MARK 4

Chivorhvaa Pandam

(Met 13:1–9; Luk 8:4–8)

1 # Met 13:1–9; Luk 5:1–3; 8:4–8 Veikhatla amah in tuiiboom apaalla matheih amthronpei. Che miitam in amah kuungah inboomsei, chunna amah in tuiiboom chung mulisuunga luut a inboksa; che mii naamtein tuiiboom apaalla amsei. 2Che amah in pandam veia tam amtheih ei, che amah in matheih a asonei: 3“Rungaive! Chivorh mii khat in avorhnatu inthruhsa. 4Amah in chita avorh in, chi arouva lamkomma tla, cheva va in thlenga mahchu anchunpei. 5Che arouin lung amnachunga tla, mahchun philtam amnoh taningvah intha a moong, mahchu philtam thuuknoh; 6che kini ahanglaia akjung chom taningvah inhuuisa. 7Chi arouin kuling kaara tla, che kuling inkaanga ahippei, che inrahnohsa. 8Che chi arouin tuklei athratna ah tla a adoon thra inthruhsa, che thra moonga sopthumvak, soprukvak mahche reijavak akrah ralla inrahsa.” 9Che amah in ason, “Tunangkhat in arungeihnatu amkuur am miikhan, rungaiso.”

Pandam Kharelna Amtheihnaei

(Met 13:10–17; Luk 8:9–10)

10 # Met 13:10–15; Luk 8:9–10 Che amah in akroua amlai, amahsoh inlomma ak amin somleinihsoh inruuia pandam kharella akuungah anrui. 11#1 Kor 5:12–13; Kol 4:5; 1 Thes 4:12; 1 Tim 3:7Che amah in ankuungah asonei, “Ringpu vaa kurung huunna anrukta nankuungah kamlanpeichou, chuta apaalla ak am eiva bilam pandamma insonsa; 12chunna anmah in atak a muhvah aja chuta romnoh tuei, che anmah in atak a rungaiva aja chuta lou theihnoh tuei; anmah in veikhat inhei tuei, che in iptuei.”

Jisu in Chivorh Pandamta Invuia Amtheihnaei

(Met 13:18–23; Luk 8:11–15)

13 # Met 13:18–23; Luk 8:11–15 Che amah in ankuungah asonei, “Mah pandam i nannih in romnoh sachoume? Chuleva khatloh a pandam anaam nannih in rom nanchek tupotme? 14Chivorh mii in trongta avorh 15Che lamkomma aktlakha anmahsei, trong anrungeihta seitanin kak hanga thlenga che ankuungah am trongkhata alohpei. 16Che mahchunanga lungchungah akvorh eikho, trongchu antheihlaiva, kak hanga roomthoksoh inruuia anloh; 17che anmah antak a akjung amnoh a, chuta kakruta moongning, trong irella klah knang nohle chut in athleng laia kak hanga anmah in inriilsei. 18Che aktlei in kuling kaara avorhkhasei; anmahva trong arungai khasei, 19chuta tukleiram turel insuulsei, che doonkhaal tinga roomthoksei, che aktlei akthloi akditing luutsei che inhalsei a akrah amnoh veisei. 20Chuta arouva tuklei athratna ah avorhkhasei anmahva trong anrungeihche aklou khasei mahche sopthumvak, soprukvak che reijavak inrahsei.”

Mitton Luktoonga Makhum

(Luk 8:16–18)

21 # Met 5:15; Luk 8:16; 11:33 Che amah in ankuungah asonei, “Mittonta ataarna ah taarnoh a luktoong thuuia nohle kukthool thuuia itaar tupotme? 22#Met 10:26; Luk 8:17; 12:2Alamva inthuptu jakhatkho amnoh, indangtupot seengning, inruktu jakhatkho amnoh, akvaara thlengtupot seengning. 23#Met 11:15; Mak 4:9Tunangkhat in arungeihnatu amkuur am miikhan rungaiso.” 24#Met 7:2; Luk 6:38Che amah in ankuungah asonei, “Nannih in nantheihchu thratea louve; nannih in olla namilanna chaang khanna olla nanphahtu che thloia nankuungah nanimlantu. 25#Met 13:12; 25:29; Luk 8:18; 19:26Alamva tam ak am ningah ralla amlantu che ak amnoh ningva amah in asihkhakho alohtu.”

Akmoong Chivaa Pandam

26 # Met 13:24–30 Che amah in ason, “Ringpu kurung huunna i miikhatvaa chita kuleichungah akthek khanangsa, 27che khulouh ah intolh a mahche suunna inthoutu, che chi in akekche moongtu, amah in khatloh a moongme romnohtu. 28Thalei in akroua amthruhning, matsahremma adoon, che inmuum, mahchuche inmuumnata akrah apum vei. 29Chuta akrahkhan aminlaiva, kak hanga amah in tokoia avaat, alamva chiluh thlengsa.”

Intram Amuvaa Pandam

(Met 13:31–32,34; Luk 13:18–19)

30 # Met 13:31–32; Luk 13:18–19 Che amah in ason, “Ringpu kurung huunna i jangso imlakchek ume, nohle jaknang pandam in alamveia ihuuina ume? 31Mah i intram amunang, kuleichungah ivorhlaiva, thaleichung ak am chi anaamtechung andihrem; 32mahchu ivorhlaiva kmoonga liinsa che inlou naamtechung ralla akliinrem vei, che abaak in liinna inbaak, mahchun marvaanna va in amah aliah anbuh anseem.” 33Amah in ankuungah trong veia pandam tam asonei, anmah inkho rungai anchek; 34#Met 13:34; Jon 16:25amah in ankuungah pandamnoh a routrongnoh, chuta aroi ankuungah ajea amah in bilam anaam amtheih ei.

Jisu in khuleh Thli Amngeih

(Met 8:23–27; Luk 8:22–25)

35 # Met 8:18,23–27; Luk 8:22–25 Mahni khulouhram athlengin, amah in ankuungah asonei, “Aktleitonga vanna sehrasei.” 36Che miitamta amah eiche, anmah in amahta mulisuunga anphurhpei, matsahna nanga aktlei mulikho anmahsoh inruuijoua sehsei. 37Che aktrang khuleh thli karaangsa, che tuiisolh in mulita amratpei, mahchun mulisuungah tuii luut amthronpei. 38Chuta amahvah thikhemma insa; che anmah in amithohche akuungah anson, “Lulok, kannihva maangsamsung nangin kanimdonnoh sacheme?” 39Che amah in anthohche thlita akhaampei, che tuiiboomta ason, “Nangninga leh oi am veiso!” che thliraangchu ingaisa, daichritsa. 40Amah in ankuungah asonei, “Nannih in jarelna intrichoume? Nannihva namilot amnohme?” 41Che anmahva intria thonohsei, che khatleh khat insonsei, “Amah i jaknangmii meio? Thlileh tuiiboom inkho atrongta amijuih i!”

Currently Selected:

MARK 4: TARAOBSI

Highlight

Copy