Саалтыр 16
16
1Давид үҥүүтэ.
Айыы Тойон, иһит мин кырдьыктаах дьыалабын,
болҕой үөгүлүүр саҥабын;
иһит Эйиэхэ үҥэрбин – мин сымыйаны эппэппин.
2Эйигиттэн көнө дьүүл миэхэ тосхойдун;
Эн хараҕыҥ кырдьыгы көрүөхтүн.
3Сүрэхпин тургутан көрөөрү, Эн миэхэ түүн кэлэн барбытыҥ,
миигин холоон көрөҥҥүн, тугу да булан ылбатаҕыҥ:
тылым-өһүм миэнэ санаабыттан атына суох.
4Күннээҕи дьыалабар-куолубар, Эн тылгын тутуһаммын,
күөмчүһүттэр суолларыттан мин дьалты туттарым.
5Мин өрүү Эн суолгунан сылдьарым,
биирдэ да бүдүрүйбэтэҕим#16:5 Былыргы гректии тылбааска: Бүдүрүйбэккэ, Эн суолгунан барарым курдук, хардыыбын чиҥэт. .
6Эйигин ыҥырабын, Эн миэхэ хардарыаҕыҥ, Айыы Таҥара;
кулгааххын миэхэ чугаһатан, мин этэрбин иһит.
7Сөҕүмэр бигэ тапталгын миэхэ көрдөр,
Эйигин дурда-хахха туттааччылары
Эн уҥа илиигэр утарсааччылартан Быыһааччы!
8Хараҕыҥ харатыныы, миигин харыстаа,
кынатыҥ хаххатыгар саһыар
9миигин үрэйэр өһөгөйдөөхтөртөн,
төгүрүйэн турар дууһам өстөөхтөрүттэн.
10Сүрэхтэрэ сыа буолан, аһынары умналлар,
бэрдимсийэн-үтүөмсүйэн саҥараллар.
11Ханна да барыыбыт, тулабытыгар сылдьаллар,
хара буорга тэпсээри, хас хардыыбытын манаһаллар.
12Хайа тардарга бэлэм хахай кыыллар курдуктар,
хахха сиргэ манаһар эдэр хахайдар курдуктар.
13Оо, тур, Айыы Тойон; утары туран, кинилэри самнартаа.
Кылыскынан быыһаа олохпун хара дьайдаахтартан,
14Бэйэҥ илиигинэн өрүһүй, Айыы Тойон, муҥур үйэлээхтэртэн,
ирээттэрин олохтон ылбахтаан хаалар бу дойду дьонноруттан.
Эн кинилэргэ хаһааммыккын истэрэ уйарынан сиэтиннэр,
уолаттарыгар эмиэ дэлэйдик бэристиннэр,
оҕолоругар эмиэ төһө эмэ ордоруохтуннар.
15Оттон мин, кырдьыгынан сылдьаммын, Эн сирэйгин көрүөҕүм;
уһуктан бараммын, Эн мөссүөҥҥүнэн дуоһуйуоҕум.
Currently Selected:
Саалтыр 16: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
