MARK 11

Jisu in Raalchek a Jerusalem Luut

(Met 21:1–11; Luk 19:28–40; Jon 12:12–19)

1 # Met 21:1–9; Luk 19:29–38 Che anmah in Chorophol Muulla am Betphake leh Bethani, mahche Jerusalem annai in amah in aroi innihta amthlahpei, 2che ankuunga asonei, “Nanmaa a am khuukhan nannih in sehve, che kak hanga nannih in nanluut laia samong aruulkhat inkhit a am nantuuktu, mahchu tukhat inkho huuinanoh mangei, majak choulaia thlenve. 3Tukhat in nankuunga, mah i jarella nantlohme? ta nanirui eile, ‘Akpu in darkaar che intha amlenglatu ta masangve.’ ” 4#Mak 14:16Che anmah in sehsei, che samong aruulchu lamkomma am thongkunga inkhit a amta anmah in antuukpei; che anmah in amijakpei. 5Mahchunna tunangkhat ngirra am in ankuunga asonei, “Nannih in jangtlohnatu, samong aruulkha namijakme?” 6Che anmah inkho Jisu in ason khananga ankuunga ansonpei; che anmah in anjapei. 7#Jon 12:12–15Che anmah in samong aruulkha Jisu kuung anthlenpei, che anmah in anpuun anrei achunga anthahpei; mahchuche achunga chuungsa. 8Che aktam in anpuun anrei lamchunga anthah, mahche aktlei in lounata thingbur antukche anthah. 9#Met 21:15; 23:39Che amah amaa a akseh leh akjuih in tranga ongsei, “Hosana! Akpu minga akthleng amahkha doiphahsa! 10Inih Pa Devit va kurung huunna akthlengsam i doiphahsa! Ankaang remma hosana!”

11 # Met 21:10–11,17 Che amah in Jerusalem a luutsa, mahche mathruunna thlaamsuunga hongsa; che bilam anaam invella a an in, mahchu thilsa, amah in anthruhche somleinihsoh Bethani a sehsei.

Jisu in Thotthingta Phool Atloh

(Met 21:18–19)

12 # Met 21:18–19; Luk 13:6–9 Akhuvar a Bethani nata anthlenglai, amah in avon traamsa. 13Che saraalla thotthing inkhat abur jaova moong amuhpei, che amah in inrah tunaita a an, amah in a an inva, jakhatkho tuuknohsa aburnoh a, alamva mahchu thotthing anrahna manjangnuram nohmang. 14Che amah in mahchuta ason, “Tukhat inkho veikhat inlenga nikrah naksaanoh eiso.” Cheva aroi in mahchuta antheihpei.

Jisu in Mathruunna Thlaamma Luut

(Met 21:12–17; Luk 19:45–48; Jon 2:13–22)

15 # Met 21:12–16; Luk 19:45–48; Jon 2:13–16 Che anmah in Jerusalem a thlengsei. Mahchuche amah in mathruunna thlaamma luutsa che tukhat in mathruunna thlaam asuunga akjuur leh aklei eita thek amthronpei, mahchuche baobeh amlatmii tebor leh khuinu akjuurmii inboknata amah in achung athlang amlatpei ei; 16che amah in tukhatkho mathruunna thlaamsuunga jakhatkho thlen majanoh. 17Che amah in ankuunga matheih a atih, “Kei inni jaat naamtetu ngenna inn tih a in ongtuta injih a amnohme? Chuta nannih in mah i inru inraanva akon namiveipei.” 18Che akthloi thiimpu leh ringjih lulok in mahchuta antheihpei che amahta mamaangnatu lam anjonpei; anmah in amahta trihsei, alamva amah in amtheihna khanna mii in salungkhousei. 19#Luk 21:37Che khulouhram aphah in anmah in khuuboom nata inthruhsei.

Thotthing nata Para Matheihna

(Met 21:20–22)

20 # Met 21:20–22; 17:20; Luk 17:6 Chunna anmah in juktiinga anseh in thotthingchu akjungphah inhuuichu anmuhpei. 21Che Pitar in intheihsa, mahche akuunga ason, “Lulok, anro! Nangin phool nitloh thotthingkha inhuuisa.” 22Che Jisu in ankuunga amsangei, “Ringpu ta malotve. 23#Met 17:20; 1 Kor 13:2Tak a keiin nankuunga kitihchou, tukhat in mah muulta, ‘Inlongbulhro che tuiiboom suunga tlarota sonchoule, che arilla chingna amnoh luungle, amah inta malotle ason anaam veikirtu, che akuunga mahchu veitu.’ 24#Jon 14:13–14; 16:23; Met 7:7–11Churella keiin nankuunga kisonchou, nannih in bilam ngenna nihchoule, mahchu kphahpeita malotve; che mahchu nanta veitu. 25#Met 6:14–15; 18:35Che nannih in ngirra nanngenrel, tukhat kuunga nanjanoh amle ipve; chunna ringram ak am Pa inkho nanleh eikha a iptu. 26Chuta nannih inta ipnohchoule ringramma am nanpa inkho nannih nanlehta nani ipnohtu.”

Akchek Amneh Jisu Relna Trongrui

(Met 21:23–27; Luk 20:1–8)

27 # Met 21:23–27; Luk 20:1–8; Jon 2:18 Che anmah in veikhat Jerusalem a thlengsei. Che amah in mathruunna thlaamma aluut suunga, akthloi thiimpu leh ringjih lulok khatkho anparuul ei in akuunga thlengsei, 28che amah in akuunga asonei, “Jangnichek nimneh amrella mah i nitlohme, nohle mah achek amneh i nitlohnatu tunang in nangta namlanme?” 29Jisu in ankuunga asonei, “Keiin trongkhat naniruitang; kamsangve, mahche keiin mah i jangnang kichek kimneh ah kitlohme kison uchou. 30John in alupkha ringram name nohle mii tingname? Kamsangve.” 31Che anmah in khatleh khat inngeia amsei, “Inih in ringram tingna tihmaleva amah in asontu, ‘Jarella amahta malotnoh choume?’ 32Chuta inih in, ‘Mii tingna tih a ison ume?’ Chulata amah in miita trihsei, alamva John va akchim ringraan ta aktam in anrompei.” 33Chunna Jisu kuunga amisangpei, “Kannih in romnoh ung.” Che Jisu in ankuunga asonei, “Kei inkho mah i jaknang akchek amneh ah kitlohme nanisonnoh usang.”

Currently Selected:

MARK 11: TARAOBSI

Highlight

Copy