MARK 3

Akutkhat Thi mii

(Met 12:9–14; Luk 6:6–11)

1 # Met 12:9–14; Luk 6:6–11 Amah in sinakok ah khatla luutsa, mahchunna akutthi mii khat rouam. 2#Luk 11:54Chunna amahta amilaalnatu sabat niah amahta amthrat umeta anngaak. 3Che akut thimiita ason, “Tingvaro.” 4Mahche anmah ankuungah asonei, “Sabat niah akthra tloh chunohleh thranoh tloh, chaanta kal chunohleh that i tlohphume tlohphunohme?” Chuta anmah in rimta amsei. 5Cheva amah in amlung inhaanga anmahta invella aneiche, anril antrangrella mii khata ason, “Nikutkha jamro.” Amah in ajampei, cheva akutkha thrasa. 6#Mak 12:13Pharisi in inthruhsei, che amahta khatloh a immaang umeta kak hanga Herodia eisoh intelsei.

Tuiiboom Apaalla Miitam

7 # Met 4:24–25; 12:15–16; Luk 6:17–19 Jisu in aroieiso inruuijoua tuiiboomma sehjousei, che Kalili nata miitam in anjuih. 8#Met 11:21Jerusalem nata Idumia Jordan araalnata, che Tair leh Sidon na miitam in amah in atlohthlou khata antheih a amah kuungah thlengsei. 9#Mak 4:1; 5:29,34; 6:56; Luk 5:1–3Che amah in aroita muli khat amahturel amichaang natu asonei, alamva mii tammalsei, chunohleva anmah in anlom usa; 10alamva amah in miitamta amthratei, chunna natna rii akna annaam in amahta palnatuta akuungah anlompei. 11Che akseengnoh li akluut mii in Akpu ta anmuh in amah kuungah inriilla ongsei, “Nangi Ringpu Asa kupache.” 12#Mak 1:45Mahchunna miikuungah kamromnoh veta anmahta tranga asonei.

Jisu in Aroi Somleinihta Achar

(Met 10:1–4; Luk 6:12–16)

13 # Met 5:1; Luk 6:12 Amah in muulla kalla, akdittal eita aongpei; che anmah in akuungah thlengsei. 14#Met 10:1Amahsoh inruuipi jounatu, che trongraan mathlahnatu, 15che khousaar manom ancheknatu, akchek amnehvaa lii an amnatu mah somleinihta acharei, 16#Met 10:2–4; Luk 6:14–16; Noon 1:13Pitar ta Simon tih akho an ong; 17Jebedi asa kupa Jems che Jems anao John amah in Boanerkes takho aong, mah chuvah kini inthlavaa asa kupa; 18Andriu, Philip, Bartholomi, Methiu, Thomas, Alphias asa kupa Jems, Thadias, Kana na Simon, 19#Mak 2:1; 7:17che amahta akjuur Judas Iskariot isei.

Jisu Khatkho Biljebul

(Met 12:22–32; Luk 11:14–23; 12:10)

Che inna inlengsa; 20#Mak 6:31mahchuche miitam in veikhat thlenglasei, chunna anmah in saa iinkho cheknohsei. 21#Mak 3:31–35; Jon 10:20Che amah taploikuungin mahchuta antheih inva anmah in ansuurnatu inthruhsei, alamva mii in antihpei, “Amah in anroua insengsa” 22#Met 9:34; 10:25; 12:24–29; Luk 11:15–22Che Jerusalem nata akthleng ringjih lulok eiin anson, “Amah atak i Biljebul soh inruuisa, che khousaar aklok akliia amah in khousaarta amnompei.” 23Che anmahta akuungah aongeiche pandam malanna asonei, “Khatloh a seitan in seitanta amnomchek ume? 24Kurung khat in paalta akroua injanoh a inthrek baak suukleva, amah innsuungkha paal cheknohtu. 25Che innsuung khatin akroua injanoh a inthrek baak suukleva, amah innsuungkha paal cheknohtu. 26Che Seitan in ataksaakta injanoh a inthrek baak suukleva amah in paal cheknoh, chuta amahtu achena thlengsa. 27Chuta tukhat inkho akraang mii inna luut a, akraang mii khata matsah a makaangnoh avah amah apootchei sut cheknoh tuei, amkaangche aknua sut anchek umang.

28 # Met 12:31–32; Luk 12:10 “Atak a keiin nankuungah kisonchou; miisavaa anleh naamte mahche anmah in thranoh antrong anaamva in ipkirtu; 29#Luk 12:10chuta tukhat in Li Akseengta thranoh indah a trongle, tiknikho in ipnohtu, chuta ache amnoh alehvaa amraal am” 30Alamva anmah in ason, “Amah atak ah akseengnoh li amsa.”

Jisu Anuleh Anaoei

(Met 12:46–50; Luk 8:19–21)

31 # Met 12:46–50; Luk 8:19–21 Che amah anuleh auh anao thlengsei; che apaalla ngirra anmah in mii mathlah a amahta amiong. 32Che miitam in amahta lomma inbok a amsei; che anmah in akuungah anson, “Nangnu leh ninao eiin apaalla nakjonna amsei.” 33Chunna amah in amsang, “Kei kinu mahche kiuh knaochu tuseime?” 34Che akomma inlomma anbokeita invella anche asonei, “Kei kinu mahche kei kiuh kinaova onna amsei! 35Tunangkhat Ringpu amdon aktloh miikha kei kinao, kisar mahche kinusei.”

Currently Selected:

MARK 3: TARAOBSI

Highlight

Copy