MARK 7

Puthou Pathou ei Tingna Loua Matheihna

(Met 15:1–9)

1 # Met 15:1–11; Luk 11:38 Ipekva Jerusalem nata akthleng ringjih lulok arousoh inruuia, Pharisi ei in amahsoh anchun laia, 2aroi arouin ankut buura ansaak mah chuvah ankut silnoh eita anmah in anmuhpei, 3(Alamva Pharisi, leh Judi annaamva ankut ansilnohmiil anmah in saanoh ei puthou pithou in antloh nonota anna; 4#Met 23:25; Luk 11:39che anmah in keithiil nata anthlengche, antakta amiseengnoh miil anmah in saanoh innoh ei; mahche anmah in aktlei antlohthlou jikchakho anjuih am, kam leh beel che pithrai kuchaikho anchaam.) 5#Kal 1:14Pharisi leh ringjih lulok in akuunga anrui, “Jarella nang niroi in puthou pithou in antloh nujuih a ringnoh eime, che khatloh a ankut buura ansaakme?” 6Che amah in ankuunga asonei, “Isaiah ringraan in thratea nannih in akthra nanveisinta amjihnanga nanisonpei, mahmii ei in annar avah keita kanjah ei, chuta anril avah kei kuungnata inlasei; 7nannih in veinohtupot ah keita kamthruunna amchou, mii in matheihna nanga namitheih nohme? 8Nannih in Ringpu trongthuunta namithlahche mii in antloh nonota matuh a amchou?”

9Che amah in ankuunga asonei? “Nannih in Ringpu trongthuunta nandah natu akthra lam nantlohpei, nantlohthlou nonota tlohna turella! 10Alamva Moses in ason, ‘Nannu leh nanpata injahve; che anu apata thranoh aktrong amahkha, inlitnoh a thitu;’ 11chuta nannih in nanson, ‘Mii khat in apa nohle anuta; jangmekhat slakho nangin kikuunga kanana niktuk in Korban’ (mah chuvah Ringpu kuunga malan) ta sonleva, 12amah in apa nohle anuta jangmekhat tlohkhal majanoh usa, 13nga tloh a Ringpu atrongta thou sanohchou nannih in nantloh nonota tloh a nan amrella. Che aktlei jikchakho nantloh.”

Miikhatta Ambuurna

(Met 15:10–20)

14Che veikhatla mii eita amahkuunga onga asonei, “Keirungaive, nannaamtea che loutheihve: 15miivaa apaalna jangkhat inkho atak a aluutche amahta mabuur cheknoh; chuta miivaa asuungnata anthruhkhop in amahta ambuurning.” 16“Tunangkhat in arungeihnatu amkuur am miikhan rungaiso.” 17#Met 15:15–20; Mak 4:10Che mii eita amthlahche innsuunga aluutlaia, aroi eiin pandam irelna akuunga anrui. 18#1 Kor 10:25–27; Rom 14:14; Tit 1:15; Noon 10:15Che amah in ankuunga ason ei, “Mahchu nannih nannaam in loutheinoh sachoume? Nannih in muhnohchou mah chuvah jangmekhat slakho apaalnata mii ninga akluut in amahta abuur cheknoh, 19mahchu luutleva malungnanoh chuta avonpiina, mahchu phao ume?” (Nga tloh a saakphu anaam kseeng amah in asonpei.) 20#Rom 1:28–31; Kal 5:19–21Che amah in asonei, “Mii kuungnata anthruh in amahta ambuurpei. 21Alamva asuung tongna, miivaa malungnata anthruh thranoh ril kumei kupa inlaal, inru, miithat, miimei miisa laal, 22#Met 6:23; 20:15karaam, ril seengnoh, machinthi, ralla karaam, amah ata amveijahang, miirilh miison, in orh, kmong. 23Mah thranoh anaam i asuung tongnata inthruh, che mah naamte in miita ambuur.”

Kumei khat in Amlot

(Met 15:21–28)

24 # Met 15:21–28 Che mah chunnata amah in inthousa mahche Sidon leh Tair aveella sehsa, mahchuche inn khat a luutsa, mahchu tukhatkho marom indah; chuta amah in inthup cheknohsa. 25Chuta kak hanga seengnoh li amruui nao kumeiva anuin, amah relna atheihpei, cheva thlenga akehkungah intolhsa. 26Ipekva kumeichu Kriik jatih, apok lainata Sairophonisia na mii. Che khousaarta asakumei ningnata amnomnatu anoolpei. 27Chunna kumei kuunga ason, “Naoei in matsah a invahmaan eiso, alamva naoin ansaaktuphu tolta loua uiikuunga loonna malanvah chimnoh.” 28Chuta amah in akuunga amsang, “Oi, Akpu; naoin ansaakna tebor thuuia aktlakho uii in ansaak.” 29Che kumei kuunga ason, “Alamva mahchu nisonche nang nilamting sehrosa; khousaar in nisa kumeita aloumahpei.” 30Chunna amah in inna inlengsa, che naochu kuktholla intolh a am antuukpipei, mahche khousaar in aloumahpei.

Jisu in Makuurpang Trong Suuknoh Miikhatta Amthrat

31 # Met 15:29–31 Cheva amah in Tair aveelnata inlengsa, che Sidom inthruh a Kalili tuiiboom, Dekapolis aveel vanna sehsa. 32#Mak 5:23Che makuurpang trong suuknoh kupa khatta amahkuunga anthlen; che amah achunga akut ajamnatu anson. 33#Mak 8:23Che miitam kaarnata ajea alohche, akut majungin amkuurta apalche machilla amleita apal. 34Che amah in ringramta intouva anna, tranga in onga akuunga ason, “Iphatha,” mahchuva, “Inhoongrosa.” 35Che amah amkuurchu inhoongsa, amah amleikho inthruhsa, che amah in khleng khlengta trongsa. 36#Mak 1:44; 5:43Che anmah in tukhat kuungkho antongnoh natu tranga asonei, chuta anmah in ral ralla ril malut a amiphorpei. 37Che anmah in ol cheknohna chaanga salungkhousei, che anroua insonsei, “Amah in anaamte amthratpei; amah in makuur akpangeikho mahoonga amtheih chekpei, che antrong aksuuknohkho amtrongchek peiei.”

Currently Selected:

MARK 7: TARAOBSI

Highlight

Copy