Саалтыр 18
18
1Хуор салайааччытыгар. Давид псалома.
2Таҥара кэрэмэн килбиэнин мэҥэ халлаан кэрэһилиир,
Кини ураннаан оҥорбутун улуу куйаар туоһулуур.
3Күн күҥҥэ ону сэһэргиир,
түүн түүннүүн билиитин үллэстэр.
4Тыла-дорҕооно суох кинилэр кэпсииллэр,
саҥалара-иҥэлэрэ иһиллибэт#18:4 Эбэтэр: кинилэр саҥалара иһиллибэтэх ханнык да омук тыла, ханнык да түөлбэ тыла суох. ;
5ол эрэн, кинилэр этэллэрэ сири биир гына эҥсиллэр,
сир-халлаан сиксигэр тиийэ иһиллэр.
Халлааҥҥа Таҥара күҥҥэ уораҕай туруорбут.
6Күтүөт уол хаппахчыттан тахсарыныы, күн эмиэ тахсан,
биэтэккэ тиийиэхтээх сүүрүк курдук үөрэр-көтөр.
7Халлаан биир саҕаҕыттан атын саҕаҕар кини тиийэр,
туох да саһар кыаҕа суох кини сыралҕаныттан.
8 Айыы Тойон Сокуона эҥкилэ суох ситэри,
куту-сүрү бөҕөргөтөр;
Айыы Тойон туоһулуур кырдьыга эрэбил,
кэнэни үөрэтэр;
9 Айыы Тойон ыйаахтара кырдьыктаахтар,
сүрэҕи үөрдэллэр;
Айыы Тойон кэриэстэрэ сырдыктар,
хараҕы сырдаталлар.
10 Айыы Тойонтон куттаныы ыраас,
үйэлэргэ барар.
Айыы Тойон дьүүлэ көнө,
барыта сөптөөх,
11кыһыл көмүстээҕэр,
элбэх ыраас көмүстээҕэр ордук баҕалаах,
ыҥырыа уйатыттан таммалыыр
мүөттээҕэр минньигэс.
12Кинилэри тутуһан, кулутуҥ бэйэтин харыстанар;
кинилэри тутуһуу улуу манньаҕа тиксэрэр.
13Ким сыыһатын барытын ситэн көрүнүөҕэй?
Оо, биллибэт-көстүбэт аньыыбыттан миигин ыраастаа;
14аньыыга-хараҕа баһыйтарбатым туһугар,
билэн туран буруйу оҥорорбун тохтот.
Оччоҕо мин туох да омсото суох буолуоҕум,
улуу буруйтан-суҥхаттан ырааһырыаҕым.
15Мин этэр тылым, саныыр санаам барыта
сүрэҕиҥ ортотунан Эйиэхэ киириэхтин, Айыы Тойон,
мин туруук таас хайам, мин Өрүһүйээччим.
Currently Selected:
Саалтыр 18: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
