MARK 2

Jisu in Apangnem thi Miikhatta Amthrat

(Met 9:1–8; Luk 5:17–26)

1Nikhat ninih aknua amah in Kaparnaum ah anlengin amah atakva inna amta antongpei. 2Miitam boomsei, chunna anmah turella ohchunna khumkho sangnohsa, inkhaar apaal luungkho sangnohsa; che amah in ankuungah akthra trongta araanei. 3#Met 9:2–8; Luk 5:18–26Mii manli in tuklaia apangnem thi miikhatta puuia anthlen, 4cheva mii tammal rella amah kuungah thlen cheknoh seia, anmah in amah amnachung inbungta ankekche mahoa, apangnem thi mii in antolhna tuklaita amithlakpei. 5Chuna anmah in amilotkhata Jisu in amuh a apangnem thi miikuungah ason, “Kisakupa, nang nileh eita ki ip peiche.” 6Ipek ringjih lulok ste in mah khanna inbok a, anrilsuunga inruiisei, 7“Mahmii in jarella ngatrong meio? Amah in Ringpu ta usitnoh a trongsa! Tunang in alehta ip achekme chuta Ringpu khop in acheknoh ningme?” 8Che kak hanga akroua ankaara trong inruieita Jisu vaa li in arompeia ankuunga asonei, “Jarella nannih nanrilla mainanga inruichoume?” 9Apangnem thimiita, “Nang nilehkha ki ippeita son chunoh a; inthoua nang nantolhnata loua sehrota sonni, jaknangin aklaibebme?” 10Chuta miivaa Asa kupa in alehta ipnatu tukleiramma achek am tih a namrom cheknatu amah in apangnem thimiita ason– 11“Keiin nangta kisonche, inthoua nantolhnakha loua ni inna inlengrosa.” 12#Met 9:33Che amah in inthoua antolhnakha kak hanga alohche mii annaamta mah a sehsa; machunna anmah naamtein salungkhou seia Ringpu ta paar mathrat a antih, “Inih in mainangjim loumuhnoh luung mangme!”

Jisu in Levi ta aong

(Met 9:9–13; Luk 5:27–32)

13Amah in veikhatla tuiiboom apaalla sehsa; che miinaam in amah kuungah inlomsei, mahche anmahta amtheih ei. 14#Met 9:9–13; Luk 5:27–32Che amah in aseh in, roi teenna phrangki thlaamma inbok a am Alphias asa kupa Levi ta amuh in ason, “Kiknu keijuihro.” Mahchunna inthoua amah aknuta ajuihpei.

15Amah in teborra buh asaaknatu anboklai, roi akthrai eileh alehchel mii khatkho amah roijuih eiin Jisu soh inbokjousei, alamva amah aknujuihva miitam ei. 16#Noon 23:9Mahche Pharisi vaa ringjih lulok eiin, amah in alehchel mii eisoh che roithrai eisoh ansaakjou anmuh in aroikuunga anson, “Jarella roithrai mahche alehchel mii eisoh asaakjoume?” 17Mahchuta Jisu in atheih a ankuunga asonei, “Aruung akthra miiningva maipa kananoh, chuta aknaei turella kana; keiin akchimlamseh eita ak ong thlengnoh ang chuta alehchelei turella thlengsang.”

Buhel Rella Ruina

(Met 9:14–17; Luk 5:33–39)

18 # Met 9:14–17; Luk 5:33–38 Pek John aroileh Pharisi aroi eiin buhella ammei; chunna anmah in Jisu kuungah thlenga ason, “John aroileh Pharisi aroi eiin buh anhelche, nang niroiva buh helnoh ei i jarelname?” 19Mahchun Jisu in asonei, “Changri in changvaang akthleng rapkhei eisoh an amjoulai anmah in buhel anchek ume? Changri in anmahsoh an amlaisoot anmah in buhel cheknoh ei. 20#Luk 17:22Mah aknichu thlengumang, changrita anmah kuungnata aphurhlai, che mah aknichunna anmah in buh anhel umang. 21Tukhat inkho amlui puunna akthar puunkirra louphohnoh ei, phoh eile, phohna munkha, tihva amluinata akthar aphohna in akaia ralladom thranoh a inthrit. 22Mahche tukhat inkho amlui savun thongta akthar nganglirah atuii lousuungnoh ei, suungeile, nganglirah atuii in savun thongta amphuuktu, chunna nganglirah atuiikho savun thongkho maangtu, chuta akthar nganglirah atuii i akthar savun thonga anlousuungning.”

Sabatni Rella Rui

(Met 12:1–8; Luk 6:1–5)

23 # Met 12:1–8; Luk 6:1–5 Sabatni khat a amah in loulai juih a seh, che amah aroiin anseh malamma niim ahuumta chin anmithronpei. 24Mahchunna Pharisi in amahta anson, “Anro, Sabat niah tlohphunoh thlouta niroi in antloh i jarelname?” 25Che anmahta asonei, “Davit in atlohkha paanohchoume, andarkaar amlai che antraamlai anmah in jangthlouta antlohme. 26Abiathar in aklok thiimpu aveilaia, amah in Ringpu inna khatloh a luutme, mahche thiimpu noh a saa janoh ankat tolta ansaak, che amah in anruuipikho amlannei.” 27Che anmahta asonei, “Sabat i mii turella aseem, mii in Sabat turelna noh. 28Chunna miivaa Asa kupa i Sabatni tukho akpu sa.”

Currently Selected:

MARK 2: TARAOBSI

Highlight

Copy