Саалтыр 17
17
1Хуор салайааччытыгар. Айыы Тойон Давиды өстөөхтөрүттэн уонна Саултан быыһаабытыгар,
Айыы Тойон кулута Давид бу ырыаны Айыы Тойоҥҥо ыллаабыта. Кини эппитэ:
2Таптыыбын Эйигин, Айыы Тойон, мин күүһүм-тирэҕим!
3 Айыы Тойон – мин туруук таас хайам,
мин кириэппэһим, Өрүһүйээччим.
Айыы Таҥарам – хорҕойор очуоһум,
мин куйаҕым, Быыһааччым, суон дурдам.
4Уруйданар тосхоллоох Айыы Тойону ыҥырыам,
өстөөхтөрбүттэн мин быыһаныам.
5Өлөр өлүү муҥа миигин буулаабыта,
хара дьай халаана уолуһуппута.
6Үтүгэн түгэҕин быата-туһаҕа иилээбитэ,
иин илимэ миигин эрийбитэ.
7Кыһарҕаҥҥа түбэһэн, мин Айыы Тойону ыҥырбытым,
Таҥарабыттан көмө көрдөһөн үөгүлээбитим.
Кини Бэйэтин Дьиэтиттэн мин саҥабын истибитэ,
мин үөгүлүүрүм Кини кулгааҕар тиийбитэ.
8Дьэ онно сир, дьигиһийэн, түөрэҥнэс буолбута,
хайалар, олохторо хамнаан, халбаҥнаан ылбыттара,
ол курдук Таҥара уора-кылына оргуйан турбута.
9Кини уоруттан буруо будулуйан тахсыбыта,
уоһуттан суостаах уот уһуурбута;
Киниттэн кыһыл чох кытыаста ыһыллыбыта.
10Халлааннары иҥнэри баттаан, Кини түһэн кэлбитэ,
халыҥ хараҥаҕа үктэммитэ.
11 Херувимнарга олорон көппүтэ,
тыал кынаттарыгар уйдарбыта.
12Хараҥаны таҥастыы бүрүммүтэ,
хара былыты тулатыгар сабыы быыстыы түһэриммитэ.
13Иннигэр иһэр туналхай сырдыктан,
Кини былыттарын курдаттаан,
тобурах тохтубута, кыһыл чох сардырҕас буолбута.
14Халлааннарга Айыы Тойон этиҥнии ньиргийбитэ,
Үрдүктэн Үрдүк Таҥара куолаһа иһиллибитэ,
Кини толону кытта уоттаах чоҕу куппута.
15Онтон оҕунан ытыалаан, кинилэри ыспыта,
чаҕылҕан бөҕөнөн дапсыырдаан, үрүө-тараа ыыппыта.
16 Айыы Тойон, Эн суостаах саҥаҥ сатарыйбытыгар,
Эн уоруҥ буркун буолан бураллыбытыгар,
уу төрдө үрүлүйэн көстүбүтэ,
аан дойду акылаата аҥайа арыллыбыта.
17Кини, үөһэттэн илиитин уунан, миигин тардан ылбыта,
дириҥ ууттан ороон таһаарбыта.
18Кини миигин суостаах өстөөхпүттэн,
күүстэринэн сабырыйар абааһы көрөөччүлэртэн өрүһүйбүтэ;
19Күчүмэҕэй күммэр күөнтээбиттэрэ эрээри,
Айыы Тойон миигин өйөөбүтэ.
20Киэҥ дуолга Кини миигин таһаарбыта,
үтүө сыһыаннаах буолан быыһаабыта.
21 Айыы Тойон кырдьыкпынан көрөн төлөөбүтэ,
илиим ырааһынан көрөн биэрбитэ.
22Мин куруутун Айыы Тойон суолун тутуһарым,
Таҥарабыттан нэгэйдик тэйэ хаампатаҕым;
23Кини биир да кэриэһин умнубатаҕым,
уураахтарын туора уурбатаҕым.
24Кини иннигэр буруйа-сэмэтэ суох сылдьарым,
аньыыны оҥорортон туттунарым.
25Ол иһин Айыы Тойон, кырдьыкпынан көрөн,
илиим ырааһынан көрөн, миэхэ төлөөтө.
26Бэриниилээххэ Эн бэриниилээххин көрдөрөҕүн#17:26 Эбэтэр: Аһыныгаска Эн аһыныгаскын көрдөрөҕүн. ,
эҥкилэ суохха – эҥкилэ суоххун;
27ырааска – ырааскын көрдөрөҕүн,
уодаһыннаахха – албастааххын.
28Сэмэйдэри Эн быыһаан ылаҕын,
оттон улахамсыктары намтатаҕын.
29Мин сибэтиинньикпин Эн уматаҕын;
Айыы Тойон Таҥарам хараҥабын сырдатар.
30Эйигин кытта мин өстөөх сэриитин үлтүрүтэбин,
Таҥарабын кытта куорат эркинин ылабын.
31Таҥара! – Кини суола-ииһэ эҥкилэ суох,
Айыы Тойон тыла эрэбил;
Киниэхэ эрэнээччигэ барытыгар Кини куйах буолар.
32Ким баарый Таҥара – Айыы Тойонтон ураты?
Ким баарый биһигини көмүскүөх – Таҥарабытыттан ураты?
33Таҥара миигин, сылайбат сындааһыннаан,
көнө суолунан сырытыннарар.
34Кини миигин, таба курдук быһый оҥорон,
үрдүк очумаастары дабайтарар;
35Кини сэриилэһэргэ үөрэтэн,
мин алтан ох саа кирсин тардабын.
36Эн миэхэ быыһабыллаах куйаххын туттардыҥ,
уҥа илиигинэн миигин өйөөтүҥ,
Эн көмөҥ миигин улуу оҥордо.
37Хардыылыырбар Эн миэхэ киэҥ сири биэрдиҥ,
ол иһин мин халты тэбиммэтим.
38Өстөөхтөрбүн, эккирэтэн, ситэ баттаан ыллым,
итиэннэ, имнэри эһиэхпэр диэри, төннүбэтим.
39Мин кинилэри турбаттыы сууһараммын,
атаҕым анныгар сууллаллар,
40ол курдук Эн миэхэ сэриилэһэр күүс уктуҥ,
утарсааччыларбын атаҕым анныгар охтордуҥ.
41Өстөөхтөрүм тыылларын миэхэ аһан биэрдиҥ,
онон миигин абааһы көрөөччүлэри мин суох оҥордум.
42Көмө көрдөһөн үөгүлэспиттэрэ да, ким да быыһаабата,
Айыы Тойону ыҥырбыттара да, Кини хардарбата.
43Кумаҕы тыалга ыһардыы, мин кинилэри күдэҥҥэ көтүттүм,
уулусса бадарааныныы илдьи тэбистим.
44Эн миигин норуот өрө туруутуттан өрүһүйдүҥ,
туора уустар тойоннорунан туруордуҥ;
урут билбэтэх дьонум миэхэ үлэлииллэр;
45сурахпын истиэхтэрэ эрэ кэрэх, бас бэринэллэр,
туора омуктар илин-кэлин түһэллэр;
46кинилэр, эр санааларын ыһыктаннар,
кириэппэстэриттэн салыбырас буолан тахсаллар.
47 Айыы Тойон тыыннаах, мин көмүскээччим алгыстаах!
Айхаллана туруохтун быыһабыллаах Таҥарам,
48мин туспар иэстэһэр,
миэхэ норуоттары бас бэриннэрэр Айыы Таҥара,
49өстөөхтөрбүттэн өрүһүйээччи.
Эн миигин утарсааччыларбынааҕар үрдэттиҥ,
суостаах киһиттэн өрүһүйдүҥ.
50 Айыы Тойон, мин омуктар ортолоругар Эйигин уруйдуом,
Эн ааккын айхаллаан ыллыам.
51Улуу кыайыылары Эн ыраахтааҕыгар биэрэҕин,
бүрүстүөлгэ олордубут Давидкар уонна кини удьуордарыгар
үйэттэн үйэҕэ бигэ тапталгын көрдөрөҕүн.
Currently Selected:
Саалтыр 17: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
