Саалтыр 19
19
1Хуор салайааччытыгар. Давид псалома.
2Санаарҕабыллаах күҥҥэр эйигин Айыы Тойон иһиттин,
Иаков Таҥаратын аата эйигин көмүскээтин.
3Сибэтиэй Дьиэтиттэн Кини эйиэхэ көмө ыыттын,
Сион хайатыттан эйигин бөҕөргөттүн.
4Биэрбит бэлэххин-туһаххын барытын аҕыннын,
бүтүннүү умаппыт сиэртибэҕин үөрүүнэн ылыннын. Села
5Сүрэҕиҥ сөбүлүүрүн Таҥара эйиэхэ биэриэхтин,
бары баҕа санааҕын барытын толоруохтун.
6Биһиги, эн быыһанаҥҥын, өрөгөйдүү үөрүөхпүт,
былаахпытын Таҥарабыт аатыгар күөрэччи көтөҕүөхпүт.
Айыы Тойон толоруохтун эн бары көрдөһүүгүн.
7Билигин мин билэбин:
Айыы Тойон Бэйэтин ыраахтааҕытын быыһыаҕа;
уҥа илиитинэн кинини өрүһүйэн,
сибэтиэй халлааныттан хардарыаҕа.
8Сорох колесницатынан, сорох атынан күөн туттар,
оттон биһиги Айыы Тойон Таҥарабыт аатынан күөн туттабыт.
9Кинилэр, тирэхтэрин сүтэрэн, бүдүрүйэн охтуохтара,
оттон биһиги, сүһүөхпүтүн булунан, бигэтик туруохпут.
10 Айыы Тойон, ыраахтааҕыны быыһаа
уонна, Эйигин ыҥырдахпытына, биһигини иһит.
Currently Selected:
Саалтыр 19: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
