Maarko 8
8
Itirok Yeesu eet aalibꞌnya ꞌwec
(Tigiil Maatteeo 15:32-39)
1Kõr umwa, ikia lothippiti cobbi umwaa tarĩ nẽ kõr tĩho, ũmmũdeek iittiõõ ꞌgẽẽn ꞌcĩ occa adak nẽẽg tõõ. Nĩngĩtĩ avvĩyyĩ Yeesu nuyyiook cĩgĩnnĩg nẽ ĩĩnnĩk, 2“Hammaannihi naa eet niccig gẽrrẽẽt, hĩnĩngĩtĩ hũrũmteea hĩ ĩhõõggõ waathinniook iyyio nẽ aitiõõ ꞌgẽẽn ꞌcĩ occa adak tõõ. 3Má hĩꞌthooihi naa ĩhõõggõ ꞌgõõl hõõt ĩĩcĩ olu nga hudukto, occa hinnia hatĩ awaalĩth ũgẽẽgĩ ꞌgõõla nẽ etteedito looc, hĩnĩngĩtĩ au nẽẽg ꞌrẽẽna gẽrrẽẽt.”
4Nĩngĩtĩ ẽdẽcĩ nuyyiooha cĩgĩnnĩg ko ĩnõõnnõ annẽẽkĩ, “Ningina occa hatĩ ngaatĩ õdõhõhĩĩ kak ko ꞌcĩ occa hammũdaanĩ ꞌgẽẽn ꞌcĩ ũũppan eet iccig vẽlẽk?”
5Nẽ ijin Yeesu ĩhõõggõ ĩĩnnĩk, “Aꞌnyaku niig ũbũnẽẽt thõng?”
Ẽdẽcĩ nẽẽg Yeesu anneek, “Haꞌnyaka ũbũnẽẽt tũkĩramma.”
6Ma ho, uduhaak nẽẽ lothippit haau loota. Nĩngĩtĩ aggamaanĩ ũbũnẽẽt ꞌcĩg ĩĩn tũkĩramma ho nẽ ĩĩnnĩk Nyekuc ĩlaallẽ nẽ appaha, nĩngĩtĩ aaꞌnyĩkĩ nuyyiook cĩgĩnnĩg heꞌngerrieek eeta. Baa nẽ ĩdĩmanit nuyyiooha hĩcĩ aduha nẽẽ ho. 7Nẽ tarĩ baa ammũdeek aꞌnyak nẽẽg ulugo ꞌcĩg abadtẽc buúk, nĩngĩtĩ aggatanĩ Yeesu ulugo niccig nẽ aaꞌnyĩk nuyyiook heꞌngerrieek eeta. 8Ma baa udukto eeta vẽlẽk hũũppattĩ, iita uluttia nuyyiooha thuruthur ꞌcĩg anyiꞌthiaa lohoddwa tũkĩramma ꞌcĩg abbĩꞌthĩĩ. 9Baa ĩĩn eeta vẽlẽk aalibꞌnya ꞌwec, nĩngĩtĩ ĩꞌthõõĩkĩ nẽẽ ĩhõõggõ ꞌgõõl hõõt. 10Ma hĩdĩĩkoothong, otodit nẽẽg hĩ nuyyiook cĩgĩnnĩg vẽlẽk haahũl, õõt ĩĩcĩ looc ꞌcĩ haĩ Dalmanutha.
Ajin Variꞌtheei thõõth ꞌcĩ ĩnaat eeta
(Tigiil Maatteeo 16:1-4)
11Ma baa ĩthĩhĩt Variꞌtheei aĩ õdõlan Yeesu, iita iꞌthiattaaĩ nẽẽg ẽppẽhattõõ hĩ ĩnõõnnõ. Baa attĩman nẽẽg ĩnõõnnõ hidtican thõõth ꞌcĩ ĩnaat eeta ꞌcĩ aku hẽẽtahujjieen, hẽtẽrẽtha makaaꞌthĩt cĩnnĩ. 12Baa õbõdẽẽkĩ Yeesu ꞌthĩnĩt gẽrrẽẽt nẽ õthõõth ĩĩ, “Inni gõõng eeta cĩg irkiꞌnyia iccig hijinit thõõth ꞌcĩ ĩnaat eeta ho? Haduhaakuung naa ngagiita, hõllõngaa hatĩ heterꞌtheehi eet iccig thõõth ꞌcĩ ĩnaat eeta ũdũt.” 13Ma ho, ũtũngeek nẽẽ eet niccig nẽ õtõd haahũl abaahĩ bũlũc ũũk dhoortaa cĩ baakitu.
Abũũla cĩg Variꞌtheei hĩ ꞌcĩg Ẽrõõdẽ
(Tigiil Maatteeo 16:5-12)
14Baa ataarriothĩ nuyyiooha ngaatĩ aꞌnyahaanĩ ũbũnẽẽt hĩĩ mẽẽlĩg, baa hinnia aꞌnyak ũbũnĩ hõdẽẽthõng dioo haahũlatõõ. 15Ma nĩngaata, uduhaak Yeesu ĩhõõggõ ĩĩnnĩk, “Ĩcĩnĩt jurrung nẽ aaut dĩkĩĩm, ĩĩtõ ꞌrẽẽttĩg hĩ abũũla cĩg Variꞌtheei hĩ cĩg Ẽrõõdẽ.”#8:15 Abũũla cĩg Variꞌtheei hĩ cĩg Ẽrõõdẽ: Adticaniini Yeesu abũũla huduhaaĩ thooꞌthiok ꞌcĩg abathĩ ꞌcĩg baag adĩmanĩ Variꞌtheei hĩ Ẽrõõdẽ eet ꞌbuth. Tigiil ꞌBuuk cĩ Maatteeo 16:12.
16Ma ho, othoothito nuyyiooha nyaagwaana ĩĩtõ, “Õthõõth Yeesu hoti, hĩnĩngĩtĩ hõllõngaa haꞌnyak naag ũbũnẽẽta.”
17Ma baa athĩhĩ Yeesu thõõth ꞌcĩ õthõõth nẽẽg ko, ikia ijin ĩhõõggõ ĩĩnnĩk, “Inni othoothit thõõth ꞌcĩ aitiõõnnĩ ũbũnẽẽta tõõ ho? Nga nooyyia ĩcĩnĩt hode nga agaac niig thooꞌthiok cĩgannĩg? Nga aalla adĩĩtĩ ngagiit ooti nẽ nga okommuung ꞌthinneeti noho? 18Aꞌnyaku niig hẽbẽrĩ nẽ hõllõngaa acĩneennu. Aꞌnyaku ĩĩna nẽ hõllõngaa athĩkneennu. Nẽ hõllõngaa ammuhooꞌthu thooꞌthiok baag ĩnaat eeta buúk inni? 19Ma kõr baa hiroktĩ naa eet aalibꞌnya ꞌtur ũbũnẽẽtĩ ꞌcĩg ĩĩn ꞌtur, ĩĩn nooyyia baa lohoddwaana ꞌcĩg alũtaannu niig ꞌcĩg ũbũnẽẽt ꞌcĩg anyiꞌthiaa thõng?”
Ẽdẽcĩ nẽẽg aĩ, “Ĩĩn õmmõtõ hĩ ꞌramma.”
20“Nẽ hĩ baa happahĩ naa ũbũnẽẽt tũkĩramma nẽ heꞌngereeha eet aalibꞌnya ꞌwec, ĩĩn nooyyia lohoddwaana ꞌcĩg abbĩꞌthĩĩ ꞌcĩg thuruthur ꞌcĩg alũtaannu niig thõng?”
Ẽdẽcĩ nẽẽg aĩ, “Ĩĩn tũkĩramma.”
21Nĩngĩtĩ ajini Yeesu ĩhõõggõ annẽẽkĩ, “Nẽ ẽrẽhaauung hutuno?”
Aaꞌnyĩk Yeesu rubenniaahit hĩcĩnĩ
22Ma baa iita nẽẽg ĩꞌthõng Beꞌthaida, iita aꞌnyaktaak eeta ũgẽẽgĩ Yeesu eet umwa ꞌcĩ rubenĩ nẽ iita alaacõ ĩnõõnnõ huhum eet nicci. 23Ma nĩngaata, ikia aggam Yeesu aꞌthiit cĩ rubenniookto ho nẽ ũũhĩ ĩnõõnnõ battaalaa cĩ olu. Nĩngĩtĩ õkõ attũũrĩkĩ ĩnõõnnõ ammũt hẽbẽrẽẽnnĩĩ cĩgĩnnĩg nẽ ataadĩk athĩn cĩgĩnnĩg ẽllaa cĩ rubenniookto nẽ ijin ĩnõõnnõ ĩĩnnĩk, “Occa icinu ꞌgiimwa?”
24Ma ho, ĩcĩnõõthĩ ẽẽtĩ hẽẽtkujjieen nẽ ĩĩ, “Eeĩ, hacini eeta, hacini aattĩg hĩ hẽẽna ꞌcĩg õvvõ thõng.”
25Ma nĩngaata, ataadĩk Yeesu ĩnõõnnõ athĩn hẽbẽrẽẽnnĩ tarĩ. Ma ngaati, ĩcĩnĩ ẽẽtĩ lõꞌngõõc, hĩnĩngĩtĩ ũbũttaathõ hẽbẽrĩ nẽ ĩcĩn hẽlẽggĩ vẽlẽk jurrung. 26Nĩngĩtĩ ĩꞌthõõĩkĩ Yeesu ĩnõõnnõ ꞌgõõl hũũk ĩĩcĩ õlõ cĩnnĩ nẽ uduhaak ĩĩnnĩk, “Ma nga hobodoothi hõkõ ꞌtaaũna tarĩ.”
Lemiinit cĩ Pẽẽtũrũ
(Tigiil Maatteeo 16:13-20; ꞌLuuka 9:18-21)
27Baa õõ õvvõõĩ Yeesu hĩ nuyyiook cĩgĩnnĩg olooyyiok ꞌcĩg õbõhõõ hĩ ꞌtaaũn ꞌcĩ haĩ Caetharea Pilippi. Ma ꞌgõõla, ijin Yeesu nuyyiook cĩgĩnnĩg ĩĩnnĩk, “Aĩ ꞌthẽk eeta nganĩĩt nganĩ naa?”
28Ẽdẽcĩ nẽẽg aĩ, “Aĩ eeta, ĩĩnĩ nii Yõaannẽ Batitta, aĩ ũgẽẽgĩ, ĩĩnĩ nii Eliijja nẽ tarĩ, ĩĩtõ ũgẽẽgĩ, ĩĩnĩ nii põrõvẽtaac umwa.”
29Nẽ ijin Yeesu ĩhõõggõ tarĩ ĩĩnnĩk, “Ma ꞌthẽk niig dẽẽdẽ, ainnu nganĩ naa?”
Ẽdẽcĩ Pẽẽtũrũ aĩ, “Ĩĩnĩ nii Krĩstõ.”
30Nĩngĩtĩ aduhaakĩ Yeesu ĩhõõggõ komiitta annẽẽkĩ, “Ma happulanaannangu.”
Õthõõth Yeesu thõõth cĩ daahĩth cĩnnĩ
(Tigiil Maatteeo 16:21-28; ꞌLuuka 9:22-27)
31Ma nĩngaata, iꞌthianaaĩ Yeesu illiman nuyyiook ĩĩnnĩk, “Ammũda hatĩ Ngeertĩ Eeto ꞌcannan cobbi gẽrrẽẽt nẽ abũrĩ hatĩ makayyiooha cĩg eetuk hĩ makayyiook cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha ĩnõõnnõ. Aruhi hatĩ nẽẽ hadaak nẽ ũrũga tarĩ, urutaa cĩ waathinniook iyyio.” 32Baa aduha nẽẽ thõõth icci cũrũmũũm hẽbẽrẽẽnnĩĩ cĩg eetuk vẽlẽk. Ma ho, ikia ũũhĩ Pẽẽtũrũ Yeesu ngadiiha nẽ ũũk eggerenyeek ĩnõõnnõ.
33Ma nĩngaata, ubbuudõthĩ Yeesu nuyyiook cĩgĩnnĩg nẽ eggerꞌnyeek Pẽẽtũrũ ĩĩnnĩk, “Ĩĩnĩ nii ꞌThĩttaan! Bĩĩt ĩĩcĩ bahuc caannĩ.” Nẽ tarĩ ĩĩnnĩk, “Ĩĩn muhẽẽnĩtĩ cunni muhẽẽnĩt cĩ eeto haaga, hõllõngaa ĩĩn cĩ Nyekuci.”
34Nĩngĩtĩ avvaanĩ Yeesu lothippit hĩ nuyyiook cĩgĩnnĩg hummuddiaak ĩnõõnnõ nẽ uduhaak ĩhõõggõ ĩĩnnĩk, “Má adiim eet umwaa ĩĩn nuyyioohit caannĩ, aꞌnyĩĩk ĩnõõnnõ hũtũbũr ẽlẽ cĩnnĩ nẽ irriongan hurucce#8:34 Hurucce: Baa aruk eeta cĩg ꞌRooma eet hadaahito ꞌgõõlaa ꞌcĩ õdõõddĩkĩ hurucciẽẽtĩĩ ꞌcĩg adĩmannia iggioolĩnĩ. Adaahĩ eeta daahĩth ꞌcĩ aku hĩdĩĩc hĩdĩĩc nẽ ahuci gẽrrẽẽt. cĩnnĩ nẽ ũnũa nganĩĩta. 35Má adiim ẽẽtĩ umwaa ẽẽla rũgẽt cĩnnĩ, adhuheek hatĩ nẽẽ rũgẽt cĩnnĩ ho tuu nẽ ẽẽtĩ ꞌcĩ adhuheek rũgẽt cĩnnĩ tuu, hĩnĩngĩtĩ nganĩĩt hĩ nyeemuut ꞌcĩ abũnnaa, ẽẽla hatĩ nẽẽ rũgẽt cĩnnĩ. 36Ne ꞌcĩ occa abũnnaa ꞌcĩ ammũda ẽẽtĩ, hatĩ aꞌnyak hẽlẽggĩ cĩg looc nicci vẽlẽk nẽ iꞌnginõõthĩ lorii cĩnnẽẽnĩ? 37Ne ꞌcĩ occa ataalõnĩ ẽẽtĩ hĩ lori cĩnnĩ? 38Má aꞌngaaõn ẽẽtĩ umwaa, hĩnĩngĩtĩ nganĩĩt hĩ ꞌlimman caannĩ waathinnioohĩĩ cĩg eet cĩg attihi eeta ngaaĩ cĩg eetuk hĩ waathinnioohĩ ꞌcĩg ĩĩnnĩ eeta ꞌthẽccanniook ko, aꞌngaaõn hatĩ Ngeertĩ Eeto buúk, hĩnĩngĩtĩ eet tĩho, hatĩ õbõda nẽẽ bulẽẽttaa cĩ Maacõnĩ, hatĩ ookorria hĩ aajĩlẽẽt ꞌcĩg ẽllẽẽmĩthĩ.”
Currently Selected:
Maarko 8: did
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
