YouVersion Logo
Search Icon

MARK 10

10
Kumei Madah relna Jisu in Amtheihnaei
(Met 19:1–12; Luk 16:18)
1 # Met 19:1–9; Luk 9:51; Jon 10:40; 11:7 Che mahchuta amthlahche Judia aveel Jordan araalla sehsei, che miitam in veikhat inleng inlenga amahta anlomlapei; che amahtu anono veia anmahta amtheih ei.
2Che Pharisi in thlenga amahta chaang anna arui, “Trongsuur nujuih a kupakhat in akmei inthrekpi ajame?” 3Amah in ankuunga amsangei, “Moses in nankuunga jaknang trongthuun amlanme?” 4#Met 5:31Anmah in amisang, “Kupakhat in rai majih a kumei inthrekpi Moses in ajapei, che amahta amnomtu.” 5Chuta Jisu in ankuunga asonei, “Nannih nanril in atrangrelna mah trongthuun i amjih. 6Chuta aseem amthron lainata, ‘Ringpu in kumei kupa aseempei.’ 7‘Mah in alamveia kupakhat in anuleh apa mathlah a kumeisoh inchuntu, 8che anmah innih in ruung khalek veiusei.’ Chunna anmah in innih veijnoh a chuta ruung khalek veiusei. 9Chunna Ringpu in alamveia amchun ei i, mii in threknoh eiso.”
10Che aroi in mairella innsuunga veikhat akuunga anrui. 11#Met 5:32; Luk 16:18; 1 Kor 7:10–11; Rom 7:2–3Che ankuunga asonei, “Tukhat in akmeita anthrekpiche aktlei kumei khatta changvaang leva, kumei laalthlou atlohpei; 12Che kumei inkho amsalta anthrekpiche aktlei kupata changvaang leva, amah inkho kupa laalthlou atlohpei.”
Jisu in Naoeita Doi Amlanei
(Met 19:13–15; Luk 18:15–17)
13 # Met 19:13–15; 18:3; Luk 18:15–17 Che naoeita amah in apalnatu; akuunga anthlen, che aroi in anmahta ansaalei. 14Chuta Jisu in mahchu amuh in amlunghaangsa, che ankuunga asonei, “Nao eikha keikuunga thlengeiso, anmahta khaamnoh eive; alamva Ringpu vaa kurung huunnakha mah naonang antasa. 15#Met 18:3Atak a, keiin nankuunga kisonchou, tukhat in naokhat nangjimma Ringpu kurung huunnata lounoh choulevah mahchun luutnoh uchou.” 16#Mak 9:36Che naoeita akutbaanga akoneiche anchunga akut jamma doi amlanei.
Kdoon Mii
(Met 19:16–30; Luk 18:18–30)
17 # Met 19:16–30; Mak 1:40; Luk 10:25; 18:18–30 Che amah in rapkheitla ah asehnatu amthronso, kupakhat in tlaanna thleng che amaikuunga akhuk amkamche akuunga arui, “Akthra lulok, ache amnoh chaan kphahnatu keiin jangkitloh ume?” 18Che Jisu in akuunga ason, “Jarella keita akthrata nak ong angme? Tukhatkho akthra amnoh chuta Ringpu khopning. 19Nangin trongthuunkha nirom; ‘Inthatnohve, miimei miisa laalnohve, Inrunohve, Akchimnoh sakhi a ngirnohve, malei seinohve, nannu nanpata injahve.’ ” 20Che amah in akuunga ason, “Lulok, keiin nao kivei lainata mah anaamte i kimjuih kirpei.” 21#Met 6:20; Luk 12:33; Noon 2:45; 4:34–35Che Jisu in akuunga a an in arilvol hangsa, che akuunga ason, “Nangin inkhat namvaatmang; seh a nangin nidoon naamtekha juurro, che anrankuunga malaneiro, che nangin ringramma doonkhaal veiuche; che thlenga kiknu keijuihro.” 22Mahchu ason in amai inthimsa, che amah in marhuuia inlengsa; alamva amahva andoon ankhaal tam asih.
23Che Jisu in invella a anche aroi ankuunga asonei, “Akdoonei in Ringpu kurung huunna ah luuttupot ei i khalmoa klu!” 24Che amah in atrong chunna aroi in salungkhousei, chuta veikhatla Jisu in ankuunga asonei, “Naoeio, mah i jikcha phah a klume Ringpu kurung huunna a luut i! 25Akdoon mii in Ringpu kurung huunna ah aluuttu ngutva kukthrimpoa uuksa in aluut in aklaitu.” 26Che anmah in thloia salungkhousei, che akuunga anson, “Chuleva tunang in achaan inkal aphahchek tupotme?” 27Jisu in anmahta a anche asonei, “Miiningva mahchu veinohtu, chuta Ringpu ningva mahchunoh; alamva poot anaamte Ringpu ningva veikir.” 28#Mak 1:16–20Pitar in Jisu kuung ason amthronpei, “Anro, kannih in anaamte kanmahkirpei che nangta kanjuihpeiche.” 29Jisu in asonei, “Atak a keiin nankuunga kitihchou, akthra trong rella che keiturel tukhat in a inn alou nohle auh anao nohle asar ajuur nohle anu apa nohle asa anao nohle aram amuul mathlahnoh leva, 30#Met 6:33ipek chup in tukhat in, a inn alou che auh anao che asar ajuur che asa anao che aram amuulchung klah knang athlenglai loutho cheknohle, athlengsam ache amnoh punsi a saruk reijavak phahnohtu. 31#Met 20:16; Luk 13:30Che aktam matsah in juktooltu che juktool in matsahtu.”
Jisu in Athihsam Relna Veithum tihpi Trong
(Met 20:17–19; Luk 18:31–34)
32 # Met 20:17–19; Luk 18:31–34 Che Jerusalem a asehnatu, anmah in lamma louamsei, che Jisu va anmah anmaa a lousehsa; che anmah in salungkhousei, che akjuih eikho intrisei. Che veikhatla somleinihta inruuipia, akuunga jaknangthlou suuktume tihrella ankuunga son amthronpei. 33#Mak 8:31; 9:12; 9:33Anmahta asonei, “Anve, inih in Jerusalem ting hangrasei; che miivaa Asa kupakha akthloi thiimpu leh ringjih lulok ankuunga amilantu, che anmah in amahta thatnatu amilaaltu, mahche Jental kuunga amilan usa; 34#Mak 14:65; 15:19,26–32che amahta amirattu, anthattu; mahchuche nithum aknua amah in veikhat ringtu.”
Jems leh John in Anngen
(Met 20:20–28)
35 # Met 20:20–28 Jebedi asa kupa Jems leh John in akuunga thlenga anson, “Lulok, kannih in kanditpot nangta kamitlohja hangche.” 36Che amah in ankuunga asonei, “Nannih turella jangthlouta namitlohja sangme?” 37#Met 19:28; Luk 22:30Che anmah in anson, “Nangin paarthra niveilaia, inkhat in nikchangtonga che inkhat in nikveitonga, inboknatu kanijaro.” 38#Luk 12:50; Jon 18:11Chuta Jisu in ankuunga asonei, “Nannih in jangthlouta nanruiangme tihkho romnohchou, keiin ki iinna chapla a nannih in iin nanchek ume, nohle keiin tuii kinlupna khanna nannih in inlup nanchek ume?” 39#Noon 12:2; Mad 1:9Che anmah in akuunga anson, “Kanchektu.” Che Jisu in ankuunga asonei, “Keiin ki iinna chapla a nannihkho nan iintu; che keiin kinlupna akhanna nannihkho inlup uchou; 40chuta kikveitong nohle kikchangtong inbokva keiin kamlantu phunoh, chuta maiva anmah turelna machaangche a asih antasa.” 41Che som in mahchuta antheih lai, Jems leh John ankuunga saal amithronpei. 42#Luk 22:25–27Che Jisu in anmahta akuunga aongeiche atih ei, “Nannih in mahchu nanrom tukhat in Jental akpuchunga paaltangta paallei, che anmah akliin mii in akchek amneh thlou anchuunga antloh. 43#Met 23:11; Mak 9:35; Luk 22:26Chuta mahchu nankaar avah veinohtu; chuta tukhat in anrol aveijale nannih roijuih veitu, 44che tukhat in nankaar a matsahremtang tihle nannaamtu roijuih roithaang veitu. 45#1 Tim 2:5–6Alamva miivaa Asa kupa in amahta rou antlohnatu thlengnoh chuta amah in miita rou atlohnatu, che amah punsita malanna miita thloknatu thlengsa.”
Jisu in Mitcho Bartimias ta Amthrat
(Met 20:29–34; Luk 18:35–43)
46 # Met 20:29–34; Luk 18:35–43; Mak 8:22–26 Che anmah in Jerikho a thlengsei, mahcheva miitam leh aroisoh inruuia Jerikho mathlah a ansehsuunga, Timias asa kupa Bartimias mitcho, doh a aksaa mii in lamkomma a inbok a am. 47#Met 9:27Che amah in Najareth na Jisu tih a atheih in, trap a ongsa che ason, “Davit vaa Asa kupa, Jisu, keita niril kamvolro!” 48Che amah in rimta a amnatu ansaalpei; chuta ral ralla ongsa, “Devit vaa Asa kupa, keita niril kamlvolro!” 49Che Jisu in inngaia ason, “Amahta ongve.” Che anmah in mitchota an ongpei; che akuunga anson, “Niril lahnohro; inthouro, amah in nangta nak onga am.” 50Che apuunta alonche chongsa che Jisu kuunga thlengsa. 51Che Jisu in akuunga ason, “Keiin nang turella jangnimtlohja angme?” Mitcho in akuunga ason, “Lulok, keiin kimuhjasa.” 52#Met 9:22; Mak 5:34; Luk 7:50; 8:48; 17:19Che Jisu in akuunga ason, “Sehrosa; nangin namlotrella nangta namthratpei.” Che kak hanga amah in amuhpei che lamma amahta ajuihveipei.

Currently Selected:

MARK 10: TARAOBSI

Highlight

Share

Copy

None

Want to have your highlights saved across all your devices? Sign up or sign in