MARKA 5

Jesu`n Gerasinmi Khanin a damsakna

(Mat. 8.28-34; Luk. 8.26-39)

1Tuachi`n tuipi gal Garasin mite gam a hungtung ua. 2Tualeh gunkuang a pat ahung pawtkhiattak in, mi khat han a pat a hungpawt in amah anatuak pai a. 3Amah hanlak a teng ahi a; tualeh kuaman sikkhau nangawn in a hentheikei uhi. 4Kol bulh in sikkhau in anakanta ua; hinanleh sikkhaute a bottan a, kolte a botsia jel a, kuamah in a thujohkei uhi. 5Tualeh sun leh jan in mualte leh hante ah omjing in akikou a, suang in aki-at jel hi.

6Aman gamla tak a pat Jesu amuh tak in, tai in, a vabiata a, 7tualeh amah aw ngaihtak in a kikou a, “Jesu Pasian tungnung pen Tapa! nang leh ken bang ahia bawlding kaneih? Hung gimsak lou dingin Pasian min in kung ngen hi!” achi hi. 8Aman a kiangah, “Nang kha-nin, hihpa sung a pan hungpawt in!” ana chita a.

9Tuachi`n aman, “Na min bang ahia?” chi in adong a.

Tualeh aman a kiangah, “Ka min ahihleh ‘Nuai ahi,’ tampi ka hihjiak un!” achi a. 10Hua gam a kipan amauh sawlmanglou dingin a kiangah angen ngutngut a.

11Tualeh huasan ah mual pang ah vok tampi a om a. 12Tuachi`n dawininte jousiahin, “Vok sungah hungsawl in asung ua ka luttheihna ding un,” chi in a kiangah a ngen ua. 13Tuachi`n Jesu`n amauh thu apia a, tuachi`n Dawininte a pawtkhia ua, vok sungah alut ua; tualeh vokhonte sangnih bang ahi ua, vokhonte ken a pat in tuipilam juan in hahtai in a hungtai ua; tuilak ah a kialumta uhi.

14Tuachi`n vok chingte atai ua, hihthu khuapi leh gam teng ah ahilhta uhi. Tualeh bang sil hungtung ata chia en ding in mipite ahung taikhawm uhi. 15Tuachi`n amauhte Jesu kiang ah a hungpai ua, dawi-mat nuai khat paipa puan silh a, lungsim ngaina pua a anatou ahung mu ua; tuatakin alauta uhi. 16Tualeh amauhte`n dawimatpa tung a sil tundan leh vok omtan amauh anahilh ua.

17Tuachi`n amah tawh agam ua pat a pawtkhia dingin a ngenta uhi.

18Tualeh amah gunkuang sung a aluttak in, dawinin paipa in, “Nang tawh pai ka ut!” chi in a kianga om dingin a ngen a.

19Hinanleh Jesu`n a phalkei a, a kiangah, “Na inn ah, na lawite kiangah pai inla, Toupa`n nang a ding a silthupi ahung bawlsak dante leh, nang ahung hehpih dante vahilh in,” a chijawta hi.

20Tuachi`n a pai a, Jesu`n amah a ding a sil thupi a bawlsak dante Dekapoli khua ah a tangkoupih ta a, mi jousiahin lamdang asa mahmah uhi.

Jaira Tanu leh Numei sipawt Damna

(Mat. 9.8-26; Luk. 8.40-56)

21Jesu gunkuang a galkhat lam ahung tunkik takin mipi tamtak akiang ah ahung paikhawm ua, tualeh amah tuipi gei ah a om a. 22Tualeh ngaiin, kikhopna inn a vaihawmte lak a mikhat amin Jaira kichi a hungpai a, Jesu amuh takin a kengbul ah akhupbok a. 23“Ka tanu naupang nou asi dekdek a, ahung dam a, a hintheihna dingin, hungpai a atung a nakhut nga ding in kungngen hi!” chi`n, chitaktak in a ngen hi.

24Tuachi`n Jesu amah tawh apaita a, mipi tampi in ajui ua, aboh lutlut uhi.

25Tualeh Numei khat kum sawmlehnih sipawt a damlou aom a, 26Daktor tampi lak a pan sil tampi a nathuak in, aneih jousiah ana jangjouta a, hinanleh bangmah a phatuamkei a, a khawk jawsem a. 27Aman Jesu tanchin ajaktak in, anung ah mipi lak ah a hungpai a, apuan a khoih a. 28“Apuan maimai khoihkha lengzong ka dam ding hi,” chi`n a ngaihsun hi.

29Thakhat in asipawt pen akangta a; anatna adamta hi chih ataksa tungah akithei hi. 30Tualeh Jesu`n a sung a kipan in silbawltheihna apawt chih atheipai a, mipilak ah akihei kawikawi a, “Kua ahia ka puan khoih?” achi a.

31Hinanleh a nungjuite`n a kiangah, mipi in ahung phuk lutlut na mu vele, kua ahia hung khoih nachih, achi ua.

32Tualeh aman hua sil bawlnu muh sawm in adak kawikawi a. 33Hinanleh numeinu in atung a sil kibawl athei a, lau leh chitun kawm in a hungpai a, a maiah khupbok in, a kiangah thudik jousiah ahilhta hi. 34Tualeh aman amahnu kiang ah, “Tanu, na ginna in ahung damsakta hi, pai inla, na natna a kipan na dam tawntungta in,” achi hi.

35Aman hihbang a thu agen laiin, kikhopna inn a vaihawmpa inn a kipan mi a hungpai ua, “Na tanu asita ve, bangding a siapa buaisak nalai nahia?” a hungchi ua.

36Jesu`n hih thu ajaktak in, kikhopna inn a vaihawmpa kiang ah, “Lauken gingta mai in,” achi hi. 37Tualeh aman Peter leh Jakob leh Jakob sanggampa Johan chihlouh in amah ajuih uh aphal kei. 38Tuachi`n amah kikhopna inn a vaihawmpa inn ah a hungtung a, ana buai vengvung leh kap a na mau vengvungte amu a. 39A valut a akiang uah, “Bangding a kap a mau vengvung nahi ua? Naupangnu asi ahikei, a ihmu ahi!” achi hi.

40Tualeh amauhte`n amah a nuihsan ua, ahihhang in aman aun un a notkhia a, naupangnu nu leh pa leh a jawhpihte a paipih a, naupangnu omna ah alut ua. 41Tuachi`n aman naupang akhut in akai a akiang ah, “Talitha kumi,” achi a. Tuapen, “Nungaknou, thouin, kungchi hi!” chihna ahi.

42Tuachi`n Numei naupang a thoua a paipai ngal a, (amahnu kum sawmlehnih mi ahita a), tuatakin a mau`n lamdang asa mahmah uhi. 43Hinanleh aman akiang uah, hih kuamah in theikei heh achi tinten a, “Tualeh nek ding banghiam pia ding in, thu apia hi.”

Currently Selected:

MARKA 5: THKHBSI

Highlight

Copy