MARK 5

Thranoh Li Luut Miikhatta Jisu in Amthrat

(Met 8:28–34; Luk 8:26–39)

1 # Met 8:28–34; Luk 8:26–39 Anmah in tuiiboomtong Keraseni ramma thlengsei, 2che amah in mulinata anthruhlai akseengnoh li luutmii khat in rusuunnata inthruh amah in antuukpi. 3Amahva rusuunkaara am; che amahta thirrui akho ankhitta cheknohsei; 4alamva amahta inleng inlenga thirhang leh thirrui akho ankhit, chuta thirruikha angem ngemma pot a akthek, che thirhangkho akir kirra akhoih, che tukhat inkho amahta madam cheknatu anlii amnohsei. 5Khulouh suun rusuunkaara che muulchungah lai amrel amah in ongtlamma am, che akroua lunga inchuk inchuk a am. 6Amah in Jisu ta saraalla aheimuh in tlaanna amahta amthruunpei; 7#Noon 16:17; Hib 7:1; Mak 1:24che amah in arool inkaanga onga ason, “Akthloirem Ringpu vaa Asa kupa Jisu keita jangniktlohja angme? Ringpu ming sonna kitihche keita kamlahnohro.” 8Alamva amah in akuungah ason, “Akseengnoh linang miikhannata inthruhro!” 9Che Jisu in amahta arui, “Nikming tume?” Amah in amsang, “Kei kikmingva miitam; alamva kannihva tammung.” 10Che ramboom khannata anmahta masehnoh natu amah in anoollei. 11Mahchunna muul ajaara vok loomkhat athlaisa a ammei; 12che anmah in akuungah anoolpei, “Kannihta vokjaam kaara kanluutnatu kanimthlahro.” 13Che amah in ajapei, che akseengnoh li in inthruhseia vokjaam khanna luutsei; che vokvah akpul innihvak ei, antrumna a inlaak a tuiiboomma tlasei che tuiia luut a thisei.

14Vokjaamta aksel in tlaanna khuuboom leh ramboomma ansonpei. Che jangthlouta suukmetea an annatu anmah in thlengsei. 15Che anmah in Jisu kuungah thlengsei, miitam in anruuipi khousaar chuung miikhan aril chimma puunreikho silh a inbok a am anmuhpei, che anmah in intrisei. 16Che akmuh eiin khousaar in anruuipi miile vokjaamkha khatloh a suukmeta antongpei 17Che anmah in Jisu ta amah amunni mathlah a anmahso inthringpi ramma asehnatu annoolpei 18Anmah in mulisuungah aluut suunga, khousaar in anruuipi mii in amahsoh anruuia asehnatu asonpei. 19Chuta amah in indahsa, che akuungah ason, “Inna inlengro, mah chuvah Akpu in nangturel jikcha atlohthloukha che nangta veichahphah namlungsikha, niruul nipai ankuungah sonro.” 20#Mak 7:31Che amah in seh a Jisu in amah kuungah jikchahphah a thlou keitlohme tihkha Dekapolis a trong amthronpei, mahchuta akmuh miinaam in salungkhousei.

Jairas Asakumei Khatkho Jisu Apuunta Akpal Kumei

(Met 9:18–26; Luk 8:40–56)

21 # Met 9:18–26; Luk 8:40–56 Che Jisu in inkhattonga mulia inlenga avanlaia, khalmo miitam in amahta anlompei, che amahva tuiiboom araalla amsa. 22#Luk 13:14; Noon 13:15; 18:8,17Cheva akming Jairas an ong, sinakok inkhat akpuuichu thlengsa; che amahta amuh in, amah in akehkungah intolhsa. 23#Mak 6:5; 7:32; 8:23; Noon 9:17; 28:8Che akuunga inruruh a ason, “kei kisakumei naoi i thisamma amsa. Thlengro che nikutkha akuunga jamro, chunna thra aja, che ringtu.” 24Cheva amahsoh inruuia sehsa.

Che khalmo miitam in amahta anjuihpei che anlompei. 25Che kum somleinih thiiluung kumei khat mahchun rouam. 26Che maipa tam ankut ah khalmo klah kanang aphah, amah in asih anaam akatkirpei, che thra cheknohsa chuta ralladom asokna veisa. 27Amah in Jisu rella antong atheih, che miitam in amah aknuta anjuihpei, che apuunta apal. 28Alamva amah in ason, “Keiin amah puunruta palsanglakho, keita kamthrattung.” 29Che kak hanga thiitam luungchu inngaisa; che amah in natna riinata thra sang ta amah aruungin antheihpeita. 30#Luk 5:17Che Jisu in akuungnata tuui inthruhsa ta arom invah kak hanga miitamting inheia ason, “Tunang in kei puunta apalme?” 31Che amah aroiin akuungah anson, “Miitam invella inkholh i nangkho nimuhche nisonlamang, ‘Tunang in keipal angme?’ ” 32Tunang in keipalmeta amah in invella a anpei. 33Chuta kumei in, keikuungah jangta atlohme tihkha aromin, kumei in trih a inchuunna amaikuungah thlenga intolhsa, che akuungah akchim anaamte atongpei. 34#Luk 7:50; Mak 10:52Che amah in akuungah ason, “Kisa kumeio, nangin namlot kharella nangta namthratpei, leh oia sehrosa, che nang ninatna riikha thrasaso.”

35Amah in tronga a amsuunga, rampuui inn khannata mii arouin thlenga ansonpei, “Nang nisa kumeikha thisa. Jarelna lulokta ralla namnok mangme?” 36Chuta anmah in asonta lounoh, Jisu in sinakok akpuui kuunga ason, “Intrinohro, malot paningro.” 37#Mak 9:2; 13:3Che Pitar leh Jems mahche Jems anao John khop noh a tukhat in keita keijuihnohve. 38Anmah in sinakok akpuui innkhanna anthleng laiva, amah in tranga ongsa. 39Mah khanna aluutche, ankuunga asonei, “Jarelna nannih in tranga onga traptruui choume? Naoi thinoh chuta inning.” 40Che amahta aminuihpei. Chuta amah in annaamta apaalla amthruh ei, che nao apa leh anu mahche amah in anruuipi eita akhaampei, che nao amna ah luutsei. 41#Luk 7:14; Noon 9:40Akut a amtuhche akuungah ason, “Nao kumei, keiin nangta kisonche, inthouro.” 42Che kak hanga anmah in salungkhoua sipsei. 43#Mak 1:43–44; 7:36Che amah in ankuungah klukanga asonei, tukhat in mah i rom janohtu, che amah kuungah saakphu ste malanveta asonei.

Currently Selected:

MARK 5: TARAOBSI

Highlight

Copy