MARK 6

Jisu ta Najareth in Loulounoh ei

(Met 13:53–58; Luk 4:16–30)

1 # Met 13:53–58; Luk 4:16–30 Amah in ohchunnata sehsa che amah ramboom talla thlengsa; mahche aroi inkho amahta anjuihpei. 2#Mak 1:21; Met 7:28Che amah in sabat nia sinakok ah matheih amthronpei; che amah trongta aktheih ei in salungkhoua anroua insonsei, “Ramnata mah vachah i alohme? Jaknang lousingta aphahmeio? Jaknang salungkhouna thlouta akut a ammeio? 3#Met 11:6Mah i thingchal mii Meri asa kupa, Jems leh Joses mahche Judas leh Simon vaa an uhte khatkho amah asarva inihsoh inruuijou mii khanohme?” Cheva amlung amihaangpei. 4#Jon 4:44Che Jisu in ankuunga asonei, “Amah ramboom khop noh a, amah unao pasa ankaar akho, mahche ataploikuung khop noh a, ringraan inkho amahta injahnohsei.” 5#Mak 5:23; 7:32; 8:23Cheva amah in salungkhouna thlou mah khanna tlohnohsa, akna mii arouta anchunga akut jamma amthratei. 6#Met 9:35Che anmah in amilotnoh khanna alamveia salungkhousa. Che amah in khuu khuua matheih a sehsa.

Jisu in Aroi Somleinihta Amthlah ei

(Met 10:5–15; Luk 9:1–6)

7 # Met 10:1,5,7–11; Luk 9:1–5 # Luk 10:1 Che amah in somleinihta aongei, che innih innih a mathlah amthronpei, mahche ankuunga akseengnoh li manom ancheknatu akchek amneh amlannei. 8#Luk 10:4–11Che sungrolh inkhat khopta, tolkho, thongkho, khapatkho, baobehkho nannih in rapkheitla nansehna a jakhatkho phurh janoh tuta amah in akchaak ei; 9chuta kekhraangva chuungve che lungluut innih maruuinohve. 10Che amah in ankuunga asonei, “Amun khatta mathlah a nansehnohmiil, nannih in nantlungna innkhan amve 11#Met 10:14; Noon 13:51Che amun aktleitlei a nannihta nanisoongnoh eile, mahche nantrongta rungaidah eile, nannih in amunkhata nanmahlaia, nankehna uphulkha mathiimma mahve alamva trongirhna in anmahta indahna veitu.” 12#Met 11:1; Luk 9:6Chunna anmah in sehsei mahchuche miita rilthlengnatu trong anraanpei. 13#Jem 5:14Che anmah in khousaar tam aminom, khatkho akna miita thao antei in anmah in thraei.

Aklup John in Thi

(Met 14:1–12; Luk 9:7–9)

14 # Met 14:1–2; 16:14; 21:11; Mak 8:28; Luk 9:7–9,19 Kurung Herot in mahchu atheihpei; alamva Jisu akming inthangsa. Arouin anson, “Aklup John kha thinata ringsa; mah churella amah atuui makhei in achunga thlou atlohpei.” 15Chuta aktlei in anson, “Mah i Elijah.” Chela aktlei in anson, “Mah i Ringraan inkhat, amlui ringraan inkhat nangjim.” 16Chuta Herot in mahchu atheihlai amah in ason, “Keiin akang kitan John ta ringsa.” 17#Met 14:3–4; Luk 3:19–20Alamva Herot in mii mathlah a John ta amsuur, anao Philip akmei Herodia relna makaanga simma asih; alamva amahta apaalpi. 18Alamva John in akuunga ason, “Nangin ninao akmeita niloh i trongsuur in janoh.” 19#Met 14:5–12Che Herodia in akuunga atlohthlou rella indahsa, che athatja hangta that cheknohsa. 20#Met 21:26Alamva Herot in John ta trihsa, amah in John i akchim mahche akseeng mii ta arom, che amah in kalla asihpei, amah in akuungnata arungeih laiva, amah in khalmo inchoisa; che aroomthok nanga arungeih. 21Chuta Herot apokni a amah in kurung koolna mii, che phrangkiei, mahche Kalili na aklokeita buh doonnatu taancha thlengsa. 22Alamva Herodia asakumei in luut a laamsa, amah in Herot leh Rapkheina akthleng mii eita anril ampelpei; che kurung in kumei kuunga ason, “Jangmekhat slakho nangin nikditchu keinih chele, keiin kamlan uche.” 23Che amah in akuunga trongchet amlanpei, “Jangmekhat slakho nangin keinih chele, kamlan uche, kei kuruung huunna tangkhai slakho kamlan uche.” 24Che amah in apaalla inthruhsa, che anukuunga atihpei, “Jaknang pootta kinih usame?” Che anuin akuunga ason, “Aklup John vaa akang.” 25Che amah in innot a kak hanga kurung kuunga luutsa, che aruipei, “Keiin nikuunga kinihche mah chuvah intha a aklup John vaa akangta tarpeng chunga sih a kamlanro.” 26Che kuruungchu kaa ralla kilaalpeita insiirsa, chuta amah trongchet leh rapkheina mii anthleng in alamveia amah trongchu akuunga khoi indahsa. 27Che kak hanga kuruung in amah akngaak raalmiita amthlahpei che aklup John akangta thlennatu jathang amlanpei. Amah in sehsa che simnata akangchu atanpei. 28Che amah akangchu tarpeng chunga athlenpei, che kumeikuunga amlanpei; che kumei in anukuunga amlanpei. 29Aroi in mahchuta antheih in, anmah in thlengseia aruungchu anlohpei, che rusuunna anphuumpei.

Jisu In Mii Akpul Rangata Amsaak

(Met 14:13–21; Luk 9:10–17; Jon 6:1–14)

30 # Luk 9:10; Mak 3:20 Raangroi in Jisu kuunga inlengsei, che anmah in antlohthlou anaamteta akuunga ansonpei. 31Che amah in ankuunga asonei, “Nanroua houla intheihnanoh amunna seh a lai kak inngaivesa.” Alamva aktam in seh ei thlengei, che anmah in buh ansaakna tukho sangnohsei. 32#Met 14:13–21; Luk 9:11–17; Jon 6:5–13; Mak 8:1–10; Met 15:32–39Che anmah in mulia antak anroua houla intheihnoh na a sehsei. 33Ipekva miitam in anmah ansehnachu anmuhpei, che anmahta anrompei, cheva anmah in khuupii khuupiinata tlaanna sehsei, che anmahchung matsah a loutlungsei. 34#Met 9:36Amah in tuiipaal annaisoh miitam inlomma amuhpei, che amah in ankuunga arilvol hangsei, alamva anmahva sadamkem amnoh sadam nangjimsei; che amah in ankuunga khalmo tam matheih amthronpei. 35Che mahchu athil inva, aroi in thlenga akuunga ason, “Mah amun i houla intheihlou che pungi ipekva thilsa; 36mathlah eirosa anmah ramboomma che khuu khuu avella ansehche antaktu saakphu ste slakho leia ansaaknatu.” 37Chuta amah in ankuunga amsangei, “Saakphu ste ankuunga malaneive.” Che anmah in akuunga asonei, “Kannih in seh a denari reijanih chaangna tol kanleiche ansaaknatu ankuunga kamilan usame?” 38Che amah in ankuunga asonei, “Tol jikcha jaomang choume? Seh choulaia anve.” Che anmah in antuuklaia asonei, “Tol ranga leh nga innih.” 39Cheva anmah in loom loom veia meiphulchung inboknatu annaamta jathang amlanpei. 40Chunna anmah in loom loom veia reija, che sopnga veia inboksei. 41#Mak 14:22; Luk 24:30–31Che tol ranga leh nga innihkha alohche amah in ringramting intouva anche, doi amlanpei, mahche tolkha akhoihche miinaam kuunga semnatu aroikuung amlanpei. 42Che annaam in ansaakche anvon invahsei. 43Che anmah in anvui anvi luktoong somleinih amitlonpei, che ngakho injaosa. 44Che tol aksaa eichu akpul ranga ei.

Jisu in Tuiichunga Seh

(Met 14:22–33; Jon 6:15–21)

45 # Met 14:22–33; Jon 6:15–21 Kak hanga amah in aroieita mulisuung amkallei che amah amaa a aktleitong Bedsaida a aloumaseh ei, amah in miitamta amthrin suungna. 46Che anmahta amthlahche aknua, amah in muulchunga ngennatu kalsa. 47Che khulouhram athleng inva, mulichu tuiiboom alaia amsa, che amah akroua tuiikomma amningsa. 48#Mak 13:35Che amah in saraalla insuulla ansehchu amuh ei, alamva thli in anmahtonga amratpei, che khulouh anna manlivak aktlaklaia, tuiiboom chunga seh a amah in ankuunga thlengsa. Anmahta ralla mahtangei ta amdon. 49Chuta anmah in tuiiboom chunga seh a thleng anmuh in kukthlata thleng inaita amidonpei, che trap a ongsei; 50#Met 9:2alamva annaam in amahta anmuh in intrisei, chuta kak hanga amah in ankuunga asonei, “Nanril liinve, keisang; intrinohve.” 51Che anmahsoh inruuia muli chuungsei cheva thliraangkho inngaisa. Cheva anmah in salungkhou khemsei, 52#Mak 8:17alamva anmah in tol relna bahap tlanoh eichuta anmah anril trangei.

Kenesaret ah Jisu in Akna Amthrat

(Met 14:34–36)

53 # Met 14:34–36 Che anmah in ohchuta anvancheva Kenesaret ramma thlengsei, che mulita tuiipaalla ansihpei. 54Che anmah in mulinata anthruhsoh, kak hanga mii in amahta anrompei, 55che intongpi ramtonga tlaansei che aknaeita thlen amithronpei. 56#Mak 3:10; Met 9:20Che amah in athlengna makheia, khuu khuua, khuuboom khuuboomma, nohle ramboom ramboomma mahche keithiil keithiilla aknaeita amthratei, che amahta intuukpia amah apuunrei slakho akpaleita amthratei.

Currently Selected:

MARK 6: TARAOBSI

Highlight

Copy