MARKA 6

Nazareth ah Jesu a deihkei uh

(Mat. 13.53-58; Luk. 4.16-30)

1Tuachi`n hua a kipan in apawt a, ama tenna gam ah a hungpai a, tualeh a nungjuite`n amah ajui ua. 2Tualeh khawlni a hunghih in, kikhopna inn ah thuhilh apanta a, tualeh mi tampi athu zate`n “Hipa`n hih thute khoia pan a amuh ahia? A kiang a pilna kipia bangpilna ahia? Akhut in hijahta a silthupi abawl bang chidan ahia? 3Hihpa Mari tapa Jakob, Jos, Juda leh Simon sanggampa, sing nasep sempa hilou amaw? A sanggamnute zong hihsan a ikiang ua om hilou ahi uh maw?” achi ua. Tuachi`n atung ah alungkim takei uhi.

4Hinanleh Jesu`n a kiang uah, “Jawlnei jaw ama gamsung leh ama inkuante lak leh ama insung ah chihlouh jahbawllouh in a omngai kei hi,” achi hi. #Jhn. 4.44.

5Mi damlou tamloute tung a akhut nga a adamsak chihlouh ngal hih gam ah sillamdang a bawlthei kei hi. 6Tualeh a gintatlouh jiak un lamdang asa mahmah hi. Tuachi`n khuate ah thu hilh in avak kawikawi hi.

Sawltak Sawmlehnihte sawlkhiatna

(Mat. 10.5-15; Luk. 9.1-6)

7Tualeh aman sawmlehnihte a kiangah a samkhawm a, nihnih in asawlkhia a, tualeh Dawininte tung a thuneihna zong apia hi. 8“Tualeh a khualjinna uah chiangkhut chihlouh bangmah, thungpite, tanghoute, leh akawng a dangka pualou ding in thu apia hi. 9Hinanleh khedap bulh unla, puan-ak nih keng kei un,” achi hi. 10Aman akiang uah, “Inn khatpeuh a na lutchiang un, huamun a na pawtkhiat masiah uh tua inn ah tung kinken un. 11Tualeh kuapeuhin ahung tunsaklouh ua, nathu uh zong a ngaihnuam kei uleh, tua a pan na pawtchiang un, amauh mawhpaihna dingin na kengtaw ua leivui thingkhia un. Adiktak in kung hilh ahi, vaihawmni chiangin tua khua thuak ding sang in Sodom leh Gomorrah thuak ding adan a omjaw ding!” achi hi. #Nst. 13.51. #Luk. 10.4-11.

12Tuachi`n amauh a pawtkhia ua mite kisik dingin thu ahilh uhi. 13Tualeh amauhte`n dawi tampi a notdok ua, damlou tampi sathau nuh in a damsak uhi. #Jkb. 5.14.

Baptispa Johan sihna

(Mat. 14.1-12; Luk. 9.7-9)

14Tualeh kumpi Herod in anaja a, amin athanta`k jiakin, “Baptispa Johan misi lak a kipan-a hung thoukik a! Huajiakin hih silbawltheihnate`n amah ah sem ahive,” achi hi. #Mat. 16.14; Mrk. 8.28; Luk. 9.19.

15Adangte`n, “Elijah ahi achi ua,”

Midangte`n, “Jawlnei ahi, Jawlneite lak a khat ahi,” achi ua.

16Hinanleh Herod in hihte ajaktak in, “Alu ka tansakpa Johan ahi ve! Misi lak a pan hung thoukik ahi!” achi hi. 17Herod in a sanggampa Philip zi Herodia a kitenpih tak jiakin Herodia jiakin mi asawl a, Johan a mansak a, ka`n in thong ah akhumta hi. #Luk. 3.19,20. 18Ajiak Johan in Herod kiangah, “Na sanggampa zi na kitenpih dan ngaina ahikei!” anachi hi.

19Tuajiakin Herodia in amah a mudah a thah a ut a, hinanleh a thatthei kei hi. 20Herod in Johan hi midiktat leh Siangthoutak ahi chih atheih jiakin a lau a, amah ana humhum a; athu ajak in a lungkham a, hinanleh kipaktak in a ngaikhia jel hi.

21Tuachi`n Herod in a pian ni-in ami thupite, galkap lamkai liante, Galili gam a miliante a ding a jahna ankuang aluilai in hun lemtang a hung omta a. 22Tualeh Herodia tanu a hunglut a, alam a, tualeh Herod leh a kiang a toute a kipaksakta a, kumpipa`n numei naupangnu kiangah, “Na deihdeih hung ngen in? Kung piading,” achi a. 23“Bang khatpeuh nung nget taphot, kungpia ding, ka gam kimkhat tan in zong chi in amahnu kiangah a kichiam hial hi!”

24Tuachi`n amahnu vapawt khia in anu kiangah, “Bang ka ngen dia?” chi`n ava dong a.

Tualeh amahnu`n, “Baptispa Johan lutang,” anachi hi.

25Kintakin kumpipa kiang ah hunglut in a kiangah, “Tu leh tuin Baptispa Johan lutang kuang khat in hungpia lechin ka ut!” chi-in a ngen a.

26Tuachi`n kumpipa a lungkham mahmah a, hinanleh a chiamsa ahihman in leh a kiang a toute jiakin a nial nuam kei a. 27Tuachi`n kumpipa`n athat ding in mikhat a sawlpai a, amah paiin thong sung a alu a vatanta a; 28a lutang kuang khat in a hungtawi a, numei naupang kiang ah apia a; tualeh numei naupangnu`n anu kiangah a piata hi. 29A nungjuite`n ajaktak un aluang avala ua, han ah avuita uhi.

Jesu`n mi sangnga avakna

(Mat. 14.13-21; Luk. 9.10-17; Jhn. 6.1-14)

30Tuachi`n sawltakte Jesu kiangah ahung kikhawm ua, a silbawlte jousiah uleh a thuhilhnate uh a hunghilh ua. 31Tualeh aman akiang uah, “Noumau guak in hungpai unla, munsip ah tomkhat hung khawlphot un,” achi a. Ajiak atung akuan ki phamat den ahihman in an nekna ding hun nasan amukei uhi. 32Tuachi`n amauhte gunkuang in munsip ah atuampai ta uhi.

33Hinanleh mipite`n apailai uh amu ua, mi tampi in amah athei ua, khuapite a pan keng in a hungtai ua, ana makhelh in a kiangah ahung paikhawm ua. 34Tualeh Jesu ahung pawtkhiat takin, mipi tampitak a muta a, chingtu bei belam bang ahihjiak un a hehpih mahmah a; tuachi`n thu ahilh panta hi. #Num. 27.17; 1 Kum. 22.17; 2 Kronk. 18.16; Ezk. 34.5; Mat. 9.36. 35Sun hun tamjaw ahung manzoh tak un, a nungjuite hungpaiin a kiangah, “Hih gamdai mun ahi a, hunlah a jekaita a; 36I kim a gamte leh khuate a vapai a nek ding aki leitheihna ding un amauhte sawlkhia in, tanghou nek ding bangmah lah aneingal kei ua,” achi ua.

37Hinanleh aman akiang uah, “Nou nek ding pia un,” chi`n adawng a.

Tualeh amauhte`n a kiang ah, “Tanghou makhai zanih man kava lei un nek ding ka pia ding uh maw?” achi ua.

38Hinanleh aman akiang uah, “Tanghou phel bangjah nanei ua? Pai unla va en un,” achi a.

Tualeh amau`n atheihtak un, “Phel nga leh ngasa nih,” achi ua.

39Tuachi`n aman akiang uah, mipite loupa tung a apawl pawl a tousak dingin amauhte thu apia hi. 40Tuachi`n amauh agual gual in jakhat khat bang sawmnga nga bangin atouta ua. 41Tualeh aman tanghou phelnga leh ngasa nih alakzoh in vanlam a entou a, gual ajawl a, tanghoute a balkham a, amai ua luisak dingin a nungjuite kiang ah apia a; tualeh ngasa nihte zong amauhte jousiah lak ah a homsakta hi. 42Tuachi`n amauhte`n aun un ane ua, avahchiatta uhi. 43Tualeh amau`n tanghou nente leh ngasa nente a luak ua, lawh sawmlehnih a dim hi. 44Tualeh tanghou nete pasal piching sangnga bang ahi uhi.

Jesu Tuipi tungah keng in apai

(Mat. 14.22-33; Jhn. 6.15-21)

45Jesu`n mipite a sawl khiat sungin a nungjuite galkhat lam Bethsaida khua a na mapai dingin gunkuang ah atousak pai hi. 46Tualeh amauhte tengteng a sawlkhiat khit in thumna neiding in mual ah apaita hi. 47Nitak a hunghih in, gunkuang tuipi laiah a omta a; amah guak in gam ah a om hi. 48Tuachi`n Jesu`n nungjuite huih in aleh lamlam a amut jiaka gunkuang hot a hahpan a pang amu a, khuavak kuan in amah tuipi tung ah keng a hungpaiin amau lam a hungjuan a, amau paisan suak asawm a. 49Tualeh a mauhte`n Tuipi tung a keng a pai amuhtak un, “Sikha khat hinteh!” achi ua, akikou khia ua. 50Amau`n amah amuchiat ua, abuaita uhi.

Hinanleh aman amauhte a houpihpai a, “Khamuang takin om un! Keimah ka hi. Laukei un!” achi hi. 51Tuakhit in amah gunkuang sung ah akiang uah akah a; huih a khawlta hi. Tuachi`n amauhte`n genzohlouh khop in lamdang asa mahmah uhi. 52A lungtangte uh atak jiakin amau`n tanghou a sil omte atheisiam nawn kei uhi.

Genesaret a Damnate

(Mat. 14.34-36)

53Amauhte a galkah khit un, Gennesaret gam a hungtung ua, tuamun ah gunkuang a khihta ua. 54Amauhte gunkuang a pat a hungpawt tak un, mipite`n amah a theipai ua. 55Tua gam kim tengteng ah atai ua, aom hi chih atheihtak un, damloute alupna pum in ahung jawng hial ua. 56Khuata hi`n khuapi hi`n ahihkeileh gam hitaleh a lutna taphot ah damloute van juakna mun bang ah alumsak ua, a puanmong bek khoihtheih a ngen ua. Tualeh a khoihkha taphot adam jel uhi.

Currently Selected:

MARKA 6: THKHBSI

Highlight

Copy