MARK 1

Aklup John vaa Trongraan

(Met 3:1–12; Luk 3:1–18; Jon 1:19–28)

1Ringpu Asa kupa, Jisu Khrista vaa Akthra Trong amthronna.

2 # Met 3:1–12; 11:10; Luk 3:2–16; 7:27; Jon 1:6,15,19–28 Ringraan Isaiah nirik ah injih khananga,

“Anro, keiin trongraanta nang nimaa a kimthlah,

“amah in nilam amchaangtu;

3“raprilla inkhat in ong ahouchuva;

“Akpu alam machaangve,

“amah in asehnalam mathluunve.”

4 # Noon 13:24 Aklup John in raprilla thlenga alehnata ipnaturel rilthlenga lupnatu araan. 5Che Judia ram anaamte mahche Jerusalem na mii naamte in amah kuungah thlenga, anmah anlehta anphoong, Jordan avaa a anmahta alupei. 6Ipek John in uuksa amulvaa puunta asilh, che savun inraakna khapat anaamta akraak, che khaoleh raprilna khuuiningta asaak. 7Che amah in raanna ason, “Kei kiknua akthleng amah in keichunga akchek amneh keiral, amah akehkhraang arui keiin inluk a majak keiva kimtik amnoh. 8Keiin nannihta tuiia kiluppeichou, chuta amah invah nannihta Li Akseenga naniluptu?”

Jisu in Inlup mahche Jisu ta Amdoina

(Met 3:13—4:11; Luk 3:21–22; 4:1–13)

9 # Met 3:13–17; Luk 3:21–22; Jon 1:29–34 Mah aknichunna Kalili vaa Najareth nata Jisu in thlenga amahta Jordan a John in aluppei. 10Che tuiinata anthruhsoh, kak hanga ringram inhoong amuhpei che Li in ukthru nanga amahchunga trumsa; 11#Met 12:18; 17:5; Mak 9:7; Luk 9:35cheva ringramnata hou inkhat thlengsa, “Nangi keiin kamchaal Kisa kupache; nangkuunga keiin khalmo pelsang.”

12 # Met 4:1–11; Luk 4:1–13 Kak hanga Li in amahta raprilla aphurhpei 13Che amahta Seitan in amdoi a raprilla nijan sopli rapril sasoh inruuia amjou, che ringroiin amahta rou antloh.

Jisu in Ngamanmii Manlita aong

(Met 4:12–22; Luk 4:14–15; 5:1–11)

14 # Met 4:12–17; Luk 4:14–15 Ipek John ta ansuurnua, Jisu in Kalili ah thlenga, Ringpu vaa Akthra Trongta raanna, 15#Met 3:2asonei, “Lai i tlungsa, che Ringram kurung huunna i innaisa; nanril thleng choulaia, akthra trongta malotve.”

16 # Met 4:18–22; Luk 5:1–11; Jon 1:40–42 Kalili tuiiboom apaalla asehlai, amah in Simon leh Simon anao Andriu in tuiiboomma toro denna amta amuh ei; alamva anmahva ngaman miiei, 17cheva Jisu in anmahta asonei, “Kei kiknu keijuihve che nannihta miisuur kamvei uchou.” 18Kak hanga anmah torota anmahche aknu anjuihpei 19Che ste asehche, amah in Jebedi asa kupa Jems che amah anao John in toro phoh a mulisuunga louam amuh ei. 20Mahchun kak hanga anmahta aongei; che anmah in anpa Jebedita baobeh akthrulh roijuih eisoh mulisuungah anmahche, amah aknuta anjuihpei.

Thranoh Li in Anruuipi Kupa

(Luk 4:31–37)

21 # Met 7:28–29; Luk 4:31–32 Che anmah in Kaparnaum ah sehsei; che Sabat niah kak hanga amah in Sinakok ah luut a amtheih ei. 22#Met 7:28,29Che amah in amtheih khanna anmahvah salungkhousei, alamva ringjih lulok nangnoh a, aktloh akhal mii nanga anmahta amtheih ei. 23#Luk 4:33–37Kak hanga anmah Sinakok ah akseengnoh li in anruuipi mii khat am; 24#Jon 6:69cheva amah in ongsa, “Najareth na Jisu, kannihsoh jangnitlohjame? Kannihta mamaangnatu thlengcheme? Nang tucheme keiin kirom, Ringpu Akseengche.” 25Chuta Jisu in amahta saalla ason, “Rimta amro, che amah ningnata inthruh rosa!” 26Cheva akseengnoh li in amahta dir dirta amchuunche rool inkaanga onga amah ningnata inthruh rosa. 27Che anmah naamtein salungkhousei, cheva anmah senga seeng inruia insonsei, “Mah i jangsame? Akthar matheihnasa! Akchek amnehkho jaoa amah in akseengnoh li eita jathang atloh ei, che amah in asonta amijuih.” 28Che kak hanga Kalili velna ram anaam amun naamtea amah akming inthangsa.

Jisu in Miitam Amthrat

(Met 8:14–17; Luk 4:38–41)

29 # Met 8:14–15; Luk 4:38–39 Che kak hanga amah in Sinakok amthlahpei. Che Jems leh John soh inruuia Simon leh Andriu inna luutsei. 30Ipek Simon api atlunna intolh a am, che intha a amah turella akuungah anson, 31cheva amah in thlenga akut matuh a, amahta amthohpei, chunna atlunkha thrasa, che anmahta rou atloh ei.

32 # Met 8:16–17; Luk 4:40–41 Mahni khulouhram kini aluutsoh, akna aksa annaam che khousaar in anruuipi eita amahkungah anthlen. 33Che khuuboomna miinaam in innkhaar kuungah inboomsei. 34Mahchunna alam tam natna rii aknaeita amah in amthratei, che khousaarta amnommei; che khousaar in antrongnatu majanoh, alamva anmah in amahta anrom.

Jisu in Kalili ah Akthra Trong Araan

(Luk 4:42–44)

35 # Luk 4:42–43 Juktiing inranga, ram avaarnatu ste avaatlai, amah in inthoua, achikna amunkhat a asehche, ohchunna angen. 36Mahchunna Simon leh amah in anruuipijou in amah aknuta anthrulh, 37cheva amahta antuukpiche akuungah anson, “Kannaam in nangta kanjonche.” 38Che amah in ankuungah asonei, “Inihsoh innai khuupii khuupii a sehreio, mahchunna keiin Akthra Trong kiraannatu, alamva mairella keiin thlengsang.” 39#Met 4:23–25; 9:35; Luk 4:44Che amah in Kalili ram naamte seh a anmah Sinakok Jikcha a Akthra Trong araan che khousaar amnomei.

Jisu in Mii khat Amthrat

(Met 8:1–4; Luk 5:12–16)

40 # Met 8:2–4; Luk 5:12–16 Reichii akna khatin amah kuungah thlenga, akhuk makamma ason, “Nangin nimdon veile keita namseeng chektung.” 41Amahta arilvol hanga akut jamma amahta apalche akuungah ason, “Keiin kijapei, nang seengrosa.” 42Mahchunna kak hanga reichii in amahta amahpei, che atakkho seengsa. 43Cheva amah in atrongnoh natu tranga asonche intha amsehpei, 44amah kuungah ason, “Anro nangin tukhat kuunga jakhatkho sonnohro; chuta sehchelaia nitaktalta thiimpu ankuungah mamuhro, che nangta namseengpei tihrella Moses trongthuun nujuih miikuungah chim tih a namromnatu inkatphukha katro.” 45Chuta amah in seh a amah kharelna inthupthip amnoh a, maphorhnatu trong amthronpei, mahchunna Jisu in indanglonga khuupii a veikhat luut cheknohsa, chuta apaalla amsa; che amun naamtena mii in amah kuungah thlengsei.

Currently Selected:

MARK 1: TARAOBSI

Highlight

Copy