Yeesu anneek, “Baa ẽlẽmaakĩ Mũũꞌtha eet ꞌcĩ maacĩ hẽtẽhẽẽd waraga ꞌcĩ tũbũrẽẽttõ nẽ õõg ngaa.”

5Nĩngĩtĩ annẽẽkĩ Yeesu ĩhõõggõ, “Hĩnĩngĩtĩ baa okommuung ngagiit ooti, ĩnõõ ꞌcĩ eheedikuung Mũũꞌtha nyattal icci ho. 6Nẽẽthĩ, nganĩngĩtĩ ꞌthianaanĩt ꞌcĩ ẽhẽnytaanĩ Nyekuci looc, ‘Baa ẽhẽnyta nẽẽ eet ꞌcĩ maacĩ hĩ ngaa ꞌcĩ ngayyi.’#Tigiil ꞌBuuk cĩ ꞌThianaattõ 1:27 7Nẽ tarĩ ĩĩ, ‘Hĩnĩngĩtĩ thõõth icci, ũũnnĩk hatĩ ẽẽtĩ maaꞌnyĩ hĩ aattĩnnĩ nẽ õõt ũrũmtĩ hĩ ngaa cĩnnĩ, 8nẽ iita ĩĩtõ eeta ꞌcĩg ĩĩn ꞌramma ho ẽlẽ hõdẽẽthõng.’ Nẽẽthĩ, iittiõõ nẽẽg hõllõngaa ĩĩn ꞌramma tarĩ, ĩĩtõ ẽlẽ hõdẽẽthõng.#Tigiil ꞌBuuk cĩ ꞌThianaattõ 2:24 9Nẽẽthĩ, ꞌgii baa ũrũm Nyekuci ẽlẽk, anneek eet umwa ma heꞌngeri.”

10Ma baa oboddioothĩ Yeesu hĩ nuyyiook cĩgĩnnĩg ꞌcieetõõ tarĩ, iita ijinit nuyyiooha ĩnõõnnõ thõõth cĩ tũbũrẽẽttõ ho. 11Ẽdẽcĩ Yeesu ĩhõõggõ anneek, “Ẽẽtĩ ꞌcĩ õõg ngaa cĩnnĩ nẽ ũꞌthũwana umwa tarĩ, adĩman ẽẽtĩ tĩho ꞌthẽccan ngaatĩ ũũnnĩkĩ ngaa cĩnnĩ baa oou. 12Nẽ ꞌgõõlaa cĩ buúk, ngaa ꞌcĩ abũrĩ maac cĩnnĩ nẽ ũũk ũꞌthũwanĩ tarĩ, adĩman nẽẽ buúk ꞌthẽccan.”

Aggatan Yeesu lõhõlĩ ꞌcĩg kidicig

(Tigiil Maatteeo 19:13-15; ꞌLuuka 18:15-17)

13Baa aꞌnyahaak eeta Yeesu lõhõlĩ ꞌcĩg kidicig, hátĩ hikia haggatan ĩhõõggõ, hataadĩk athĩn cĩgĩnnĩg eleetinii cĩggĩĩng. Au hinnia eggerꞌnyeek nuyyiooha eet thõng. 14Ma baa õrõõta Yeesu thõõth icci ho, ikia ĩlĩĩlĩ nẽẽ nẽ ĩĩnnĩk nuyyiook, “Aanytĩk lõhõlĩ hiita hĩ nganĩĩta, ma halaammu ĩhõõggõ, hĩnĩngĩtĩ adiim habuccieet cĩ Nyekuci eet ꞌcĩg aattĩg hĩ lohollia cieegi. 15Haduhaakuung naa ngagiit thõõth dĩdĩ, má hõllõngaa ẽlẽmĩ ẽẽtĩ habuccieet cĩ Nyekuci haau hĩcĩ ẽlẽmĩ loholeec ꞌcĩ hidiciẽẽnĩ, aitiõõ hatĩ hõllõngaa aduhun nẽẽ habuccieet cĩ Nyekuci ũdũt.” 16Ma nĩngaata, arabũũt Yeesu lõhõlĩ athĩnĩĩ cĩgĩnnĩg nẽ ataadĩk athĩn ootinii cĩggĩĩng, nĩngĩtĩ aggatanĩ ĩhõõggõ.

Eet ꞌcĩ aballi

(Tigiil Maatteeo 19:16-30; ꞌLuuka 18:18-30)

17Ma baa iꞌthianaaĩ Yeesu weet, avvira hinnia ẽẽtĩ umwaa hikia hakat huruꞌnyia muumaa cĩnnĩ nẽ ĩĩnnĩk, “ꞌLimmannioohit ꞌcĩ abũnnaa, hadĩmani occa naa hutuno, hátĩ hũmmũda rũgẽt ꞌcĩ aalla ooo?”

18Ẽdẽcĩ hinnia Yeesu ĩnõõnnõ anneek, “Aũyyaa nii nganĩĩt anneeka habũnnaa inni? Aitiõõ ẽẽtĩ ꞌcĩ abũnnaa tõõ, Nyekuc dioo ꞌcĩ abũnnaa. 19Aga nii tilooinit ꞌcĩ aĩ, ma haruhi, ma hattihi ngaa cĩ eet umwa, ma hĩgõrꞌthĩ, ma haddangaahi, ma higgooli, tingõlĩ maaꞌnyu hĩ ngaanu?”#Tigiil ꞌBuuk cĩ Luugithõõ 20:12; Ditoronomi 5:16-20

20Ma ho, ẽdẽc ẽẽtĩ nicciee Yeesu anneek, “ꞌLimmannioohit, baa hũꞌthũũtĩ naa tilooinit icci ẽlẽk nganĩngĩtĩ halĩꞌthaanĩ.”

21Nĩngĩtĩ akannĩ Yeesu ĩnõõnnõ hẽbẽrĩ jurrung mĩnnaniitta nẽ ĩĩnnĩk, “Adiimi nii ꞌgii hõdẽẽthõng diooni ꞌcĩ nga uunnihi niina. Bĩĩt tũũõĩ hẽlẽggĩ vẽlẽk ꞌcĩg aꞌnyahi niina nẽ eꞌngereehu ꞌrabbẽẽt tĩko eet ꞌcĩg ĩĩn hullaha, nẽẽthĩ hátĩ aꞌnyahu baliinit cunni hẽẽtahujjieen nẽ õbõda ikia ũnũa nganĩĩta.”

22Ma baa athĩhĩ ẽẽtĩ nicciee thõõth icci ho, uꞌngurruunyi muum cĩnnĩ nẽ ũtũhũĩ ũũk mothiitta, hĩnĩngĩtĩ baa aballi nẽẽ gẽrrẽẽt.

23Ma ho, ubbuud Yeesu looc nẽ ĩĩnnĩk nuyyiook cĩgĩnnĩg, “Õkõmĩ gẽrrẽẽt ngaatĩ adukni balliooha habuccieet cĩ Nyekuci!”

24Ma nĩngaata, iita aꞌngalilli nuyyiooha, hĩnĩngĩtĩ thõõth cĩnnĩ ho gẽrrẽẽt. Ma ho, õthõõth Yeesu tarĩ ĩĩ, “Lõhõlẽẽtĩg, õkõmĩ gẽrrẽẽt ngaatĩ adukni ẽẽtĩ habuccieet cĩ Nyekuci! 25Ammũjĩ ngaatĩ occa adukni nyaakaalĩ hutuli cĩ lĩbbĩraaõ hĩllõõan ngaatĩ occa adukni ẽẽtĩ ꞌcĩ aballi habuccieet cĩ Nyekuci.”

26Baa nẽ ikia ubulan nuyyiook thõõth ciee gẽrrẽẽt hĩllõõan. Nĩngĩtĩ ajinõõnĩ nẽẽg ẽmmẽn aĩnnĩ, “Ma aaĩ thõõth ciee hoti, nẽẽthĩ occa hatĩ ĩĩ nganĩ ꞌcĩ eelliaa ho?”

27Ẽggẽlẽẽm hinnia Yeesu nuyyiook nẽ ĩĩnnĩk, “Õkõmĩ thõõth ciee hĩ eeta, nẽẽthĩ, aitiõõ ꞌgii ꞌcĩ aꞌnyaman Nyekuc tõõ, hĩnĩngĩtĩ ammũjĩ hẽlẽggĩ vẽlẽk hĩ ĩnõõnnõ.”

28Ma baa ho, ẽdẽc Pẽẽtũrũ ĩnõõnnõ ĩĩnnĩk, “Cĩĩn nõõ, má ngagĩĩt baag hũtũngteeha hẽlẽggĩ vẽlẽk nẽ hunuyyi nganiit ko?”

29Ẽdẽcĩ Yeesu ĩhõõggõ anneek, “Haduhaakuung dĩdĩ, má ũũnnĩk eet umwaa õlõ cĩnnĩ, hĩ ngõõnõgĩ, hĩ ꞌgõtõõnõgĩ, hĩ maaꞌnyĩ hode hĩ aattĩnnĩ, hĩ lõhõlĩ hode hĩ manẽẽn, hĩnĩngĩtĩ nganĩĩt hĩ nyeemuut ꞌcĩ abũnnaa, 30ammũda hatĩ nẽẽ ꞌbaaninit tabattĩ ꞌmiia hõdẽĩ, ammũda hatĩ manẽẽn hĩ ꞌgõtõõnõgĩ hĩ ngõõnõgĩ hĩ ngaaggi hĩ lõhõlĩ hĩ manẽẽna, tananga hũmmũda hatĩ nẽẽ pĩĩrnanĩt buúk nẽ urutaa cĩ daahĩthõõ aku hatĩ ammũda nẽẽ rũgẽt ꞌcĩ alla ooo. 31Nẽẽthĩ, eeta ꞌcĩg mẽẽlĩg ꞌcĩg ĩĩn ꞌyioko eet ꞌcĩg oou, au hatĩ ĩĩn eet ꞌcĩg adtuurna nẽ ꞌcĩg mẽẽlĩg ꞌcĩg adtuurna ꞌyioko ho, au hatĩ ĩĩn eet ꞌcĩg oou.”

Õthõõth Yeesu thõõth cĩ daahĩth cĩnnĩ tarĩ

(Tigiil Maatteeo 20:17-19; ꞌLuuka 18:31-34)

32Baa uwwattĩ Yeesu ẽdẽcĩ ꞌgõõl hĩ nuyyiook cĩgĩnnĩg õõ ĩĩcĩ ꞌJeruꞌthalẽmĩ. Nẽ baa abulan nuyyiook thõõth ꞌcĩ õkõõĩ Yeesu ꞌJeruꞌthalẽma ho gẽrrẽẽt, nĩngĩtĩ abarti eeta ꞌcĩg anũa ĩhõõggõ uruta buúk. Ma nĩngaata tarĩ, ũũhĩ nẽẽ nuyyiook ꞌcĩg ĩĩn õmmõtõ hĩ ꞌramma ho ngadiiha nẽ ũũk uduhaak thooꞌthiok ꞌcĩg hatĩ õõ edeeꞌnyiak ĩnõõnnõ ꞌJeruꞌthalẽma. 33Baa aduhaak nẽẽ nuyyiook anneek, “Ĩthĩktõ, hõõ ꞌyioko naag ꞌJeruꞌthalẽma, ngaatĩ hatĩ õkõ õhõppõõcanõõthĩkĩ Ngeertĩ Eeto makayyiook cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha. Etteedĩk hatĩ nẽẽg ĩnõõnnõ daahĩth nẽ aanytĩk eet ꞌcĩg hõllõngaa ĩĩn ꞌJudeei, 34ꞌcĩg hatĩ õõ õdõõm ĩnõõnnõ nẽ uttuurrik ammũt nẽ uukito nẽ õõt uruhit hadaak thõng. Ma hatĩ urutaa cĩ waathinniook iyyio, arũgna hatĩ nẽẽ daahĩtha.”

Jinẽẽnĩt cĩ ꞌJeemithi hĩ cĩ Yõaannẽ

(Tigiil Maatteeo 20:20-28)

35Baa au lohollia cĩg ꞌThebedeeo ꞌJeemithi hĩ Yõaannẽ ammũdaak Yeesu nẽ ijinit ĩnõõnnõ ĩĩttĩk, “ꞌLimmannioohit, hadiimmi naag nganiit dticcaneeheet ꞌgiimwa ꞌcĩ hajinni nganiita.”

36Ma ho, ijin Yeesu ĩhõõggõ ĩĩnnĩk, “Atabbu niig hĩ nganĩĩt neegi?”

37Ẽdẽcĩ nẽẽg Yeesu anneek, “Aaꞌnyeet ngagĩĩt haau umwaa attiaa cunni ĩcobbi nẽ aau umwaa ĩĩcĩ aꞌthiit ꞌcĩ hidici bulẽẽttaa cĩ makaaꞌthĩt cunni.”

38Ma nĩngaata, uduhaak Yeesu ĩhõõggõ ĩĩnnĩk, aitiõõ niig hõllõngaa agayyu ꞌgii ꞌcĩ ajinnu niig ko. Occa ũũlũyyu niig ngaatĩ ahuddu hooppo cĩ ꞌcannan ꞌcĩ hatĩ hahudi naa ho, hode occa aggammu baattithimo hĩcĩ hatĩ haggami naa ho?

39Nĩngĩtĩ ẽdẽcĩ ꞌJeemithi hĩ Yõaannẽ aĩnnĩ, “Eeĩ, occa haggamma.”

Ma ho, uduhaak Yeesu ĩhõõggõ ĩĩnnĩk, “Abũnnaa, ahũdeennu hatĩ niig hooppoa ꞌcĩ hatĩ hahũdẽẽnĩ naana nẽ hatĩ aggamtu baattithimo ꞌcĩ haggami naana. 40Nẽẽthĩ, aitiõõ naa hõllõngaa haꞌnyahi makaaꞌthĩt ꞌcĩ occa hẽbẽraanĩ eet ꞌcĩ occa aaĩ ĩĩcĩ aꞌthiit caannĩ cobbi, hode eet ꞌcĩ occa aaĩ ĩĩcĩ aꞌthiit caannĩ ꞌcĩ hidici. Aꞌnyahit dtaabĩta cieeg eet ꞌcĩg eberria ẽlẽk nẽ Nyekuc dioo ꞌcĩ ẽbẽra ho.”

41Ma baa athĩhĩ nuyyiooha ꞌcĩg ĩĩn õmmõtõ ho thõõth icci ho, iita iliiliyyieek nẽẽg ꞌJeemith hĩ Yõaannẽ. 42Nĩngĩtĩ avvaanĩ Yeesu ĩhõõggõ vẽlẽk hõdẽĩ nẽ ĩĩnnĩk, “Agayyu niig habuẽẽtĩĩ ꞌcĩg eet ꞌcĩg hõllõngaa ĩĩn ꞌJudeei, arratan nẽẽg eet cĩggĩĩng nẽ aanytĩk makayyiooha cĩggĩĩng makaaꞌthĩt cĩnĩĩng hagaĩ. 43Ma haaꞌnyiku thõõth icci haau hõrggẽẽnaa cunuung. Nẽ ma adiim ẽẽtĩ umwaa ĩĩn makayyioohit cunuung, aꞌnyĩĩk ĩnõõnnõ hĩĩ dticciannioohit cĩ ꞌgõõnõgĩ vẽlẽk, 44nẽ ma adiim ẽẽtĩ umwaa uwwattẽẽkĩ ꞌgõõnõgĩ, aꞌnyĩĩk nõõ hĩĩ appahaca cĩ eet vẽlẽk. 45Hĩnĩngĩtĩ baa hõllõngaa aku Ngeertĩ Eeto loota nĩnga, hiita hidticattoothĩk eeta, baa aku nẽẽ, hátĩ hidticanoothĩk eet nẽ aaꞌnyĩk rũgẽt cĩnnĩ hẽẽlaĩĩ eet vẽlẽk.”

Aaꞌnyĩk Yeesu Bartimeeo hĩcĩnĩ

(Tigiil Maatteeo 20:29-34; ꞌLuuka 18:35-43)

46Baa iita õdõlanit Yeesu hĩ nuyyiook cĩgĩnnĩg ꞌJeriko. Ma baa ĩtĩngaacõ nẽẽ hĩ nuyyiook cĩgĩnnĩg hĩ lothippit ꞌcĩ baa arũmĩ hĩ ĩnõõnnõ ũtũngteek ꞌJeriko, õõt ummuddioothĩk rubenniaahit umwa ꞌcĩ haĩ Bartimeeo ngeertĩ eet ꞌcĩ haĩ Timeeo, iccioloongan ꞌgõõla ngadiiha ala eet. 47Ma baa athĩhĩ nẽẽ aĩ Yeesu cĩ Naaꞌtharẽtĩ ꞌcĩ õkõ ho, iꞌthianaaĩ ũtũvvõ moloohaa cobbi ĩĩ, “Yeesu! Ngeertĩ Daavide,#10:47 Ngeertĩ Daavide: Baa aga eeta cĩg ꞌJudeei ngaatĩ hatĩ aku arrittiaanĩ Krĩstõ hattũũgaa cĩ habu Daavide. Tigiil ꞌBuuk cĩ ĩĩn 1 cĩ Thamueele 16:1-13; Tegellwaanu 132:11-12. tamaatĩhaa nganĩĩta!”

48Baa eggerenyeek hinnia eeta ꞌcĩg mẽẽlĩg ĩnõõnnõ anneek, “ꞌJaahõ!” Nẽ baa aalla avvĩ Bartimeeo moloohaa cobbi gẽrrẽẽt noho aĩ, “Ngeertĩ Daavide, tamaatĩhaa nganĩĩta!”

49Ma ho, ĩbĩl Yeesu nẽ uduhaak eet ĩĩnnĩk, “Utuvuyyia da ho ĩnõõnnõ hikia ngaati.” Ma ho, utuvvuyyia eeta rubenniaahit ĩĩttĩk, “Talõ, tĩnga ꞌjieena, avvĩyyĩ Yeesu nganiita.” 50Nĩngĩtĩ adhuhẽẽkĩ nẽẽ cẽrẽm ꞌcĩ ahimit ẽllaa cĩnnĩ ngadiiha nẽ ĩꞌngõth ꞌjieena ũũk hĩ Yeesu.

51Ma ho, ikia ijin Yeesu rubenniaahit ĩĩnnĩk, “Adiimi nii hadaki naa nganiit neegi?”

Ẽdẽcĩ nẽẽ Yeesu anneek, “ꞌLimmannioohit, hadiimi hacĩnĩ tarĩ.”

52Nĩngĩtĩ aduhaakĩ Yeesu ĩnõõnnõ annẽẽkĩ, “Bĩtõ, aaꞌnyi nganiit lemiiniti cunni bũna.” Ma hĩdĩĩkoothong ĩcĩnĩ nẽẽnĩ, nĩngĩtĩ ẽdẽcĩ ꞌgõõl anũõõꞌthĩ Yeesu.

Currently Selected:

Maarko 10: did

Highlight

Copy